Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Enero de 2015

Ma tiktlasojkamatilikan Jehová

Ma tiktlasojkamatilikan Jehová

“Xiktlasojkamatilikan Jehová, pampa ye yolkuali.” (SALMO 106:1)

1. ¿Tleka moneki ma tiktlasojkamatilikan Jehová?

JEHOVÁ techmaka miak tlamantli kuali (Santiago 1:17). Uan noijki ika miak tlasojtlalistli techmaka tlen techpoloa, ijkon ken kichiua se kuali tlajpixki (Salmo 23:1-3). Uan tla titlajyouijtokej techpaleuia uan techmaka chikaualistli (Salmo 46:1). Ijkuak timokuayejyekoaj itech nochi tlen techchiuilia, timomachiliaj ken salmista akin okijto: “Xiktlasojkamatilikan Jehová, pampa ye yolkuali”. Noijki okijto ye nochipa yolkuali (Salmo 106:1). Moneki ma tiktlasojkamatilikan toTajtsin Dios.

Itech xiuitl 2015 motekitiltis Salmo 106:1: “Xiktlasojkamatilikan Jehová, pampa ye yolkuali”

2, 3. 1) ¿Tlen techpanos tla amo titetlasojkamatiliaj? 2) ¿Tlen tlajtlanilmej tikinnankiliskej?

2 ¿Tleka moneki ma tiktlasojkamatilikan Jehová? Biblia yiuejkika okijto axkan tlaltikpaktlakamej amo tetlasojkamatiliskiaj, uan non tlen tikitaj (2 Timoteo 3:2). Miakej tlaltikpaktlakamej amo kitlasojkamatiliaj Jehová pampa nochi tlen kichiua pampa sejse tejuan. Miakej san mochijchikauaj pampa kipiaskej miak tlamantli tlen amo kinpoloa. Pero amo yolpakij. Tla amo titetlasojkamatiliaj uelis techpanos ken israelitas. Ayakmo tikpatioitaskej tlen techmaka Jehová uan noijki ayakmo iuan timouikaskej (Salmo 106:7, 11-13).

 3 Tla amo titetlasojkamatiliaj okachi titlajyouiskej iuan itlaj techpanos. ¿Tleka? Pampa san timotekipachoskej itech tlen techtlajyouiltia uan amo itech tlateochiualismej (Salmo 116:3). Axkan tikinnankiliskej ome tlajtlanilmej: ¿Ken uelis nochipa titetlasojkamatiskej? ¿Uan ken uelis tiyolpakiskej ijkuak itlaj techtlajyouiltis?

JEHOVÁ YOTECHMAKAK MIAK TLAMANTLI KUALI

4. ¿Tlen moneki ma tikchiuakan pampa ma tiktlasojkamatilikan Jehová?

4 Moneki ma tiktlasojkamatilikan Jehová. Ik non, moneki ma timokuayejyekokan itech nochi tlamantli kuali tlen techmaka. Uan noijki moneki timokuayejyekoskej ken ijkon techititia techtlasojtla. Ijkon okichi se tlakatl akin okijkuilo se amochtli itech Biblia. Ik non, omotlajtlachialti ika nochi tlen Jehová okichi (xiktlajtolti Salmo 40:5 uan 107:43).

5. Tla tiknekij titetlasojkamatiskej ken Pablo, ¿tlen moneki ma tikchiuakan?

5 Uelis titetlasojkamatiskej ken okichi Pablo. Ye nochipa omokuayejyekoaya itech tlamantli kuali tlen okimakak Jehová. ¿Tleka ijkon tikijtoaj? Pampa ijkuak okitlatlaujtiaya Jehová nochipa okitlasojkamatiliaya. Se neskayotl, ye okimatiaya okichiuaya tlen amo kuali uan omoueyinekiaya, uan noijki okintlajyouiltiaya miakej tokniuan uan otlakajkayauaya. Ik non, okitlasojkamatiliaya Jehová pampa okitlapojpolui uan pampa otetlapouiaya (xiktlajtolti 1 Timoteo 1:12-14). Pablo noijki okitlasojkamatiliaya toTajtsin Dios pampa iikniuan, akinmej okatkaj yolkualmej uan okatkaj yolmelajkej (Filipenses 1:3-5, 7; 1 Tesalonicenses 1:2, 3). Noijki okitlasojkamatiliaya toTajtsin Dios ijkuak iikniuan okipaleuiayaj pampa itlaj okitlajyouiltiaya (Hechos 28:15; 2 Corintios 7:5-7). Ik non, Pablo okinmiluiaya tokniuan ma kitlasojkamatilikan toTajtsin Dios uan ma moyolchikauakan uan ma kitlakuikilikan uan ma kiueyichiuakan (Colosenses 3:15-17).

¿TLEN TECHPALEUIS MA TITETLASOJKAMATIKAN?

6. ¿Tleka uelis tiktlasojkamatilis toTajtsin Dios?

6 Ijkon ken Pablo uelis timokuayejyekoskej itech nochi tlen techmaka Jehová (Salmo 116:12). Ximokuayejyeko: “¿Tleka uelis niktlasojkamatilis toTajtsin Dios?”. Uelis tikijtoskej pampa iuan timouikaj,  noso pampa okitemakak iKone pampa ma techtlapojpolui totlajtlakoluan. Noijki ken techpaleuia ijkuak titlajyouiaj. Uan tla yotimonamiktijkej uan tikinpiaj tokoneuan uelis tiktlasojkamatiliskej pampa tikpiaj tokalchanejkauan. Ik non, ma timokuayejyekokan ken techpaleuia. Ijkon tiknekiskej tiktlasojkamatiliskej (xiktlajtolti Salmo 92:1, 2).

Ma timotlatlaujtikan ken okichijkej Ana uan Ezequías uan ma tiktlasojkamatilikan Jehová

7. 1) ¿Tleka moneki ma tiktlatlaujtikan toTajtsin Dios uan ma tiktlasojkamatilikan? 2) ¿Ken techpaleuia ma tiktlasojkamatilikan Jehová ijkuak tiktlatlaujtiaj?

7 Ijkuak timokuayejyekoskej itech nochi tlamantli kuali, tiknekiskej tiktlatlaujtiskej Jehová uan tiktlasojkamatiliskej nochi tlen techmaka (Salmo 95:2; 100:4, 5). Sekimej san kitlatlaujtiaj pampa itlaj kitlajtlaniliskej. Pero noijki kineki ma tiktlatlaujtikan pampa tiktlasojkamatiliskej. Itech Biblia tikinmajsij miakej neskayomej ken Ana uan Ezequías (1 Samuel 2:1-10; Isaías 38:9-20). Noijki ma tiktlasojkamatilikan nochi tlen techmaka (1 Tesalonicenses 5:17, 18). Ijkon okachi timoyolchikauaskej, tiktlasojtlaskej Jehová uan kuali iuan timouikaskej (Santiago 4:8).

¿Tleka tiktlasojkamatilis toTajtsin Dios? (Xikinmita párrafos 6 uan 7)

8. ¿Tlen uelis kichiuas ayakmo ma titetlasojkamatikan?

8 Tla amo timomaluiaj uelis ayakmo tikpatioitaskej tlen techmaka Jehová. Uan ome tlamantli uelis kichiuas ayakmo ma titetlasojkamatikan. Achto, titlajtlakolejkej pampa totatajuan otechkajteuilijkej. Ijkuak Jehová okinchijchi Adán uan Eva, okinmakak nochi tlen okinekiayaj. Uelis yoltoskiaj nochipa ika yolseuilistli (Génesis 1:28). Pero amo okipatioitakej tlen okinmakak. Okinekiayaj okseki tlamantli, pero okipolojkej nochi tlen okipiayaj (Génesis 3:6, 7, 17-19). Ome, axkan amo nochtin tetlasojkamatiliaj. Nochi tlen axkan onka uelis kichiuas ayakmo ma tiktlasojkamatilikan nochi tlen techmaka Jehová, ken tlateochiualistli pampa tikatej itech ialtepe uan pampa kuali iuan timouikaj (1 Juan 2:15-17). ¿Tlen uelis tikchiuaskej pampa amo ijkon ma techpano? Nochipa moneki ma timokuayejyekokan itech tlen techmaka Jehová uan noijki ma tiktlatlaujtikan pampa tiktlasojkamatiliskej (xiktlajtolti Salmo 27:4).

IJKUAK TITLAJYOUIAJ

9. Ijkuak itlaj sapanoa techtlajyouiltia, ¿tleka moneki timokuayejyekoskej itech tlamantli kuali tlen techmaka Jehová?

9 Titetlasojkamatiskej noijki techpaleuia ijkuak titlajyouiaj. Ualeua amo tikmatij tlen tikchiuaskej ijkuak itlaj techtlajyouiltia. Uelis tonamik techkajkayaua, timokokoaj, ikaj mikij noso se tlaxixinilistli techtlajyouiltia. Tla timokuayejyekoaj itech tlamantli kuali tlen Jehová techmaka, timoyolchikauaskej uan ijkon uelis titlaxikoskej. Ma tikitakan ken kinpaleuia sekimej tokniuan.

10. ¿Ken kipaleuia Irina ma mokuayejyeko itech tlateochiualismej tlen kimaka Jehová?

10 Ma tikitakan ineskayo Irina, * se precursora regular tlen chanti itech altepetl Estados Unidos. (Xikita tlajtoli tlen kiualika tlakxitlan.) Inamik okatka tlayekanki  itech tlanechikol, pero okikajkaya uan okikajte iuan ikoneuan. ¿Tlen okipaleui ma kitekichiuili Jehová? Irina kijtoa: “Sapanoa niktlasojkamatilia Jehová pampa nechmaluia uan notech motekipachoa. Ijkuak mojmostla nimokuayejyekoa ken nechteochiua, nikita ken sapanoa ipati nikpias noTajtsin Dios tlen nechixmati uan nechmaluia. Nikmati amo keman nechkauas”. Irina sapanoa yotlajyoui. Pero tlen mokuayejyekoa kipaleuia uan noijki oksekimej kinyolchikaua.

11. ¿Tlen kipaleuia se tokni maski sapanoa mokokoa?

11 Kyung-sook tlen yokipiaya 20 xiuitl otekitiaya ken precurora regular iuan inamik. Pero se tonal akinmej tlapajtiaj okiluijkej okipiaya cáncer itech ipulmón uan san yoltoskia kanaj eyi noso chikuase metstli. Maski ye uan inamik otlajyouiayaj amo keman okinpanok ken itech non tonal. Ye kijtoa: “Sapanoa onechyolkoko. Onikmachili nochi onikpolo uan sapanoa onimomojti”. ¿Tlen okipaleui ma tlaxiko? Nochi tonal achto kochis, yaui ipan ikalijtik uan kitlatlaujtia Jehová. Ijkuakon kitlasojkamatilia makuili tlamantli kuali tlen okimakak non tonal. Nin kiyolseuia uan kiyolchikaua pampa ma kitlasojtla Jehová. Tlatlaujtilistli kipaleuia pampa kajsikamatis Jehová techpaleuia ijkuak titlajyouiaj uan noijki tikpiaj miak tlamantli kuali.

Sheryl iuan John, iikni tlen omomakixti (Xikita párrafo 13)

12. ¿Tlen okipaleui Jason satepan ijkuak omikik isiua?

12 Jason tekiti itech kali kanin tekitij iTlaixpantijkauan Jehová itech altepetl África. Yikipia kanaj 30 xiuitl kitekichiuilia Jehová. Pero yikipia chikome xiuitl omikik inamik pampa okipiaya cáncer. Sapanoa omoyolkokoaya pampa isiua sapanoa otlajyoui. ¿Tlen okipaleui ijkuak otlajyouijtoka? Se tonal okilnamik itlaj kualtsin tlen okichi iuan isiua uan okitlasojkamatili Jehová. Sapanoa omoyolchika uan okitlasojkamatili Jehová pampa nochi tlamantli kuali tlen okilnamikti. Ye kimati okachi kuali momachilia pampa tetlasojkamati. Ok moyolkokoa pampa ayakmo kipia isiua, pero axkan kuali momachilia. Sapanoa kipaleuia kitlasojkamatilis Jehová pampa iuan isiua oyolpakik uan san sekan okitekichiuilijkej Jehová.

“Niktlasojkamatilia Jehová.”(Sheryl)

13. ¿Tlen kipaleuia Sheryl amo ma moyolkoko?

13 Sheryl okipiaya 13 xiuitl ijkuak opanok  chikauak ejekakiauitl noso supertifón Haiyan tlen oajsik itech altepetl Filipinas itech xiuitl 2013. Ijkuak omochi ejekakiauitl oxixinki ikalijtik. Noijki omikik itajtsin, inantsin uan eyi iikniuan. ¿Tlen okipaleui Sheryl pampa amo ma moyolkoko? Ye mokuayejyekoa itech nochi tlamantli kuali tlen kipia, uan ik non kitlasojkamatilia toTajtsin Dios. Ye okitak tokniuan okinpaleuiayaj akinmej okachi okinekiayaj ma kinpaleuikan. Noijki okimatiaya oksekimej tokniuan okitlatlaujtiayaj Jehová ma kipaleui. Sheryl kijtoa: “Melauak niktlasojkamatilia Jehová. Ye nochipa techmaka tlen techpoloa”. Kema, ijkuak titetlasojkamatilia nochi tlen kuali, amo timoyolkokoaj. Uan noijki uelis tikxikoskej nochi ouijkayotl (Efesios 5:20; xiktlajtolti Filipenses 4:6, 7).

MA TIYOLPAKIKAN PAMPA JEHOVÁ TECHPALEUIA

14. ¿Tlen kualtsin chialistli techmaka toTajtsin Dios? (Xikita tlaixkopinal tlen ika peua tlamachtil.)

14 ITlaixpantijkauan Jehová nochipa kitlasojkamatiliaj Jehová pampa kinpaleuia. Se neskayotl, ijkuak okinmakixti israelitas imak ueyi tekiua itech altepetl Egipto itech mar Rojo, okitlasojkamatilijkej Jehová uan okitlakuikilijkej (Éxodo 15:1-21). Axkan Jehová noijki kitemaka se kualtsin chialistli. Kijtoa ayakmo miak poliui ayakmo yetos tlen techtlajyouiltis (Salmo 37:9-11; Isaías 25:8; 33:24). Ma timokuayejyekokan tlen tikmachiliskej ijkuak ayakmo itlaj techtlajyouiltis uan tikpiaskej yolseuilistli nikan itech Tlaltikpak. ¿Amo melauak tiknekij tiktlasojkamatiliskej Jehová? (Apocalipsis 20:1-3; 21:3, 4.)

ToTajtsin Dios techiluia ayakmo miak poliui ayakmo yetos tlen techtlajyouiltis

15. ¿Tlen tikchiuaskej itech xiuitl 2015?

15 Tikmatij itech nin xiuitl 2015 Jehová sapanoa kinteochiuas sejse itekipanojkauan. Uelis noijki titlajyouiskej. Pero tikmatij Jehová amo keman techkauas (Deuteronomio 31:8; Salmo 9:9, 10). Ye techpaleuis pampa amo ma tikkauakan. Ma tikchiuakan ken teotlajtojki Habacuc. Ye okijto maski amo kipiaskia tlakuali uan maski sapanoa tlajyouiskia, ye yolpakiskia pampa Jehová okipaleuiaya (Habacuc 3:17, 18). Itech xiuitl 2015 ma timokuayejyekokan itech tlamantli kuali tlen techmaka Jehová uan ma tikchiuakan ken kijtoa texto itech nin xiuitl. Kijtoa: “Xiktlasojkamatilikan Jehová, pampa ye yolkuali” (Salmo 106:1).

^ párr. 10 Itech nin tlamachtil sekimej okinpatilijkej intoka.