Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Mayo de 2015

 BIBLIA OKINPATILI INNEMILIS

Onikajsikamatki Jehová yolkuali uan tetlapojpoluia

Onikajsikamatki Jehová yolkuali uan tetlapojpoluia
  • ONESKI ITECH XIUITL: 1954

  • UEYI ALTEPETL: CANADA

  • OKSEKI TLAMANTLI: OTLACHTEKIAYA UAN OMAUILTIAYA PAMPA KITLANIS TOMIN

TLEN ONIKCHIUAYA:

Onimoskalti itech se altepetsintli tlen kajki itech altepetl Montreal. Notatajuan okipixkej chikueyi inkoneuan uan ne nixokoyotl. Notajtsin omikik ijkuak onikpiaya chikuase metstli, ik non, nonantsin iselti otechiskalti.

Ne onikchichinaya drogas, onimauiltiaya pampa niktlanis tomin uan sapanoa onimoteuiaya uan nin opejki nikchiua ijkuak onikatka nichokotsin. Onimouikaya iuan akinmej tlachtekij. Ijkuak onikpiaya majtlaktli xiuitl yonikinpaleuiaya siuamej auilnenkej uan akinmej okitetlanetiayaj tomin. Onechpaktiaya nikinkajkayauas uan nikintlachtekilis tlaltikpaktlakamej. Amo ueli onikkauaya.

Ijkuak onikpiaya 14 xiuitl kuali onikmatiaya ken nikinkajkayauas tlaltikpaktlakamej. Se neskayotl, onikinkoaya miakej relojes, pulseras tlen omotayaj okinchijchijkej ika oro, satepan itech onitlajkuilo 14 quilates, uan onikinnemakaya itech ojtli uan kanin kinkauaj carros kanin tlanemakaj. ¡Oniktlaniaya miak tomin! Se tonal oniktlanki 10,000 dolares (kanaj 130 mil pesos).

Ijkuak onikpiaya 15 xiuitl onechkixtijkej kanin onimomachtiaya uan ayakmo onikpiaya kanin nimokauas. Onikochiaya itech ojtli, parques noso inkalijtik akinmej iuan onimouikaya.

Seki uelta policías onechkitskijkej pampa nochi tlen onikchiuaya. Pero tlen oniknemakaya amo onikichtek, ik non, amo keman onechtsakej. Maski kema oniktlaxtla seki tomin pampa onitlakajkayauaya uan amo onikpiaya se amatl kanin kijtoa uelis nitlanemakas. Amo ikaj onikmauiliaya uan noijki onikinpaleuiaya akinmej kitetlanetiaj tomin. Uan ken nin melauak oui ualeua onikuikaya se pistola. Uan noijki onitekitiaya uan akinmej kichiuaj tlen amo kuali pampa kipiaskej tomin.

 BIBLIA OKIPATLAK NONEMILIS:

Onechtlapouijkej itech Biblia ijkuak onikpiaya 17 xiuitl. Onichantiaya iuan nonovia akin opejki momachtia Biblia iuan iTlaixpantijkauan Jehová. Pero amo onechpakti nochi tlen tlamachtia Biblia, ik non, onikmotemoli okse nonovia.

Pero okse nonovia noijki opejki momachtia iuan iTlaixpantijkauan Jehová. Onechpakti ken okipatlak inemilis, axkan okatka yolkuali uan amo niman okualaniaya. Se tonal onimonechiko iuan iTlaixpantijkauan Jehová. Onikinmitak okse tlamantli inyelis; nochtin yolkualmej uan kuali onechselijkej. Ijkuakon kuali onimomachili. Nokalchanejkauan notech amo omotekipachoayaj uan amo keman onechtlasojtlakej. Sapanoa oniknekiaya ma nechtlasojtlakan ken okichijkej iTlaixpantijkauan Jehová. Ijkuak onechiluijkej kox oniknekiaya nimomachtis, onikijto kema.

Tlen onimomachti okichi amo ma nimiki. Pampa iuan ome tlakamej otimokajkej titlachtekiskej pampa kanin onimauiltiaya onikteuikiliaya 50,000 dolares (kanaj 650,000 pesos). Pero ne ayakmo oniknek nitlachtekis. Yejuan okichijkej tlen otimokuayejyekojkej, pero se okimiktijkej uan okse okitsakej.

Tlen onimomachti itech Biblia okichi okachi ma nikpatla nonemilis. Se neskayotl, itech 1 Corintios 6:10 kijtoa: “N tlachtekeh, n tominápisteh, n tlawankeh, n tepojpojkeh, iwa akimeh tekajkayawah para tlachtekiskeh, mach kalakiskeh kan Dios tlanawatijtok”. Ijkuak oniktlajtolti tlen kijtoa Biblia onichokak. Omonekiaya ma nikpatla nochi nonemilis (Romanos 12:2). Sapanoa onimoteuiaya uan onitlakajkayauaya, nochi nonemilis amo kuali okatka.

Pero noijki onikajsikamatki Jehová yolkuali uan techtlapojpoluia (Isaías 1:18). Ik non, oniktlatlaujti Jehová ma nechpaleui pampa ayakmo nikchiuas nochi tlamantli amo kuali uan uelis nikpatlas nonemilis. Ika ipaleuilis Jehová yolik onikpatlak nonemilis. Satepan onimonamikti iuan nonovia.

Niyoltok pampa nikchiua tlen kijtoa Biblia

Ijkuak onikpiaya 24 xiuitl yonikpiaya nosiua uan eyi nokoneuan. Omonekiaya kuali ma nitekiti pampa nikinmakaskia tlen moneki. Pero amo okachi onimomachti uan amo keman kuali onitekitik. Oksepa onikilui Jehová ma nechpaleui. Uan oniktemoto kanin uelis nitekitiskia. Ne onikinmiluiaya oniknekiaya nikpatlas nonemilis uan kuali nitekitis. Ualeua onikinmiluiaya onimomachtijtoka Biblia pampa niyetos yolkuali. Pero amo ikaj onechmakak tekitl. Pero saiktlami, ijkuak oksepa onikijto tlen oniknekiaya, se tlakatl onechilui: “Amo nikmati tleka, pero nikmati moneki ma nimitsmaka tekitl”. Nikmati Jehová onechnankili. Seki kauitl satepan nosiua iuan ne otimochijkej iTlaixpantijkauan Jehová.

TLATEOCHIUALISTLI TLEN YONIKSELI:

Niyoltok pampa nikchiua ken kijtoa Biblia uan nikchiua ken Jesús. Nokalchanejkauan sapanoa yolkualmej uan kuali nimomachilia pampa nikmati Jehová yonechtlapojpolui.

Yikipia 14 xiuitl nikchijtok se ueyi tekitl: oksekimej tlaltikpaktlakamej nikinmachtia ika Biblia. Nosiua yikin opejki okachi kitekichiuilia Jehová. Uan noijki, itech 30 xiuitl yonikinpaleui 22 tlakamej akinmej inmiuan nitekiti noijki ma mochiuakan iTlaixpantijkauan Jehová. Axkan ok nio kanin tlanemakaj, pero amo pampa nitlachtekis, axkan nikinmaka se kualtsin tetliokolil: nikintlapouia uelis yoltoskej itech Tlaltikpak kanin ayakmo ikaj tlachtekis (Salmo 37:10, 11).