Xikita nochi

¿Uelis ikaj ayakmo yetos iTlaixpantijka Jehová?

¿Uelis ikaj ayakmo yetos iTlaixpantijka Jehová?

Kema. Ika ome tlamantli ikaj uelis kiteititis ayakmo kineki yetos iTlaixpantijka Jehová:

  • Uelis kijtos noso kijkuilos. Ikaj uelis kijtos noso kijkuilos tla ayakmo kineki yetos iTlaixpantijka Jehová.

  • Ika tlen kichiua. Ikaj uelis kichiuas itlaj tlen kiteititis ayakmo kineki pouis inmiuan iTlaixpantijkauan Jehová (1 Pedro 5:9). Se neskayotl, uelis peuas yas itech okse tlaneltokalistli uan kiteititis kineki ompa pouis (1 Juan 2:​19).

¿Uan tla ikaj ayakmo tetlapouia noso ayakmo monechikoa namouan? ¿Nankitaj ken ayakmo iTlaixpantijka Jehová?

Amo. Se tlamantli ijkuak ikaj kijtoa ayakmo kineki yetos iTlaixpantijka Jehová uan okse tlamantli ijkuak ayakmo kipia chikauak itlaneltokilis. Ualeua akinmej ayakmo kitekichiuiliaj Jehová amo kijtosneki ayakmo tlaneltokaj, ijkon panoa pampa moyolkokoaj uan moneki ma kinyolchikauakan. Ik non, tikinyolseuiaj, tikinpaleuiaj uan amo tikinmixtopeuaj (1 Tesalonicenses 5:​14; Judas 22). Tla ikaj kineki ma kipaleuikan, akinmej tlayekanaj itech tlanechikol yejuan achto kipaleuiaj (Gálatas 6:1; 1 Pedro 5:​1-3).

Pero tlayekankej amo ikaj kichiualtiaj ok ma yeto iTlaixpantijka Jehová. Iselti moneki kipejpenas uan kijtos itech tlen tlaneltokalistli kineki yetos (Josué 24:15). Akinmej kinekij kitekichiuiliskej Jehová, moneki kichiuaskej ika nochi inyolo (Salmo 110:3; Mateo 22:37).