Xikita nochi

Pampa tikitas okse menú

ITlaixpantijkauan Jehová

náhuatl del centro

Tlamachtil 133 ika Biblia tlen kichiua Watchtower itech Galaad

Sábado 8, metstli septiembre, xiuitl 2012

Tlamachtil 133 ika Biblia tlen kichiua Watchtower itech Galaad

Itech makuili metstli 48 tokniuan sapanoa omomachtijkej itech Tlamachtil ika Biblia tlen kichiua Watchtower itech Galaad, kanin kinmachtiaj iTlaixpantijkauan Jehová. Okichijkej se nechikol itech altepetl Patterson (Nueva York), ompa omonechikojkej 9,694 tlaltikpaktlakamej, okatka inyolikniuan, inkalchanejkauan uan oksekimej tlen omonechikojkej pampa kinyolchikauaskej.

Non tlamachtil opejki itech xiuitl 1943, uan yomomachtijkej kanaj 8,000 pampa tekitiskej ken misioneros. Okachi kitekitiltiaj Biblia ijkuak momachtiaj, uan nin kinpaleuia pampa okachi kichikauaskej intlaneltokilis uan kipiaskej inyelis ken Cristo, itlaj tlen kinpaleuia pampa kixikoskej ouijkayotl tlen kipiaskej kanin tekititoskej ken misioneros.

“Kuali xikmaluikan tlamantli tlen teyolpaktia.” Anthony Morris, akin poui itech Cuerpo Gobernante tlen kipiaj iTlaixpantijkauan Jehová okiyekanki nechikol, opejki tlajtoa itech tlen kijtoa Filipenses 4:8: “Nochipa xikpixtokah [...] tlan teyolpakti [...]. Xikilnamikikah nochi tlan kuali”.

Tokni Morris okijto ijkuak timokuayejyekoaj itech tlamantli tlen teyolpaktia, techpaleuia pampa tikpiaskej tlen kuali maski itech Tlaltikpak ayakmo onka tlasojtlalistli. Ik non, okijto: “Xikitakan tlamantli tlen kuali uan xikteititikan kuali namoyelis”.

Se neskayotl, toTajtsin techmaka se kuali neskayotl pampa amo san tlachixtok itech totlajtlakoluan, uan tejuan noijki moneki ijkon tikchiuaskej (Salmo 130:3). Tokni Morris okijto: “Amo xikitakan tlen amo kuali kichiuaj oksekimej, okachi kuali, xikintlasojtlakan”.

“Xikpiakan tlamatilistli, pero amo ximotakan sapanoa nanyolkualmej.” Harold Corkern, akin poui itech akinmej tlayekanaj itech Betel itech Estados Unidos, otlajto itech tlen kijtoa Eclesiastés 7:16. Maski toTajtsin Dios kineki ma tikpiakan tlamatilistli uan ma tiktekitiltikan, amo moneki ma timomachilikan okachi tiyolkualmej ken oksekimej.

Noijki tokni Corkern okijto moneki kiteititiskej tlasojtlalistli ijkuak ikaj kinojnotsaskej. Amo kichiaskej itlaj tlen nion toTajtsin Dios kichia intech tlaltikpaktlakamej. Okijto: “Xiktekitiltikan ixtlamatilistli, tlamatilistli uan ajsikamatilistli, ijkon okachi namechtlasojtlaskej”.

“Amo xikilkauakan tlen kichiua toTajtsin Dios.” (Salmo 78:7.) Guy Pierce, akin poui itech Cuerpo Gobernante tlen kipiaj iTlaixpantijkauan Jehová, okijto tlen kichiuaj konemej kiteititiaj ken inyelis intatajuan (Proverbios 20:11). Noijki ijkon, toyelis kiteititia ken toTajtsin Dios. Okijto: “Weletis tikitas akin ikone n Totajtsi Dios, iwa akin ikone n diablo. Akin amo kichiwa tlan kuali, nion kitlasojtla ikni, amo ikone Dios” (1 Juan 3:10).

Tokni Pierce okijto akinmej okiselijkej Tlamachtil ika Biblia tlen kichiua Watchtower itech Galaad, okinyolchikajkej pampa kipiaj inyelis ken Cristo, ken yolyamanilistli. Uan okinmilnamikti moneki yetoskej yolyamankej. Uan tlamachtil tlen okiselijkej amo kijtosneki okachi ixtlamatkej ken oksekimej. Okachi kuali, moneki okachi kinpaleuiskej inmikniuan pampa san sekan yetoskej uan kiteititiskej okachi yolyamanilistli (Salmo 133:1). Tokni Pierce okijto: “Axkan okachi kuali nankajsikamatij Biblia uan xiktekitiltikan non tlamatilistli pampa okachi kuali nanmouikaskej iuan Jehová”.

“Sanwel otikchijkeh tlan omonekia tikchiwaskeh.” William Samuelson, akin kiyekana Tlamachtilmej pampa akinmej kichiuaj ken Cristo, okintlajtlani: “¿Nankiseliskej san tlen tekitl namechmakas Jehová, maski amo namechpaktis?”. Ma tikitakan tlen techmachtia tlen ijkuilitok itech Lucas 17:7-10: “Ijkuak nankichiuaskej nochi tlamantli tlen namechnauatiskej xikijtokan: ‘Tejwah mach itla topatih, porke sanwel otikchijkeh tlan omonekia tikchiwaskeh’ ”. Tejuan amo itlaj topati noso amo itlaj tikchiuaj tla tikitaj tlen kichiua Jehová.

Ninmej tokniuan omomachtijkej miakej semanas, uan uelis oui okinchiuili. Tokni Samuelson okijto: “Nochtin onankichijkej tlen moneki, ik non, ijkuak nankitaj ken namechpaleuia, okachi mochikaua namotlaneltokilis”. Saiktlami okijto: “Xikitakan se ueyi tlateochiualistli nankitekichiuiliskej Jehová, akin Ueyi Tekiua itech nochi semanauak”.

“Xikilnamikikan tlen okijto namechmakas Jehová ijkuak nankipiaskej ouijkayotl.” Sam Roberson, akin noijki tekiti itech Tlamachtilmej pampa akinmej kichiuaj ken Cristo, okinmilui ninmej tokniuan ualeua uelis moyolkokoskej. Ik non, okinmilui ma kilnamikikan ken Jehová okinpaleui itekipanojkauan. Se neskayotl, Moisés okilui Josué: “Jehová [...] mouan yetos. Amo mitsilkauas nion mitskauas” (Deuteronomio 31:8). Uan ijkuak Josué yimikiskia okijto: “Nion se tlajtoli opoliuik itech nochi kuali tlajtolmej tlen okijto Jehová namoDios” (Josué 23:14).

Jehová kinmiluia itekipanojkauan: “Ayik nimitskajtewas moselti, nion nimitsilkawas” (Hebreos 13:5). Itoka Jehová kijtosneki Ye Kichiua tlen Kineki Kichiuas, ik non, melauak kichiuas tlen moneki pampa kinmaluis itekipanojkauan. Tokni Roberson okijto: “Amo ximoyolkokokan, nion ximosotlauakan. Nochipa xikilnamikikan Jehová amo keman, amo keman namechkauas”.

“Intlajtol omokak itech nochi n tlaltíkpaktli.” (Romanos 10:18.) Mark Noumair, akin tlamachtia itech Galaad, okipanolti se tlapoualistli uan akinmej omomachtijkej okijtojkej noso okiteititijkej ken otetlapouijkej itech altepetl Patterson. Se neskayotl, se tlakatl uan se siuatl tlen yomonamiktijkej tlen uitsej altepetl Sudáfrica okintlapouijkej eyi siuamej tlen noijki chantij itech nin altepetl, okintlapouijkej ika tlajtoli zulú uan xhosa. Okse namiktilistli tlen uits altepetl Sri Lanka okitlapouijkej se tlakatl tlen ochantiaya itech altepetl India uan isiua uan iichpoch chantij itech altepetl Sri Lanka. Nin tlakatl ayamo keman okitaya se Biblia, uan tokniuan okimakakej tlen inmiaxka.

‘Xikmatika kenijki nankichiwaskeh nochi tlan kuali.’ Gene Smalley, akin tlapaleuia Kanin Moijkuiloaj amatlajkuilolmej okintlajtlani naui tokniuan tlen yomonamiktijkej. Tokniuan tlen uitsej altepetl Sierra Leona okijtojkej pampa amo okipiaya atl omonekiaya mojmostla kisasakaskej. Yejuan okinmachtiayaj ika pakilistli 50 tlaltikpaktlakamej, ik non, amo okitayaj ken se ouijkayotl. Ninmej tokniuan okitlasojkamatkej tlamachtilistli tlen okiselijkej, pampa kichiuaskej nochi tlen kuali san kanin kintitlaniskej (2 Timoteo 3:16, 17).

“Xitlaxikokan hasta ijkuak tlamis tlen amo kuali.” Gerrit Lösch, akin poui itech Cuerpo Gobernante tlen kipiaj iTlaixpantijkauan Jehová, okintlapoui itech akinmej motlaloaj uejka, pampa tlatlaniskej kitemoaj ken uelis ajsitiuij itlamian ojtli. Maski akinmej motlaloaj san se tlatlani, akinmej kichiuaj ken Cristo tlatlanij nochtin akinmej tlaxikoaj.

Titlaxikoskej kijtosneki nochipa tiktekichiuiliskej toTajtsin Dios, maski tikpiaskej miak ouijkayotl, techtlajyouiltiskej noso timoyolkokoskej. Jesús okijto: “Pero akin nochi kixikos, momakixtis” (Mateo 24:13). ¡Sapanoa techyolchikaua tikmatiskej Jehová uan Jesús kipatioitaj ken titlaxikoaj! Satepan tokni Lösch okijto seki tlamantli tlen uelis kinpaleuis pampa kixikoskej ouijkayotl. Okinmilui:

  • Xiktlatlaujtikan toTajtsin Dios, “Akin teyolsewia iwa teyolchikawa” uan “akin mojmostla techuikilia totlamamal” (Romanos 15:5; Salmo 68:19).

  • Nochipa xiyetokan nanyolmelajkej uan xikilnamiktokan: “Dios nochipa kiyekchiwa tlan kijtoa, Ye amo kitekawilis manomechyoltilana okachi tla ayakmó nontlaxikoah. Ye nomechilis kenomi nonmakisaskeh, iwa ijkó nontlaxikoskeh” (1 Corintios10:13).

  • Nochipa xikilnamiktokan chialistli tlen nankipiaj, ijkon ken Jesús okichi, Biblia kijtoa: “Porke okimatia satepa de itlaijyowilis kipiaskia miak pakílistli” (Hebreos 12:2).

Tokni Lösch noijki okijto amo moneki ma timosotlauakan pampa yitiajsitiuij kanin tiknekij. Okijto: “Ika miak yolchikawálistli matimotlelokah itech nin ojtli non kajki toyakapa” (Hebreos 12:1).

Saiktlami se tokni akin okiseli nin tlamachtil okitlajtolti se amatlajkuilol tlen kijtoa nochtin kitlasojkamatij tlamachtilistli tlen okiselijkej. Nin amatlajkuilol okijtoaya pampa omomachtijkej Biblia okinpaleui kajsikamatiskej okachi itlanekilis toTajtsin Dios, uan okachi kichikauaskej intlaneltokilis. Noijki okijtoaya nin amatlajkuilol: “Melauak timochijchikauaskej pampa tikchiuaskej nochi tlen otimomachtijkej”.