Xikita nochi

Pampa tikitas okse menú

ITlaixpantijkauan Jehová

náhuatl del centro

Sekimej tlaltikpaktlakamej tlayektlaliaj itech altepetl Tuxedo

Sekimej tlaltikpaktlakamej tlayektlaliaj itech altepetl Tuxedo

Poliui quince minutos pampa ajsis las siete itech altepetl Tuxedo (Nueva York). Tlachipaua uan setl omoso ixko atl kanin kajki nin ueyi kali. Tlaltikpaktlakamej kalakij tekititiuij ika intlaken pampa tekitiskej uan ika botas, inkalijtik kualkan kisaj. Sekimej amo uejka chantij uan oksekimej chantij itech altepetl Nueva York ken: Patterson, Wallkill uan Brooklyn, kanaj 80 kilómetros yauij.

Amo san itech altepetl Nueva York uitsej tlaltikpaktlakamej, miakej uitsej itech nochi ueyi altepetl Estados Unidos. Nochtin tekitij ika nochi inyolo. Sekimej mokauaj se semana, sekimej chikuase semanas uan oksekimej okachi uejkauaj. Yejuan kimotlaxtlauiliaj inpasaje pampa yaskej uan mokuepaskej uan amo ikaj kintlaxtlauia pampa tekititiuij. Yejuan yolpakij pampa kichiuaskej nin tekitl.

Itech nin tonal kanaj 120 tlaltikpaktlakamej otekititoj, uan satepan okachi miakej tlapaleuiskej. Kuali kalakij pampa tlakuatiuij, motlaliaj itech se mesa kanin tlakuaj majtlaktli tlaltikpaktlakamej uan konij cafe. Uan kanin kichiuaj tlakuali moijnekui tlen kichijtokej, teksistli ika tocino. Kualkan ijkuak ajsi las siete, itech televisiones mota ken se tokni kiyekijtoa se tlaxelol itech Biblia. Panoa quince minutos uan satepan kitemakaj tlakuali. Amo san teksistli uan tocino kikuaj, noijki pan uan avena. ¡Sapanoa uelik!

Tlakualistli tlami ika se tlatlaujtilistli uan nochtin yauij pampa peuaskej tekitiskej. Akinmej tekititokej motlapouiaj ika miak pakilistli ijkuak kimotlaliliaj cascos, cinturones pampa itech kinuikaskej miakej teposmej, lentes uan chalecos pampa amo itlaj ma kinpano.

Kinekij kiyektlaliskej se empresa tlen itoka International Paper Company kanin okichijchiuayaj amatl. Axkan uelis kichiuaskej se yankuik Kali kanin kinyekanaskej iTlaixpantijkauan Jehová, inauak altepetl Warwick. Uan nikan itech altepetl Tuxedo mochijchiuaskej oficinas, talleres, almacenes uan kanin chantiskej. Itech tonal martes 12, metstli marzo, xiuitl 2013, tekiuajkej akinmej kijtoaj kanin uelis mochiuas se tekitl, okijtojkej ma mochiua tekitl tlen kinekij kichiuaskej iTlaixpantijkauan Jehová.

¿Ken kinseliaj akinmej tekititiuij seki tonalmej? Willian, tlen chanti itech altepetl Nueva Jersey, kijtoa: “Ijkuak tiajsitiuij, tokniuan techiluiaj kanin timokauaskej, techiluiaj ken tiajsitiuij tla tiknekij san kanin tiaskej, ken tikintekitiltiskej llaves... uan nochi tlen moneki tikmatiskej. Kichiuaj kuali ma timomachilikan. Ijkuak tiajsitiuij itech altepetl Tuxedo, kualkan ijkuak yotitlakuajkej tikitatiuij akin techyekanas itech tekitl uan ye techiluia tlen tikchiuaskej”.

¿Ken tekitij? Yajaira uan inamik, akinmej ochantiayaj itech ueyi altepetl Puerto Rico, tekitij ika yeso, kijtoaj: “Timeuaj kualkan a las 4:30. Kuali tikyektlaliaj kanin timokauaj, tikonij seki cafe uan satepan techuikaj san sekan kanin titekitiskej. Ijkuak timokuepaj yotisotlauakej, pero non amo itlaj pampa nochi tonal otiuetskatokaj, nochtin otiyolpakiayaj”.

Se tlakatl tlen itoka Zach uan inamik, Beth, tlen chantij itech altepetl Minnesota uan noijki tlapaleuiaj itech altepetl Warwick, ijkuak okintlajtlanijkej tleka ompa tekitij, Beth otlanankili: “Okachi kuali tiktekichiuiliskej Jehová pampa amo onka okse tekitl tlen miak ipati itech toyolilis. Tiknekij tiktekitiltiskej tlen tikmatij tikchiuaskej”.