“Moneki Jehová ineuia ma kimalui altepetl, tla amo, amo itlaj ipati akinmej tlamaluiaj amo okochkej.” (SALMO 127:1b)

1, 2. 1) ¿Tleka 24,000 israelitas amo okalakej itech Tlali tlen Jehová okijto kinmakaskia? 2) ¿Tleka miak ipati tlen okinpanok israelitas?

ISRAELITAS yikalakiskiaj itech Tlali tlen Jehová okijto Kinmakaskia. Pero sapanoa miakej tlaltikpaktlakamej opejkej auilnemij iuan siuamej moabitas. Ik non, omikej 24,000 israelitas. ¡Teyolkoko tlen okinpanok! Yiuejkika okichixtokaj kalakiskej itech Tlali tlen Jehová okijto Kinmakaskia, uan yikalakiskiaj. Pero amo okalakej pampa amo okitlakamatkej Jehová uan opejkej auilnemij iuan siuamej (Números 25:1-5, 9).

2 Nin neskayotl omoijkuilo itech Biblia pampa amo ijkon ma tikchiuakan (1 Corintios 10:6-11). Biblia techyekiluia axkan tikatej itech itlamian nochi tlen amo kuali, uan ayakmo miak poliui tlamis nochi tlen amo kuali. Ik non, ayakmo miak poliui pampa tiyetoskej itech Xochitlali (2 Timoteo 3:1; 2 Pedro 3:13). Techyolkokoa tikmatiskej miakej itekipanojkauan Jehová amo kitlakamatij uan auilnemij. Axkan yitlajyouijtokej pampa amo otetlakamatkej. Uan  tla amo moyolkuepaj, amo uelis yetoskej itech Xochitlali.

3. ¿Tleka moneki Jehová ma kimalui namiktilistli? (Xikita tlaixkopinalmej tlen ika peua tlamachtil.)

3 Tiknekij Jehová ma techpaleui ma kimalui tonamiktilis. ¿Tleka? Pampa miakej tlaltikpaktlakamej auilnemij (xiktlajtolti Salmo 127:1). Axkan timomachtiskej miakej tlamantli tlen kinpaleuis. Akinmej yomonamiktijkej moneki kimaluiskej tlen kinekij, moneki kichiuaskej tlen kineki toTajtsin Dios, moneki motlapouiskej ika tlasojtlalistli uan tlakaitalistli uan noijki moneki san yejuan moyolpaktiskej ijkuak san sekan motekaj noso moajsikamatij.

XIKMALUIKAN TLEN NANKINEKIJ

4. ¿Tleka sekimej tokniuan auilnemij?

4 ¿Tleka sekimej tokniuan auilnemij? Ualeua auilnemij pampa amo kitlakamatij tlen okijto Jesús uan kitaj tlen amo kuali. Jesús kijtoa: “Nochi tlakatl non kelewia se siwatl non amo iaxka, kijtosneki yokimomekati itech iyolo” (Mateo 5:27, 28; 2 Pedro 2:14). Miakej kitaj pornografía, kitlajtoltiaj uan kitaj itech Internet tlen kinyoleua ma auilnemikan. Oksekimej kitaj itech televisión noso itech películas ken se siuatl uan se tlakatl auilnemij. Uan oksekimej yauij kanin siuamej uan tlakamej mijtotiaj uan amo kipiaj intlaken, noso oksekimej yauij kanin kinpajpachoaj noso kinpachoaj pampa ma kinekikan auilnemiskej.

5. ¿Tleka moneki ma tikmaluikan toyolo?

5 Sekimej auilnemij pampa peuaj sapanoa kuali mouikaj iuan akin amo innamik. Tlaltikpaktlakamej kinpaktia auilnemiskej. Uan noijki tinochtin titlajtlakolejkej uan toyolo uelis techkajkayauas. Ik non, tla amo timomaluiaj uelis peuas tiktlasojtlaskej akin amo tonamik (xiktlajtolti Jeremías 17:9, 10). Jesús okijto tlamantli amo kuali tlen tiknekij tikchiuaskej kisa itech toyolo, ken ijkuak temiktiaj noso auilnemij (Mateo 15:19).

6, 7. 1) ¿Tlen uelis panos tla toyolo kineki kichiuas tlen amo kuali? 2) ¿Tlen uelis kichiuaskej akinmej yomonamiktijkej pampa amo ma auilnemikan?

6 Ijkuak ome tlaltikpaktlakamej moyolpaktiaj, amo oui pampa peuas kinekiskej kichiuaskej tlen amo kuali kineki inyolo. Uelis peua motlapouiaj tlen san motlapouiskiaj iuan innamik. Uelis kitemoaj ken uelis motaskej uan kijtoa san mota uan amo ijkon omokajkej. Yolik peuaj okachi motlasojtlaj. San kinekij san sekan yetoskej. Ijkuak okachi motlasojtlaj, oui kitaj ayakmo san sekan yetoskej. Kimatij amo kuali tlen kichijtokej, pero amo uelij kikauaj (Proverbios 7:21, 22).

7 Ajsi tonal ijkuak ayakmo kinmilnamikij itlanauatiluan Jehová. Tlen kinekij uan tlen motlapouiaj kichiua ma momakitskikan, ma mopipitsokan, ma monapalokan noso ma momajmachilikan. Nin san moneki kichiuaskej iuan innamik. Pero tlen kinekij san kinmijtlakoa. Uan nin kichiua ma auilnemikan (Santiago 1:14, 15). ¡Teyolkokoa! Uelis amo auilnemiskiaj. San omonekiaya ma kikauilikan Jehová ma kinpaleui ma kitlakaitakan innamiktilis. Ma tikitakan ken uelis kichiuaskej.

KUALI XIMOUIKAKAN IUAN TOTAJTSIN DIOS

8. ¿Tleka miak ipati kuali ma mouikakan iuan toTajtsin Dios?

8 (Xiktlajtolti Salmo 97:10.) Ijkuak tlakatl uan isiua kuali mouikaj iuan toTajtsin Dios, okachi oui pampa auilnemiskej. ¿Tleka? Pampa ijkuak okachi kixmatij Jehová uan ken iyelis, mochijchikauaskej pampa kichiuaskej ken ye uan tetlasojtlaskej. Nin kinpaleuis ma kixtopeuakan tlen kinekij uan amo ma auilnemikan (Efesios 5:1-4). Uan noijki kimatij toTajtsin Dios kinmixkomakas akinmej momekatiaj uan auilnemij (Hebreos 13:4). Ik non, tlakatl uan isiua mochijchikauaj pampa yetoskej yolmelajkej.

9. 1) ¿Tleka José amo otlajtlakolchi? 2) ¿Tlen techmachtia ineskayo José?

9 Tla amo tiktlakamatij nochi tlen Jehová techiluia, uelis titlajtlakolchiuaskej. Sekimej  ijkon kinpanoa pampa sapanoa mouikaj iuan akinmej tekitij maski ayakmo itech tekitl. Oksekimej ijkon kinpanoa kanin tekitij. Ijkon okipanok se telpochtli tlen itoka José. Kanin otekitiaya okitak isiua iteko okiuelitaya. Nin siuatl mojmostla okinekiaya iuan motekas. Se tonal okikitski itech itlaken uan okilui: “Nouan ximoteka”. Pero nin telpochtli amo okinek uan totoka ocholo. ¿Tleka okiteititi yolmelajkayotl? Pampa okinekiaya kuali mouikas iuan Jehová. Pampa okiteititi yolmelajkayotl, José okipolo iteki uan okitsakej telpiloyan. Pero satepan Jehová okiteochi (Génesis 39:1-12; 41:38-43). ¿Tlen techmachtia ineskayo? Maski san kanin tiyetoskej, moneki timomaluiskej pampa amo ma titlajtlakolchiuakan.

MA TIKCHIUAKAN KEN JEHOVÁ KICHIUA

10. ¿Tleka ‘yankuik nemilis’ kinmaluia pampa amo ma auilnemikan?

10 Biblia kijtoa “se yankuik nomonemilis”. Tokniuan akinmej ijkon inyelis katej yolmelajkej uan yolmelauakej ken Jehová. Uan tla akinmej yomonamiktijkej kipiaj nin yankuik nemilistli, kimaluiskej innamiktilis pampa amo ma tlajtlakolchiuakan (Efesios 4:24). Tla ijkon inyelis nin kinyolchikauas pampa amo tlajtlakolchiuakan (xiktlajtolti Colosenses 3:5, 6). Nin kijtosneki amo kichiuaskej tlen kinekij tlen amo kuali. Noijki momaluiskej pampa amo kichiuaskej itlaj tlen kichiuas ma tlajtlakolchiuakan (Job 31:1). Uan ijkuak kintlakamatij itlanauatiluan Jehová, kixtopeuaj tlen amo kuali uan mochijchikauaj pampa kichiuaskej tlen kuali (Romanos 12:2, 9).

Akinmej yomonamiktijkej moneki motlapouiskej ika tlasojtlalistli, teiknomatilistli uan kuali tlajtolmej

11. ¿Tleka ‘yankuik nemilis’ kichikaua namiktilistli?

11 Tla tlakatl uan isiua kinekij kipiaskej ijkon inyelis, moneki kichiuaskej ken Jehová (Colosenses 3:10). Se neskayotl, Jehová teiknomati, yolkuali, yolyamanki uan noijki mochia. Tla akinmej yomonamiktijkej noijki kichiuaj ken toTajtsin Dios, innamiktilis mochikauas uan ye kinteochiuas (Colosenses 3:12). Tla “iyolsewilis” Cristo kiyekana namoyolo, nankipiaskej yolseuilistli uan amo itlaj namechtekipachos (Colosenses 3:15). Uan tla motlasojtlaj, sejse mochijchikauas pampa kajsikamatis inamik uan noijki kitlakaitas (Romanos 12:10).

12. ¿Tlen kinpaleuis akinmej yomonamiktijkej ma yolpakikan?

12 Sekimej tokniuan tlen yomonamiktijkej kijtoaj tlen kinpaleuia ma yolpakikan. Ye okijto tlasojtlalistli non tlen okachi ipati uan nochipa mochijchikauaj pampa motlasojtlaskej. Noijki okijto miak ipati kuali ma tenotsakan uan ma mochiakan. Isiua noijki ijkon mokuayejyekoa. Noijki okijto miak ipati ma tetlakaitakan uan ma teyolpaktikan. Uan okijto maski oui, nochipa mochijchikauaj pampa kiteititiskej yolyamanilistli.

XIMOTLAPOUIKAN IKA TLAKAITALISTLI UAN IKA TLAJTOLMEJ TLEN TEYOLPAKTIAJ

13. 1) ¿Tlen moneki pampa ma yeto chikauak namiktilistli? 2) ¿Tleka miak ipati?

13 Pampa ma yeto chikauak namiktilistli tlakatl uan isiua moneki motlapouiskej ika tlasojtlalistli, teiknomatilistli uan ika tlajtolmej tlen teyolpaktiaj (Efesios 4:32). Pero miakej amo ijkon kichiuaj uan innamiktilis amo mochikaua. Oksekimej okachi kuali kintlapouiaj inyolkauan noso oksekimej tlaltikpaktlakamej. Amo kuali  motlapouiskej, san kualantoskej, mouijuikaltiskej kichiuas amo ma yeto chikauak namiktilistli (Efesios 4:31). Noijki amo kuali tla moteneuaj noso kijtoaj tlen kiyolkokoa inamik.

14. ¿Tlen amo moneki kichiuaskej akinmej yomonamiktijkej?

14 Pampa ma yolpakikan itech innamiktilis miak ipati tlakatl uan isiua ma motlapouikan. Ijkuak Biblia kijtoa “amo san nima xitlajtokah”, amo kijtosneki ayakmo moneki tlajtoskej (Santiago 1:19). Se tokni siuatl tlen yomonamikti uan chanti itech altepetl Alemania, kijtoa ijkuak okachi tlajyouijtokej okachi oui pampa amo tikualaniskej, pero kijtoa tla ikaj ayakmo tlajtoa okachi titlajyouiskej. Noijki amo san moneki tlajtos pampa uelis kiyolkokos inamik uan okachi nantlajyouiskej. Ijkuak tokniuan akinmej yomonamiktijkej amo san se tlamantli mokuayejyekoaj, amo mokualaniaj nion ayakmo motlapouiaj. Mochijchikauaj pampa san niman kiyektlaliskej ouijkayotl pampa amo okachi ma moouijtili.

15. ¿Tlen moneki kichiuaskej pampa ma mochikaua innamiktilis?

15 Noijki tla kinekij okachi chikauak ma yeto innamiktilis, tlakatl uan isiua moneki motlapouiskej tlen kimachiliaj uan mokuayejyekoaj. Miak ipati tlen kijtoaj, pero noijki miak ipati ken kijtoaj. Noijki ijkuak tlajyouijtokej, tlakatl uan isiua moneki kinpejpenaskej kuali tlajtolmej pampa tetlakaitaskej uan kijtoskej tlajtolmej tlen teyolpaktiaj. Ijkon inamik kinekis kikakis (xiktlajtolti Colosenses 4:6). Noijki moneki kijtoskej tlajtolmej tlen teyolchikauaj (Efesios 4:29).

Tlakatl uan siuatl moneki motlapouiskej pampa ma mochikaua innamiktilis (Xikita párrafo 15)

MA MOYOLPAKTIKAN IJKUAK SAN SEKAN MOTEKAJ UAN MA MOAJSIKAMATIKAN

16, 17. ¿Tleka miak ipati akinmej yomonamiktijkej ma moyolpaktikan ijkuak san sekan motekaj uan ma moajsikamatikan?

16 Tla kinekij ma mochikaua innamiktilis, moneki tlakatl uan isiua ma moyolpaktikan ijkuak san sekan motekaj uan ma moajsikamatikan (xiktlajtolti 1 Corintios 7:3, 4). Ik non, okachi moneki ma motekipacho itech inamik (Filipenses 2:3, 4).

17 Ualeua tlakatl noso siuatl amo kipaktia kiteititis tlasojtlalistli nion motekas iuan inamik. Oksekimej tlakamej kineltokaj amo chikauakej tla kintlajsojtlaj insiuauan. Pero Biblia  kinmiluia tlakamej ma kinmajsikamatikan insiuauan (1 Pedro 3:7). Uan noijki tlakatl moneki kajsikamatis amo san moneki motekas iuan isiua pampa ma yolpaki. Noijki moneki nochipa kitlasojtlas. Ijkon siuatl okachi yolpakis ijkuak san sekan motekaskej. Ijkuak motlasojtlaj okachi amo oui pampa moyolpaktiskej ijkuak san sekan motekaj uan moajsikamatij.

18. ¿Tlen moneki ma kichiuakan akinmej yomonamiktijkej pampa ma mochikaua innamiktilis?

18 Amo keman uelis moijtos kuali okikajkaya inamik. Pero ijkuak kichiuaj uelis pampa inamik amo okitlasojtlaya ken omonekiaya (Proverbios 5:18; Eclesiastés 9:9). Ik non, Biblia kijtoa akinmej yomonamiktijkej moneki nochipa motekaskej san sekan, san uelis amo motekaskej tla ijkon omokajkej uan san seki kauitl. ¿Tleka? Pampa Satanás uelis kinyejyekos pampa kitas kox tlaxikoskej (1 Corintios 7:5). Melauak teyolkoko tla ikaj auilnemi san pampa yejuan okikauilijkej Satanás ma kinyejyeko. Ijkuak tlakatl uan siuatl mochijchikauaj pampa moyolpaktiskej ijkuak san sekan motekaj noso moajsikamatiskej, kiteititiaj okachi motekipachoaj itech innamik. Uan kichiuaj pampa tetlasojtlaj uan amo pampa kinchiualtiaj. Tla tlakatl uan siuatl kinekij ma mochikaua innamiktilis, moneki ma motlasojtlakan uan san sekan ma motekakan (1 Corintios 10:24).

XIKCHIKAUAKAN NAMONAMIKTILIS

19. 1) ¿Tlen uelis tikchiuaskej pampa ma mochikaua tonamiktilis? 2) ¿Tleka miak ipati ijkon ma tikchiuakan?

19 Pampa ma mochikaua innamiktilis moneki tlakatl uan isiua ma yetokan yolmelajkej iuan Jehová uan inamik (Mateo 19:5, 6). Melauak teyolkokoa ikaj ma auilnemi ijkuak ayakmo miak poliui pampa tiyoltoskej itech Xochitlali. Ika tlen okichijkej 24,000 israelitas uan siuamej moabitas, Biblia techiluia: “Akin kimolia amitla weletis kitlajtlakolchiwaltis, kuali mamotlakxili iwa mamotlachili para amo matlajtlakolchiwa” (1 Corintios 10:12). Axkan okachi moneki ma timochijchikauakan pampa ma tiyetokan tichipauakej uan ma tikpiakan yolseuilistli (2 Pedro 3:13, 14).