Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Abril de 2015

 MOTLAPOUIAJ ITECH BIBLIA

¿Tleka sejse xiuitl moneki ma tikilnamikikan imikilis Jesús?

¿Tleka sejse xiuitl moneki ma tikilnamikikan imikilis Jesús?

Pampa ma tikitakan ken ikaj motlapouiskia iuan se iTlaixpantijka Jehová, ma timokuayejyekokan se iTlaixpantijka Jehová tlen itoka Linda motlapouijtok iuan se siuatl tlen itoka Lucía.

“IJKÍ XIKCHIWAKAH PARA NONNECHILNAMIKISKEH”

Linda: Panolti. Yichikome onimitsitak itech iCena toTeko uan sapanoa oniyolpakik. * ¿Ken otikitak nechikol?

Lucía: Sapanoa onechpakti. Pero seki tlamantli amo kuali onikajsikamatki. Ne onikmatiaya moneki tikilnamikiskej tonal ijkuak oneski Jesús, nin tikchiuaj itech Navidad, uan itech Semana Santa moneki tikilnamikiskej ijkuak okiyolitijkej, pero amo onikmatiaya kox moneki ma tikilnamikikan imikilis.

Linda: Kema. Non tlen miakej kimatij. Pero tejuan tikneltokaj miak ipati sejse xiuitl ma tikilnamikikan imikilis Jesús. Tla timajxilia nikneki nimitsititis tleka ijkon tikneltokaj.

Lucía: Kema.

Linda: Kuali. Tiitlaixpantijkauan Jehová tikilnamikij imikilis Jesús pampa ye ijkon otlanauati ma tikchiuakan. Ma tikitakan tlen opanok se yoak achto kimiktiskiaj. ¿Tikilnamiki Jesús otlakua iuan imachtijkauan itech se tlakualistli tlen miak ipati?

Lucía: Kema, La Última Cena.

Linda: Kema. Miakej noijki kitokayotiaj iCena toTeko. Ijkuak yejuan otlakuajtokaj, Jesús okinmilui imachtijkauan tlen omonekiaya ma kichiuakan. Ijkuilitok itech Lucas 22:19. ¿Tikneki tiktlajtoltis?

Lucía: Kema, kijtoa: “Otlanki okónanki n paj iwa omotlasojkama inawak Dios; okitlatlajkotlápanki iwa okinmajmák itlamachtijkawah iwa okinmili:—Ye ni [kijtosneki, TNM] nokuerpo non niktemaka por nomejwah. Ijkí xikchiwakah para nonnechilnamikiskeh”.

Linda: Tlasojkamati. Xikita tlen otlanauati Jesús kanin tlami nin tlaxelol, ye okijto: “Ijkí xikchiwakah para nonnechilnamikiskeh”. Uan itech achto tlajtolmej tikitaj tlen okijto Jesús ma kilnamikikan. Ye okinmilui kitemakaskia ‘ikuerpo’ noso iyolilis pampa imachtijkauan. Itech Mateo 20:28 Jesús noijki okijto: “Ijkó kemi Ne Non onimochi ni tlakatl amo oniwala manechtekitilikah, yej oniwala onitekitiko iwa nimotemakas manechmiktikah iwa ijkó miakeh mamomakixtikah”. Ik non, tiiTlaixpantijkauan Jehová tikilnamikij imikilis Jesús pampa ijkon tikilnamikij tlamanali tlen okitemakak pampa techmakixtis. Ika imikilis Jesús, uelis tikpiaskej yolilistli tlen amo keman tlamis tla tejuan titetlakamatij.

¿ITECH TLEN TECHMAKIXTIA IMIKILIS JESÚS?

Lucía: Miakej kijtoaj Jesús omikik pampa techmakixtis. Pero amo nikajsikamati itech tlen techmakixtia imikilis Jesús.

Linda: Tlaxtlauili noso tlamanali tlen okitemakak Jesús sapanoa oui moajsikamatis. Pero nin  se kualtsin tlamachtil tlen tikajsij itech Biblia. ¿Ok timajxilia?

Lucía: Kema.

Linda: Kuali. Yikin onimomachti nin tlamantli uan nimochijchikauas pampa amo okachi oui nimitsmachtis.

Lucía: Kuali.

Linda: Achto moneki tikajsikamatiskej tlen opanok itech xochitlali Edén ijkuak Adán uan Eva otlajtlakolchijkej. Ik non, ma tiktlajtoltikan tlen kijtoa Romanos 6:23. ¿Uelis tiktlajtoltis?

Lucía: Kema, nikan kijtoa: “Porke n tlajtlákoli tetlaxtlawia ika mikílistli, pero tlan Dios kitetliokolia ye n nemílistli non ayik tlami keman tiseititokeh iwan Toteko Cristo Jesús”.

Linda: Tlasojkamati. Ma timomachtikan nin tlaxelol. Xikita kanin peua kijtoa: “Porke n tlajtlákoli tetlaxtlawia ika mikílistli”. Nin se tlanauatil tlen toTajtsin Dios okitlali ijkuak opejkej tlaltikpaktlakamej: tlajtlakoli kichiua ma timikikan. Uan kema, ijkuak yikin okinchijchijkej tlaltikpaktlakamej ayamo otlajtlakolchiuayaj. Pampa ijkuak toTajtsin Dios okinchijchi Adán uan Eva yejuan amo okipiayaj tlajtlakoli. Uan inkoneuan noijki amo kipiaskiaj tlajtlakoli. Ik non, amo ikaj mikiskia. Adán, Eva uan inkoneuan uelis yolpakiskiaj nochipa. Pero ken tikmati, opanok itlaj tlen okijtlako nochi. ¿Tikilnamiki tlen opanok?

Lucía: Kema. Adán uan Eva okikuajkej se tlakilotl tlen amo omonekiaya kikuaskej.

Linda: Kema. Ijkon Adán uan Eva okipejpenkej amo kitlakamatiskej toTajtsin Dios uan otlajtlakolchijkej. Yejuan opejkej kipiaj tlajtlakoli. Uan nin okichi yejuan uan nochtin inkoneuan ma tlajyouikan.

Lucía: ¿Uan tejuan tleka titlajtlakolejkej? Tejuan amo otitlajtlakolchijkej.

Linda: Ma tiktlalikan se neskayotl. ¿Tikmati ken kinchijchiuaj tabiques?

Lucía: ¡Kema!

Linda: Axkan ximokuayejyeko tlen ika nankinchijchiuaj tabiques ouetski uan axkan chijkoltik. ¿Ken kisaskej okseki tabiques? Noijki kisaskej chijkoltikej.

Lucía: Kema.

Linda: Noijki ijkuak Adán uan Eva okipejpenkej amo kitlakamatiskej toTajtsin Dios, yejuan noijki chijkoltikej pampa otlajtlakolchijkej. Ken ijkuak otlajtlakolchijkej ayamo okinpiaya inkoneuan, nochtin inkoneuan kipiaskiaj tlajtlakoli. Itech Biblia tlajtlakoli amo san kijtosneki tlamantli amo kuali tlen kichiuaj tlaltikpaktlakamej, noijki kijtosneki ken tinochtin tiknekij titlajtlakolchiuaskej. Ik non, maski tejuan amo otitlajtlakolchijkej iuan Adán uan Eva, kema otikselijkej tlajtlakoli pampa tinochtin nochipa tiknekij titlajtlakolchiuaskej. Uan ken otiktlajtoltijkej itech Romanos 6:23, “porke n tlajtlákoli tetlaxtlawia ika mikílistli”.

Lucía: Pero non amo kuali. ¿Tleka tejuan noijki titlajtlakolejkej pampa itlaj tlen okichijkej Adán uan Eva?

Linda: Melauak tlen tikijtoa, amo kuali otechchiuilijkej. Pero toTajtsin Dios nochipa kichiua tlen kuali. Ik non, ye okijto Adán uan Eva omonekiaya ma mikikan pampa otlajtlakolchijkej. Pero nochtin ikoneuan kipiaskiaj se chialistli. Okiyektlali seki tlamantli pampa uelis momakixtiskej. Uan ijkon okitlali tlaxtlauili tlen okitemakak Jesús. Oksepa ma tiktlajtoltikan Romanos 6:23. Ompa kijtoa: “Porke n tlajtlákoli tetlaxtlawia ika mikílistli”, pero satepan kijtoa ika Jesús “Dios kitetliokolia ye n nemílistli non ayik tlami”. Ijkon imikilis Jesús uelis techmakixtis itech tlajtlakoli uan mikilistli. *

 TLAXTLAUILI: SE UEYI TETLIOKOLIL TLEN KITEMAKA TOTAJTSIN DIOS

Linda: Itech nin tlaxelol onka okseki tlajtoli tlen nechpaktiskia nimitsititis.

Lucía: ¿Tlen tlajtoli?

Linda: Xikita tlen kijtoa nikan: “Dios kitetliokolia ye n nemílistli non ayik tlami keman tiseititokeh iwan Toteko Cristo Jesús”. Tla Jesús otlajyoui uan omikik ijkuak okitemakak iyolilis ken tlaxtlauili, ¿tleka amo kijtoa “Jesús kitetliokolia”? *

Lucía: Amo nikmati tleka ijkon kijtoa.

Linda: Ijkuak itech xochitlali Edén Adán uan Eva amo okitlakamatkej toTajtsin Dios, yejuan otlajtlakolchijkej iixpan akin okinchijchi. Uan nin melauak okiyolkoko Jehová. Pero Jehová san niman omokuayejyeko ken uelis kiyektlalis nochi: se ikone tlen kajki iluikak ualaskia Tlaltikpak, yoltoskia ken tlakatl tlen amo okipiaya tlajtlakoli uan kitemakaskia iyolilis ken tlaxtlauili pampa nochtin tlaltikpaktlakamej. * Ik non, tlaxtlauili se tetliokolil tlen kitemaka toTajtsin Dios. Noijki ika okse tlamantli tikijtoaj se tetliokolil. ¿Yotimokuayejyeko tlen okimachili toTajtsin Dios ijkuak okimiktijkej Jesús?

Lucía: Amo.

Linda: Tejuatsin tikinpia mokoneuan, pampa onikinmitak itech iCena toTeko.

Lucía: Kema.

Linda: Ken tikinpia mokoneuan, uelis timokuayejyekos tlen okimachili Jehová ijkuak okitak okimiktiayaj iKone. ¿Tlen tikneltoka okimachili ijkuak okikitskijkej Jesús, okipinatijkej uan okiuitekej? Ximokuayejyeko ken sapanoa omoyolkoko ijkuak okitak iKone yolik omikiaya uan sapanoa temomojti tlen okichiuilijkej itech kuauitl kanin okimiktijkej.

Lucía: Amo keman onimokuayejyeko itech nin tlamantli. ¡Sapanoa temomojti!

Linda: Amo tikmatij tlen okimachili toTajtsin Dios. Pero Biblia kema techiluia tleka okika ma kimiktikan uan ma kitlajyouiltikan iKone. Itech Juan 3:16 techiluia tleka okika ijkon ma kipano. ¿Tikneki tiktlajtoltis?

Lucía: Kema. Nikan kijtoa: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo mamoixpolokah, yej makipiakah se yankuik nemílistli non ayik tlami”.

Itech tlaxtlauili mota toTajtsin Dios sapanoa techtlasojtla

Linda: Tlasojkamati. Oksepa ma tikitakan tlen kijtoa kanin peua nin tlaxelol. Nikan kijtoa: “Totajtsi Dios saikpanoa okintlasojtlak n tlaltikpaktlakah”. Nin tlajtoli tlen okachi ipati: tlasojtlalistli. Pampa toTajtsin Dios techtlasojtla ye okiualtitlanki iKone ma mikiki topampa. Sapanoa techtlasojtla toTajtsin Dios. Uan non tlen sejse xiuitl tiknekij tikilnamikiskej tiiTlaixpantijkauan Jehová, uan nin tikchiuaj itech tonal ijkuak omikik. ¿Axkan yotikajsikamatki tleka tikilnamikij nin tonal?

Lucía: Kema. Tlasojkamati pampa otinechmachti nin tlamantli.

¿Itlaj tlamachtil itech Biblia amo kuali tikajsikamati? ¿Mitspaktiskia tikmatis tleka tikchiuaj seki tlamantli? Tla ijkon, timitstlatlaujtiaj xikintlajtlani iTlaixpantijkauan Jehová. Yejuan ika miak pakilistli mitsiluiskej tleka ijkon titlaneltokaj.

^ párr. 5 Sejse xiuitl iTlaixpantijkauan Jehová monechikoaj pampa kilnamikiskej imikilis Jesús, tlamanali tlen okitemakak topampa. Nin xiuitl tikilnamikiskej viernes 3, metstli abril.

^ párr. 32 Itech okse tlamachtil tlen noijki kisas moijtos ken imikilis Jesús techmakixtia itech tlajtlakoli uan tlen moneki ma tikchiuakan pampa uelis timomakixtiskej.

^ párr. 36 Itech Biblia amo techiluia toTajtsin Dios uan Jesús san se. Tla tikneki tikmatis okachi, xiktlajtolti tlamachtil 4 itech amochtli ¿Tlen melauak tlamachtia Biblia?, tlen kichijchiuaj iTlaixpantijkauan Jehová uan

^ párr. 38 Xiktlajtolti Génesis 3:15.