Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Abril de 2015

¿Tikita Jehová ken moyolikni?

¿Tikita Jehová ken moyolikni?

“Xiwalmijkuanikah [noso, ximotokikan] inawak Dios, iwa Ye mijkuanis [noso, motokis] nomonawak.” (SANTIAGO 4:8)

1. ¿Tleka moneki okachi kuali ma timouikakan iuan Jehová?

ITLAIXPANTIJKAUAN Jehová tikpiaj itlaj tlen miak ipati. Timouikaj iuan Jehová. Miak ipati okachi kuali ma timouikakan iuan Jehová. ¿Tleka? Pampa nochi tlen kiyekana Satanás uan ken titlajtlakolejkej, non uelis kichiuas ayakmo kuali ma timouikakan iuan Jehová.

2. 1) ¿Tlen kijtosneki timouikas iuan ikaj? (Xikita tlajtoli tlen kiualika tlakxitlan.) 2) ¿Ken uelis okachi kuali timouikaskej iuan Jehová?

2 ¿Tikita Jehová ken moyolikni? ¿Tikneki okachi kuali timouikas iuan Jehová? Santiago 4:8 techiluia: “Xiwalmijkuanikah [noso, ximotokikan] inawak Dios, iwa Ye mijkuanis [noso, motokis] nomonawak”. Ken tikitaj, pampa kuali timouikas iuan Jehová, moneki itlaj tikchiuas. * (Xikita tlajtoli tlen kiualika tlakxitlan.) Tla timotokia itech Jehová, ye noijki motech motokis. Tla okachi timotokis itech Jehová, okachi kuali iuan timouikas. Uan timomachilis ken Jesús akin okijto: “Ye yekmilajka” uan, “Ne nikixmati” (Juan 7:28, 29). Ma tikitakan tlen uelis tikchiuaskej pampa ma timotokikan itech Jehová.

¿Ken timotlapouiaj iuan Jehová? (Xikita párrafo 3)

3. ¿Ken uelis timotlapouiskej iuan Jehová?

 3 Tla tiknekij timotokiskej itech Jehová, miak ipati kuali iuan ma timotlapouikan. ¿Ken uelis kuali timotlapouiskej? Ma tiktlalikan se neskayotl. Tla ome yoliknimej tlen uejka katej kinekij motlapouiskej, ¿tlen uelis kichiuaskej? Nochipa motlapouiaj ika teléfono noso motlajkuililiaj. Noijki ijkon moneki ma tikchiuakan iuan Jehová. ¿Ken timotlapouiaj iuan Jehová? Nochipa ma tiktlatlaujtikan (xiktlajtolti 1 Tesalonicenses 5:17). ¿Uan ye ken techtlapouia? Ye techtlapouia ika Biblia. Ik non, moneki mojmostla ma tiktlajtoltikan uan ma timokuayejyekokan itech tlen kijtoa, ijkon tikkakij tlen techiluia (xiktlajtolti Isaías 30:20, 21). Ken axkan timomachtiskej, tla nochipa timotlapouiaj iuan Jehová, okachi kuali iuan timouikaskej.

JEHOVÁ TECHTLAPOUIA IKA BIBLIA

4, 5. 1) ¿Ken techtlapouia Jehová ika Biblia? 2) Xikijto ika se neskayotl.

4 Tikmatij tlen Biblia kijtoa uelis kinpaleuis nochtin tlaltikpaktlakamej. Pero Biblia noijki uelis techpaleuis sejse tejuan okachi ma timotokikan itech Jehová. Ik non, ijkuak tiktlajtoltiaj Biblia uan timokuayejyekoaj itech tlen kijtoa, moneki tikmatiskej tlen tikmachiliaj. Noijki moneki ma timokuayejyekokan ken uelis tikchiuaskej tlen otiktlajtoltijkej. Ijkuak ijkon tikchiuaj, tikitaskej ken Jehová techtlapouijtoskia. Uan ijkuak tikitaj techpaleuia, okachi kuali timouikaj iuan Jehová (Hebreos 4:12; Santiago 1:23-25).

5 Ma tiktlalikan se neskayotl. Itech Mateo 6:19 uan 20 Jesús okijto: “Amo xikoololokah miak tomi itech nin tlaltíkpaktli”. ¿Tlen tikmachiliaj ijkuak tiktlajtoltiaj tlen nikan kijtoa? Tla timochijchikajtokej pampa tikteititiskej Jehová okachi ipati itech tonemilis, tikmachiliskej Jehová yolpaki ika tlen tikchiuaj. Tla tikitaj moneki okachi tikpatioitaskej Jehová, okachi moneki ma tiktekichiuilikan. Ijkuakon tikajsikamatiskej Jehová techpaleuijtok pampa ma tikmatikan tlen moneki ma tikchiuakan tejuan pampa uelis itech timotokiskej.

6, 7. 1) Ijkuak timomachtiaj Biblia, ¿ken timouikaj iuan Jehová? 2) ¿Tleka tiknekij timomachtiskej Biblia?

6 Melauak, ijkuak timomachtiaj Biblia tikitaj tlen moneki tikpatlaskej itech tonemilis pampa okachi kuali tiktekichiuiliskej toTajtsin Dios. Pero noijki tikmatij ken iyelis uan tlen tlamantli kichiua pampa techtlasojtla. Ika nochi nin tlamantli okachi tiktlasojtlaj Jehová. Uan ye noijki okachi techtlasojtla. Uan noijki okachi kuali timouikaj iuan Jehová (xiktlajtolti 1 Corintios 8:3).

7 Tla tiknekij timotokiskej itech Jehová, miak ipati ma timomachtikan Biblia pampa melauak tiktlasojtlaj. Jesús okijto: “Tla mitsixmatiskeh sanwel Tejwatsi n de milajka Dios, iwa Cristo Jesús,  Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3). Uan itech Biblia tikajsij miak tlamantli tlen miak ipati. Pero amo non tlen okachi tikpatioitaj. Timomachtiaj Biblia pampa tiknekij kuali tikixmatiskej Jehová (xiktlajtolti Éxodo 33:13; Salmo 25:4).

8. 1) ¿Tlen mokuayejyekoaj miakej itech tlen Jehová okichiuili Azarías? 2) Ken tejuan kuali tikixmatij Jehová, ¿tlen tikmatij?

8 Tla tikitaj Jehová ken toyolikni, amo techtekipachos tleka itech Biblia amo moijtoa tleka Jehová okichi seki tlamantli. Se neskayotl, ma timokuayejyekokan itech tlen okipanok se ueyi tekiua tlen okatka itech altepetl Judá, omotokayotiaya Azarías. Ijkuak ye otlanauatijtoka, judíos okinueyichiuayaj okseki teotsitsintin. Pero nin ueyi tekiua amo okichi ken yejuan, pampa Azarías nochipa okichi tlen kuali iixpan Jehová (2 Reyes 15:1-5). Pero Jehová okitlajyouilti ika se kokolistli. ¿Tleka? Nikan amo tikajsij tleka ijkon okipanok. Miakej uelis kijtoskej Jehová amo kuali tlen okichi uan amo okinamikiaya tlajyouis. Pero tejuan kuali tikixmatij Jehová uan tikmatij ye nochipa kichiua tlen kuali (Jeremías 30:11). Ik non, maski amo tikmatij tleka Jehová okitlajyouilti nin ueyi tekiua, kema tikmatij Jehová okichi tlen kuali.

9. ¿Tleka Jehová okitlajyouilti ueyi tekiua Azarías?

9 Itech okseki tlaxelolmej itech Biblia techtlapouia itech ueyi tekiua Azarías, tlen noijki moixmati ken Uzías (2 Reyes 15:7, 32). Itech 2 Crónicas 26:3-5, 16-21 techiluia nin ueyi tekiua nochipa okichi tlen kuali iixpan Jehová. Pero noijki techiluia satepan opejki moueyineki. Se tonal ye okinekiaya kichiuas tekitl tlen san okinnamikiaya kichiuaskej teopixkej. 81 teopixkej okiluijkej amo kuali tlen okichijtoka uan okinekiayaj kitsakuiliskej. Pero nin ueyi tekiua sapanoa omoueyinekiaya, ik non, okualanki uan amo okinkak. Nin tlamantli techpaleuia tikmatiskej tleka Jehová okitlajyouilti.

10. 1) ¿Tleka amo moneki tikmatiskej nochi itech tlen Jehová kichiua? 2) ¿Tlen uelis tikchiuaskej pampa tikneltokaskej Jehová nochipa kichiua tlen kuali?

10 Nin neskayotl techmachtia itlaj tlen miak ipati. Itech tlen okipanok Azarías tikajsij miak tlamantli tlen techpaleuia ma tikmatikan tleka toTajtsin Dios okitlajyouilti. Pero itech Biblia onka seki tlapoualismej tlen amo techiluiaj tleka Jehová kichiua seki tlamantli. Ijkuak tikajsiskej se tlapoualistli ijkon, ¿tikneltokaskej Jehová amo okichi tlen kuali? Noso ¿tikneltokaskej Jehová nochipa kichiua tlen kuali? (Deuteronomio 32:4). Itech Biblia tikajsij miak tlamantli tlen kichiua kuali ma tikixmatikan Jehová uan itech ma titlaneltokakan. Tla kuali tikixmatij uan tiktlasojtlaj amo tiknekiskej tikmatiskej tleka kichiua seki tlamantli. Pero ¿ken uelis titlaneltokaskej itech tlen Jehová kichiua? Ma timomachtikan Biblia. Ijkon uelis kuali timouikaskej iuan Jehová (Salmo 77:12, 13).

Tikmatij Jehová techkaki ijkuak timotlatlaujtiaj

TIMOTLAPOUIAJ IUAN JEHOVÁ IJKUAK TIMOTLATLAUJTIAJ

11-13. ¿Tleka tikmatij toTajtsin Dios techkaki ijkuak tiktlatlaujtiaj? (Xikita tlaixkopinal tlen ika peua tlamachtil.)

11 Ijkuak tiktlatlaujtiaj Jehová, tikueyichiuaj, tiktlasojkamatiliaj uan noijki tikiluiaj ma techpaleui. Ijkon okachi itech timotokiaj (Salmo 32:8). Pero tla tiknekij timouikaskej iuan Jehová, moneki tikneltokaskej ye melauak techkaki.

12 Miakej kijtoaj toTajtsin Dios amo kinkaki tlaltikpaktlakamej. Kijtoaj tlatlaujtilistli san kichiua kuali ma timomachilikan. Miakej kijtoaj tlatlaujtilistli kichiua ma timokuayejyekokan  itech ouijkayotl tlen tikpiaj uan ma tiktemokan tejuan ken uelis tikyektlaliskej. Kema, tlatlaujtilistli noijki ijkon uelis techpaleuis. Pero ijkuak tiktlatlaujtiaj Jehová, ye melauak techkaki. ¿Tleka ijkon tikijtoaj?

13 Ma timokuayejyekokan itech Jesús. Achto ualaskia Tlaltikpak, ye okitak ken Jehová okinnankiliaya tlaltikpaktlakamej. Uan ijkuak ouala Tlaltikpak, Jesús okitlatlaujti iTajtsin uan okilui tlen omokuayejyekoaya uan okimachiliaya. Se uelta nochi yoak omotlatlaujti (Lucas 6:12; 22:40-46). Uan noijki okinmachti imachtijkauan ken uelis motlatlaujtiskej. Tla Jesús kimatiskia toTajtsin Dios amo okinkakiaya tlaltikpaktlakamej, amo kichiuaskia nochi tlen otikijtojkej. Ye okimatiaya Jehová kema kinkaki tlatlaujtilmej. Ik non, Jesús okilui iTajtsin: “Notajtsi, nimitstlasojkamati porke otechkak. Ne nikmatok nochipa techkaki”. Tejuan noijki tikneltokaj Jehová techkaki ijkuak tiktlatlaujtiaj (Juan 11:41, 42; Salmo 65:2).

Nochipa uelis timotokiskej okachi itech Jehová

14, 15. 1) ¿Tleka moneki tikiluiskej Jehová tlen melauak tiknekij? 2) ¿Ken tlatlaujtilistli okipaleui se tokni?

14 Uelis ualeua amo tikmatij ken technankilia Jehová. Pero tla tikiluiaj tlen tiknekij, uelis tikitaskej ken technankilia. Ijkuakon okachi kuali timouikaskej iuan Jehová. Tla ika nochi toyolo tikiluiaj tlen techtekipachoa, ye okachi totech motokis.

15 Ma tikitakan ineskayo se tokni tlen itoka Kathy. * (Xikita tlajtoli tlen kiualika tlakxitlan.) Ye kijtoa ijkuak ok otekitiaya noijki otetlapouiaya, pero amo okipaktiaya tetlapouis. Ijkuak ayakmo otekitiaya, se tlayekanki okiyolchika pampa ma tekiti ken precursora regular. Ye okikak tlen okilui tokni. Uan noijki mojmostla okitlajtlaniliaya Jehová ma kipaleui pampa ma kipakti tetlapouis. ¿Okikak toTajtsin Dios? Axkan Kathy yikipia eyi xiuitl tekititok ken precursora regular. Uan ye kijtoa ken axkan okachi  tetlapouia uan miakej tokniuan kipaleuiaj, axkan ye okachi kuali tetlapouia. ¡Axkan kipaktia tetlapouis! Pero ye kijtoa axkan okachi kuali mouika iuan Jehová. Ken tikitaj, tlatlaujtilistli okipaleui tokni okachi kuali ma mouika iuan Jehová.

Nochipa ma timotokikan itech Jehová (Xikinmita párrafos 16 uan 17)

MA TIKCHIUAKAN TLEN MONEKI

16, 17. 1) ¿Tlen moneki ma tikchiuakan pampa mojmostla okachi kuali ma timouikakan iuan Jehová? 2) ¿Tlen timomachtiskej chikome?

16 Nochipa uelis timotokiskej itech Jehová. Ik non, ma tikakikan ijkuak tiktlajtoltiaj Biblia mojmostla, uan ma tiktlapouikan ijkuak timotlatlaujtiaj. Tla tikchiuaj, mojmostla okachi kuali timouikaskej iuan Jehová. Uan ika ipaleuilis uelis tikxikoskej nochi ouijkayotl.

17 Uan maski nochipa tiktlatlaujtiskej Jehová, uelis ok titlajyouijtoskej. Nin uelis kichiuas ayakmo ma titlaneltokakan itech Jehová. Uelis timokuayejyekoskej Jehová amo kinkaki totlatlaujtiluan uan uelis timotlajtlaniskej kox iuan timouikaj. Tla ijkon timomachiliaj, ¿tlen uelis tikchiuaskej? Chikome timomachtiskej.

^ párr. 2 Yekuikalistli kijtosneki ijkuak ome tlaltikpaktlakamej motlasojtlaj uan moneltokaj. Pampa nochipa kuali ma mouikakan moneki ma kichikauakan ken mouikaj.

^ párr. 15 Otikpatilijkej itoka.