Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Julio de 2015

¿Akin anticristo?

¿Akin anticristo?

Se película tlen temomojtia itoka Anticristo.

Sekimej akinmej tlatsotsona okikixtijkej se disco tlen okitokayotijkej Antichrist Superstar.

Se filósofo tlen itoka Friedrich Nietzsche, itech xiuitl 1941 okichi se tekitl tlen okitokayoti el Anticristo.

Tekiuajkej tlen okatkaj itech Edad Media okintokayotiayaj Anticristos nochtin akinmej okinkokoliayaj.

Martín Lutero, se alemán tlen omoxelo itech Iglesia católica, okintokayoti anticristo nochtin papas tlen okatkaj Roma.

ANTICRISTO se tlajtoli tlen yiuejkika motekitiltia itech películas uan pampa kintokayotiskej papas. Ik non, miakej tlaltikpaktlakamej motlajtlaniaj: ¿Akin anticristo? ¿Moneki tikmatiskej akin? Itech Biblia makuili uelta tikajsij nin tlajtoli, ik non, miak ipati tleka motekitiltia nin tlajtoli.

MOMATI AKIN ANTICRISTO

San tlatitlanil Juan okitekitilti tlajtoli anticristo. ¿Tlen otlajkuilo itech anticristo? Ye kijtoa: “Ya tikateh itech iksemi tonatijmeh, yononkikakeh wits se akin kixnamikis Cristo [anticristo]. Milák, axa miakeh yomonextijkeh non kixnamiki n Cristo [anticristos], yika tikmatih ya tikateh itech iksemi tonatijmeh. Yejwah okatkah towa, iwa omoxelojkeh [...] ¿Akin non tekajkaya? [Anticristo] Ye akin kijtoa Jesús amo ye n Cristo, ye akin kixnamiki iwa amo kineltoka nion Totajtsi Dios nion Ikone” (1 Juan 2:18, 19, 22).

Tlatitlanil Juan okijto anticristo ye akin tlakajkayaua itech Jesús uan tlen otlamachti

¿Tlen techmachtia tlen otlajkuilo Juan? Ye okijto “miakeh yomonextijkeh” ken anticristos, nin kijtosneki miakej tlaltikpaktlakamej. Juan okijto anticristos tlakajkayauaj, kijtoa Jesús amo Cristo, uan noijki tlakajkayauaj itech Jesús uan iTajtsin. uelis yetoskej tlaltikpaktlakamej tlen moijtoaj Cristo, noso seki nechikolmej tlen kijtoaj kipatkayotiaj Cristo. Noijki uelis yetoskej tlaltikpaktlakamej akinmej amo kiseliaj Jesús uan kinkokoliaj imachtijkauan. Tlatitlanil noijki kijtoa: “Yejwah okatkah towa, iwa omoxelojkeh” nin techmachtia yejuan amo okiselijkej tlamachtilmej tlen techmaka toTajtsin Dios. Yejuan noijki yokatkaj ijkuak Juan otlajkuilo nin amatlajkuilol. Ijkuak Juan okijto “tikateh itech iksemi tonatijmeh”, uelis okijto pampa iksekimej itlatitlanil Jesús ayakmo okipoloaya miak pampa mikiskia.

¿Tlen okijto Juan itech anticristo? Okijto anticristo tlamachtiskia tlen amo melauak: “Akin tlaneltokah Cristo Jesús omochiwako tlakatl itech nin tlaltíkpaktli, iaxka Dios. Iwa nochi espíritu non amo kiteilia Jesús omochi tlakatl, amo kipia Iespíritu Dios, yej kipia iespíritu akin kikokolia n Cristo [anticristo]. Nomejwah yononkimatiah nin espíritu walaskia, iwa ya kajki itech nin tlaltíkpaktli” (1 Juan 4:2, 3). Satepan ijkuak okichi okse iamatlajkuilo noijki okijto: “Itech nin tlaltíkpaktli nemih miakeh tekajkayajkeh, iwa kijtoah Cristo amo milák owala itech nin tlaltíkpaktli kemi se tlakatl kemi tejwah. Akin ijkó kijtoa, tekajkaya iwa ikokolikni n Cristo [anticristo]” (2 Juan 7). Juan kuali okimatiaya anticristo tlakajkayaua itech Jesucristo uan tlen otlamachti.

“TIOTLAJTOLTEH TEKAJKAYAJKEH” UAN “TLAKATL TETLAJTLAKOLCHIWALTI”

Jesús okijto: “Ximotlachilikah inmak nekateh tiotlajtolteh tekajkayajkeh, non motlakentiah kemi yetoskiah ichkameh, pero ik inmijtik kokoyomeh tekuanimeh”

Miak xiuitl achto Juan tlajkuiloskia itech anticristo, Jesús okinmilui imachtijkauan: “Ximotlachilikah inmak nekateh tiotlajtolteh tekajkayajkeh,  non motlakentiah kemi yetoskiah ichkameh, pero ik inmijtik kokoyomeh tekuanimeh” (Mateo 7:15). Tlatitlanil Pablo noijki okinmilui tokniuan tlen okatkaj Tesalónica: “¡Amo xikmokawilikah manomechkajkayawakah! Porke ijkuak ajsiki non tonati, miakeh non axa kijtoah kineltokah n Toteko Dios, kitlawelitaskeh, iwa tlamis monextis n tlakatl tetlajtlakolchiwalti, non teaxkatitok miktla” (2 Tesalonicenses 2:3).

Nin techmachtia itech achto siglo yokatkaj sekimej akinmej amo kuali otlamachtiayaj uan tlen okinekiayaj tokniuan ayakmo ma tlaneltokakan. Nochtin akinmej otlakajkayauayaj itech Cristo uan tlen otlamachti okatkaj anticristos ijkon ken okijto Juan. Tlatitlanil Pablo okijto tlen kinchiuiliskia Jehová pampa ye kinmixpolos.

¡XIMOMALUIKAN!

Axkan anticristo ok tlakajkayajtok. Axkan noijki miakej tlaltikpaktlakamej uan nechikolmej amo kiseliaj Jesús uan tlen otlamachti. Tlakajkayauaj uan amo kuali tlamachtiaj pampa tlaltikpaktlakamej amo ma kimatikan Jesús amo ken iTajtsin Jehová. Ma timomaluikan pampa amo ma techkajkayauakan. Axkan tikitaskej ome tlamantli tlen ika kinkajkayauaj miakej tlaltikpaktlakmej.

Yiuejkika miakej tlaneltokalismej tlamachtiaj itech Trinidad. Kijtoaj toTajtsin Dios uan ikone san se. Ninmej tlaneltokalismej kichiuaj ken anticristos pampa amo tlamachtiaj tlen melauak itech totajtsin Dios uan Cristo. Nin kichiua miakej tlaltikpaktlakamej amo ma kixmatikan toTajtsin Dios uan Jesús ijkon ken kijtoa Biblia (1 Corintios 11:1; Santiago 4:8).

Ninmej tlaneltokalismej noijki kinkajkayauaj tlaltikpaktlakamej pampa itech inBiblias amo kitekitiltiaj tokayotl Jehová, uan noijki pampa kinteneuaj akinmej kema kitekitiltiaj. Amo yolkualmej, pampa itech Biblia tokayotl Jehová onesiaya kanaj siete mil veces. ¿Tlen panoa pampa tlakajkayauaj? Miakej tlaltikpaktlakamej amo kimatij akin melauak toTajtsin Dios.

Uan noijki oksekimej tlaltikpaktlakamej tlen yolkualmej yomopaleuijkej pampa kimatij tlen itoka toTajtsin Dios uan axkan okachi itech motokiaj. Ijkon okipanok Richard, akin omotlapoui iuan sekimej iTlaixpantijkauan Jehová, ye amo kilkaua tlen omotlapoui. ye kijtoa: “Onechmachtijkej toTajtsin Dios itoka Jehová. Onechtlajtlachialti nikmatis toTajtsin Dios kipia itoka. Amo keman onimokuayejyeko itech nin tokayotl.” Ijkuakon itech inemilis opejki kichiua tlen omomachti itech Biblia, pampa ijkon uelis kiyolpaktis Jehová. Richard noijki kijtoa: “Axkan kuali nimouika iuan toTajtsin Dios pampa nikmati tlen itoka”.

Yiuejkika anticristo yokichi miakej tlaltikpaktlakamej amo ma kimatikan tlen melauak. Tla timomachtiaj Biblia, uelis tikmatiskej akin anticristo uan ayakmo uelis techkajkayauas (Juan 17:17).