“Nochipa itech xitlaneltoka, oh altepetl.” (SALMO 62:8)

1-3. ¿Tleka tlatitlanil Pablo otlaneltokaya itech Jehová? (Xikita tlaixkopinal tlen ika peua tlamachtil.)

ITECH achto siglo akinmej okichiuayaj ken Cristo tlen ochantiayaj itech ueyi altepetl Roma okipixkej miak ouijkayotl. Romanos okintojtokakej. Okijtoayaj yejuan amo otetlasojtlayaj uan okinmiluijkej intlajtlakol otlatlak altepetl. Uan miakej okintsakej uan sekimej okintlamotlakej kanin okatkaj yolkamej pampa ma kinkuakan. Sekimej okinpilojkej itech kuauitl uan okintsoponiliayaj clavos, yoltokej okintlatiayaj pampa ika motlauiliskiaj. Akinmej okichiuayaj ken Cristo kuali okimatiayaj nochtin uelis tlajyouiskiaj.

2 Itech non kauitl sapanoa okatka oui, romanos okitsakej tlatitlanil Pablo. Uelis ye omotlajtlani kox oksekimej kipaleuiskiaj. ¿Tleka? Pampa se tonal ijkuak okipixki se ouijkayotl amo ikaj okipaleui. Pero Pablo okijto Jehová uan Jesús kema okipaleuijkej uan okimakakej chikaualistli pampa tlaxikos. Noijki okijto okimakixtijkej itech ikamak se león (2 Timoteo 4:16, 17, TNM). * (Xikita tlajtoli tlen kiualika tlakxitlan.)

 3 Tlatitlanil Pablo okineltokaya Jehová kema kipaleuiskia. ¿Tleka? Pampa ye okilnamiktoka achto toTajtsin Dios yokipaleuijka. Ye okineltokaya Jehová kimakaskia chikaualistli pampa kixikos nin ouijkayotl uan tlen okseki kipiaskia. Sapanoa chikauak itlaneltokilis okipiaya pampa okijto toTeko kimakixtis itech san tlen tlamantli amo kuali kiixnamikiskia (2 Timoteo 4:18). Maski iikniuan amo kipaleuiskiaj, ye okineltokaya Jehová uan Jesús nochipa kipaleuiskiaj. Ye ijkon okineltokaya.

IJKUAK TIKPIA OUIJKAYOTL XIKTEITITI OKACHI TITLANELTOKA ITECH JEHOVÁ

4, 5. 1) ¿Akin uelis nochipa techpaleuis? 2) ¿Tlen uelis tikchiuas pampa okachi timouikas iuan Jehová?

4 ¿Yomitspanok se ouijkayotl uan moselti otimomachili? Uelis ayakmo tikpia tekitl noso otikpixki ouijkayotl kanin timomachtia. Uelis timokokoa noso tikpia ouijkayotl. Uelis ijkuak ijkon omitspanok otimoyolkoko pampa amo ikaj omitspaleui. Pero ken tikmatij onka seki ouijkayotl tlen tlaltikpaktlakamej amo uelis kiyektlaliskej. ¿Tlen uelis tikchiuas? Biblia techiluia ma titlaneltokakan itech Jehová (Proverbios 3:5, 6). ¿Melauak uelis itech titlaneltokaskej? Kema. Itech Biblia tikinmajsij miakej tlapoualismej tlen techmachtiaj Jehová kinpaleuia itekipanojkauan.

Ijkuak tikpia se ouijkayotl ma mitspaleui okachi xitlaneltoka itech Jehová

5 Tla tejuatsin tikpia se ouijkayotl uan amo ikaj mitspaleuia, amo ximosotlaua. Ijkon ken tlatitlanil Pablo, xikteititi ika nin ouijkayotl okachi titlaneltoka itech Jehová. Uan noijki xikita ken Jehová mitsmaluia maski tikpia ouijkayotl. Non kichiuas okachi xitlaneltoka itech Jehová uan ijkon okachi kuali iuan timouikas.

MONEKI XITLANELTOKA ITECH JEHOVÁ

6. ¿Tleka ualeua oui titlaneltokaskej itech Jehová ijkuak titlajyouiaj?

6 Ximokuayejyeko tikpia se ouijkayotl uan sapanoa mitstekipachoa. Yotiktemo ken tikyektlalis ouijkayotl uan yotiktlatlaujti Jehová ma mitspaleui. Tla ijkon yotikchi, ayakmo ximotekipacho uan xikneltoka toTajtsin Dios mitspaleuis (xiktlajtolti Salmo 62:8; 1 Pedro 5:7). Tla tikneki timouikas iuan Jehová, miak ipati itech xitlaneltoka. Non uelis yetos oui. ¿Tleka? Ijkon tikijtoaj pampa Jehová ualeua amo san niman technankilia (Salmo 13:1, 2; 74:10; 89:46; 90:13; Habacuc 1:2).

Jehová techtlasojtla ken se teta uan kimati tlen techpoloa

7. ¿Tleka ualeua amo san niman technankilia Jehová?

7 ¿Tleka ualeua amo san niman technankilia Jehová? Pampa tikajsikamatis, xikilnamiki Biblia techiluia Jehová ken se teta uan tejuan tiikoneuan (Salmo 103:13). Tetajmej amo nochipa kinmakaj konemej tlen kinekij. Kinmakaj tlen kinekij, pero amo san niman. Uan ualeua konemej kitlajtlanij itlaj uan satepan ayakmo kinekij. Noijki tetajmej kimatij tlen kinekij inkoneuan kox kuali pampa yejuan noso pampa oksekimej. Tla nochipa kinmakaskej inkoneuan tlen kinekij, tetajmej yetoskej ken tlakeualmej. Tetajmej kimatij tlen kinpoloa inkoneuan uan kimatij keman kinmakaskej. Ijkon panoa iuan Jehová. Ye techtlasojtla, kimati tlen techpoloa uan keman moneki techmakas. Ik non, moneki ma timochiakan pampa tikitaskej ken technankilis Jehová (xikita Isaías 29:16; 45:9).

8. ¿Tlen techiluia kichiuas Jehová tla tikmachiliaj ayakmo titlaxikoaj?

8 Noijki xikilnamiki, Jehová techixmati sejse uan kox titlaxikoskej (Salmo 103:14). Ye nochipa  techmakas chikaualistli pampa ma titlaxikokan. Ualeua uelis tikmachiliskej ayakmo titlaxikoaj. Pero Jehová techiluia tla tikpiaj se ouijkayotl uan amo tikmatij ken tikyektlaliskej, ye techpaleuis ma titlaxikokan (xiktlajtolti 1 Corintios 10:13). Tikneltokaj Jehová kimati tlen uelis tikxikoskej uan non techyolseuia.

9. Tla tikita amo totoka mitsnankilia Jehová, ¿tlen moneki tikchiuas?

9 Tla tikita amo totoka mitsnankilia Jehová, ximochia. Amo xikilkaua ye nochipa kineki mitspaleuis, pero ye kimati keman mitsnankilis. Biblia techiluia ye kimati mochias pampa techpaleuis uan techiknomatis, pampa ye yolmelauak. Uan akinmej itech tlaneltokaj, okachi yolpakij (Isaías 30:18).

ITECH IKAMAK LEÓN

10-12. 1) ¿Tleka oui tikmaluiskej se tokalchanejka tlen mokokoa? 2) Ijkuak tikpiaj se ouijkayotl uan titlaneltokaj itech Jehová, ¿ken okachi kuali iuan timouikaj? Xikijto se neskayotl.

10 Itech párrafo 2 otimomachtijkej tlatitlanil Pablo okimakixtijkej itech ikamak león (2 Timoteo 4:17). Tla tejuatsin noijki tikpia se ouijkayotl uan timomachilia ken tlatitlanil Pablo, ¿tlen moneki tikchiuas? Miak ipati xitlaneltoka itech Jehová. Se neskayotl, ¿tikmaluijtok se mokalchanejka tlen mokokoa? Uelis yotiktlatlaujti Jehová ma mitspaleui uan ijkon tikmatis tlen okachi kuali tikpejpenas. * (Xikita tlajtoli tlen kiualika tlakxitlan.) Amo ximotekipacho, Jehová kajsikamati tlen mitspanotok. Tikmati ye mitspaleuis xitlaxiko uan xiyeto yolmelajki (Salmo 32:8).

Xitlaneltoka Jehová mitsmakas chikaualistli pampa xiyeto yolmelajki uan xiktlakamati

11 Ualeua uelis tikmachilis amo mitspaleuia Jehová. Uelis akinmej tepajtiaj amo kimatiskej ken kipajtiskej mokalchanejka. Noso otikchiaya ma mitsyolchikauakan mokalchanejkauan, pero amo mitspaleuiaj. Ik non, miak ipati xiktlatlaujti Jehová ma mitsmaka chikaualistli uan okachi itech ximotoki (xiktlajtolti 1 Samuel 30:3, 6). Uan ijkuak tikitas ken omitspaleui Jehová okachi kuali iuan timouikas.

12 Ma tikitakan tlen okipanok se tokni tlen itoka Linda. * (Xikita tlajtoli tlen kiualika tlakxitlan.) Ye okinmalui itatajuan ijkuak yimikiskiaj. Kijtoa inamik, iikni uan ye ayakmo okimatiayaj tlen kichiuaskej. Ualeua okimachiliayaj ayakmo otlaxikoayaj. Pero axkan kajsikamatij ken okinpaleui Jehová ma tlaxikokan. Tokni kineltoka ye Jehová okinmakak chikaualistli pampa ma tlaxikokan, okachi ijkuak okimachiliayaj ayakmo okixikoayaj ouijkayotl.

13. ¿Ken okipaleui tokni Rhonda pampa otlaneltokaya itech Jehová?

13 Tla titlaneltokaj itech Jehová, ye techpaleuis ijkuak tikpiaskej ouijkayotl. Ijkon okipanok se tokni tlen itoka Rhonda. Inamik amo iTlaixpantijka Jehová uan yomokajkajtoka iixpan tekiuajkej. Noijki, okiluijkej iikni okipiaya se kokolistli. Seki metstli satepan omikik isiua iikni. Tokni sapanoa otlajyoui. Ijkuak opejki kuali momachilia, opejki tekiti ken precursora regular. Pero inantsin omikik, ¿tlen okipaleui ma kixiko nochi nin ouijkayotl? Nochipa okitlatlaujtiaya Jehová, ijkon okichiuaya maski amo okipiaya se ouijkayotl. Tokni kijtoa opejki sapanoa kuali mouika iuan Jehová. Noijki kijtoa opejki tlaneltoka itech Jehová uan amo itech ye noso itech oksekimej tlaltikpaktlakamej. Tokni okitak ken Jehová okipaleui pampa nochipa okipiaya tlen moneki. Okimachili tekititok iuan Jehová.

Seki ouijkayotl tlen tikpiaj iuan tokalchanejkauan, kiteititiskej kox tiktlasojtlaj Jehová (Xikinmita párrafos 14 a 16)

14. ¿Ken mitspaleuis Jehová tla se mokalchanejka kikixtiaj itech tlanechikol?

 14 Axkan ma timotlapouikan itech okse ouijkayotl. Uelis se mokalchanejka kikixtiaj itech tlanechikol. Tejuatsin kuali tikmati Biblia kijtoa amo inmiuan ma timotlapouikan (1 Corintios 5:11; 2 Juan 10). Pero ken te tiktlasojtla mokalchanejka uelis yetos oui tiktlakamatis nin tlanauatil. ¿Ken uelis mitspaleuis Jehová? Ye mitsmakas chikaualistli tlen moneki pampa xiyeto yolmelajki uan xiktlakamati. Xitlaneltoka itech Jehová ijkuak titlajyouia uan okachi itech ximotoki.

15. ¿Tleka Adán amo okitlakamatki Jehová?

15 Ma tikitakan ken noijki ijkon okipanok Adán. ¿Tleka okikua tlakilotl tlen okimakak Eva? Ijkon okichi pampa omokuayejyeko uelis yoltoskia maski amo kitlakamatiskia Jehová. Biblia techiluia Adán “amo okikajkayajkeh” (1 Timoteo 2:14). ¿Tleka okitlakamatki isiua uan amo okitlakamatki Jehová? Pampa okachi okitlasojtlaya isiua uan amo Jehová (Génesis 3:6, 17). ¿Tlen techmachtia nin?

16. ¿Akin okachi moneki tiktlasojtlaskej uan tleka?

16 Tlen okichi Adán techmachtia okachi ma tiktlasojtlakan Jehová uan amo se tlaltikpaktlakatl (xiktlajtolti Mateo 22:37, 38). ¿Tleka? Pampa kinpaleuis tokalchanejkauan, maski kitekichiuiliaj Jehová noso amo. Ik non, ximochijchikaua okachi xiktlasojtla Jehová uan okachi itech xitlaneltoka. Tla timotekipachoa itech se mokalchanejka tlen okikixtijkej itech tlanechikol, xikilui Jehová ken timomachilia (Romanos 12:12; Filipenses 4:6, 7). * (Xikita tlajtoli tlen kiualika tlakxitlan.) Maski sapanoa mitsyolkokoa nin ouijkayotl, ma mitspaleui okachi ximouika iuan Jehová. Ijkon okachi itech  titlaneltokas uan tla tiktlakamatis nochi kuali kisas.

¿TLEN MONEKI TIKCHIUAS PAMPA OK TIMOCHIA?

Tla timochijchikauaj titetlapouiskej, tikteititiskej titlaneltokaj itech Jehová (Xikita párrafo 17)

17. Tla nochipa timochijchikauaj titetlapouiskej, ¿tlen uelis tikneltokaskej?

17 ¿Tleka Jehová okimakixti tlatitlanil Pablo itech ikamak león? Tlatitlanil Pablo ijkon okipanok pampa okachi uelis tetlapouiskia uan kitlamiskia nin tekitl tlen Jehová okimakak (2 Timoteo 4:17). Jehová noijki technauatia ma titetlapouikan. Uan tejuan san tikpaleuiaj (1 Tesalonicenses 2:4; 1 Corintios 3:9). Tla timochijchikauaj nochipa titetlapouiskej, Jehová nochipa techmakas tlen techpoloa (Mateo 6:33). Noijki, amo timosotlauaskej tla amo san niman technankilia Jehová.

18. ¿Tlen moneki tikchiuaskej pampa timouikaskej iuan Jehová uan itech titlaneltokaskej?

18 Nochipa ximochijchikaua pampa okachi kuali timouikas iuan Jehová. Ijkuak tikpias se ouijkayotl, ma mitspaleui okachi ximouika iuan Jehová. Xiktlajtolti uan ximomachti Biblia uan noijki itech ximokuayejyeko. Nochipa ximotlatlaujti uan xiktekichiuili Jehová. Tla tikchiuas nin, Jehová mitspaleuis xikxiko nochi ouijkayotl tlen tikpias.

^ párr. 2 Pablo uelis okimakixtijkej itech ikamak se león noso itech okse ouijkayotl.

^ párr. 10 Itech revistas onka seki tlamachtilmej tlen kinpaleuiaj akinmej mokokoaj uan akinmej tlamaluiaj. Tikinmajsis seki tlamachtilmej itech ¡Despertad! 8 de febrero 1994, uan itech 8 de febrero 1997, uan itech 22 de mayo 2000 uan 22 de enero 2001.

^ párr. 12 Otikpatilijkej itoka.

^ párr. 16 Itech revistas onka seki tlamachtilmej tlen kinpaleuis akinmej kinpiaj inkalchanejkauan tlen okinkixtijkej itech tlanechikol. Tikinmajsis ninmej tlamachtilmej itech La Atalaya (ika náhuatl del centro Akin Tetlapouijtok) 1 de septiembre 2006, páginas 17 a 21 uan La Atalaya (ika náhuatl del centro Akin Tetlapouijtok) 15 de enero 2007, páginas 17 a 20.