ITlaixpantijkauan Jehová kinnejnekij tlatlamantli biblias para momachtiskej. Pero melauak kipatioitaj ITlajtol toTajtsin Dios. Biblia del Nuevo Mundo tlen yokitlajtolkopkej ika miak tlajtoli. Non Biblia kipia itoka toTajtsin Dios, kijtoua tlen melauak uan kuali moajsikamati.

•   Kipia itoka toTajtsin Dios. Akinmej kitlajtolkopaj Biblia amo nochtin kitlakaitaj toTajtsin Dios tlen otlanauati makijkuilokan. Matikitakan tlen kichiuaj sekimej. Se Biblia kijtoua intoka kanaj setenta personas tlen otlapaleuijkej makitlajtolkopakan pero amo kanaj kijtoua itoka toTajtsin Dios tlen motokayotia Jehová.

   ITlajtol toTajtsin Dios. Biblia del Nuevo Mundo kipia itoka toTajtsin Dios kanin moneki ijkuilitos uan amo kijtoua intoka tlen otlajtolkopkej.

•   Melauak tlen kijtoua. Seki biblias kipatiliaj seki tlamantli ijkuak kitlajtolkopaj uan ayakmo kijtoua ijkon ken yiuejkika okijkuilojkej. Matikitakan ken kichiuaj. Ijkin okikajkej ijkuak okitlajtolkopkej Mateo 7:13: “Xikalakikan itech puerta tlen amo patlauak. Porque yaskej ijtik tlitl akinmej kalakij itech puerta patlauak uan itech ojtli patlauak uan miakej kalakij itech non puerta”. Pero yiuejkika ijkuak okijkuilojkej amo okijtouaya “ijtik tlitl”. Achto oijkuilitoka tlajtoli “ixpoliuij”. Xamo akinmej otlajtolkopkej okineltokayaj akinmej amo yolkualmej kintlajyouiltiskiaj ijtik tlitl. Pero Biblia amo ijkon tlamachtia. ITlajtol toTajtsin Dios. Biblia del Nuevo Mundo kipia tlajtoli “ixpoliuij” ijkon ken yiuejkika okijkuilojkej.

•   Kuali moajsikamati. Moneki kuali mamoajsikamati ijkuak kitlajtolkopaj Biblia uan amitlaj makikixtilikan nion makajxitilikan. Matikitakan tlen kichiuaj sekimej ijkuak tlajtolkopaj. Miakej biblias ijkin okikajkej ijkuak okitlajtolkopkej Mateo 5:3: “Makipiakan pakilistli akinmej amo chikauak inmiespíritu”. Pero axkan amo kajsikamatij ijkuak kitlajtoltiaj tlen ompa kijtoua. Ikinon ITlajtol toTajtsin Dios. Biblia del Nuevo Mundo ijkin okitlajtolkopkej nin texto: “Pakij akinmej kimatij moneki kixmatiskej toTajtsin Dios”.

 Ijkuak okitlajtolkopkej ITlajtol toTajtsin Dios. Biblia del Nuevo Mundo okijkuilojkej itoka toTajtsin Dios kanin moneki ijkuilitos porque tiktlakaitaj itoka. Noijki kuali moajsikamati, amitlaj okikixtilijkej nion amitlaj okajxitilijkej uan amo tikinnemakaj ijkuak tikintemakaj. Ijkon miakej uelis kitlajtoltiskej Biblia ika intlajtol maski amo kipiaj tomin tlen ika kimokouiskej.