Xikita nochi

Pampa tikitas okse menú

ITlaixpantijkauan Jehová

náhuatl del centro

Nochtin kinseliaj itech “Tepexitl”

Nochtin kinseliaj itech “Tepexitl”

Itech nochi Tlaltikpak, iTlaixpantijkauan Jehová kipiaj 15 kalmej kanin kinchijchiuaj amatlajkuilolmej. Se kajki itech Europa central itech altepetl Selters (Alemania), ik itech Steinfels, se tlajtoli alemán tlen kijtosneki “tepexitl”.

Itech tonalmej 23 a 25, metstli mayo, xiuitl 2014, itech nin Kali kanin tekitij iTlaixpantijkauan Jehová okinyole akinmej ompa chantij, akinmej tlanemakaj uan tekiuajkej ma tlaixmatitij. Nin okitokayotijkej “Treinta xiuitl itech Selters” pampa itech tonal 21, metstli abril, xiuitl 1984 opejkej tekitij itech nin kali.

Pampa okinyolejkej ma tlaixmatitij, oyajkej kanaj 3,000 tlaltikpaktlakamej. Se tekiua tlen yitekititok kanaj treinta xiuitl itech non altepetl okijto: “Otikpatioitakej miak titlaixmatitiuij itech Kali kanin tekitij iTlaixpantijkauan Jehová. Onechtlajtlachialti onikitak ken totoka okichijchijkej Kali kanin tekitij iTlaixpantijkauan Jehová itech altepetl Steinfels, pampa opejkej itech xiuitl 1979 uan otlankej itech xiuitl 1984”.

¿Tlen okitakej ijkuak otlaixmatitoj?

Okiteititijkej se tlamantli tlen itoka: “Ialtepe Jehová itech Europa central”. Akinmej otlaixmatitoj okitakej tlen okinpanok iTlaixpantijkauan Jehová itech kanaj 120 xiuitl itech nin altepetl. Tlen okiteititijkej nochipa uelis kitaskej itech nin kali kanin tekitij.

Noijki okiteititijkej seki Biblias tlen yiuejkika katej uan inpati miak. Se neskayotl, okatka se Biblia ika tlajtoli alemán tlen omochijchi itech xiuitl 1534 uan seki amochmej tlen kipia Biblia Políglota tlen okichijchi Elias Hutter itech xiuitl 1599 ika 12 tlatlamantli tlajtolmej. Noijki okiteititijkej amamej tlen okintlalijkej itech tepamitl uan videos tlen kiteititiaj ken techpaleuiaj principio bíblicos itech tonemilis itech ninmej tonalmej.

Uan inselti okitakej tlen kichiuaj mojmostla kanaj 1,100 tlakamej uan siuamej akinmej tekitij itech nin kali. Achto okitakej nin tlamantli tlen itoka “Ken tichantij” uan okitakej ken katej kanin moseuiaj akinmej ompa tekitij. Noijki otlakuajkej uan onemitoj kanin tlaxochio. Se siuatl okijto: “Nikan sapanoa tlakualtsin”.

Ik ome okitakej nin tlamantli tlen itoka “Kinchijchiuaj amatlajkuilolmej”, uan okitakej kanin kinchijchiuaj amatlajkuilolmej, kanin kintlaliliaj pastas amochmej uan kanin kintitlanij amatlajkuilolmej. Nochtin akinmej otlaixmatitoj okitakej ken kinchijchiuaj Biblias, kintlaliliaj pastas uan kintitlanij itech 51 uejueyij altepemej. Se tlakatl okijto: “Amo onimokuayejyekoaya kox iTlaixpantijkauan katej ken se altepetl itech nochi Tlaltikpak. Nankintitlanij amatlajkuilolmej itech nochi Tlaltikpak. Nankichiuaj nin tekitl uan amo ikaj namechtlaxtlauia, nin se milagro”.

Akinmej otlaixmatitoj kitaj tlen onka itech jw.org

Noijki okintlajtlachialti miakej tlaltikpaktlakamej ijkuak okitakej jw.org, página oficial tlen kipiaj iTlaixpantijkauan Jehová. Telpokamej uan akinmej yikipiaj miak xiuitl okinmitakej videos uan okinnankilijkej tlen omotlajtlaniayaj.

Pampa kuali okajsikamatkej ken tekitij iTlaixpantijkauan Jehová, ijkuak otlankej otlaixmatkej, miakej omotlajtlachialtijkej uan oyolpakej. Se tlakatl okijto: “Onikneltokaya miak tlamantli tlen amo melauak itech iTlaixpantijkauan Jehová. Pero axkan nikita moneki nikpatlas tlen nimokuayejyekoa”. Uan se siuatl miak uelta okijtoaya: “Itech nin tonal melauak ayakmo nitechikoitas.”

^ párr. 17 Nin omochi itech xiuitl 2014

^ párr. 21 Nin omochi itech xiuitl 2014

^ párr. 24 Nin omochi itech xiuitl 2014