Xikita nochi

Pampa tikitas okse menú

ITlaixpantijkauan Jehová

náhuatl del centro

Tlamachtil 137 ika Biblia tlen kichiua Watchtower itech Galaad

Tlamachtil 137 ika Biblia tlen kichiua Watchtower itech Galaad

Itech tonal 13, metstli septiembre, xiuitl 2014, otlanki Tlamachtil 137 ika Biblia tlen kichiua Watchtower itech Galaad itech altepetl Patterson (Nueva York), kanin momachtiaj iTlaixpantijkauan Jehová. Itech nin tlamachtil kinmachtiaj iTlaixpantijkauan Jehová akinmej yikimatij ken kuali tekitiskej, pero ok kinmachtiaj pampa okachi ma kinpaleuikan tlanechikolmej noso itech se Kali kanin tekitij iTlaixpantijkauan Jehová. Itech nechikol omonechikojkej 12,333 tlaltikpaktlakamej itech altepetl Patterson uan okipanoltijkej itech ueyi altepetl Canadá, Estados Unidos, Jamaica uan Puerto Rico.

Samuel Herd, akin poui itech Cuerpo Gobernante tlen kipiaj iTlaixpantijkauan Jehová, okiyekanki nin nechikol. Itech tlapoualistli tlen okipanolti, okijto ikuayejyekoluan Jehová okachi uejueyij uan amo ken tokuayejyekoluan (Isaías 55:8, 9). Okijto maski omomachtijkej makuili metstli pampa mokuayejyekoskej ken toTajtsin Dios, akinmej omomachtijkej itech Galaad san tepitsin okajsikamatkej ken yetoskia yikin peuaj kinmixmatij iojuiuan toTajtsin Dios (Job 26:14). Tokni Samuel Herd noijki okijto techpaleuia ijkuak timonechikoaj pampa tikinkakiskej ikuayejyekoluan toTajtsin Dios, ken nin nechikol.

“Ijkuak n Espíritu kiyakana se tlakatl, ye ni tlan kichiwah: [...] nochi kixikoa.” (Gálatas 5:22.) John Larson, akin poui itech akinmej tlayekanaj itech Betel itech Estados Unidos, okijto ome tlamantli kanin uelis tikteititiskej nochi tikxikoaj, pampa techpaleuia espíritu santo ma tikchiuakan. Achto, moneki tikteititiskej nochi tikxikoaj noso amo timosotlauaj iuan Jehová pampa ye techmachtia uan techpaleuia ma tikpiakan chikauak totlaneltokilis (1 Pedro 5:10). Abrahán okitemakak se kuali neskayotl pampa amo omosotla ijkuak Jehová okimachti, ik non, Jehová okichi nochi tlen okilui kichiuaskia (Hebreos 6:15).

Ome, amo moneki timosotlauaskej. Akinmej yomomachtijkej itech Galaad, uelis kinekiskej kichiuaskej sapanoa miak tlamantli. Pero tla amo nochi kuali kisa kanin ajsitiuij, uelis mokuayejyekoskej: “¿Tlen amo kuali onikchi?”. Ika tlen okipanok tokni John Larson okinmilui yejuan uelis kixnamikiskej ouijkayotl tla amo mosotlauaskej. Noijki okinmilui kinpaleuis kixnamikiskej ouijkayotl tla chikauak kitekichiuiliaj toTajtsin Dios ijkon kinmachtijti (Hebreos 6:11, 12).

“Nochipa xiyetokan nanyolyamankej uan nochipa nanyoltoskej.” Anthony Morris, akin poui itech Cuerpo Gobernante tlen kipiaj iTlaixpantijkauan Jehová, okintlapoui itech Salmo 22:26, kanin tlami nin tlaxelol kijtoa: “Uelis namoyolo yolitos nochipa”. Pampa tikseliskej nin tlateochiualistli moneki tiyetoskej tiyolyamankej. Tokni Anthony Morris okiyekijto amo uelis kuali tiktekichiuiliskej toTajtsin Dios tla amo tiyolyamankej. Maski yitikpiaj miak xiuitl tiktekichiuilijtokej toTajtsin Dios, uelis ayakmo tikpatioitaskej tikchiuaskej ken Cristo (2 Pedro 1:9).

Itech Biblia onka miakej neskayomej itech akinmej okiteititijkej yolyamankej uan akinmej amo. Se neskayotl, Herodes Agripa sapanoa omoueyinekiaya uan okiseli ma kiueyichiuakan sekimej tlaltikpaktlakamej, itlaj tlen san kinamiki toTajtsin Dios, ik non, se iángel Jehová okikoko uan okikuajkej okuilimej (Hechos 12:21-23). Pero Pedro amo ijkon okichi, maski Jesús chikauak okinojnotski pampa amo omokuayejyekoaya ken toTajtsin Dios uan san omokuayejyekoaya ken tlaltikpaktlakamej, ye amo omoyolkoko nion okualanki (Mateo 16:21-23). Okachi kuali, okiseli ken okiyektlali uan okitemakak se kuali neskayotl itech yolyamanilistli (1 Pedro 5:5).

Sekimej akinmej omomachtijkej, tekitiskej itech se Kali kanin tekitij iTlaixpantijkauan Jehová, ik non, tokni Anthony Morris okinmilui tla amo yolyamankej, amo yolpakiskej itech inteki. Ualeua amo uelis kitaskej kox yolyamankej. Pampa kuali kiyekijtos, okijto yikipia seki xiuitl se tlayekanki okinojnotskej pampa amo okiteititiaya yolyamanilistli, ye otlajkuilo itech Kali kanin tekitij iTlaixpantijkauan Jehová uan okijto: “Amo onka okse tlakatl tlen okachi yolyamanki ken ne”. Tokni Anthony Morris okinmilui tokniuan amo keman ma moueyinekikan. Tla kajsikamatij san Jehová uan Jesús akinmej okachi kipiaj tlanauatilistli amo keman moueyinekiskej.

“Dios amo kitemaka n Espíritu san ajachi.” (Juan 3:34.) Michael Burnett, akin tlamachtia itech Galaad, okinmilnamikti akinmej omomachtijkej iespíritu santo toTajtsin Dios kinpaleuis pampa kixnamikiskej ouijkayotl noso tla kimachiliaj amo kimatij ken kichiuaskej inteki. Se neskayotl, ika iespíritu santo toTajtsin Dios okipaleui Bezalel pampa ma kichijchiua tabernáculo maski sapanoa oui okatka (Éxodo 35:30-35). Noijki okipaleui Bezalel pampa kuali ma kichiua iteki uan ma kinmachti oksekimej. Uan iespíritu santo toTajtsin Dios noijki ijkon uelis kichiuas iuan akinmej omomachtijkej itech Galaad pampa kichiuaskej ken tlamachtia Biblia, ijkon ken omomachtijkej.

Yiuejkika ijkuak okatka Bezalel, noijki siuamej israelitas otlapaleuijkej pampa ma mochijchiua tabernáculo (Éxodo 35:25, 26). Axkan noijki, tokniuan siuamej tlen omomachtijkej itech Galaad kuali yokiteititijkej ixtlamatilistli pampa kinpaleuiaj innamik. Saiktlami, tokni Michael Burnett okinmilui akinmej omomachtijkej: “Nochi tlen nankimatij kuali nankichiuaskej tla nankichiuaj ika yolyamanilistli uan nantetlakamatij, Jehová okachi namechmakas iespíritu santo”.

“¿Nouan timijtotis?” Mark Noumair, akin kinpaleuia Akinmej kiyekanaj Tlamachtilistli, okintlapoui itech ueyi tekiua David ijkuak otlanauati ma kiuikakan arca itech tlajtolsenkaualistli itech altepetl Jerusalén (2 Samuel 6:12-14). David okiteititi yolyamanki pampa omijtotijtiaya iuan ichpokamej tlen okinpaleuiayaj intlakeualuan (2 Samuel 6:20-22). Nonmej ichpokamej amo keman kilkauaskiaj ijkuak ueyi tekiua David inmiuan omijtoti. Tokni Mark Noumair okinmilui akinmej omomachtijkej ma mijtotikan iuan tlakeualmej. Okintlajtlani: “¿Namechixmatiskej ken akinmej kinpaleuiaj akinmej amo kipiaj miak tekitl itech tlanechikol? [...] ¿Nankinpatioitaskej oksekimej pampa kipiaj kuali inyelis?”.

Tla akinmej omomachtijkej itech Galaad nochipa tetlasojtlaj, kiteititiskej kichiuaj ken Jehová (Salmo 113:6, 7). Maski miakej tlaltikpaktlakamej sapanoa moueyinekij, ninmej tokniuan amo moneki kikauaskej ma kinmijtlako. Tokni Mark Noumair noijki okijto: “Amo ximomachilikan sapanoa miak namopati uan xikinmaluikan iichkauan Jehová ken ye kichiuaskia”.

“Nochipa xitetlapouikan.” William Samuelson, akin kiyekana Tlamachtilmej pampa akinmej kichiuaj ken Cristo, okijto Pablo nochipa otetlapouiaya kuali tlajtolmej (Hechos 17:17). Tokni William Samuelson okinmilui akinmej omomachtijkej ma kiteititikan tlen okinpanok itech tetlapouilistli ijkuak omomachtijtokaj itech Galaad. Se neskayotl, se namiktilistli okitlapouijkej se siuatl tlen tekiti itech tiankistli. Yejuan okichixkej hasta ijkuak ayakmo okipiaya miak tekitl uan okititijkej video tlen itoka ¿Tleka moneki timomachtis Biblia? Noijki okititijkej jw.org, kanin siuatl uelis tlatemos ika itlajtol tlen itoka lao. Nin namiktilistli omokuepkej pampa kichiuaskiaj okachi ma kineki kimatis.

“Nochipa xikpaleuikan Tekiuajkayotl.” William Nonkes, akin tekitij kanin kiyekanaj tetlapouilistli itech altepetl Estados Unidos, okintlajtlani naui tokniuan tlen omomachtijkej itech Galaad. Yejuan yokiteititijkej kinekij kichiuaskej ken kijtoa Isaías: 6:8, kipaleuiskej tekiuajkayotl, pero ika tlamachtil tlen okiselijkej okinmachti pampa okachi kuali kichiuaskej inteki. Tokni Snolia Maseko okijto ika tlamachtil itech Galaad okitak tlen tlamantli moneki okachi kuali kichiuas, okachi itech ken uelis kitekitiltis kauitl ika ixtlamatilistli maski nochi se tonal yotetlapoui. Ye okijto: “Ika nin tlamachtil tlen onikseli axkan okachi uelis nitlapaleuis”. Uan tokni Dennis Nielsen ika tlen kijtoa Sofonías 3:17, omomachti tlen uelis kichiuas pampa amo moyolkokos itech tetlapouilistli. Ye okijto: “Tla se tonal amo kuali kisa ken nitetlapouia, moneki nikilnamiktos sapanoa kiyolpaktia Jehová uan ne noijki ijkon moneki nimomachilis”.

“Xikinmitakah n totomeh non patlantinemih.” (Mateo 6:26.) Stephen Lett akin poui itech Cuerpo Gobernante tlen kipiaj iTlaixpantijkauan Jehová, okipanolti tlapoualistli tlen okachi ipati itech nin nechikol. Otlajto itech tlen otlamachti Jesús ken moneki kuali ma tikinmitakan totomej, tokni Stephen Lett okijto miak tlamantli techmachtia (Job 12:7).

Se neskayotl, okijto ijkon ken Jehová kintlamaka totomej, ye techmakas tlen ika timopanoltiskej. Pampa tipouij itech ikalijtik toTajtsin Dios, techmakas tlen techpoloa (1 Timoteo 3:15; 5:8). Pero tejuan noijki moneki itlaj tikchiuaskej. Ijkon ken totomej kitemoaj tlakuali tlen Jehová kinmaka, tejuan moneki achto tiktemoskej iTekiuajkayo toTajtsin Dios pampa tikseliskej itlateochiualis (Mateo 6:33).

Tokni Stephen Lett noijki okijto totomej tsajtsij ijkuak kimachiliaj itlaj amo kuali kinpanos. Noijki ijkon, moneki tikinnejmachtiskej oksekimej. Se neskayotl, ken ijkuak tikitaj se tokni uelis uetsis itech tlajtlakoli (Gálatas 6:1). Noijki ijkuak titetlapouiaj tikinnejmachtiaj tlaltikpaktlakamej amo uejka kajki “iueyi tonal Jehová” (Sofonías 1:14). Tokni Stephen Lett noijki otlajto itech seki totomej tlen yauij itech okseki uejueyij altepemej. Yejuan patlanij inkuapak uejueyij tepemej, tejuan noijki ika ipaleuilis Jehová tikixnamikiskej ouijkayotl maski tikinmitaskej sapanoa uejueyij (Mateo 17:20).

Saiktlami. Okinmakakej indiplomas akinmej omomachtijkej itech Galaad uan se tokni tlen omomachti okitlajtolti inpatka nochtin se amatlajkuilol kanin tetlasojkamatiliaj. Ijkuak yitlamiskia, tokni Samuel Herd okijto pampa tikpiaskej ikuayejyekoluan Jehová itech toyolo yetoskia ken tiksoponiliskej clavos kanin panoa tren. Uan moneki tikuijuitekiskej miak uelta pampa kalakis. Noijki ijkon, akinmej omomachtijkej itech Galaad moneki nochipa ma mokuayejyekokan itech tlen omomachtijkej itech Galaad. Okinmilui: “Xikintsoponikan itech namoyolo ninmej tlamachtilmej. Tla nanmokuayejyekoaj ken toTajtsin Dios, nanyetoskej se tlateochiualistli”.