Xikita nochi

Pampa tikitas okse menú

ITlaixpantijkauan Jehová

náhuatl del centro

Yomochijchijkej mil kalmej kanin monechikoaj iTlaixpantijkauan Jehová

Yomochijchijkej mil kalmej kanin monechikoaj iTlaixpantijkauan Jehová

Itech metstli agosto, xiuitl 2013, iTlaixpantijkauan Jehová tlen katej itech altepetl Filipinas okichijchijkej se Kali kanin monechikoaj iTlaixpantijkauan Jehová, tlen sapanoa miak ipati. ¿Tleka sapanoa miak ipati? Pampa ika non kali yomochijchijkej 1,000 uan totoka okichijkej. Tlanechikolmej tlen katej itech Filipinas —uan noijki itech oksekimej altepemej— amo kipiaj tomin uan amo kimatij ken uelis kinchijchiuaskej kalmej kanin monechikoskej. Sekimej omonechikoayaj inkalijtik tokniuan noso itech kaltsitsintin tlen ochijchitokaj ika bambú.

Cuerpo Gobernante tlen kipiaj iTlaixpantijkauan Jehová itech xiuitl 1999 okichi se programa pampa mochijchiuaskej kalmej kanin amo kipiaj se kali kanin monechikoskej, pampa itech miakej altepemej —ijkon ken Filipinas— okachi miakej omochiuayaj iTlaixpantijkauan Jehová. Nin programa kinpaleuia altepemej kanin amo kipiaj tomin pampa kichiuaskej se kali kanin monechikoskej. Tokniuan tlapaleuiaj pampa uelis mochijchiuas se kali kanin monechikoskej uan okseki tomin kitemakaj oksekimej iTlaixpantijkauan Jehová ika nochi inyolo tlen katej itech oksekimej altepemej. Noijki kintitlanij sekimej tokniuan tlen kimatij tekitiskej pampa ma tlapaleuikan. Itech Filipinas nin programa opejki itech metstli noviembre, xiuitl 2001.

Se tokni tlen itoka Iluminado tlen yaui itech nechikol Marilao (Bulacan), kanin omochijchi kali número 1000, kijtoa: “Axkan kuali nikmati melauak miakej tiknimej. Miakej tokniuan oualajkej otechpaleuikoj; okatkaj tlakamej, siuamej, akinmej yikipiaj miak xiuitl, telpokamej uan ichpokamej. Maski otonaya, san sekan otitekitikej. Uan maski itlamian tonal sapanoa otisotlauayaj, melauak otiyolpakiayaj pampa tekitl tlen otikchijkej”.

Akinmej ompa otekitikej okichijkej ika nochi inyolo, uan non amo san iTlaixpantijkauan Jehová okintlajtlachialti. Se tlakatl tlen okinmakaya arena uan graba okijto: “Namejuan ken miakej nanaskamej. Nochtin tekititokej. Amo keman ijkon onikitaya”.

Yankuik Kali kanin monechikoaj iTlaixpantijkauan Jehová.

Ijkuak opejki kichiuaj kali uan hasta ijkuak otlanki, ouejka kanaj chikuase semanas. Pampa amo ouejka nin tekitl, iTlaixpantijkauan Jehová itech Marilao ueli otetlapouijkej ika nochi inyolo itech iTekiuajkayo toTajtsin Dios, tekitl tlen sapanoa miak ipati (Mateo 24:14).

Se tokni tlen itoka Ellen, kijtoa: “Itech kali kanin otimonechikoayaj amo otiakiaj, uan miakej omokauayaj kiauak. Pero itech nin yankuik kali okachi kuali uan melauak kualtsin.

Axkan okachi kuali timomachtiaj uan okachi techyolchikauaj nechikolmej”.