Xikita nochi

Pampa tikitas okse menú

ITlaixpantijkauan Jehová

náhuatl del centro

Kichijchiuaj se yankuik Kali kanin mochiuaj uejueyij nechikolmej itech selva amazónica

Kichijchiuaj se yankuik Kali kanin mochiuaj uejueyij nechikolmej itech selva amazónica

Itlajkotia selva amazónica opejkej kichijchiuaj se yankuik kali kanin kinchiuaskej uejueyij nechikolmej iTlaixpantijkauan Jehová, itlaj tlen miakej kintlajtlachialtia. Nin tlali kipia 52 hectáreas uan kajki ik norte itech altepetl Manaos (Brasil), kanin kuajyo. Nikan katej kuajkualtsitsintin guacamayas, tucanes uan okseki totomej tlen kualtsin tlakuikaj itech kuajmej, ken ueyi kuauitl nuez de Brasil, cupuarana uan angelim pedra. ¿Tleka ompa okichijchijkej Kali kanin mochiuaj uejueyij nechikolmej?

Altepetl Manaos —tlen kajki 1,450 kilómetros ik kanin kisa aueyatl Amazonas— chantij kanaj dos millones tlaltikpaktlakamej. Itech nin yankuik kali uelis monechikoskej 7,000 iTlaixpantijkauan Jehová tlen chantij itech altepetl Manaos uan okseki altepemej, uan altepemej tlen katej itempa aueyatl Amazonas uan okseki aueyamej. Altepetl tlen okachi uejka mokaua ye São Gabriel da Cachoeira, tlen kajki kanaj 900 kilómetros ik oeste itech altepetl Manaos. Pampa ajsitiuij itech nin Kali kanin mochiuaj uejueyij nechikolmej, sekimej iTlaixpantijkauan Jehová moneki yaskej itech lanchas eyi tonalmej.

Kichijchiuaskej se Kali kanin mochiuaj uejueyij nechikolmej itlajkotia selva amazónica omonekiaya sapanoa mochijchikauaskej tekitiskej. Nochi tlen okitekitiltijkej okiuikakej ika 13 contenedores itech se barco, nochi okikojkej itech puerto Santos (São Paulo), uan okiuikakej hasta kanin tlami aueyatl amazonas, kanin okichijchijkej nin kali.

Itech ueyi altepetl Brasil yokinchijchijkej 27 Kalmej kanin mochiuaj uejueyij nechikolmej, uan ijkuak otlankej okichijchijkej nin kali omonechikojkej 1,956 tlaltikpaktlakamej itech tonal domingo 4, metstli mayo, xiuitl 2014. Miakej sapanoa oyolpakiayaj pampa yikin achto omonechikoayaj itech se Kali kanin mochiuaj uejueyij nechikolmej.

Akinmej omonechikojkej amo san okinkakej akinmej okipanoltijkej se tlapoualistli, noijki okinmitakej. Pampa yiuejkika amo ijkon omochiuaya, achto ijkuak omochiuayaj uejueyij nechikolmej amo nochtin okinmitayaj akinmej okipanoltiayaj se tlapoualistli. Se iTlaixpantijka Jehová okijto: “Yikipia miak xiuitl nio uejueyij nechikolmej pero amo keman onikitaya tlamauisol, san onikkakiaya”. Axkan nochtin ueli kitaj nochi tlen panoa.