Itech tonal 6 hasta tonal 16, metstli junio, xiuitl 2013, sapanoa miakej tlaltikpaktlakamej itech nochi Tlaltikpak oyajkej itech puerto de Ruán, ik norte itech ueyi altepetl Francia, pampa kitaskej ken sapanoa miakej barcos san sekan yetoskej, nin tlamantli moixmati ken: Armada.

Oualajkej kanaj 120 kilómetros ixko aueyatl tlen itoka Sena, tlen panoa itech altepetl Normadía, ninmej tlen okachi uejueyij uan kuajkualtsitsintin barcos itech nochi Tlaltikpak omoketsatoj itempa aueyatl kanaj siete kilómetros. Kanaj majtlaktli tonalmej, nochtin akinmej otlachiatoj ueli otlejkokej intech seki barcos, ompa okatkaj 45 barcos tlen iluitl.

¿Tleka sapanoa miakej okinmitatoj ninmej barcos? Tlakatl tlen okichi nin iluitl uan okichi Armada, kijtoa oyajkej pampa kinekij yetoskej innauak ninmej sapanoa uejueyij barcos, pampa kinmilnamiktia tlen okachi kinekij kichiuaskej. Uan miakej tlaltikpaktlakamej —telpokamej uan akinmej yiuejueyij— ijkuak kitaj se barco mokuayejyekoaj uelis uejka yaskej uan momakixtiskej.

Sapanoa miakej akinmej opaxialotoj ompa, okikakej itech okse tlamakixtilistli, tlen kitemaka Biblia ijkuak momachtiaj tlen melauak (Juan 8:31, 32). Akinmej paxialoaj itech altepetl Ruán uan yauij itech ojtli tlen chijchijtokej ken youejka omotayaj, akinmej ompa yauij uelij kinmitaj sekimej carritos noso mesas tlen iTlaixpantijkauan kintlaliaj itech ojtli itech nonmej tonalmej. Ijkuak se marinero noso akin ompa paxialoa omotokiaya kanin kajki se carrito noso mesa, okiluiayaj ma kikonana se amatlajkuilol tlen amo kitlaxtlauas. Miakej okinpakti revista La Atalaya (ika náhuatl del centro Akin Tetlapouijtok) de junio de 2013, tlen okipiaya se tlapoualistli tlen itoka: “¿Cuándo desaparecerán los prejuicios?”. Noijki okinyoleuayaj ma kikakitij se tlapoualistli ika tlajtoli francés, inglés noso español.

Akinmej ompa chantij okipatioitakej tlen iTlaixpantijkauan Jehová omochijchikajkej okichijkej. Se tlakatl, okitlajtlachialti ijkuak okinmitak sekimej iTlaixpantijkauan Jehová okipiayaj se carrito noso mesa itech ojtli, okijto: “Niyolpaki namechitas itech ojtli. Niktlakaita tlen namejuan nankineltokaj, maski amo nitlaneltoka ken namejuan”. Ome tlakamej tlen yiuejueyij okinmiluijkej ome telpokamej tlen iTlaixpantijkauan Jehová: “¡Xiyolpakikan ika tlen tekitl nankichiuaj!”.