Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Febrero de 2015

 Motlapouiaj Itech Biblia

¿Tleka moneki timomachtiskej itech Biblia?

¿Tleka moneki timomachtiskej itech Biblia?

Pampa ma tikitakan ken ikaj motlapouiskia iuan se iTlaixpantijka Jehová, ma timokuayejyekokan se iTlaixpantijka Jehová tlen itoka Bruno motlapouijtok iuan se tlakatl tlen itoka Omar.

BIBLIA, SE AMOCHTLI TLEN TECHILUIA TLEN MELAUAK OPANOK

Omar: Ne amo okachi nitlaneltoka itech toTajtsin Dios. Amo uelis timotlapouiskej itech miak tlamantli.

Bruno: Tlasojkamati pampa tinechiluia tlen timokuayejyekoa. Notoka Bruno. ¿Uan tejuatsin?

Omar: Omar.

Bruno: Niyolpaki nimitsixmatis.

Omar: Ne noijki.

Bruno: San xinechilui: ¿se tonal otitlaneltokak itech toTajtsin Dios?

Omar: Kema, ijkuak onikatka nikonetl. Pero ijkuak onia universidad ayakmo okachi itech onitlaneltokak.

Bruno: Kuali. ¿Uelis tinechiluis tlen otimomachti itech universidad?

Omar: Kema, onimomachti Historia uan Ciencias sociales. Sapanoa nechpaktia nikmatis tlen yopanok uan tlen okichijkej tlaltikpaktlakamej.

Bruno: Kema, sapanoa kualtsin se kimatis tlen yopanok. Uelis yitikmati Biblia noijki techtlapouia tlen yiuejkika opanok. ¿Yotimomachti itech nin amochtli?

Omar: Amo keman. Nikmati nin amochtli miakej kinpaleuia, pero amo onikmatiaya kox techtlapouia itech tlen yiuejkika opanok.

Bruno: Nikita te kuali tikajsikamati uan mitspaktia ma mitstlapouikan. Tla timajxilia nikneki nimitsititis ken melauak tlen kijtoa Biblia itech tlen yiuejkika opanok.

Omar: Kuali kajki, pero amo nikpia Biblia.

Bruno: Amo ximotekipacho. Ne nikualika se. Achto ma tiktlajtoltikan tlen kijtoa 1 Crónicas 29:26 uan 27. Kijtoaj: “Ijkon David ikone Jesé otlanauati itech nochi altepetl Israel; uan itech altepetl Israel otlanauati cuarenta xiuitl. Itech Hebrón otlanauati chikome xiuitl, uan itech Jerusalén otlanauati treinta y tres xiuitl”.

Omar: ¿Nin achto neskayotl?

Bruno: Kema. Yiuejkika akinmej amo kitlakaitaj Biblia okijtojkej amo melauak tlen ijkuilitok itech David.

Omar: ¿Kema? ¿Uan tleka?

Bruno: Achto san Biblia otechtlapouiaya itech David. Pero itech xiuitl 1993, sekimej arqueólogos okajsikej se tetl tlen okipiaya ome tlajtolmej, tla tikintlajtolkuepaj kijtosnekij “ikalijtik David” uan “ueyi tekiua itech Israel”.

Omar: Mmm... Amo onikmatiaya.

Bruno: Noijki miakej okijtoayaj amo melauak okatka Poncio Pilato se tekiua tlen otlanauatiaya ijkuak okatka Jesús. Lucas 3:1 techtlapouia  itech nin tlakatl. Ompa tikinmajsij intoka miakej tekiuajkej tlen ijkuakon otlanauatijtokaj.

Omar: Kema, nikan kijtoa: “Ijkuak [...] Poncio Pilato okatka gobernador de Judea, Herodes Antipas gobernador de Galilea”.

Bruno: Tlasojkamati. Yiuejkika miakej tlaltikpaktlakamej noijki okijtojkej amo melauak okatka Poncio Pilato. Pero yikipia kanaj cincuenta xiuitl, okajsikej se tetl ik Oriente Medio, ompa ijkuilitok nin tokayotl.

Omar: Amo onikmatiaya nin tlamantli.

Bruno: Niyolpaki nimitsmatiltis nochi nin.

Omar: Ne nikneltoka Biblia se kuali amochtli, pero amo nikmati ken uelis techpaleuis. Uelis melauak techiluia tlen yiuejkika opanok, pero ¿tlen okseki tlamantli techmachtia?

AXKAN TLAPALEUIA BIBLIA

Bruno: Miakej tlaltikpaktlakamej noijki ijkon kineltokaj, pero ne okse tlamantli nikneltoka. ¿Tikmati tleka? Pampa yiuejkika tiknekij itlaj. Nochipa tiknekij tlakuali, totlaken uan kanin tichantiskej. Nochipa tiknekij iuan ikaj timotlapouiskej uan tiyolpakiskej iuan tokalchanejkauan. ¿Amo melauak?

Omar: Kema ijkon.

Bruno: Biblia uelis techpaleuis. Uelis yiuejkika okijkuilojkej pero axkan uelis techpaleuis.

Omar: ¿Melauak?

Bruno: Kema. Ximokuayejyeko: Ijkuak omoijkuilo Biblia okinpaleui tlaltikpaktlakamej, uan axkan noijki techpaleuia.

Tlen ijkuilitok itech Biblia sapanoa okinpaleui ijkuak omoijkuilo, pero axkan noijki sapanoa tlapaleuia

Omar: Xinechilui se neskayotl.

Bruno: Biblia techpaleuia pampa kuali ma tikpejpenakan iuan akin timouikaskej, ken tiktekitiltiskej tomin uan noijki ken uelis yolpakiskej tokalchanejkauan. Nin ken se mapa tlen techiluia ik kanin moneki tiaskej. Se neskayotl, axkan sapanoa oui kuali tikinyekanaskej tokoneuan uan tokalchanejkauan, ¿amo melauak?

Omar: Kema. Yikipia se xiuitl onimonamikti uan ualeua oui pampa amo timoteuiskej.

Bruno: Itech Biblia tikinmajsij miakej tlamachtilmej tlen techyekanaj uan techpaleuiaj. Se neskayotl, ma tikitakan tlen kijtoa Efesios 5:28. ¿Tikneki tiktlajtoltis?

Omar: Kema, kijtoa: “Noiwa moneki n tlakatl makitlasojtla isiwa, kemi ye inewia kitlasojtla ikuerpo. Porke akin kitlasojtla isiwa, noiwa ye motlasojtla”.

Bruno: Tlasojkamati. Tla se tlakatl kitlakamati nin tlanauatil, ¿amo melauak yolpakis iuan ikalchanejkauan?

Omar: Kema, ijkon mota, pero oui se kichiuas.

Bruno: Melauak tlen tikijtoa, tinochtin titlajtlakolejkej. Uan noijki itech non tlakotonal techiluia “xitlalnamiktokah”. * Nochtin akinmej yomonamiktijkej moneki ijkon kichiuaskej. Nosiua uan ne yotechpaleui tlen kijtoa Biblia, pampa kuali ma timouikakan.

Omar: Non melauak.

Bruno: Itech Internet tiiTlaixpantijkauan Jehová tikpiaj seki tlamantli tlen kinpaleuia akinmej yomonamiktijkej. San ika seki minutos nimitsititis tlen ompa uelis tikajsis.

Omar: Kuali.

Bruno: Página itoka jw.org... Nikan peua.

Omar: Nechpaktia tlaixkopinalmej.

Bruno: Noijki seki itlaixpantijkauan Jehová tlen tetlapouijtokej itech nochi Tlaltikpak. Xikita... Nikan se itoka “Matrimonios y padres”. Nikan tikajsis miak tlapaleuilistli. ¿Tlen okachi mitspaktia?

Omar: Nin: “Cómo solucionar problemas en el matrimonio”. ¡Nin tlen uelis nechpaleuis!

 Bruno: Nikan techiluia naui tlamantli tlen techpaleuia ma tikyektlalikan ouijkayotl. Se neskayotl, ma tiktlajtoltikan tlen kijtoa nikan. Omar ¿uelis tiktlajtoltis?

Omar: Kema... Kijtoa: “Ijkon ken estli miak ipati pampa ma tiyoltokan, noijki miak ipati ma timotlapouikan. Pero pampa kuali ma timotlapouikan, moneki ome tlamantli tlen tikneskayotiskej ken toyolo uan topulmones: moneki tlasojtlalistli uan tlakaitalistli”. Nechpaktia nin neskayotl.

Bruno: Kuali. Axkan nikan kiualika se tlaxelol. Uelis tiktlapos tla tikpachilis nikan.

Omar: Kuali... Omotlapo Efesios 5:33. Kijtoa: “Ijkó noiwa, nochi tlakatl makitlasojtla isiwa kemi ye inewia motlasojtla, iwa n tesiwa noiwa makitlakita iokich”.

Bruno: Noso inamik. ¿Tikita tlen moneki ma tikchiuakan? Moneki tikchiuiliskej tonamik tlen tiknekij ma techchiuilikan.

Omar: Amo nikajsikamati. Xinechyekilui tlen kijtosneki.

Bruno: ¿Amo melauak nochtin tlakamej kinekij insiua ma kintlakaita? ¿Uan melauak nochtin siuamej kinekij ma kintlasojtlakan?

Omar: Kema.

Bruno: Tla tlakatl kitlasojtla isiua uan ijkon kiteititia, siuatl amo oui kitlakaitas inamik ijkon ken ye kineki, ¿amo melauak?

Omar: Kema, non tlapaleuis miak.

Bruno: Nin yikipia kanaj dos mil xiuitl omoijkuilo, pero axkan sapanoa tlapaleuia. Tla ijkon kichiuaj, akinmej yomonamiktijkej uelis moyolpaktiskej uan kuali yetos inyolo uan inpulmones tlen kipaleuia namiktilistli.

Omar: Axkan nikita Biblia sapanoa tlapaleuia.

Bruno: Niyolpaki nikmatis axkan yitikmati nin itech Biblia. ¿Ken tikita tla okse tonal timotlapouiskej noijki nikan? Nechpaktiskia xinechilui tlen timokuayejyekoa itech nin: “Cuatro pasos para solucionar los problemas”. *

Omar: Kuali. Nikiluis nosiua san sekan ma tiktlajtoltikan.

¿Tikneki tikmatis okachi itech se tlamachtil itech Biblia? ¿Tikneki tikmatis okachi itech itlaj tlen kichiuaj iTlaixpantijkauan Jehová? Tla ijkon, ¿tleka amo tikintlajtlania ijkuak tikinmitas? Yejuan ika miak pakilistli mouan motlapouiskej.

^ párr. 43 Xikita Efesios 5:17.

^ párr. 63 Tla tikneki tikmatis okachi, xikita tlamachtil 14 itech amochtli ¿Tlen melauak tlamachtia Biblia?, tlen kichijchiuaj iTlaixpantijkauan Jehová.