Xikita nochi

Tlen kiualika

 TLAMACHTIL TLEN IKA PEUA | ¿MITSPAKTIA MOTEKI?

¿Ken uelis tiyolpakiskej ijkuak chikauak titekitij?

¿Ken uelis tiyolpakiskej ijkuak chikauak titekitij?

“Nochtin ma tlakuakan uan ma konikan uan ma kitakan tlen kuali pampa chikauak tekitij. Nin itetliokolil toTajtsin Dios.” (Eclesiastés 3:13.) Tla toTajtsin Dios kineki ma tiyolpakikan itech toteki, ¿amo moneki ma techititi ken uelis tiyolpakiskej? (Isaías 48:17). Uan non tlen kichiua itech iTlajtol, Biblia. Ma tikitakan ken uelis tiyolpakiskej itech toteki.

MA TIMOKUAYEJYEKOKAN TLEN KUALI ITECH TOTEKI

Itech moteki uelis moneki ximochijchikaua noso sapanoa ximokuayejyeko, pero xikilnamiki itech nochi tekitl uelis itlaj kuali tikseliskej (Proverbios 14:23). ¿Tlen uelis tikpiaskej? Achto, toteki techmaka nochi tlen techpoloa. ToTajtsin Dios kijtoa kinmakas tlen kinekij nochtin akinmej mochijchikauaj kitekichiuiliskej (Mateo 6:31, 32). Pero noijki kijtoa moneki chikauak ma titekitikan (2 Tesalonicenses 3:10).

Ximokuayejyeko ika moteki uelis tikpias itlaj: tlen moneki. Joshua, tlen kipia 25 xiuitl kijtoa: “Tikpias tlen moneki sapanoa miak ipati. Tla ueli tiktlaxtlaua tlen tikneki, uelis tikijtoskej moteki mitspaleuia”.

Noijki ijkuak chikauak titekiti okachi timopatioita. ¿Tleka ijkon tikijtoaj? Sapanoa oui titekitiskej chikauak, pero tla timochijchikauaj uan amo timosotlauaj, tiyolpakiskej pampa tikmatiskej otikchijkej tlen omonekiaya; uan amo tikchiuaskej ken oksekimej akinmej amo kinpaktia tekitiskej chikauak (Proverbios 26:14). Uan non kichiua kuali ma timomachilikan. Aaron itech akin otimomachtijkej itech achto tlamachtil kijtoa: “Uelis ijkuak tlami tonal sapanoa nisotlaua,  noso uelis amo ikaj okitak tlen onikchi; pero ne nikmati itlaj onikchi uan non nechyolpaktia”.

KUALI XITEKITI

Biblia kinueyichiua tlakamej uan siuamej akinmej kuali tekitij ika inmauan (Proverbios 22:29; 31:13). Amo uelis san totoka kuali tikchiuaskej toteki, uan noijki amo ikaj kipaktia kichiuas itlaj tlen amo kiyolpaktia. Ik non, uelis miakej amo kinpaktia inteki, pampa amo mochijchikauaj kuali tekitiskej.

Nochtin uelis tiyolpakiskej itech toteki tla kuali titekitij. William akin kipia 24 xiuitl kijtoa: “Sapanoa timochijchikauaskej uan tikitaskej tlen tikchiuaj sapanoa teyolpaktia. Amo keman tiyolpakis tla amo timochijchikaua”.

XIMOKUAYEJYEKO KEN TLAPALEUIA MOTEKI

Amo san ximokuayejyeko itech kech mitstlaxtlauiskej. Ximotlajtlani: “¿Tleka miak ipati noteki? ¿Tlen panos tla amo ikaj kichiuas noso amo kuali kichiuas? ¿Ken kinpaleuia oksekimej tlen nikchiua?”

Nin tlajtlanilistli miak ipati, pampa itlanankilis kichiuas ma tiyolpakikan itech toteki. Jesucristo okijto: “Okachi makipia pakílistli n tlakatl non tlapalewia ika tlan kipia, iwa amo akin kipalewiah” (Hechos 20:35). Uan amo san akinmej tikintekichiuiliaj noso akinmej tikinnemakiltiaj itlaj mopaleuiaj ika totekij, noijki mopaleuiaj tokalchanejkauan uan noijki ueli tikpiaj tlen tiknekij.

Tokalchanejkauan. Ijkuak se tlakatl noso isiua mochijchikauaj pampa kinmakaskej ikalchanejkauan tlen moneki, kinpaleuiaj itech ome tlamantli. Achto, kinmakaj tlen okachi moneki: tlakuali, intlaken uan se kali; ijkon kitlakamatij itlanauatil toTajtsin Dios uan kinmakaj tlen kinekij inkalchanejkauan (1 Timoteo 5:8). Uan noijki kinmachtiaj ika inneskayo ken moneki chikauak tekitiskej. Shane kijtoa: “Notajtsin se kuali neskayotl itech tekitl: pampa amo tlachteki uan itech nochi inemilis tekiti, uan yiuejkika tekiti ken kuajxinki. Ye onechmachti chikauak ma nitekiti ika nomauan, uan ma nikchiua tlamantli tlen kinpaleuia tlaltikpaktlakamej”.

Akinmej amo itlaj kipiaj. Tlatitlanil Pablo okijto akinmej melauak kichiuaj ken Cristo omonekiaya “matekitikan ika inmawah para makipiakan tlan ika kimpalewisken akimeh kimpoloa” (Efesios 4:28). Tla timochijchikauaj pampa tikinpaleuiskej tokalchanejkauan uelis noijki tikinpaleuiskej akinmej amo itlaj kipiaj (Proverbios 3:27). Kema, tla chikauak titekitij uelis tiyolpakiskej ijkuak oksekimej tikinpaleuiaj.

 OKACHI XITEKITI

Ijkuak Jesús otlamachti itech tepetl okinmilui imachtijkauan tla ikaj akin kipia tlanauatilistli kinmiluia ma kiuikili “itlamamal se kilómetro” omonekiaya kiuikiliskej “ome kilómetro” (Mateo 5:41). ¿Ken uelis tikchiuas ijkon ken kijtoa nin tlanauatil? Ximochijchikaua pampa okachi titekitis uan amo san tlen mitsnauatiaj. Ximochijchikaua mojmostla kuali titekitis uan totoka. Kuali xikchiua noijki tlamantli tlen mota amo okachi ipati.

Tla ijkon tikchiua uelis okachi tiyolpakis. ¿Tleka? Pampa amo tikchiua pampa ikaj mitschiualtia, tikchiua pampa non mitsyolpaktia. Tejuatsin tikijtos tlen tikchiuas (Filemón 14). Non techilnamiktia ken inmauan akinmej chikauak tekitij tlanauatiskej pero akinmej tlatsijkej kinchiualtiskej ma tekitikan (Proverbios 12:24). Uelis amo keman tiyetoskej titlakeualmej nion amo techchiualtiskej ma titekitikan. Pero tla amo timochijchikauaj uelis ijkon timomachiliskej, ken intlakeualuan akinmej techtlajtlaniliaj. Okachi ximochijchikaua, uan tiyolpakis pampa tikchiuas tlen tejuatsin tikneki.

AMO NOCHIPA XITEKITITO

Maski miak ipati chikauak ma titekitikan, amo san non moneki tikchiuaskej. Biblia techyoleua ma titekitikan (Proverbios 13:4). Pero amo nochipa ma titekititokan. Itech Eclesiastés 4:6 kijtoa okachi kuali ma timoseuikan uan amo miak ma titekitikan. ¿Tlen techmachtia? Uelis akin nochipa tekititok amo kita ken miak ipati tlen kichiua, uan nin pampa sapanoa sotlaua uan amo kipia kauitl. Eclesiastés kijtoa nin amo itlaj ipati, ken motlaloskia ikuitlapan ejekatl.

Biblia mitspaleuis pampa amo nochipa xitekitito. Uan maski itech Biblia kijtoa chikauak ma titekitikan, noijki kijtoa moneki tikitaskej tlen tlamantli okachi ipati (Filipenses 1:10). ¿Tlen tlamantli okachi ipati? Tiyetoskej iuan tokalchanejkauan uan toyolikniuan. Uan okachi ipati ma timomachtikan Biblia uan itech ma timokuayejyekokan.

Okachi yolpakij tlaltikpaktlakamej akinmej kuali kimatij tlen kichiuaskej. William techiluia: “Se noteko tlen achto onikpiaya se kuali neskayotl itech ken amo moneki nochipa titekititoskej. Chikauak tekiti uan nochtin akinmej kinnemakiltia itlaj sapanoa yolpakij pampa kuali tlen kichiua. Pero ijkuak tlami tonal, kilkaua nochi uan axkan san motekipachoa itech ikalchanejkauan uan itlaneltokilis. Uan ye sapanoa yolpaki”. ▪