Xikita nochi

Pampa tikitas okse menú

ITlaixpantijkauan Jehová

náhuatl del centro

ITlaixpantijkauan Jehová, ¿kinxeloaj kalchanejkej noso kinsetiliaj?

ITlaixpantijkauan Jehová, ¿kinxeloaj kalchanejkej noso kinsetiliaj?

ITlaixpantijkauan Jehová timochijchikauaj pampa tokalchanejkauan uan noijki okseki kalchanejkej san sekan ma yetokan. Kuali tikmatokej Jehová okintlali kalchanejkej, ik non, tikpatioitaj (Génesis 2:21-24; Efesios 3:14, 15). Itech Biblia tikinmajsij principios bíblicos tlen kipaleuia namiktilistli ma yolpaki uan kichiua kuali ma mouikakan.

¿Ken kichiuaj ITlaixpantijkauan Jehová pampa kuali ma mouikakan inkalchanejkauan?

Timochijchikauaj tikintlakamatiskej tlanojnotsalmej tlen tikinmajsij itech Biblia, tlen techpaleuiaj ma tiyetokan kuali itech tonamiktilis uan ma tiyetokan okachi kuali tetajmej (Proverbios 31:10-31; Efesios 5:22–6:4; 1 Timoteo 5:8). Biblia noijki kinyolchikaua kalchanejkej maski tlatlamantli intlaneltokalis (1 Pedro 3:1, 2). Ma tikitakan tlen okijtojkej sekimej ijkuak innamik opejkej momachtiaj iuan iTlaixpantijkauan Jehová:

  • “Itech chikuase xiuitl san nochipa otimokualaniayaj uan san otimoyolkokoayaj. Pero ijkuak Ivete omochi iTlaixpantijka Jehová, opejki okachi tetlasojtla uan kimati mochias nin okichi okachi kuali ma timouikakan.” (Clauir, de Brasil)

  • “Ijkuak nonamik Chansa opejki momachtia iuan iTlaixpantijkauan Jehová, ne amo onikkauili ma momachti, onimokuayejyekoaya iTlaixpantijkauan Jehová san kinxeloaj kalchanejkej. Pero satepan onikajsikamatki Biblia melauak kipaleuia tonamiktilis.” (Agness, de Zambia)

Ijkuak titetlapouiaj, tikinmachtiaj oksekimej ken Biblia tlapaleuia itech kalchanejkej:

  • Kuali tikpejpenas akin iuan timonamiktis

  • Nankiyektlaliskej ouijkayotl ijkuak yikin nankipiaj se xiuitl onanmonamiktijkej

  • Kuali nanmouikaskej iuan namomontajuan

  • Ken nankitekitiltiskej tomin

  • Pampa ayakmo nanmokualaniskej

  • Ximotlapojpoluikan

  • Ken nankinmachtiskej namokoneuan

Ijkuak ikaj kipatla itlaneltokalis, ¿onka ouijkayotl?

Kema ijkon panoa, itech xiuitl 1998 se empresa tlen itoka Sofres okijto se itech 20 akinmej yomonamiktijkej, okipixki ouijkayotl ijkuak omochi iTlaixpantijka Jehová.

Jesús okijto akinmej mochiuaskiaj imachtijkauan kipiaskiaj ouijkayotl tlen ualaskia itech inkalchanejkauan (Mateo 10:32-36). Se tlakatl tlen itoka Will Durant okijto itech imperio romano, “akinmej okichiuayaj ken Cristo okintlajtlakoltiayaj okinxeloayaj kalchanejkej”. * Axkan noijki kijtoaj tiiTlaixpantijkauan Jehová tikinxeloaj kalchanejkej. Pero ¿melauak iTlaixpantijkauan Jehová kinxeloaj kalchanejkej?

Tribunal Europeo de Derechos Humanos

Ijkuak okijtojkej iTlaixpantijkauan Jehová kinxeloaj kalchanejkej, Tribunal Europeo de Derechos Humanos okijto akinmej amo iTlaixpantijkauan Jehová amo “kiseliaj uan amo kitlakaitaj itlaneltokalis inkalchanejka nion ma kichiua ken moneki”, ik non, peua mokualaniaj. Noijki okijto: “Nochtin kalchanejkej kipiaj nin ouijkayotl maski amo iTlaixpantijkauan Jehová”. * Uan maski amo nochtin kiseliaj totlaneltokalis, tiiTlaixpantijkauan Jehová timochijchikauaj pampa tikchiuaskej tlen kijtoa nin tlanauatil: “Tla aka nomechtoktia itla amokuali, nomejwah amo xikmokopilikah, [...] asta kan weletis, nomejwah xiktemolikah kenijki nonmoyekwikaskeh ika yolsewílistli iwan nochteh” (Romanos 12:17, 18).

¿Tleka monamiktiaj san iuan iTlaixpantijkauan Jehová?

ITlaixpantijkauan Jehová tiktlakamatij tlanauatil tlen kijtoa san ximonamikti iuan “tlakatl non kineltoka Toteko Dios”, kijtosneki akin noijki tlaneltoka ken tejuan (1 Corintios 7:39). Nin tlanauatil melauak techpaleuia. Se neskayotl, itech xiuitl 2010 revista Journal of Marriage and Family okijto “akinmej yomonamiktijkej kipiaj san se tlaneltokalistli uan kichiuaj san se tlamantli” okachi kuali mouikaj. *

ITlaixpantijkauan Jehová amo kinmiluiaj oksekimej inmikniuan ma moxelokan itech innamik tla amo iTlaixpantijka Jehová. Biblia kijtoa: “Tla se tokni kipia isiwa amo tlaneltokak, pero isiwa kineki yetos íwa, non tokni amo makikajkawa isiwa. Iwa tla se siwatl kipia iokich amo tlaneltokak, iwa ye kineki yetos íwa, amo makikajkawa iokich” (1 Corintios 7:12, 13). ITlaixpantijkauan Jehová tiktlakamatij nin tlanauatil.

^ párr. 17 Xikita amochtli César y Cristo, tomo ll, página 405.

^ párr. 18 Xikita tlen okijtojkej tekiuajkej itech Testigos de Jehová de Moscú contra Rusia, páginas 26 y 27, párrafo 111.

^ párr. 20 Xikita revista Journal of Marriage and Family, volumen 72, número 4, (agosto del 2010), página 963.