Xikita nochi

Pampa tikitas okse menú

ITlaixpantijkauan Jehová

náhuatl del centro

¿Tleka iTlaixpantijkauan Jehová amo mokajkalakiaj itech política?

¿Tleka iTlaixpantijkauan Jehová amo mokajkalakiaj itech política?

TiiTlaixpantijkauan Jehová amo timokajkalakiaj itech política pampa titlaneltokaj itech tlen kijtoa Biblia. Uan amo ikaj tikchiualtiaj ijkon ma kichiua, amo tikpejpenaj se partido político noso akin kineki mochiuas tekiua, uan amo tiauij kanin kichiuaj votaciones pampa titlapaleuiskej nion tikijtoaj moneki ma kipatlakan se tekiua. Itech Biblia kuali techyekiluia tleka amo moneki timokajkalakiskej itech política. Kijtoa nin:

  • Jesús amo okiseli ma kichiuakan tekiua, uan tejuan moneki ijkon ma tikchiuakan (Juan 6:15). Uan noijki okinmilui imachtijkauan yejuan “ayakmó de nin tlaltíkpaktli”, ik non, amo omonekiaya kipaleuiskej se partido político (Juan 17:14, 16; 18:36; Marcos 12:13-17).

  • Moneki tikpaleuiskej san iTekiuajkayo toTajtsin Dios, tlen Jesús okijto: “Iwa [...] nin kualitlájtoli non techilia kenomi Dios tlanawatia [noso iTekiuajkayo toTajtsin Dios], motetlapowis itech nochi n tlaltíkpaktli” (Mateo 24:14). Pampa tikpaleuiaj san iTekiuajkayo toTajtsin Dios, amo timokajkalakiaj itech política kanin tichantij noso itech okseki altepemej. Okachi kuali, titetlapouiaj itech non Tekiuajkayotl (2 Corintios 5:20; Efesios 6:20).

  • Amo timokajkalakiskej itech política techpaleuia pampa ma tikintlapouikan nochtin tlaltikpaktlakamej itech iTekiuajkayo toTajtsin Dios, maski san tlen partido político kipaleuiaj. Timochijchikauaj pampa tlen tikchiuaj uan tikijtoaj ma kiteititi tikneltokaj san iTekiuajkayo toTajtsin Dios kiyektlalis nochi ouijkayotl tlen kajki itech Tlaltikpak (Salmo 56:11).

  • Tla timokajkalakiskej itech política, ayakmo kuali timouikaskej iuan nochtin tokniuan tlen chantij itech okseki altepemej (Colosenses 3:14; 1 Pedro 2:17). Ik non, tlaneltokalismej tlen mokajkalakiaj itech política amo kuali mouikaj (1 Corintios 1:10).

Tikintlakaitaj tekiuajkej. Maski amo timokajkalakiaj itech política, tejuan tikintlakaitaj nochtin tekiuajkej tlen tlanauatiaj. Ijkon kijtoa Biblia ma tikchiuakan itech Romanos 13:1: “Nochteh n tlakah moneki makintlakitakah n tekiwajkeh”. Ik non, tikintlakamatij nochi tlanauatilmej, tiktlaxtlauaj nochi tlen moneki uan tiktlakamatij tlen tekiuajkej kichiuaj pampa techmaluiskej. Amo tikixnamikij intlanauatil tekiuajkej, okachi kuali, tikchiuaj tlen kijtoa Biblia: “Ximotiotsajtsilikah por akimeh nomechnawatiah iwa por nochteh n tekiwajkeh”, okachi ijkuak kinekij kichiuaskej itlaj tlen uelis techtsakuilis ma tikueyichiuakan toTajtsin Dios (1 Timoteo 2:1, 2).

Uan tikintlakaitaj tlaltikpaktlakamej tla kinekij mokajkalakiskej itech política. Se neskayotl, amo tikintsakuiliaj tlen kichiuaj pampa kipejpenaskej se tekiua uan amo ikaj tikiluiaj amo ma kichiua non.

Pampa amo timokajkalakiaj itech política, ¿yikin opejki ijkon tikchiuaj? Amo. Tlatitlanilmej uan akinmej achto opejkej kichiuaj ken Cristo noijki ijkon okichiuayaj. Se amochtli tlen tlajtoa itech nin tlamantli okijto: “Maski okimatiayaj moneki kintlakaitaskej tekiuajkej, akinmej achto opejkej kichiua ken Cristo okimatiayaj amo moneki mokajkalakiskej itech política” (Beyond Good Intentions—A Biblical View of Politics [Amo san okinekiayaj tlen kuali. Tlen kijtoa Biblia itech política]). Noijki, Orígenes, se tlakatl tlen omomachti itech tlaneltokalismej uan ochantik itech siglo II uan III, okijkuilo: “Akinmej achto opejkej kichiuaj ken Cristo amo okinekiayaj kinpaleuiskej tekiuajkej”.

Pampa amo timokajkalakiaj itech política, ¿kijtosneki uelis tikinouijtiliskej tlaltikpaktlakamej? Amo. Tekiuajkej amo moneki techmauiliskej, pampa amo timokajkalakiaj itech ouijkayotl. Se neskayotl, ma tikitakan tlen kijtoa se amatlajkuilol tlen okichijchi Academia Nacional de Ciencias de Ucrania itech xiuitl 2001. Pampa amo timokajkalakiaj itech política, okijto: “Uelis nin tlamantli tlen kichiuaj iTlaixpantijkauan Jehová amo kinpaktia tlaltikpaktlakamej. Uan san ika nin tlamantli, tekiuajkej nazis uan comunistas okintlajyouiltijkej akinmej ijkon okichiuayaj”. Uan noijki kijtoa ijkuak sovíeticos otetlajyouiltijkej, iTlaixpantijkauan Jehová “nochipa okintlakaitayaj tlanauatilmej”, uan “omochijchikauayaj pampa kuali tekitiskej itech granjas uan itech fábricas” uan “amo keman omotaya kichiuiliskej itlaj amo kuali tlanauatijkayotl comunista”. Saiktlami nin amatlajkuilol okijto tlen kineltokaj uan kichiuaj iTlaixpantijkauan Jehová itech ninmej tonalmej “amo kinouijtiliaj tlaltikpaktlakamej nion altepetl”.