Xikita nochi

Pampa tikitas okse menú

ITlaixpantijkauan Jehová

náhuatl del centro

Hacienda Watchtower: cincuenta xiuitl tekititok chikauak

Hacienda Watchtower: cincuenta xiuitl tekititok chikauak

Kanaj 145 kilómetros ik norte itech altepetl Nueva York, kajki altepetl Wallkill, katej seki tlalmej tlen kintokayotiaj Hacienda Watchtower. Nikan miak tekitl yomochi pampa tetlapouiskej kuali tlajtolmej itech nochi Tlaltikpak, tekitl tlen kichiuaj iTlaixpantijkauan Jehová. Non tlali okikojkej itech tonal 2, metstli enero, xiuitl 1963, yikipia cincuenta xiuitl.

David Walker, se iTlaixpantijka Jehová, tlen opejki ompa tekiti ijkuak opejki tekitl, techiluia tleka okikojkej nin tlali: “Pampa akinmej tekitij itech Kali kanin kinyekanaj iTlaixpantijkauan Jehová tlen kajki itech altepetl Brooklyn (Nueva York) omomiaktilijkej. Ik non, omonekiaya tikitaskej ken uelis tikchiuaskej pampa amo miak tomin motekitiltis pampa tikouaskej tlakuali. Yotikpiayaj okse tlali itech altepetl Nueva York, pero kajki kanaj chikuase noso chikueyi horas itech altepetl Brooklyn. Uan altepetl Wallkill kajki san kanaj ome horas. Ik, non nin tlali uelis tiktekitiltiskiaj”. ITlaixpantijkauan Jehová okitekitiltijkej pampa kitokaskej tlakilotl, verduras, kipiaskiaj torojnakatl, pitsonakatl uan tlakuali tlen kichiuaj ika leche. Satepan, okikojkej okseki tlalmej.

Itech majtlaktli xiuitl, tekitl tlen kichiuaj iTlaixpantijkauan Jehová omomiaktilij, ik non, tlen omochiuaya itech altepetl Wallkill omopatlak. Omochiuaya tlakuali, pero noijki opejkej kinchijchiuaj amatlajkuilolmej tlen kisa itech Biblia, tlen tlapaleuiaj pampa miakej mochiuaskej imachtijkauan Jesús (Mateo 9:37; Lucas 10:2; Juan 4:35, 36). Ma tikitakan tlen okseki tekitl mochiua itech altepetl Wallkill.

Imprenta. Kanaj itlajkotia siglo veinte, nochi amatlajkuilolmej omochiuayaj itech imprenta tlen okatka itech altepetl Brooklyn (Nueva York). Pero pampa miakej okintlajtlaniliayaj amatlajkuilolmej, imprenta ayakmo ueli okichiuaya nochi tlen omonekiaya. Ik non, itech xiuitl 1973, iTlaixpantijkauan Jehová okitlalijkej okse imprenta itech altepetl Wallkill. Ik non, omonekiaya okachi moueyitilis imprenta uan ijkon okichijkej miak uelta. Okachi yikin okichijkej itech xiuitl 2004.

Tecnología. Itech xiuitl 1979, sekimej iTlaixpantijkauan Jehová okichijkej se yankuik sistema informático itech altepetl Wallkill, axkan moixmati ken Sistema Electrónico de Edición Plurilingüe (MEPS, ika tlajtoli inglés). Nin programa tlapaleuia pampa moyektlaliskej amatlajkuilolmej ika kanaj seiscientos tlatlamantli tlajtolmej.

Tlamachtilistli. Itech xiuitl 1988, Tlamachtil ika Biblia tlen kichiua Watchtower itech Galaad tlen okatka itech altepetl Brooklyn okipanoltijkej itech altepetl Wallkill, uan itech tonal 17, metstli octubre opejkej ompa momachtiaj. Uan itech xiuitl 1995, Tlamachtil ika Biblia tlen kichiua Watchtower itech Galaad okipanoltijkej itech altepetl Patterson (Nueva York).

Ijkon ken mochiua itech oksekimej haciendas, ken tekitij uan tlen kichiuaj mopatlati itech Hacienda Watchtower itech cincuenta xiuitl tlen yopanok. Pero chikauak tekititokej pampa kinmakaskej tlakuali tlen kuali iTlaixpantijkauan Jehová tlen tekitij itech kali Betel itech altepetl Nueva York (Estados Unidos).

Itech ninmej tonalmej, iTlaixpantijkauan Jehová kinchijchiuaj kalmej yankuikej pampa ompa tekitiskej uan kanin chantiskej itech altepetl Wallkill. Uan noijki kinyektlaliaj kalmej tlen yiuejkika amo ikaj kintekitiltia. Nochi nin tekitl tlen kichiuaj tlapaleuia pampa Hacieda Watchtower uelis kinmakas amatlajkuilolmej sapanoa miakej tlaltikpaktlakamej tlen kinekij iTlajtol toTajtsin Dios itech nochi Tlaltikpak.

David Walker kijtoa: “Sapanoa niyolpaki nikitas ken itech cincuenta xiuitl miak tekitl omochi, uan nin tekitl mochiua pampa miakej tlaltikpaktlakamej itech nochi Tlaltikpak ma kinmachtikan tlen melauak tlamachtia Biblia”.