Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Febrero de 2015

Ma tiyetokan tiyolchikauakej uan kuali ma tikpejpenakan ken Jesús

Ma tiyetokan tiyolchikauakej uan kuali ma tikpejpenakan ken Jesús

“Nomejwah nonkitlasojtlah n Cristo, iwa nonkineltokah maya amo nonkitah.” (1 PEDRO 1:8)

1, 2. 1) ¿Tlen moneki ma tikchiuakan tla tiknekij tiyoltoskej nochipa? 2) ¿Tlen techpaleuis ma titlaxikokan hasta ijkuak tlamis nochi tlen amo kuali?

PEUAS tikchiuaskej ken Cristo ken tiaskiaj itech se ojtli. Ijkuak tlamis nin ojtli tikseliskej yolilistli tlen amo keman tlamis. Jesús okijto: “Akin nochi kixikos, momakixtis” (Mateo 24:13). ¿Tlen moneki ma tikchiuakan tla tiknekij tiyoltoskej nochipa? Moneki tiyetoskej tiyolmelajkej hasta ijkuak tlamis nochi tlen amo kuali noso hasta ijkuak timikiskej. Pero onka seki tlamantli tlen uelis kichiuas ayakmo ma tiyetokan tiyolmelajkej (1 Juan 2:15-17). ¿Tlen techpaleuis nochipa ma tiyetokan tiyolmelajkej?

2 Moneki ma tikchiuakan ken Jesús. Biblia techmachtia tlen okichiuaya Jesús. Tla timomachtiaj tlen Biblia techiluia itech Jesús, tiktlasojtlaskej uan uelis itech titlaneltokaskej (xiktlajtolti 1 Pedro 1:8, 9). Tlatitlanil Pedro otechilui kuali ma tikitakan tlen okichi Jesús uan ijkon uelis kuali tikchiuaskej tlen ye okichi (1 Pedro 2:21). Tla ijkon tikchiuaj, uelis titlaxikoskej hasta ijkuak tlamis nochi tlen  amo kuali. * (Xikita tlajtoli tlen kiualika tlakxitlan.) Yichikome otimomachtijkej ken uelis tiyetoskej tiyolyamankej uan ken uelis titeiknomatiskej ken Jesús. Axkan timomachtiskej ken uelis tiyetoskej tiyolchikauakej uan ken uelis kuali tikpejpenaskej tlen tikchiuaskej ken Jesús.

JESÚS YOLCHIKAUAK

3. 1) ¿Tlen kijtosneki yolchikaualistli? 2) ¿Tlen techpaleuis ma tiyetokan tiyolchikauakej?

3 Yolchikaualistli kijtosneki titlaxikoskej maski sapanoa titlajyouijtoskej. Noijki kijtosneki tikpaleuiskej tlen kuali, amo san niman tikualaniskej uan amo keman ma tikkauakan toTajtsin Dios maski sapanoa titlajyouiskej. Ken amo tiknekij tikyolkokoskej toTajtsin Dios, amo techmomojtia tlen oksekimej techchiuiliaj (1 Samuel 11:7; Proverbios 29:25). Tla titlaneltokaj itech tlen techmakas Jehová, amo techtekipachos tlajyouilistli, okachi kuali tikchiaskej tlen Jehová satepan techmakas (Salmo 27:14). Uan tla tikintlasojtlaj oksekimej, tikinpaleuiskej maski timikiskej (Juan 15:13). ¿Tlen techpaleuis ma tiyetokan tiyolchikauakej? Ma titlaneltokakan itech Jehová uan ma tikchiuakan ken Jesús (Salmo 28:7).

4. ¿Ken okiteititi Jesús yolchikaualistli ijkuak okatka itech teokali? (Xikita tlaixkopinal tlen ika peua tlamachtil.)

4 Jesús okiteititi yolchikaualistli se tonal ijkuak okatka “itech Weyi Tiopa de Jerusalén. Ye oewatoka tlatlajkotia de kan oewatokah non kitemachtiah n tlanawatílistli” (xiktlajtolti Lucas 2:41-47). Ye san okipiaya 12 xiuitl uan nonmej tlakamej okimatiayaj miak itech tlanauatil tlen okijkuilo Moisés. Noijki okimatiayaj miak tlamantli tlen okichiuayaj judíos, non okichiuaya okachi oui ma kitlakamatikan Tlanauatil. Pero Jesús amo omomojti. Ik non, okinchiuili miakej tlajtlanilmej. Pero amo okintlajtlani tlen se konetl tetlajtlaniskia. Uelis okintlajtlani tlen okichi kuali ma kikakikan uan ma mokuayejyekokan akinmej otlamachtiayaj. Uelis yejuan noijki okitlajtlanijkej seki tlamantli pampa kitaskiaj akin okachi kimati, pero amo ueli okichijkej. Akinmej okikakej Jesús uan noijki akinmej otlamachtiayaj omotlajtlachialtijkej pampa nochi tlen okimatiaya uan ken otlajtoaya. Jesús okatka yolchikauak uan okipaleui tlen melauak.

5. ¿Ken okiteititi yolchikaualistli Jesús ijkuak otetlapouiaya?

5 Jesús noijki okiteititi yolchikaualistli ijkuak otetlapoui, uan okichi miak uelta. Se neskayotl, amo omomojti uan okijto tlayekankej teopixkej okinkajkayauayaj tlaltikpaktlakamej ika nochi tlen otlamachtiayaj (Mateo 23:13-36). Jesús noijki amo keman okichi tlen amo kuali (Juan 16:33). Nochipa otetlapoui maski sekimej amo okinekiayaj (Juan 5:15-18; 7:14). Uan noijki ome uelta okinkixti akinmej otlanemakatokaj itech teokali (Mateo 21:12, 13; Juan 2:14-17).

Ijkuak okixkomakakej, ika miak yolchikaualistli Jesús okijto ye iKone toTajtsin Dios uan noijki ye Cristo

6. ¿Ken okiteititi yolchikaualistli Jesús itech saiktlami tonal ijkuak okatka itech Tlaltikpak?

6 Ma tikitakan ken Jesús okiteititi yolchikaualistli itech saiktlami tonal ijkuak okatka itech Tlaltikpak. Ye okimatiaya tlen kipanoskia ijkuak Judas kitemaktiliskia. Pero ye okilui: “Tlan tikchiwas sansemi xikchiwa” (Juan 13:21-27). Ijkuak soldados okinekiayaj kikitskiskej ye amo omotlati. Maski ye mikiskia, okika ma kikitskikan uan  okinmilui soldados ma kinkauakan itlatitlaniluan ma cholokan (Juan 18:1-8). Ijkuak ye okatka inmixpan akinmej okachi inpati tlen okipiayaj judíos, ika miak yolchikaualistli Jesús okijto ye iKone toTajtsin Dios uan noijki ye Cristo. Tlayekanki teopixki okitemoaya ken uelis kimiktiskia, pero Jesús amo omomojti (Marcos 14:60-65). Jesús okatka yolmelajki maski okimiktijkej. Ik non, achto mikiskia okijto: “¡Nochi yomochi!” (Juan 19:28-30).

MA TIYETOKAN TIYOLCHIKAUAKEJ KEN JESÚS

7. 1) Telpochtli, ¿tlen tikmachilia pampa tiitlaixpantijka Jehová? 2) ¿Ken uelis tikteititis yolchikaualistli?

7 ¿Ken uelis telpokamej yetoskej yolchikauakej ken Jesús kanin momachtiaj? Miakej telpokamej yolchikauakej uan kinmiluiaj akinmej iuan momachtiaj noso akinmej kinmachtiaj yejuan iTlaixpantijkauan Jehová. Tla ok timomachtijtok uelis tikinmiluis oksekimej te tiiTlaixpantijka Jehová, maski oksekimej mitspinatiskej. Ijkon tikteititis tiyolpaki tikijtos tiiTlaixpantijka Jehová (xiktlajtolti Salmo 86:12). Uelis sekimej akinmej mitsmachtiaj mitschiualtiskej xitlaneltoka tiuitsej itech se yolkatl. Pero uelis tikneltokas Biblia nochipa kijtoa tlen melauak. Tla ikaj mitsiluia tleka tikneltoka ikaj otechchijchi, uelis tiktekitiltis amatlajkuilol El origen de la vida (1 Pedro 3:15). Ijkon tiyolpakis pampa otikijto ika miak yolchikaualistli tlen melauak tlamachtia Biblia.

8. ¿Tleka uelis tiyetoskej tiyolchikauakej ijkuak titetlapouiaj?

8 Noijki tiyolchikauakej ijkuak titetlapouiaj. (Hechos 14:3). ¿Tleka uelis tikteititiskej yolchikaualistli ijkuak titetlapouiaj? Achto pampa titetlapouiaj tlen kijtoa Biblia. Uan Biblia kijtoa tlen melauak (Juan 17:17). Noijki pampa tejuan “titlapalewijkeh itech iteki Dios”, uan ye techpaleuia ika iespíritu santo (1 Corintios 3:9; Hechos 4:31). Uan noijki pampa tiktlasojtlaj Jehová uan tlaltikpaktlakamej. Nin techyolchikaua ma titetlapouikan (Mateo 22:37-39). Nochipa titetlapouiaj pampa tiyolchikauakej. Tiknekij tikinmachtiskej tlen melauak nochtin tlaltikpaktlakamej akinmej tlayekankej teopixkej san kinkajkayauaj (2 Corintios 4:4). Nochipa titetlapouiskej maski sekimej amo kinekiskej techkakiskej uan maski techtojtokaskej (1 Tesalonicenses 2:1, 2).

9. ¿Ken uelis tikteititiskej yolchikaualistli ijkuak sapanoa titlajyouijtokej?

9 Noijki tiyolchikauakej ijkuak titlajyouiaj. Tla titlaneltokaj itech Jehová ye techmakas chikaualistli uan tlaneltokilistli pampa ma titlaxikokan. Se neskayotl, tla ikaj miki timoyolkokoaj, pero tikchiaj tikitaskej. Tikmatij Jehová techpaleuis pampa ye “nochipa techyolchikawa” (2 Corintios 1:3, 4; 1 Tesalonicenses 4:13). Tla timokokoaj uan maski sapanoa titlajyouijtokej, amo tikseliaj pajtli tlen kichiuas amo ma tiktlakamatikan Jehová (Hechos 15:28, 29). Uan tla timoyolkokoaj, uelis tlen timokuayejyekoaj kichiua okachi amo kuali ma timomachilikan, pero amo timosotlauaj. Tikmatij Jehová nochipa kinpaleuia akinmej tlajyouiaj (1 Juan 3:19, 20; 2 Corintios 7:6).

JESÚS KUALI KIPEJPENA

10. 1) ¿Tlen moneki ma tikchiuakan pampa kuali tikpejpenaskej? 2) ¿Ken tikteititiaj kuali tikpejpenaj ika tlen tikchiuaj uan ken titlajtoaj?

10 Pampa kuali tikpejpenaskej moneki ma tikmatikan ken tlatlamantli tlen kuali uan tlen amo kuali, uan ma tikpejpenakan tlen kuali (Hebreos 5:14). Motas tla kuali tikpejpenaj ika tlen tikchiuaj uan ken titlajtoaj. ¿Ken? Moneki ma tikpejpenakan tlen tikijtoskej pampa amo ma tikinyolkokokan oksekimej, okachi kuali ma tikinpaleuikan. Nin tlen kineki toTajtsin Dios ma tikchiuakan (Proverbios 11:12, 13). Noijki tikteititiaj ijkuak amo tikualanij (Santiago 1:19). Timouikaj iuan toTajtsin Dios tla kuali tikpejpenaj tlen tikchiuaskej (Proverbios 15:21). ¿Tlen uelis tikchiuaskej pampa kuali ma tikpejpenakan? Moneki ma timomachtikan Biblia uan ma tikchiuakan  tlen ompa techiluia (Proverbios 2:1-5, 10, 11). Noijki uelis tikitaskej ken Jesús kuali okipejpenki tlen kichiuas uan noijki ijkon ma tikchiuakan.

11. ¿Ken Jesús kuali okipejpenki ijkuak otlajtoaya?

11 ¿Ken Jesús kuali okipejpenki tlen kichiuas? Ma tikitakan seki neskayomej. Achto, kuali okipejpenki ijkuak otlajtoaya. Miakej omotlajtlachialtiayaj ika tlen Jesús otlamachtiaya, pampa ye kuali okinmachtiaya (Mateo 7:28; Lucas 4:22). Noijki nochipa okijtoaya tlen kijtoa iTlajtol toTajtsin Dios. Ye okimatiaya tlen omonekiaya kijtos itech iTlajtol toTajtsin Dios (Mateo 4:4, 7, 10; 12:1-5; Lucas 4:16-21). Uan noijki ijkuak okinmiluiaya iTlajtol toTajtsin Dios oajsiaya itech inyolo tlaltikpaktlakamej. Se neskayotl, satepan ijkuak okiyolitijkej Jesús okinyekilui sekimej imachtijkauan tlen onejnemiayaj itech ojtli nochi itech iTlajtol toTajtsin Dios. Yejuan omoyolchikajkej, ik non, okijtojkej: “Satlawel otiyoltlatlayah keman otechtlapowijtiwalaya itech ojtli” (Lucas 24:27, 32).

12, 13. ¿Tlen neskayomej techmachtiaj Jesús amo san niman okualaniaya uan okajsikamatiaya tlen okinpanoaya oksekimej?

12 Noijki ika tlen okichi okiteititi kuali okipejpenki. Jesús amo san niman okualaniaya (Proverbios 16:32). Ye okatka yolkuali uan okimatiaya amo omonekiaya kualanis (Mateo 11:29). Noijki ijkuak imachtijkauan okichiuayaj itlaj amo kuali amo okinmajuaya (Marcos 14:34-38; Lucas 22:24-27). Uan noijki amo okualanki nion ijkuak okitlajyouiltijtokaj (1 Pedro 2:23).

13 Jesús noijki okajsikamatiaya tlen okinpanoaya oksekimej. Se neskayotl, ma timokuayejyekokan itech siuatl tlen yiuejkika oeskisaya (xiktlajtolti Marcos 5:25-34). Ye okitelko itlaken Jesús maski sapanoa miakej tlaltikpaktlakamej okiyaualoayaj. Tlanauatil okijtoaya amo ikaj omonekiaya kikitskis (Levítico 15:25-27). Pero Jesús amo okajuak. Jesús okiknomatki. Ye okimatiaya okachi ipati ijkon kichiuas uan amo okachi kitlakamatis nochi tlen okijtoaya Tlanauatil (Mateo 23:23). Ik non, Jesús okilui: “Nokone, motlaneltokalis omitspajti. Xiajti ika pakílistli, porke axa yotipajtik de motlaijyowilis”. ¡Se kuali neskayotl!

14. 1) ¿Tlen tlamantli okachi okipatioitaya Jesús? 2) ¿Tlen okipejpenki Jesús pampa uelis okachi tetlapouiskia?

14 Noijki Jesús ika inemilis okiteititi kuali okipejpenaya tlen kichiuas. Ye okachi okipatioitaya tetlapouis (Lucas 4:43). Ik non, okipejpenki tlamantli tlen uelis kipaleuiskia okachi ma tetlapoui. ¿Tlen okipejpenki? Okipejpenki  amo kipias miak tlamantli uan yolpakis san ika tlen okipiaya pampa okachi tetlapouiskia (Lucas 9:58). Noijki okinmachti itlatitlaniluan pampa maski kimiktiskiaj yejuan ok tetlapouiskiaj (Lucas 10:1-12; Juan 14:12). Uan noijki okinmilui ye nochipa kinpaleuiskia hasta ijkuak tlamis nochi tlen amo kuali (Mateo 28:19, 20).

KUALI MA TIKPEJPENAKAN IJKON KEN JESÚS

Pampa kuali ma tikpejpenakan ken titlajtoskej, moneki ma tikilnamikikan tlen kinekij tlaltikpaktlakamej (Xikita párrafo 15)

15. ¿Ken uelis tikpejpenaskej ken titlajtoaj?

15 Noijki uelis tikchiuaskej ken Jesús tla kuali tikpejpenaj ken titlajtoaj. Ijkuak timotlapouiaj iuan tokniuan tikinpejpenaj tlajtolmej tlen kinpaleuiaj amo tlen kinyolkokoaj (Efesios 4:29). Ijkuak titetlapouiaj moneki “[to]tlajtol nochipa mateyolpakti”, kijtosneki ijkuak tikintlapouiaj moneki ma tikintlakaitakan (Colosenses 4:6). Pampa kuali ma tikpejpenakan tlen tikijtoskej, moneki ma tikmatikan tlen kinekij uan tlen kintekipachoa. Tla kuali tikintlapouiaj, uelis techkakiskej uan tlen tikintlapouiaj ajsis itech inyolo. Uan noijki nochipa tiktekitiltiaj Biblia pampa tikyekijtoskej tlen titlaneltokaj. Tikchiuaj pampa okachi kinpaleuia tlen kijtoa Biblia pampa kipia miak chikaualistli (Hebreos 4:12).

16, 17. 1) ¿Tlen techpaleuis amo ma tikualanikan? 2) ¿Ken tikteititiaj titeajsikamatij? 3) ¿Tlen techpaleuis okachi ma titetlapouikan?

16 Noijki tikteititiaj kuali tikpejpenaj ika tlen tikchiuaj. ¿Ken? Ijkuak amo tikualanij. ¿Tlen uelis techpaleuis pampa amo ma tikualanikan? (Santiago 1:19). Ijkuak ikaj kijtos noso kichiuas itlaj tlen techkualanis, ma timotlajtlanikan tleka ijkon okichi. Ijkon okachi amo oui tiktlapojpoluiskej (Efesios 4:32). Noijki moneki titeajsikamatiskej. ¿Ken? Amo tiknekiskej tokniuan amo keman ma kichiuakan itlaj amo kuali. Ma tikilnamikikan uelis itlaj kinpanoa tlen tejuan amo kuali tikajsikamatij. Noijki uelis titeajsikamatiskej tla tikinkakij oksekimej. Amo tiknekiskej nochipa ma mochiua tlen tejuan tiknekij (Filipenses 4:5).

17 Noijki tikteititiaj kuali tikpejpenaj ika tonemilis. Tejuan tikpatioitaj titetlapouiskej. ¿Tlen techpaleuis okachi ma titetlapouikan? Moneki okachi tiknekiskej titetlapouiskej uan tiyolpakiskej san ika tlen tikpiaj. Nin kichiuas okachi ma titetlapouikan achto tlamis nochi tlen amo kuali (Mateo 6:33; 24:14).

18. ¿Tlen moneki ma tikchiuakan tla tiknekij tiyoltoskej nochipa?

18 Melauak tiyolpakij otikmatkej Jesús yolyamanki, teiknomati, yolchikauak uan kuali kipejpena tlen kichiuas. Timomachtiskej okseki tlamantli itech Jesús sapanoa techpaleuis. Ik non, ma tikchiuakan ken Jesús. Ijkon okachi timotokiskej itech Jehová uan uelis tiyoltoskej nochipa.

^ párr. 2 Tlen ijkuilitok itech 1 Pedro 1:8, 9 okinmijkuililijkej tokniuan tlen yoltoskej itech iluikak. Pero noijki kinpaleuia akinmej mokauaskej Tlaltikpak.