Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Febrero de 2015

Ma titeiknomatikan uan ma tiyetokan tiyolyamankej ken Jesús

Ma titeiknomatikan uan ma tiyetokan tiyolyamankej ken Jesús

“Cristo otlaijyowi topatka, ijkó otechititi kenijki tikchiwaskeh.” (1 PEDRO 2:21)

1. ¿Tleka tla tikchiuaj ken Cristo okachi timotokiaj itech Jehová?

IJKUAK ikaj techtlajtlachialtia tiknekij noijki ijkon tikchiuaskej. Pero okachi kuali ma tikchiuakan ken Jesús. ¿Tleka? Ye okijto: “Akin yonechitak kijtosneki yokitak Notajtsi” (Juan 14:9). Ijkon okijto Jesús pampa ye kichiua ken iTajtsin. Ijkuak tikmatij ken Jesús, noijki tikmatij ken Jehová. Ik non, ijkuak tikchiuaj ken Jesús okachi timotokiaj itech Jehová, akin okachi ueyititok itech nochi semanauak. ¡Se ueyi tlateochiualistli!

2, 3. 1) ¿Tleka Biblia techtlapouia miak tlamantli itech Jesús? 2) ¿Tlen kineki Jehová ma tikchiuakan? 3) ¿Tlen timomachtiskej axkan uan chikome?

2 Biblia techiluia miak tlamantli itech Jesús. ¿Tleka? Pampa Jehová kineki kuali ma tikixmatikan Jesús uan ijkon ma tikchiuakan (xiktlajtolti 1 Pedro 2:21). Biblia kijtoa moneki ma tikchiuakan ken Jesús. ¿Tlen kijtosneki nin? Moneki ma tikchiuakan ken Jesús okichi itech nochi inemilis. Jesús amo kipia tlajtlakoli. Pero Jehová amo kichia ma tikchiuakan nochi ken Jesús. Jehová kineki ma timochijchikauakan pampa tikchiuaskej ken Jesús.

3 Ma tikitakan seki tlamantli tlen okichi Jesús uan tlen moneki  ma tikchiuakan. Axkan timomachtiskej Jesús yolyamanki uan teiknomati. Uan chikome timomachtiskej Jesús okiteititi yolchikaualistli uan kuali okipejpenaya tlen kichiuas. Tikinnankiliskej eyi tlajtlanilmej itech sejse tlamantli tlen okichi Jesús: ¿Tlen kijtosneki? ¿Ken okiteititi Jesús? Uan ¿ken uelis noijki ijkon tikchiuaskej?

JESUS OKATKA YOLYAMANKI

4. ¿Tlen kijtosneki yolyamanilistli?

4 Akinmej moueyinekij kineltokaj tla ikaj yolyamanki amo kipia chikaualistli noso kimachilia amo itlaj uelis kichiuas. ¿Melauak ijkon? Amo. Moneki miak yolchikaualistli pampa uelis tiyetoskej tiyolyamankej. ¿Tlen kijtosneki yolyamanilistli? Nin amo san kijtosneki amo ma timoueyinekikan. Achto moneki ma timotakan ken moneki. Se neskayotl, se diccionario tlen techtlapouia itech Biblia kijtoa moneki tikmatiskej amo itlaj topati iixpan toTajtsin Dios. Uan noijki tla tiyolyamankej amo tikijtoskej okachi topatij (Romanos 12:3; Filipenses 2:3). Nochtin titlajtlakolejkej, ik non, ualeua oui tiyetoskej tiyolyamankej. Pero uelis tikchiuaskej. Pero achto moneki ma timokuayejyekokan itech iueyitilis Jehová uan itech ineskayo Jesús.

Tla tiyolyamankej amo timokuayejyekoskej okachi tiyolkualmej

5, 6. 1) ¿Akin arcángel Miguel? 2) ¿Ken okiteititi Miguel okatka yolyamanki?

5 IKone toTajtsin Dios nochipa okiteititi yolyamanilistli. Ijkuak okatka itech iluikak ken se ángel tlen kipia miak chikaualistli. Uan noijki ijkuak ouala ipan Tlaltikpak ken se tlakatl tlen amo kipia tlajtlakoli. ¿Ken okiteititi yolyamanilistli? Ma tikitakan seki neskayomej.

6 Ika tlen okichi Jesús okiteititi yolyamanilistli. Achto ualaskia ipan Tlaltikpak Jesús okatka se ángel akin okinyekanaya oksekimej ángeles. Uan Biblia kijtoa itoka Miguel. Itech amochtli Judas moijtoa Miguel uan Satanás omoteuijtokaj (xiktlajtolti Judas 9). ¿Tleka omoteuijtokaj? Jehová okitokak Moisés kanin amo ikaj uelis kajsiskiaj (Deuteronomio 34:5, 6). Pero Satanás okinekiaya itlalnakayo Moisés, uelis pampa israelitas ma kiueyichiuakan. Se amochtli kijtoa uelis Jesús okilui Satanás amo uelis kiuikaskia itlalnakayo Moisés. Maski ika miak yolchikaualistli Jesús amo okikauili Satanás ma kiuika itlalnakayo, ye okimatiaya amo okipiaya miak tlanauatilistli. Ik non, okiteititi yolyamanilistli uan okika Jehová ma kixkomaka. San Jehová uelis kixkomakaskia Satanás.

Jesús okatka yolyamanki uan nochipa okitlakamatki Jehová. ¡Maski okimiktijkej!

7. 1) ¿Ken okiteititi Jesús okatka yolyamanki ijkuak otlajtoaya? 2) ¿Ken okiteititi Jesús okatka yolyamanki ika tlen okichi?

7 Ijkuak Jesús okatka itech Tlaltikpak okiteititi yolyamanilistli ijkuak otlajtoaya. Ye amo okinekiaya ma kiueyichiuakan. Ye san okinekiaya ma kiueyichiuakan Jehová (Marcos 10:17, 18; Juan 7:16). Noijki amo keman okinpinati imachtijkauan. Okintlakaitaya uan okinyolchikauaya ika tlen okichiuayaj. Ijkon okinmititi intech otlaneltokaya (Lucas 22:31, 32; Juan 1:47). Jesús noijki okiteititi yolyamanilistli itech nochi tlen okichi. Jesús okipejpenki yolpakis san ika tlen okipiaya uan amo kipias miak tlamantli (Mateo 8:20). Noijki okichi seki tekitl tlen amo ikaj okinekiaya kichiuas (Juan 13:3-15). Noijki otetlakamatki (Filipenses 2:5-8). Akinmej moueyinekij amo kinekij kintlakamatiskej oksekimej. Pero  Jesús amo ijkon okichi. Ye okatka yolyamanki uan nochipa okitlakamatki Jehová. ¡Otetlakamatki maski okimiktijkej! Jesús okatka “yolyámanki” (Mateo 11:29).

MA TIYETOKAN TIYOLYAMANKEJ KEN JESÚS

8, 9. ¿Ken tikteititiaj tiyolyamankej?

8 ¿Ken uelis tiyetoskej tiyolyamankej ken Jesús? Tla tiyolyamankej, tikmatij amo titlanauatiaj. Amo uelis tikinmixkomakaskej oksekimej. Ik non, amo tikinteneuaj nion titlajtoaj tlen amo kuali intech oksekimej (Lucas 6:37; Santiago 4:12). Noijki amo tikneltokaj okachi topati san pampa tikmatij tikchiuaj seki tlamantli noso tikpiaj se tekitl (Eclesiastés 7:16). Tlayekankej akinmej yolyamankej noijki amo moueyinekij inmixpan oksekimej. Yejuan kinmitaj oksekimej ken okachi inpati (Filipenses 2:3; Lucas 9:48).

9 Ma tikitakan ineskayo Walter Thorn. Itech xiuitl 1894 ye opejki tekiti ken tlayekanki itech circuito. Pero miak xiuitl satepan, okiluijkej ma kinmalui piomej itech se granja tlen okipiayaj iTlaixpantijkauan Jehová itech altepetl Nueva York. Ijkuak omokuayejyekoaya uelis kichiuaskia okse tekitl tlen okachi ipati uan amo san kinmaluis piomej okimoluiaya: “Te, tlalpinoli tlen amo ipati, ¿tlen timokuayejyekoa?” (xiktlajtolti Isaías 40:12-15). ¡Ye okatka yolyamanki!

10. 1) ¿Ken tikteititiaj tiyolyamankej ijkuak titlajtoaj? 2) ¿Ken tikteititiaj tiyolyamankej ika tlen tikchiuaj?

10 Ijkuak titlajtoaj tikteititiaj tla tiyolyamankej (Lucas 6:45). Ijkuak timotlapouiaj iuan oksekimej, amo san titlajtoaj itech tlen tikchiuaj nion pampa timoueyinekiskej (Proverbios 27:2). Tikinmiluiaj kuali tlen kichiuaj uan ken kipiaj inyelis (Proverbios 15:23). Noijki tikteititiaj yolyamanilistli ika tlen tikchiuaj. Amo tiknekij miakej ma techixmatikan nion ma techueyichiuakan. Tiknekij tiyolpakiskej san ika tlen tikpiaj pampa ijkon okachi tiktekichiuiliskej Jehová. Uan noijki tiknekij tikchiuaskej tlen oksekimej amo kinekij (1 Timoteo 6:6, 8). Uan noijki tikteititiaj tiyolyamankej tla titetlakamatij. Ik non, tiktlakamatij ialtepe Jehová uan noijki tikintlakamatij tlayekankej itech tlanechikol (Hebreos 13:17).

JESUS TEIKNOMATI

11. ¿Tlen kijtosneki teiknomatilistli?

11 ¿Tlen kijtosneki teiknomatilistli? Tla titeiknomatij, tikintlasojtlaskej oksekimej uan noijki intech timotekipachoskej. Titeiknomatij pampa titetlasojtlaj. Biblia kijtoa Jehová uan Jesús teiknomatij uan tetlasojtlaj (Lucas 1:78; 2 Corintios 1:3; Filipenses 1:8). Se amochtli kijtoa teiknomatilistli amo san moteititia ijkuak ikaj tlajyouijtok. Kijtoa tla ikaj teiknomati motekipachoa intech oksekimej uan mochijchikaua pampa kinpaleuis. Ik non, tla melauak titeiknomatij timochijchikauaskej pampa tikinpaleuiskej oksekimej.

12. 1) ¿Ken okiteititi Jesús teiknomatilistli ika tlen okimachiliaya? 2) ¿Ken okiteititi Jesús teiknomatilistli ika tlen okichi?

12 ¿Ken okiteititi Jesús teiknomati? Ma tikitakan eyi neskayomej. Achto ika tlen okimachiliaya. Ijkuak okitak María uan oksekimej ochokatokaj pampa omikik Lázaro, ye noijki ochokak (xiktlajtolti Juan 11:32-35). Biblia kijtoa Jesús noijki okinmiknoma sekimej  tlaltikpaktlakamej tlen oyajkej kanin ye okatka (Marcos 6:34). Noijki Jesús okiteititi teiknomatilistli ika tlen okichi. Se neskayotl, teiknomatilistli okiyolini ma kinpaleui oksekimej. Ik non, okiyoliti ikone se iknosiuatl uan noijki Lázaro (Lucas 7:11-15; Juan 11:38-44). Ijkon Lázaro uelis satepan yetos iluikak. Uan ijkuak miakej tlaltikpaktlakamej oyajkej kanin okatka Jesús, teiknomatilistli okichi ma kinmachti miak tlamantli. Nin okinpatili innemilis akinmej okikakej. Ken tikitaj Jesús amo san oteiknomatiaya. Noijki okinpaleui oksekimej (Mateo 15:32-38; 20:29-34; Marcos 1:40-42).

13. ¿Ken oteiknoma Jesús ika tlen okijtoaya? (Xikita tlaixkopinal tlen ika peua tlamachtil.)

13 Jesús noijki oteiknoma ika tlen okijtoaya. Iknomatilistli okiyolini Jesús kuali ma kintlapoui oksekimej, uan okachi akinmej otlajyouijtokaj. Uan Mateo se itlatitlanil Jesús okijto seki tlajtolmej tlen okijto teotlajtojki Isaías: “Nion se akatl non yoxámanki kipostekis, iwa n tláwili non san achitsi xotlatok, amo kisewis” (Isaías 42:3; Mateo 12:20). ¿Tlen kijtosnekij ninmej tlajtolmej? Jesús amo keman ikaj okichiuili tlen amo kuali. Ijkuak okintlapouiaya oksekimej iuan kuali omomachiliayaj. Noijki okintlapoui nochtin akinmej omoyolkokoayaj (Isaías 61:1). Ye okinyolseui akinmej otlajyouiayaj (Mateo 11:28-30). Okinmilui imachtijkauan Jehová intech omotekipachoaya, uan noijki omotekipachoaya intech akinmej oksekimej amo okinpatioitayaj (Mateo 18:12-14; Lucas 12:6, 7).

MA TITEIKNOMATIKAN KEN JESÚS

14. ¿Ken uelis titeiknomatiskej?

14 ¿Ken uelis titeiknomatiskej ken Jesús? Ika tlen tikmachiliaj. Biblia kijtoa moneki tikinmiknomatiskej oksekimej, maski yetos oui ijkon tikchiuaskej. Teiknomatilistli miak ipati pampa akinmej melauak kichiuaj ken Cristo pampa ijkon kiteititiaj kipiaj yankuik nemilistli (xiktlajtolti Colosenses 3:9, 10, 12). ¿Ken uelis tikinmiknomatiskej oksekimej? Biblia kijtoa moneki tiktlaposkej toyolo uan tikinmiluiskej oksekimej tlen tikmachiliaj (2 Corintios 6:11-13). Moneki kuali ma tikkakikan ijkuak ikaj techiluia tlen kimachilia uan tlen kitekipachoa (Santiago 1:19). Uan satepan moneki ma timotlajtlanikan: “Tla ne ijkon nechpanoskia, ¿tlen nikmachiliskia? ¿Tlen nechpaktiskia nikpias?” (1 Pedro 3:8).

15. ¿Ken uelis tikinpaleuiskej akinmej tlajyouiaj noso ikaj itech ikalchanejka omikik?

15 Noijki ika tlen tikchiuaj tikteititiaj titeiknomatij.  Teiknomatilistli techyolinis ma tikinpaleuikan akinmej tlajyouiaj noso akinmej ikaj itech ikalchanejka omikik. ¿Ken uelis tikinpaleuiskej? Romanos 12:15 kijtoa: “Xichokakah inwah akimeh chokah”. Miakej tlaltikpaktlakamej kinekij ma tikinyolseuikan uan amo san ma tikinmiluikan ken uelis kiyektlaliskej se ouijkayotl. Kinekij ikaj intech ma motekipacho uan ma kinkakikan. Se tokni tlen okiyolseuijkej tokniuan ijkuak omikik se iichpoch okijto: “Onikintlasojkamatili pampa oualajkej nokalijtik uan nouan ochokakej”. Noijki titeiknomatij ijkuak tikinpaleuiaj oksekimej. Uelis se tokni iknosiuatl kineki itlaj ma kiyektlalilikan itech ikalijtik. Noso uelis se tokni tlen yokokoxkatik noso youeuejtik kineki ma kiuikakan nechikolmej, ijkuak tetlapouiti noso kanin kipajtiskej. Uelis sapanoa tikinpaleuiskej oksekimej ika amo miak tlamantli (1 Juan 3:17, 18). Uan noijki titeiknomatij ijkuak timochijchikauaj pampa titetlapouiskej. Ijkon okachi kuali uelis tikinpaleuiskej akinmej yolkualmej.

¿Melauak timotekipachoaj itech tokniuan?(Xikita párrafo 15)

16. ¿Tlen uelis tikinmiluiskej akinmej moyolkokoaj uan tlajyouiaj?

16 Noijki tikteititiaj titeiknomatij ika tlen tikijtoaj. Biblia techiluia ma tikinyolseuikan akinmej moyolkokoaj noso itlaj kintekipachoa (1 Tesalonicenses 5:14). ¿Tlen uelis tikinmiluiskej? Uelis tikinmiluiskej intech timotekipachoaj. Noijki uelis tikinpaleuiskej ma kitakan kuali inyelis tlen kipiaj uan uelis tikinmiluiskej kuali tlen kichiuaj. Uelis tikinmiluiskej katej itech tlanechikol pampa Jehová kinpatioita (Juan 6:44). Uelis tikinmiluiskej Jehová melauak motekipachoa itech itekipanojkauan “akimeh mosotlawah” uan moyolkokoaj (2 Corintios 7:6). Tlen tikijtoaj uelis kinyolseuis akinmej sapanoa moyolkokoaj (Proverbios 16:24).

17, 18. 1) ¿Ken kineki Jehová tlayekankej ma kinmitakan oksekimej tokniuan? 2) ¿Tlen timomachtiskej chikome?

17 Jehová kineki tlayekankej ma kinmiknomatikan nochtin tokniuan (Hechos 20:28, 29) Tlayekankej moneki ma kinmachtikan, ma kinyolchikauakan uan ma kinyolseuikan tokniuan (Isaías 32:1, 2; 1 Pedro 5:2-4). Amo kintlaliaj tlanauatilmej pampa amo ma tlajyouikan. Noijki amo kintlajtlakoltiaj san pampa okachi ma kitekichiuilikan Jehová. Tlayekankej kinekij tokniuan ma yolpakikan. Yejuan kineltokaj tokniuan kitlasojtlaj Jehová uan mochijchikauaj pampa kitekichiuiliskej (Mateo 22:37).

18 Timokuayejyekoskej Jesús okatka yolyamanki uan oteiknoma, techyolchikaua noijki ijkon ma tikchiuakan. Chikome timomachtiskej ken uelis tikteititiskej yolchikaualistli uan kuali tikpejpenaskej ijkon ken Jesús.