Xikita nochi

Pampa tikitas okse menú

ITlaixpantijkauan Jehová

náhuatl del centro

Noamoch tlen nechtlapouia itech Biblia motekitiltia itech escuelas

Noamoch tlen nechtlapouia itech Biblia motekitiltia itech escuelas

Amochtli tlen itoka Noamoch tlen nechtlapouia itech Biblia opejki mochijchiua ika tlajtoli pangasinán itech xiuitl 2012; akinmej chantij itech ueyi altepetl Filipinas tlajtoaj non tlajtoli. Nin amochtli melauak kinpaleuia akinmej tlamachtiaj itech non altepetl, pampa ompa kinmachtiaj konemej ika intlajtol. Axkan nin amochtli kinpaleuia miakej konemej itech escuelas.

Itech ueyi altepetl Filipinas tlajtoaj kanaj 100 tlatlamantli tlajtolmej, ik non, amo kimatij tlen tlajtoli kitekitiltiskej pampa tlamachtiskej. Akinmej ompa tlamachtiaj okijtojkej itech xiuitl 2012, konemej okachi kuali uan totoka kajsikamatij tlen kinmachtiaj ika intlajtol. Ik non, tekiuajkej okijtojkej itech escuelas kinmachtiskej konemej ika intlajtol.

Okipejpenkej tlajtoli pangasinán pampa ika kinmachtiskej konemej itech escuelas. Pero ijkon ken okijto se tlakatl akin otlayekanaya kanin tlamachtiaj, okatka se ouijkayotl: amo okatkaj amochmej ika tlajtoli pangasinán. Pero ijkuakon opejki kichijchiuaj Noamoch tlen nechtlapouia itech Biblia, nin amochtli okiski itech uejueyij nechikolmej de distrito tlen okipixkej iTlaixpantijkauan Jehová itech metstli noviembre, xiuitl 2012.

Okinchijchijkej kanaj 10,000 (diez mil) amochmej tlen omoxexelojkej itech nonmej uejueyij nechikolmej. Nochtin oyolpakej ijkuak okitakej non amochtli ika intlajtol. Se tlakatl uan isiua okijtojkej: “Tokoneuan kinpaktia nin amochtli pampa kuali kajsikamatij”.

Seki tonalmej satepan ijkuak omochi ueyi nechikol, sekimej iTlaixpantijkauan Jehová okinuikakej Noamoch tlen nechtlapouia itech Biblia itech se escuela itech altepetl Dagupan. Ijkuakon akinmej otlamachtiayaj okintemojtokaj amatlajkuilolmej ika tlajtoli pangasinán uan sapanoa okinpakti non amochtli. Itech non escuela okintlajtlankej 340 amochmej tlen san niman opejkej kintekitiltiaj pampa kinmachtiskej konemej ken kitlajtoltiskej se amatl ika intlajtol.

ITlaixpantijkauan Jehová sapanoa yolpakij pampa nin amochtli kinpaleuia konemej ma momachtikan. Se akin otlapaleui ma motlajtolkuepa nin amochtli okijto: “Yiuejkika tikmatij miak ipati tikinchijchiuaskej amatlajkuilolmej ika intlajtol tlaltikpaktlakamej tlen ajsi itech inyolo. Ik non, tiiTlaixpantijkauan Jehová timochijchikauaj tiktlajtolkuepaskej Biblia uan okseki amatlajkuilolmej ika miakej tlatlamantli tlajtolmej”.