Xikita nochi

Pampa tikitas okse menú

ITlaixpantijkauan Jehová

náhuatl del centro

Se tlamantli tlen amo keman nikilkauas

Se tlamantli tlen amo keman nikilkauas

Sejse xiuitl, miakej tlaltikpaktlakamej yauij tlachiatiuij itech Kali kanin kinyekanaj iTlaixpantijkauan Jehová uan okseki kalmej tlen kinpiaj itech altepetl Nueva York (Estados Unidos). Ninmej kalmej noijki kintokayotiaj Betel, se tokayotl hebreo tlen kijtosneki “Ikal toTajtsin Dios”. Sekimej tlaltikpaktlakamej amo uejka chantij, pero oksekimej kema. Yejuan kinekij kitaskej ken mochijchiuaj amatlajkuilolmej uan ken tekiti ialtepe toTajtsin Dios, noso kinekij kintlajpalotiuij inyolikniuan tlen ompa tekitij. Se tlaltikpaktlakatl melauak okinekiaya tlaixmatis.

Se iTlaixpantijka Jehová tlen omotokayotiaya Marcellus, tlen ochantiaya itech altepetl Anchorage, Alaska (Estados Unidos), ye san tepitsin otlajtoaya pampa okipiaya parálisis cerebral, non kokolistli okichi ayakmo ma nejnemi. * Ik non, omonekiaya ikaj ma kipaleui ijkuak itlaj kichiuaskia. Maski omokokoaya, melauak okinekiaya yas Betel. Uan okiuikakej ma tlaixmatiti.

Se iyolikni Marcellus tlen itoka Corey okipaleui ma uia Betel, kijtoa: “Melauak okinekiaya yas. Nochipa onechnotsaya uan okinekiaya ma nikilui keman yaskia. Marcellus san ueli okijtoaya ‘kema’ uan ‘amo’, omonekiaya niktlajtlanis pampa uelis nikmatiskia tlen okinekiaya”. Yejuan omotlapouiayaj ijkin:

—¿Tikneki ma nio mokalijtik?

—Amo.

—¿Tikneki ma niknotsa akin tlapajtia?

—Amo.

—¿Tikneki tikmatis keman tias Betel?

—Kema.

Corey kijtoa: “Omonekiaya nikyekiluis ken yaskia. Ijkuak okichij tlen okinekiaya sapanoa onechyolpakti”.

Marcellus okixnamik seki ouijkayotl. Ken amo okipiaya miak tomin, omonekiaya kitlatis seki tomin pampa ika yaskia Nueva York tlen mokaua kanaj 5,400 kilómetros. Ken omokokoaya omonekiaya iuan ikaj yaskia pampa kipaleuiskia. Saiktlami, omonekiaya kitlajtlaniskej akin okipajtiaya kox uelis yaskia, uan okilui kema seki tonal achto yaskia Nueva York.

Ijkuak Marcellus oajsito Nueva York, okiuikakej ma tlaixmatiti Brooklyn, Patterson uan Wallkill. Okitak ken omochijchiuayaj Biblias uan okseki amatlajkuilolmej itech uejueyij teposmej uan okitak ken moyekana tekitl tlen kichiua ialtepe toTajtsin Dios. Okitak se exposición tlen itoka “Biblia uan itoka toTajtsin Dios” uan “Se altepetl tlen kipia itoka Jehová”. Noijki okinmixmatki oksekimej uan omochijkej iyolikniuan. Melauak, nochi nin amo keman kilkauaskia.

Miakej akinmej yauij Betel sapanoa kinpaktia. Uan ijkuak okitlajtlanijkej Marcellus kox okipakti tlaixmatis Betel, ye omochijchika uan okijto: “¡Kema, kema, kema!”.

Titlaixmatis Betel uelis mitsyolchikauas te uan mokalchanejkauan, ijkon ken Marcellus. ITlaixpantijkauan Jehová ika miak pakilistli kinseliaj akinmej yauij tlaixmatitiuij itech kalmej Betel tlen katej itech nochi Tlaltikpak. ¿Mitspaktiskia noijki titlaixmatiti?

^ párr. 3 Marcellus omikik tonal 19, metstli mayo, xiuitl 2014, ijkuak yitlamiskia moijkuilo nin tlamachtil.