Xikita nochi

Pampa tikitas okse menú

ITlaixpantijkauan Jehová

náhuatl del centro

Okinmakixti se bombero tlen amo otekititoka

Okinmakixti se bombero tlen amo otekititoka

Itech tonal 5, metstli enero, xiuitl 2014, Serge Gerardin oyaya itech carro pampa ajsiti itech se ueyi nechikol tlen kichiuaskej iTlaixpantijkauan Jehová ik itech altepetl París (Francia), pero okitak itlaj temomojti. Ye kijtoa: “Se carro omouitek itech tepamitl tlen kipia se puente, ik non, omoixkuepki uan omouitekito itech puente, satepan opejki tlatla”.

Serge yokipiaya kanaj 50 xiuitl ken bombero. Uan pampa kinyekana bomberos, san niman okitak tlen uelis kichiuas. Ye kijtoa: “Maski tejuan iuan otimonamikej, onikilui akin okiuikaya carro ma moketsa, onikiski uan onimotlalo onitlachiato kanin otlatlatoka carro”. Serge okikak ikaj otsajtsiaya uan okijtoaya: “¡Xinechpaleuikan!” Noijki kijtoa: “Kuali onimoyejyektlali, uan amo onikpiaya notlaken tlen ika nitekiti. Pero ijkuak onikkak ikaj otsajtsiaya, omonekiaya nikpaleuis”.

Miakej carros omonechikotoj, ye okipaleui se tlakatl tlen omokoko. Serge kijtoa: “Onechilui ok okatkaj ome tlaltikpaktlakamej itech carro. Miakej tlaltikpaktlakamej ompa yokatkaj. Pero ijkuak okachi yotlatlatoka carro, ayakmo ueli otikinpaleuiayaj”.

Sekimej tlaltikpaktlakamej okiuikakej tlen ika kiseuiskej tlitl. Serge okinmilui tlen omonekiaya kichiuaskej, uan okiseuijkej tepitsin tlitl. Akin okiuikaya carro omoka itlampa, ik non, Serge uan oksekimej tlaltikpaktlakamej okikixtijkej non tlakatl.

Satepan, kijtoa Serge: “Oksepa opejki tlatla carro”. Pero okse tlaltikpaktlakatl omoka ilpitok ika cinturón de seguridad. Se motociclista akin otlakentitoka ika cuero tlen noijki okatka bombero, omotoki pampa tlapaleuis. Serge okilui non tlakatl yitoponiskia carro, ik non, okimakitskijkej non tlakatl uan okikixtijkej. Satepan otoponki carro.

Ijkuak oajsitoj bomberos uan akinmej tlapaleuiskej, okinpaleuijkej akinmej omokokojkej uan okiseuijkej tlitl. Serge noijki okipajtijkej pampa omatlatlak uan omotejteki. Ijkuak yiyaskia itech ueyi nechikol, miakej tlaltikpaktlakamej okitlasojkamatilitoj pampa okinpaleui.

Serge oyolpakik pampa otlapaleui. Ye kijtoa: “Iixpan Jehová, noTajtsin Dios, omonekiaya nikinpaleuis. Uan niyolpaki pampa onikinpaleui”.