Xikita nochi

Pampa tikitas okse menú

ITlaixpantijkauan Jehová

náhuatl del centro

¿Tleka iTlaixpantijkauan Jehová amo iluichiuaj ijkuak ikaj kajxitia xiuitl?

¿Tleka iTlaixpantijkauan Jehová amo iluichiuaj ijkuak ikaj kajxitia xiuitl?

TiiTlaixpantijkauan Jehová amo tiiluichiuaj ijkuak ikaj kajxitia xiuitl pampa kuali tikmatokej toTajtsin Dios amo kipaktia. Maski Biblia amo techiluia amo ma tiiluichiuakan ijkuak ikaj kajxitia xiuitl, kema techiluia seki tlamantli pampa tikmatiskej ken kita toTajtsin Dios non iluitl. Ma tikitakan naui tlamantli uan tlapoualismej tlen kisaj itech Biblia.

  1. Nin iluitl poui itech tlaneltokalistli tlen amo melauak. Se diccionario enciclopédico kijtoa, ijkuak kichiuaj nin iluitl kineltokaj “amo kuali ejekamej kinekij itlaj amo kuali kichiuiliskej akin kajxitia xiuitl” uan ijkuak “iyolikniuan kiluiaj ma kipia suerte kipaleuiaj pampa amo itlaj ma mochiua” (Funk & Wagnalls Standard Dictionary of Folklore, Mythology, and Legend). Okse amochtli kijtoa yiuejkika okinmijkuiloayaj akinmej onesiayaj pampa kimatiskiaj keski oneskej, nin okatka miak ipati “pampa kitaskiaj tlen horóscopo kipiaskiaj”, uan okisayaj itech “akinmej kinmitaj sitlalimej”. Uan nin amochtli kijtoa: “Kineltokaj velas tlen kintekitiltiaj itech nin iluitl kipiaj magia pampa uelis kitlajtlaniskej tlen kinekij” (The Lore of Birthdays).

    Pero Biblia kijtoa amo kuali magia, tetlajchiuilistli, adivinación noso akinmej kijtoaj tlen panos satepan noso okseki tlamantli (Deuteronomio 18:14; Gálatas 5:​19-​21). Ik non, toTajtsin Dios okintlajyouilti babilonios pampa okinmitayaj sitlalimej noso kitekitiltiaj adivinación (Isaías 47:11-​15). Maski tejuan amo san tiktemojtokej kanin uits se iluitl, moneki tiktlakamatiskej tlen kijtoa Biblia uan amo tikchiuaskej tetlajchiuilistli.

  2. Akinmej opejkej kichiuaj ken Cristo amo oiluichiuayaj ijkuak ikaj okajxitiaya xiuitl. Se enciclopedia kijtoa, akinmej okichiuayaj ken Cristo itech achto siglo, “yejuan okitayaj nin iluitl ijkuak ikaj okajxitiaya xiuitl, poui itech tlaneltokalistli tlen amo melauak” noso tlen okineltokayaj itech non tlaneltokalistli (The World Book Encyclopedia). Biblia techiluia imachtijkauan Jesús uan oksekimej tlen okinmachti ijkuak okatka Tlaltikpak, yejuan otechkauilijkej se kuali neskayotl pampa tinochtin ijkon tikchiuaskej (2 Tesalonicenses 3:6).

  3. Akinmej kichiuaj ken Cristo kichiuaj san se iluitl tlen okinnauatijkej uan poui itech imikilis Jesús (Lucas 22:17-​20). Biblia kijtoa “okachi kuali [...] tonal ijkuak timikij uan amo ijkuak tinesij” (Eclesiastés 7:1). Itech nochi inemilis Jesús nikan Tlaltikpak, okimotlanili se kuali tokayotl iixpan toTajtsin Dios, ik non, imikilis okachi miak ipati uan amo ijkuak oneski (Hebreos 1:4).

  4. Itech Biblia amo kanaj kijtoa itekipanojkauan toTajtsin Dios oiluichiuayaj ijkuak ikaj okajxitiaya xiuitl. Ijkon tikijtoaj pampa itech iTlajtol toTajtsin Dios katej ome tlapoualismej kanin kijtoaj ome tlakamej okinmiluichiuilijkej ijkuak okajxitijkej xiuitl pero yejuan amo okitekichiuiliayaj Jehová. Uan itech ninmej ome iluimej opanok itlaj tlen amo kuali (Génesis 40:20-​22; Marcos 6:​21-​29).

Inkoneuan iTlaixpantijkauan Jehová, ¿itlaj kuali kimopoliliaj pampa amo kinmiluichiuiliaj ijkuak kajxitiaj xiuitl?

Ken nochtin tetajmej, iTlaixpantijkauan Jehová noijki kintlasojtlaj inkoneuan. Ik non, san tlen tonal itlaj kintliokoliaj uan kichiuaj itlaj pampa ma mauiltikan noso ma moyolpaktikan. Mochijchikauaj kichiuaskej ken toTajtsin Dios, akin nochipa kinmaka miak tlamantli kuali itekipanojkauan (Mateo 7:​11). Ik non, inkoneuan iTlaixpantijkauan Jehová amo itlaj kuali kimopoliliaj. Ninmej tlajtolmej ijkon kiteititiaj:

  • “Okachi teyolpakti se tetliokolil ijkuak amo tikmati kox mitsmakaskej.” (Tammy, kipia 12 xiuitl.)

  • “Ijkuak nikajxitia xiuitl, amo itlaj nechtliokoliaj, pero nechmakaj itlaj itech okseki tonalmej. Nechyolpaktia ijkuak itlaj nechtliokoliaj uan amo onikmatiaya kox nechmakaskiaj.” (Gregory, kipia 11 xiuitl.)

  • “Konemej san kikuaj pastel uan tlakuikaj. Nonmej iluimej amo nechpaktiaj, tlen tikchiuaj itech nokalijtik okachi nechpaktia.” (Eric, kipia 6 xiuitl.)