Xikita nochi

¿Tlen mokuayejyekoaj iTlaixpantijkauan Jehová ijkuak ikaj ixpoliui uan ijkuak kitokaj?

¿Tlen mokuayejyekoaj iTlaixpantijkauan Jehová ijkuak ikaj ixpoliui uan ijkuak kitokaj?

Tejuan tiktlakamatij Biblia. Ik non, kisa itech Biblia nochi tlen timokuayejyekoaj ijkuak ikaj ixpoliui uan ijkuak kitokaj. Ma tikitakan seki tlamantli:

  • Tinochtin timoyolkokoaj ijkuak ixpoliui se tokalchanejka. Imachtijkauan Jesús okinchokilijkej inkalchanejkauan ijkuak oixpolikej (Juan 11:33-​35, 38; Hechos 8:2; 9:​39). Ik non, ijkuak ikaj ixpoliui amo tikitaj ken se iluitl (Eclesiastés 3:​1, 4; 7:​1-4). Non tonal, timochijchikauaj tikinmajsikamatiskej akinmej moyolkokoaj (Romanos 12:15).

  • Akinmej yoixpolikej amitlaj kimachiliaj nion tlajyouiaj. Maski tlatlamantli toaltepe uan tlatlamantli tikchiuaj, amo tikchiuaj ken oksekimej ijkuak kijtoaj akinmej yoixpolikej ok kanaj yoltokej uan uelis itlaj techchiuiliskej. Porque Biblia amo tlamachtia non tlamantli (Eclesiastés 9:​5, 6, 10). Amo tikintlachijchiuaj akinmej yoixpolikej, amo tikinnotsaj uan amo tikinmiluiaj ma techpaleuikan. Amitlaj tikchiuiliaj akin yoixpoliuik inamik nion amo tikinmiluichiuiliaj mikamej sejse xiuitl. Biblia kijtoa: “Xikinkakajtewakah [...] amo xiktelkokah tlan teyolijtlakoa”. Tejuan tiktlakamatij nin tlanauatil porque toTajtsin Dios amo kipaktia nin tlamantli (2 Corintios 6:​17).

  • Oksepa kinyolitiskej akinmej yoixpolikej. Biblia kijtoa ajsis tonal kinyolitiskej akinmej yoixpolikej uan ijkuakon ayakmo ikaj ixpoliuis (Hechos 24:15; Apocalipsis 21:4). Nin sapanoa techyolchikaua ijkuak ikaj ixpoliui. Noijki okinyolchika tokniuan tlen okatkaj itech achto siglo (1 Tesalonicenses 4:​13).

  • Biblia techpaleuia amo ma timoueyinekikan (Proverbios 11:2). Ijkuak ikaj ixpoliui amo tikchiuaj miak tlamantli para tikintlajtlachialtiskej oksekimej uan ijkon ma kitakan tikpiaj miak tomin (1 Juan 2:​16). Ik non, amo tiktekitiltiaj miak tomin para ma moyolpaktikan oksekimej uan amo tikinkouiliaj tlen sapanoa patio tlen ijtik kintokaskej. Noijki amo patio totlaken tikonakiaj non tonal.

  • Amo tikinchiualtiaj oksekimej ma kichiuakan ken tejuan ijkuak ikaj ixpoliui. Tejuan timoyekanaj ika nin principio: “Tosejselti tikmokuitiskeh inawak Dios nochi tlan otikchijkeh” (Romanos 14:12). Pero tikintlakaitaj ijkuak tikinyekiluiaj tlen tikneltokaj (1 Pedro 3:​15).

¿Tlen nankichiuaj ijkuak ikaj ixpoliui?

¿Kanin nankichiuaj? Nin tlamantli kipejpenaj ikalchanejkauan akin oixpoliuik. Tla yejuan kinekij, uelis kichiuaskej itech kali kanin timonechikoaj tiiTlaixpantijkauan Jehová, inkalijtik, itech se crematorio noso kanin kitokaskej akin oixpoliuik.

¿Tlen nankichiuaj? Tiktemakaj se tlapoualistli para tikinyolchikauaskej akinmej moyolkokoaj uan tikinmiluiaj Biblia kijtoa ken katej akinmej yoixpolikej. Noijki tikinmiluiaj toTajtsin Dios okijto ajsis tonal kinyolitis (Juan 11:25; Romanos 5:​12; 2 Pedro 3:​13). Noijki tikijtoaj ken okipiaya iyelis akin oixpoliuik uan noijki timotlapouiaj ken techpaleuis tlen ye okichi (2 Samuel 1:​17-​27).

Noijki uelis titlakuikaskej se tlakuikali tlen kisa itech Biblia (Colosenses 3:​16). Saiktlami tikchiuaj se tlatlaujtilistli tlen teyolchikaua (Filipenses 4:​6, 7).

¿Namechtlaxtlauiaj noso nankololoaj tomin? Amo. Amo techtlaxtlauiaj ijkuak tiktemakaj se tlapoualistli. Noijki amo keman tikololoaj tomin kanin timonechikoaj (Mateo 10:8).

¿Akinmej uelis yaskej? Ijkuak tiktemakaj tlapoualistli itech kali kanin timonechikoaj ijkuak ikaj ixpoliui, nochtin uelis yaskej ijkon ken ijkuak nochipa timonechikoaj. Ik non, uelis yaskej akinmej amo iTlaixpantijkauan Jehová.

¿Namejuan nanyauij nankintlajpalotiuij oksekimej ijkuak akin oixpoliuik kipia okse religión?

Moneki sejse tikpejpenaskej kox tiaskej porque yotikmachtijkej totlalnamikilis ika Biblia (1 Timoteo 1:​19). Pero amo tikchiuaj tlen okseki religiones kichiuaj. Porque tlen kichiuaj kixnamiki tlen kijtoa Biblia (2 Corintios 6:​14-​17).