Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Noviembre de 2014

¿Tleka miak ipati iyolitilis Jesús?

¿Tleka miak ipati iyolitilis Jesús?

“Ye yomoyoliti.” (MAT. 28:6)

1, 2. 1) ¿Tlen okinekiayaj kimatiskej sekimej tlayekankej teopixkej? 2) ¿Tlen okinnankili tlatitlanil Pedro? (Xikita tlaixkopinal tlen ika peua tlamachtil.) 3) ¿Tleka Pedro otlanankili ika miak yolchikaualistli?

SEKI tonalmej satepan ijkuak omikik Jesús, sekimej tlayekankej teopixkej okixkomakakej tlatitlanil Pedro pampa okinekiayaj ma kinyekilui seki tlamantli. Ninmej tlayekankej teopixkej noijki okichijkej miak tlamantli pampa ma kimiktikan Jesús. Pedro yikin okipajti se tlakatl tlen amo onejnemiaya desde ijkuak oneski, uan tlayekankej okinekiayaj kimatiskej akin okipaleui tlatitlanil Pedro. Ika miak yolchikaualistli okinnankili: “Nin tlakatl non kajki nomoyakapah, opajtik ika Itoka n Cristo Jesús non de Nazaret, Akin nomejwah ononkimiktijkeh itech [kuauitl, TNM], iwa Dios okiyoliti de kan mikemeh” (Hech. 4:5-10).

2 Seki tonalmej achto, Pedro omomojti uan eyi uelta okijto amo okixmatiaya Jesús (Mar. 14:66-72). ¿Tleka axkan otlanankili ika miak yolchikaualistli? Achto, espíritu santo okipaleui, pero noijki kuali okimatiaya okiyolitijkej Jesús uan axkan oksepa yoltok. ¿Tleka okineltokaya melauak okiyolitijkej? ¿Uan tleka tejuan noijki tikneltokaj okiyolitijkej?

3, 4. 1) ¿Akinmej okinyolitijkej achto nesiskiaj itlatitlaniluan Jesús? 2) ¿Akinmej okinyoliti Jesús?

 3 Itlatitlaniluan Jesús yokimatiayaj akinmej yomikej uelis oksepa kinyolitiskej, sekimej okinyolitijkej miak xiuitl achto nesiskiaj itlatitlaniluan Jesús. Se neskayotl, yejuan okimatiayaj toTajtsin Dios okinpaleui teotlajtojkej Elías uan Eliseo ma kinyolitikan sekimej tlen omikej (1 Rey. 17:17-24; 2 Rey. 4:32-37). Uan noijki se tlakatl tlen okitlamotlakej kanin okitokakej Eliseo omoyoliti ijkuak okitelko iomiouan Eliseo (2 Rey. 13:20, 21). Itech achto siglo akinmej okichiuayaj ken Cristo okineltokayaj melauak ijkon opanok, ijkon ken axkan tikneltokaj melauak tlen ijkuilitok itech Biblia.

4 Nochtin techtlajtlachialtia uan techyolchikaua yolitilistli tlen okichi Jesús. Se neskayotl, ma tikilnamikikan ijkuak Jesús okiyoliti san se ikone tlen okipiaya se iknosiuatl. ¿Timokuayejyekoaj ken omotlajtlachialti? (Luc. 7:11-15.) Jesús noijki okiyoliti se takotsin tlen okipiaya 12 xiuitl. ¡Melauak oyolpakej itatajuan ijkuak okitakej oksepa oyoltoka! (Luc. 8:49-56.) Uan ma timokuayejyekokan tlen okimachilijkej akinmej okitakej Lázaro okiski itech koyoktli. ¡Melauak oyolpakej! (Juan 11:38-44.)

IYOLITILIS JESÚS AMO KEN OKSEKIMEJ

5. ¿Tleka iyolitilis Jesús amo ken oksekimej?

5 Itlatitlaniluan Jesús okimatiayaj iyolitilis Jesús amo okatka ken oksekimej. Pampa nochtin akinmej okinyolitijkej okipiayaj innakayo iuan inomiouan, uan satepan oksepa omikej. Pero Jesús okiyolitijkej ken se espíritu tlen amo kipia tlajtlakoli uan tlen amo kokoxkatis noso ueuejtis nion mikis (xiktlajtolti Hechos 13:34). Pedro okijto Jesús “omikki itech ikuerpo pero omoyoliti ika espíritu”. Uan noijki okijto “axa Cristo Jesús kajki ilwikak iyekma n Totajtsi Dios, iwa imak kateh ángeles, [...] non kipiah tekiwajyo [...], iwa nochi tlan kipia weletílistli” (1 Ped. 3:18-22). Yolitilistli tlen omochijkej sapanoa tetlajtlachialtiaj, pero amo keman omochi okse ken ijkuak okiyolitijkej Jesús.

6. ¿Ken okinpaleui imachtijkauan Jesús iyolitilis?

6 Iyolitilis Jesús sapanoa okinpaleui imachtijkauan. Uan maski oksekimej okijtoayaj Jesús amo oyoltoka, non amo melauak. Axkan okatka se espíritu tlen kipia sapanoa miak chikaualistli uan tlen amo itlaj uelis kichiuiliskej. Noijki iyolitilis okiteititi iKone toTajtsin Dios. Ik non, imachtijkauan ayakmo omoyolkokoayaj nion omomojtiayaj, axkan oyolpakiayaj uan okipiayaj yolchikaualistli. Uelis tetlapouiskiaj ika miak yolchikaualistli. ¡Jesús oyoltoka uan itlanekilis Jehová melauak mochiuas!

7. 1) ¿Tlen kichijtok Jesús axkan? 2) ¿Tlen tlajtlanilmej monankiliskej?

7 Tiitekipanojkauan Jehová tikmatij Jesús amo san okichi seki tlamantli tlen tetlajtlachialtia. Axkan kiyekantok tetlapouilistli tlen mochijtok itech nochi Tlaltikpak. Uan ayakmo miak poliui pampa ken ueyi Tekiua itech iTekiuajkayo toTajtsin Dios kitlajtlamis nochi tlamantli tlen amo kuali, uan nochi Tlaltikpak kikuepas se kualtsin xochitlali kanin uelis tiyoltoskej nochipa (Luc. 23:43). Tla amo kiyolitiskiaj Jesús, amo itlaj uelis mochiuaskia. Pero ¿tleka tikneltokaj melauak okiyolitijkej uan axkan yoltok? ¿Uan tleka techpaleuia iyolitilis?

JEHOVÁ UELIS KITLAJTLAMIS MIKILISTLI

8, 9. 1) ¿Tleka tlayekankej teopixkej okinekiayaj ma kimaluikan mikakoyoktli? 2) ¿Tlen opanok ijkuak oajsitoj siuamej?

8 Satepan ijkuak okimiktijkej Jesús,  tlayekankej teopixkej uan fariseos okiluijkej Pilato: “Otimitsonitakoh tejwatsi, porke otikilnamikeh ijkuak oyolitoka neká tekajkaya, okijto ipan eyi tonati moyolitis. Yika tejwah tiknekih xitlanawati makimokuitlawijtokah [noso ma kimaluikan] eyi tonati n kúyoktli kan okitookakeh n Jesús. Amo kichiwa itlamachtijkawah yaskeh yuak kikixtitiweh, iwa satepa kijtojtinemiskeh yomoyoliti. Tla ijkó tlakajkayawaskeh okachi techijtlakos”. Pilato okinmilui uelis kintlaliskiaj sekimej tlakamej ma kimaluikan non mikakoyoktli (Mat. 27:62-66).

9 Itlalnakayo Jesús okitlalijkej itech se koyoktli tlen okichijchijkej itech se ueyi tetl uan tlen okitsakej ika se ueyi tetl. Tlayekankej teopixkej ayakmo okinekiayaj ma yolto Jesús. Pero Jehová okse tlamantli okinekiaya kichiuas. Eyi tonal satepan, María Magdalena uan okse María oyajkej kanin okatka mikakoyoktli, uan okitakej ayakmo otsaktoka uan se ángel oeuatoka ipan tetl. Ángel okinmilui ma kitakan ken itech koyoktli amo itlaj okatka. Okinyekilui: “Mach ok nika kajki, Ye yomoyoliti” (Mat. 28:1-6). ¡Jesús yoltok!

10. ¿Tlen okijto Pablo tlen okiteititi Jesús okiyolitijkej?

10 Uan itech cuarenta tonalmej omotak Jesús melauak okiyolitijkej. Itech achto amatlajkuilol tlen tlatitlanil Pablo okintlajkuilili tokniuan akinmej ochantiayaj Corinto okijto seki tlamantli tlen kiteititia Jesús melauak okiyolitijkej. Okijkuilo: “Onomechmachti tlan achto ne onechmachtijkeh. Ijkuak tejwah otitlajtlakolchiwayah, Cristo omikki topatka kemi yokijtojka itlajkuilol Dios. Okitookakeh, iwa ipan eyi tonati omoyoliti, ijkó kemi noiwa yokijtojka n tiotlajkuíloli, iwa ijkuak omoyoliti, achto okimonextili n Pedro, iwa satepa okinmonextili n májtlaktli iwa n ome tlatematiltijkeh. Okachi satepa okinmonextili mákuili siento tokniwah. Miakeh ok onkateh, iwa sikimeh yomikkeh. Satepa okimonextili n Jacobo, iwa satepa nochteh n tlatematiltijkeh. Sa iksemi, ne noiwa onechmonextili, kemi se konetl non yopanok tonati para tlakatis” (1 Cor. 15:3-8).

NAUI TLAMANTLI TLEN KITEITITIA OKIYOLITIJKEJ JESÚS

11. ¿Ken okiyolitijkej Jesús ijkon ken kijtoa Biblia?

11 Jesús okiyolitijkej ijkon ken kijtoa Biblia. ITlajtol toTajtsin Dios okijto kiyolitiskiaj Jesús. Se neskayotl, David okijkuilo itech ikaj akin ‘yolmelajki’ tlen amo kikauaskiaj itech mikakoyoktli (xiktlajtolti Salmo 16:10). ¿Itech akin otlajkuilo? Itech Pentecostés tlen omochi itech xiuitl 33, tlatitlanil Pedro okijto David otlajkuilo itech Jesús, Pedro okijto: “David okijto Cristo moyolitiskia iwa Dios amo kikawaskia ikuerpo maijtlakawi miktla [mikakoyoktli, TNM]” (Hech. 2:23-27, 31).

12. ¿Akinmej okitakej Jesús oksepa oyoltoka?

12 Miakej okitakej Jesús oksepa oyoltoka. Itech cuarenta tonalmej Jesús okinmonextili imachtijkauan, sekimej okatkaj kanin okitokakej, itech ojtli tlen oyaya Emaús uan oksekan (Luc. 24:13-15). Ualeua omotlapoui san iuan se tlakatl, ken ijkuak omotlapoui iuan Pedro, uan itech okseki tonalmej omotlapoui iuan miakej. Uan noijki se tonal okinmonextili kanaj quinientos tlaltikpaktlakamej. Uan amo ikaj uelis kijtos amo melauak tlen yejuan okitakej.

13. Imachtijkauan Jesús, ¿ken okiteititijkej melauak okineltokayaj okiyolitijkej Jesús?

13 Ika miak yolchikaualistli imachtijkauan Jesús otetlapouijkej Jesús oyoltoka. Miakej okintojtokakej, okintlajyouiltijkej uan okinmiktijkej pampa  otetlapouiayaj itech iyolitilis Jesús. Inmixpan tlayekankej teopixkej akinmej okikokoliayaj uan okimiktijkej Jesús, tlatitlanil Pedro okijto Jesús melauak okiyolitijkej. ¿San okinekiaya tlajyouis tla amo melauak okiyolitijkej? Pedro uan oksekimej imachtijkauan Jesús okimatiayaj Jesús oyoltoka uan okiyekanaya tetlapouilistli. Uan iyolitilis Jesús okinmachti yejuan noijki kinyolitiskej. Ijkon okipanok Esteban, akin ijkuak okimiktijkej okineltokaya oksepa kiyolitiskej (Hech. 7:55-60).

14. ¿Tleka tikneltoka Jesús yoltok?

14 Tikmatij Jesús tlanauatijtok ken ueyi Tekiua uan noijki kiyekana tlanechikol. Tlaneltokalistli tlen melauak momiaktilijtok. ¿Mochiuaskia nochi nin tla Jesús amo yoltoskia? Tla amo kiyolitiskiaj, uelis amo keman techtlapouiskiaj itech Jesús. Pero onka miak tlamantli tlen kichiua ma tikneltokakan melauak yoltok uan kiyekantok tetlapouilistli tlen mochijtok itech nochi Tlaltikpak.

¿TLEKA TECHPALEUIA IYOLITILIS JESÚS?

15. ¿Tleka iyolitilis Jesús techyolchikaua ma titetlapouikan?

15 Tikmatiskej okiyolitijkej Jesús kichiua ma titetlapouikan. Yikipia kanaj dos mil xiuitl akinmej kikokoliaj toTajtsin Dios mochijchikajtokej amo ma motetlapoui kuali tlajtolmej. Yokitekitiltijkej miak tlamantli pampa ayakmo ma titetlapouikan: akinmej yomoxelojkej itech Jehová, techpinatiaj, techtlajyouiltiaj, techtojtokaj, amo kinekij ma titetlapouikan uan noijki sekimej tokniuan kinmiktiaj. Pero Biblia kijtoa: “Maski san tlen tepostli ika mitsixnamikiskej, amo mitstlaniliskej” (Is. 54:17). Nochtin tlaltikpaktlakamej tlen Satanás kintekitiltia amo techmomojtiaj. Jesús techpaleuia ijkon ken okijto (Mat. 28:20). ¡Amo itlaj techmomojtia! Maski sapanoa mochijchikauaskej amo uelis kichiuaskej ayakmo ma titetlapouikan.

Jesús techyolchikaua ma titetlapouikan (Xikita párrafo 15)

16, 17. 1) ¿Ken kiteititia iyolitilis Jesús nochi tlen otlamachti melauak mochiuas? 2) Ken kijtoa Juan 11:25, ¿tlen kichiuas Jesús, uan akin okimakak chikaualistli?

16 Iyolitilis Jesús techititia nochi tlen otlamachti melauak. Tlatitlanil Pablo okijto tla amo melauak okiyolitijkej Jesús, intlaneltokilis uan tetlapouilistli tlen kichiuaj akinmej melauak kichiuaj ken Cristo amo itlaj ipati. Se tlakatl tlen momachtia Biblia okijto: “Tla Jesús amo okiyolitijkej, [...] akinmej kichiuaj ken Cristo tlaneltokaj itech itlaj tlen amo melauak opanok”. Uan noijki, Evangelios techtlapouiskiaj san itech se tlakatl yolkuali uan ixtlamatki akin sapanoa okitlajyouiltijkej uan okimiktijkej akinmej okikokoliayaj. Pero Jesús kema okiyolitijkej. Uan nochi nin technejmachtia tlen ye otlamachti uan tlen panos satepan melauak (xiktlajtolti 1 Corintios 15:14, 15, 20).

17 Jesús okijto: “Ne niktemaka nemílistli iwa yolílistli. Akin nechneltokas maya mamiki, yolitos nochipa” (Juan 11:25). Ninmej tlajtolmej melauak mochiuaskej. Jehová okimakak chikaualistli Jesús ma kinyoliti akinmej tlanauatiskej iuan itech iluikak, uan noijki akinmej nochipa yoltoskej itech Tlaltikpak. Imikilis uan iyolitilis Jesús techyekiluia ayakmo yetos mikilistli. Nin techyolchikaua pampa tikxikoskej ika miak yolchikaualistli nochi ouijkayotl, maski techmiktiskej.

18. ¿Tlen tikmatij pampa okiyolitijkej Jesús?

18 Iyolitilis Jesús techmachtia techixkomakaskej ken kijtoaj itlanauatiluan Jehová. Ma tikitakan tlen okinmilui Pablo sekimej tlaltikpaktlakamej tlen  ochantiayaj Atenas: “Dios yokitlali se tonati ijkuak tlaixkomakas. Ye kichiwas porke Ye yolmilajka iwa kitlalis n Cristo Jesús makichiwa nin tekitl, akin Ye yowejka okipéjpenki. Iwa tinochteh otikmatkeh Dios yokipéjpenki n Jesús ijkuak okiyoliti” (Hech. 17:31). Jehová yokitlali Jesús ma techixkomaka, uan tikmatij ye kichiuas ika tlasojtlalistli uan melajkayotl (xiktlajtolti Isaías 11:2-4).

19. ¿Ken techpaleuia titlaneltokaskej itech iyolitilis Jesús?

19 Pampa tikchiuaskej itlanekilis toTajtsin Dios moneki titlaneltokaskej itech iyolitilis Jesús. Amo uelis techmakixtiskiaj itech tlajtlakoli uan mikilistli tla amo mikiskia uan kiyolitiskiaj Cristo (Rom. 5:12; 6:23). Tikijtoskiaj ken miakej: “Matitlakuakah iwa matikonikah, porke mostla timikiskeh” (1 Cor. 15:32). Pero tejuan amo san tiknekij timoyolpaktiskej ika tlen onka itech Tlaltikpak. Ken tikmatij uelis techyolitiskej, tiknekij tiktlakamatiskej nochi tlen Jehová technauatia.

20. ¿Ken iyolitilis Jesús techmachtia Jehová ueyititok?

20 Iyolitilis Jesús techmachtia Jehová ueyititok, uan kinteochiua akinmej kitemoaj (Heb. 11:6). ¿Yotimokuayejyekojkej itech chikaualistli uan ixtlamatilistli tlen Jehová okiteititi ijkuak okiyoliti iKone ken se espíritu tlen amo keman mikis? Iyolitilis Jesús techmachtia Jehová kichiuas nochi tlen kijtoa. Jehová okijto “iixui siuatl” tlapaleuiskia ma moteititi san Jehová kinamiki tlanauatis. Pampa mochiuaskia tlen omoijto, omonekiaya ma miki uan ma kiyolitikan Jesús (Gén. 3:15).

21. ¿Tleka tikpatioita yolitilistli?

21 ¡Melauak tiktlasojkamatiliaj Jehová pampa techmaka chialistli itech yolitilistli! Tlatitlanil Juan okikak tlen panos satepan: “Xikita, axa Dios yochanchiwato iwa n tlakah. Dios chantitos inwah; iwa yejwah yetoskeh iaxkawah nochipa, iwa Ye inewia yetos non sanwel se Dios. Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki. Ijkuakó Dios non oyayantitoka okijto: [...] Xikijkuilo tlan nimitsilis, porke tlan nimitsilijtok milák iwa kuali se kinneltokas”. Ma timokuayejyekokan: ¿akin okimatilti Juan ninmej tlajtolmej? ¡Jesucristo akin okiyolitijkej! (Apoc. 1:1; 21:3-5.)