Xikita nochi

Tlen kiualika

¿Tleka moneki tiyetoskej tichipauakej uan amo titlajtlakolchiuaskej?

¿Tleka moneki tiyetoskej tichipauakej uan amo titlajtlakolchiuaskej?

“Moneki nanyetoskej nanchipauakej.” (LEV. 11:45)

1. ¿Ken techpaleuia amochtli Levítico?

JEHOVÁ kineki nochtin tiitekipanojkauan ma tiyetokan tichipauakej uan amo ma titlajtlakolchiuakan. Itech Biblia uan okachi itech amochtli Levítico techtlapouia itech chipaualistli noso amo ma titlajtlakolchiuakan. Uan pampa tiktlakamatiskej nin tlanauatil moneki kuali ma tikmatikan tlen techtlapouia nin amochtli.

2. Xikijto seki tlamantli tlen techmachtia amochtli Levítico.

2 Moisés noijki okijkuilo amochtli Levítico, tlen kajki itech “nochi tiotlajkuíloli” tlen kuali techmachtia (2 Tim. 3:16). Itech sejse tlakotonal tikajsij tokayotl Jehová kanaj majtlaktli uelta. Tla timomachtiaj amochtli Levítico okachi timochijchikauaskej pampa amo tikchiuaskej itlaj tlen uelis kisokiotis nin tokayotl (Lev. 22:32). Itech nin amochtli miak uelta tikajsij tlajtoli “Ne niJehová”, uan nin techilnamiktia moneki tiktlakamatiskej toTajtsin Dios. Axkan uan chikome timomachtis miak tlamantli tlen miak ipati, uan tlen techpaleuis ma tiktekichiuilikan Jehová uan amo ma titlajtlakolchiuakan.

 MONEKI TIYETOSKEJ TICHIPAUAKEJ UAN AMO TITLAJTLAKOLCHIUASKEJ

3, 4. 1) ¿Tlen kijtosneki ijkuak okaltijkej Aarón? 2) ¿Tlen kijtosneki ijkuak okinmaltijkej ikoneuan Aarón? (Xikita tlaixkopinal tlen ika peua tlamachtil.)

3 (Xiktlajtolti Levítico 8:5, 6.) Jehová okipejpenki Aarón ken ueyi teopixki uan ikoneuan ken teopixkej. Aarón okineskayoti Jesucristo, uan ikoneuan okinneskayotijkej tlapejpenalmej. Pero ¿tlen kineskayotia ijkuak okaltijkej Aarón? ¿Noijki omonekiaya ma kaltikan Jesús? Amo, pampa Jesús amo kipia tlajtlakoli (Heb. 7:26; 9:14). Ijkuak okaltijkej Aarón okineskayoti Jesús chipauak uan amo kipia tlajtlakoli iixpan toTajtsin Dios. ¿Tlen kijtosneki ijkuak okinmaltijkej ikoneuan Aarón?

4 Nin tlamantli kiteititia ken noijki moneki kinchipauaskej akinmej okinpejpenkej pampa tlanauatiskej itech iluikak. ¿Kijtosneki mochipauaj ijkuak moapolaktiaj? Amo, ijkuak ikaj moapolaktia amo kijtosneki ayakmo tlajtlakole. Kijtosneki motemaka pampa kichiuas itlanekilis toTajtsin Dios. Tla ijkon, ¿ken kinchipauaj? Pablo okijto kinchipauaj ika iTlajtol toTajtsin Dios, ik non, tlapejpenalmej moneki kichiuaskej tlen otlamachti Jesús (Efes. 5:25-27). Ijkon ika itlajtol toTajtsin Dios kinchipauaj. ¿Noijki ijkon kinpanoa tokniuan akinmej mokauaskej itech Tlaltikpak? (Juan 10:16.)

5. ¿Tleka tikijtoaj oksekimej tokniuan noijki kinchipauaj ika iTlajtol toTajtsin Dios?

5 Ken yotikijtojkej, ikoneuan Aarón amo kinneskayotiaj akinmej mokauaskej itech Tlaltikpak (Apoc. 7:9). Pero yejuan noijki mochipauaj ika iTlajtol toTajtsin Dios. Tlaneltokaj itech tlen tlamachtia Biblia itech ken sapanoa ipati estli tlen Jesús okitemakak, uan non kinyoleua ma kitekichiuilikan Jehová “tlajka iwa n yuak” (Apoc. 7:13-15). Tlapejpenalmej uan tokniuan tlen mokauaskej itech Tlaltikpak nochipa kinchipajtokej, ik non, nochipa mochijchikauaj kichiuaskej tlen kuali (1 Ped. 2:12). ¡Melauak yolpaki Jehová pampa kinmita chipauakej uan san sekan katej tokniuan tlapejpenalmej inmiuan akinmej mokauaskej itech Tlaltikpak uan san kitekichiuilijtokej intlajpixki Jesús!

6. ¿Tleka moneki nochipa tikitaskej kox chipauak tonemilis?

6 Teopixkej omonekiayaj yetoskej chipauakej, uan nin techmachtia miak tlamantli tlen miak ipati. Miakej akinmej tikinmachtiaj kintlajtlachialtia ken chipauak kajki kanin timonechikoaj, uan tejuan tichipauakej uan kuali timoyektlaliaj. Pero noijki teopixkej techmachtiaj nochtin akinmej kinekiskej kiueyichiuaskej Jehová moneki kichiuaskej ika nochi inyolo uan amo tlajtlakolchiuaskej (xiktlajtolti Salmo 24:3, 4; Is. 2:2, 3). Jehová kineki ma tikueyichiuakan uan ma yeto chipauak toyolo, tokuayejyekol uan totlalnakayo. Ik non, moneki nochipa tikitaskej ken tikatej. Tla ijkon tikchiuaj, uelis tikitaskej tlen moneki tikpatlaskej (2 Cor. 13:5). Se neskayotl, tla se tokni tlen yomoapolakti kita pornografía moneki motlajtlanis: “¿Melauak nikteititia nichipauak noso amo nitlajtlakolchiua?”, uan ma kitemo ikaj ma kipaleui pampa ayakmo ijkon ma kichiua (Sant. 5:14).

MONEKI TITETLAKAMATISKEJ PAMPA AMO TITLAJTLAKOLCHIUASKEJ

7. ¿Ken okichi Jesús tlen kijtoa Levítico 8:22-24?

7 Ijkuak itech altepetl Israel okintlalijkej teopixkej, Moisés okitlali ieso se tentso itech inyekma ueyi teopixki Aarón, uan ikoneuan, itech innakas, inmajpil  uan inmikxipil tlen okachi tomauak (xiktlajtolti Levítico 8:22-24). Nin okiteititi teopixkej tetlakamatiskiaj uan mochijchikauaskiaj pampa kichiuaskiaj nochi inteki. Noijki Jesús, toUeyi Teopixki, okinmakak se kuali neskayotl tlapejpenalmej uan oksekimej tokniuan. Nochipa okikakiaya itlayekanalis Jehová; okichiuaya itlanekilis uan nochipa okichiuaya tlen kuali (Juan 4:31-34).

8. ¿Tlen moneki tikchiuaskej nochtin tiitekipanojkauan Jehová?

8 Nochtin moneki tikchiuaskej ken toUeyi Teopixki Jesús akin amo okika Jehová, noijki moneki ma tikintlakamatikan itlanauatiluan Jehová tlen katej itech Biblia, pampa amo tiknekij ‘tikyolkokoskej Iespíritu Santo n Totajtsi Dios’ (Efes. 4:30). Uan moneki tiktemoskej “n ojtli milaktik” (Heb. 12:13).

9. 1) ¿Tlen okijtojkej eyi tokniuan tlen kipaleuiaj Cuerpo Gobernante? 2) ¿Ken techpaleuia tlen kijtoaj tokniuan pampa ma tiyetokan tichipauakej?

9 Ma tikitakan tlen kijtoaj sekimej tokniuan tlen yiuejkika kipaleuiaj Cuerpo Gobernante. Se tokni okijto: “Maski se ueyi tlateochiualistli titekitiskej iuan tokniuan, ualeua nikita maski tlapejpenalmej, noijki tlajtlakolejkej. Pero nimochijchikaua nikintlakamatis tokniuan tlen Jehová okinpejpenki ma kiyekanakan ialtepe”. Okse tokni okijto: “Tlen kijtoa 2 Corintios 10:5, techyoleua ma tiktlakamatikan Cristo, nechmachtia moneki nikintlakamatis uan nikinpaleuis akinmej kiyekanaj tekitl. Uan nikchiua ika nochi noyolo”. Okse tokni noijki okijto: “Akin kitlasojtla tlen Jehová kitlasojtla, uan kikokolia tlen ye kikokolia, uan nochipa kitemoa itlayekanalis uan kineki kiyolpaktis, kitlakamatis tlen kijtos ialtepe uan akinmej Jehová kintekitiltia pampa ma mochiua itlanekilis itech Tlaltikpak”. Nin tokni kijtoa sapanoa okitlajtlachialti ken otetlakamatiaya tokni Nathan Knorr, akin noijki otekitik iuan Cuerpo Gobernante. Itech xiuitl 1925 nin amatlajkuilol tlen omoijkuiloaya ika inglés okijto seki tlamantli tlen amo ijkon okineltokayaj tokniuan, tlamachtil omotokayoti “Nesi ueyi altepetl”, tokni Knorr san niman okineltokak tlen ompa omoijtoaya maski sekimej amo okineltokakej. Timokuayejyekoskej itech tlen kijtoaj tokniuan techpaleuis ma tikajsikamatikan ken pampa tiyetoskej tichipauakej, moneki titetlakamatiskej.

MA TIKTLAKAMATIKAN ITLANAUATIL TOTAJTSIN DIOS ITECH ESTLI

10. ¿Tleka miak ipati ma tiktlakamatikan itlanauatil toTajtsin Dios itech estli?

10 (Xiktlajtolti Levítico 17:10.) Jehová okinnauati israelitas amo ma kikuakan estli, uan tejuan noijki tiktlakamatij nin tlanauatil, uan amo tikkuaj inmieso yolkamej nion tlaltikpaktlakamej (Hech. 15:28, 29). Tiknekij tiktlakamatiskej nin tlanauatil maski timikiskej noso maski oksekimej techiluiskej amo ma tiktlakamatikan Jehová. Tejuan tiktlasojtlaj Jehová uan tiknekij tiktlakamatiskej. Amo itlaj kichiuas ayakmo ma techseli Jehová uan ayakmo ma tiyetokan itech itlanechikol. Uan maski sekimej techpinatiskej pampa amo tikseliaj estli, tejuan tiknekij tiktlakamatiskej Jehová (Jud. 17, 18). ¿Tlen mitspaleuis pampa amo tiknekis tikkuas nion ma mitstlalilikan estli? (Deut. 12:23.)

11. ¿Tleka kipia miak ipati tlen okichiuiliayaj estli itech tonal ijkuak okintlapojpoluiayaj intlajtlakoluan israelitas?

11 Tlen Jehová okinauati ueyi teopixki ma kichiua ika estli itech tonal ijkuak okintlapojpoluiayaj intlajtlakoluan israelitas, techpaleuia ma tikajsikamatikan ken kita Jehová estli. Estli san  omotekitiltiaya pampa: kintlapojpoluiskej intlajtlakoluan akinmej okinekiayaj ma kintlapojpolui Jehová. Itech non tonal, ueyi teopixki omonekiaya kiajtsoluis ieso se toro uan se tentso ipan arca itech tlajtolsenkaualistli (Lev. 16:14, 15, 19). Ijkon Jehová okintlapojpoluiaya intlajtlakoluan israelitas. ToTajtsin Dios noijki otlanauati akin kimiktiskia se yolkatl, omonekiaya kikixtilis ieso uan kitlaltemis uan satepan uelis kikuas. ¿Tleka? “Pampa yolilistli kajki itech estli.” (Lev. 17:11-14.) Okipiayaj miak ipati ken okitekitiltiayaj estli itech tonal ijkuak okintlapojpoluiayaj intlajtlakoluan israelitas uan tlanauatil tlen okijtoaya ma kikixtilikan nochi ieso se yolkatl. Miak xiuitl satepan Jehová okinauati Noé iuan ikalchanejkauan amo ma kikuakan estli (Gén. 9:3-6). ¿Tlen techmachtia nin tlanauatil?

12. Ijkon ken Pablo okintlajkuilili tokniuan hebreos, ¿tleka estli miak ipati pampa ma techtlapojpoluikan?

12 Ijkuak tlatitlanil Pablo okintlajkuilili tokniuan hebreos, ye okinyekilui pampa kintlapojpoluiskiaj omonekiaya estli. Okijto “n tlanawátili techititia miak tlajtlákoli omochipawaya ika estli, iwa amitla motlaxtlawah tla amo motoyawa estli” (Heb. 9:22). Tlatitlanil Pablo okijto, maski nin tlamanali okipiaya miak ipati, okinpaleuiaya israelitas ma kilnamiktokan yejuan tlajtlakolejkej uan omonekiaya okse ueyi tlamanali pampa sepa kintlapojpoluiskiaj intlajtlakoluan. “Itlanawatil Moisés sanwel itlasekawilo tlan satepa walaskia, iwa amo tlan milák techmakaskia.” (Heb. 10:1-4.) ¿Ken uelis sepa techtlapojpoluiskiaj totlajtlakoluan?

13. ¿Tlen tikmachiliaj ika tlen okichi Jesús?

13 (Xiktlajtolti Efesios 1:7.) Akinmej tiktlasojtlaj Jesús uan iTajtsin, sapanoa tikpatioitaj tlen okichi Jesús ijkuak okitemakak iyolilis (Gál. 2:20). Pero tlen okichi Jesús satepan ijkuak okimiktijkej uan okiyolitijkej non tlen otechmakixti itech tlajtlakoli. Uan non tlen okineskayotiaya Tlanauatil itech tonal ijkuak okintlapojpoluiayaj intlajtlakoluan  israelitas. Itech non tonal, ueyi teopixki okalakiaya itech Santísimo, uan ompa okitemakaya estli ken yetoskia iixpan Jehová (Lev. 16:11-15). Noijki, ijkuak okiyolitijkej Jesús oyajki iluikak uan iixpan Jehová okitemakak ieso (Heb. 9:6, 7, 11-14, 24-28). ¡Melauak tiktlasojkamatiliaj tlen okichi! Pampa tikneltoka ieso Jesús sapanoa ipati, toTajtsin Dios techtlapojpoluia totlajtlakoluan uan totlalnamikilis kuali kajki.

14, 15. ¿Tleka miak ipati ma tikajsikamatikan uan ma tiktlakamatikan tlanauatil itech estli?

14 Axkan kuali tikajsikamatij tleka toTajtsin Dios otlanauati amo ma tikkuakan estli (Lev. 17:10). ToTajtsin Dios kijtoa yolilistli kajki itech estli, ik non kipatioita (Gén. 9:4). Tiknekij timokuayejyekoskej ken ye itech estli uan tiktlakamatiskej tlanauatil tlen kijtoa amo ma tikkuakan. San uelis kuali timouikaskej iuan toTajtsin Dios tla titlaneltokaj itech estli tlen okitemakak Jesús uan tla tikajsikamatij tleka toTajtsin Dios kipatioita estli (Col. 1:19, 20).

15 Pero moneki ma tikilnamikikan ajsis se tonal keman tejuan noso se tokalchanejka kinekiskej kitlaliliskej estli, uan moneki tikpejpenaskej kox tikseliskej, tlamantli tlen kipiaj san tepitsin estli noso se pajtli kanin kitekitiltiskej toeso. Uan amo itlaj ma tikselikan tlen iTlajtol Jehová kijtoa amo ma tikchiuakan, tlamo tikyolkokoskej. Ik non, miak ipati ma tiktlatlaujtikan, ma timomachtikan uan axkan ma tikpejpenakan tlen tikchiuaskej ijkuak itlaj amo kuali techpanos. Tla ijkon tikchiuaj tikpiaskej chikaualistli pampa amo tikseliskej estli uan tikijtoskej tleka ijkon titlaneltokaj. Akinmej tlapajtiaj uan akinmej kinpaleuiaj uan oksekimej, kineltokaj ijkuak kintlaliliaj estli pajtij uan kintlajtlaniliaj ma kitemakakan estli. Pero tejuan tikmatij, Jehová akin oTechchijchi, san ye uelis kijtos ken tiktekitiltiskej estli, uan ye kipatioita estli (Lev. 17:10). Ik non, ma tiktlakamatikan itlanauatil toTajtsin Dios itech estli. Uan noijki amo ma titlajtlakolchiuakan uan ijkon ma tikteititikan sapanoa tikpatioitaj estli tlen okitemakak Jesús, tlen kichiua ma techtlapojpoluikan uan ma tikpiakan yolilistli tlen amo keman tlamis (Juan 3:16).

¿Tikneki tiktlakamatis itlanauatil Jehová itech estli? (Xikinmita párrafos 14 a 15)

¿TLEKA JEHOVÁ KICHIA MA TIYETOKAN TICHIPAUAKEJ UAN AMO MA TITLAJTLAKOLCHIUAKAN?

16. ¿Tleka moneki ma tiyetokan tichipauakej?

16 Ijkuak Jehová okinmakixti israelitas pampa ayakmo ma yetokan tlakeualmej itech Egipto, okinmilui: “Ne niJehová akin nikchijtok xikisakan itech tlali Egipto pampa nimochiuas namoTajtsin Dios; uan namejuan moneki nanyetoskej nanchipauakej, pampa ne nichipauak” (Lev. 11:45). Jehová okinekiaya ialtepe ma yeto chipauak pampa ye noijki chipauak. Ik non, tejuan noijki moneki tiyetoskej tichipauakej. Amochtli Levítico kuali techmachtia.

17. ¿Ken techpaleuia amochtli Levítico?

17 Tlaxelolmej tlen otimomachtijkej sapanoa techpaleuiaj. Techpaleuiaj okachi ma tikpatioitakan amochtli Levítico, uan ma tikajsikamatikan tleka miak ipati ma tiyetokan tichipauakej uan amo ma titlajtlakolchiuakan. Pero amochtli Levítico kipia miak tlamantli tlen miak ipati. Chikome timomachtiskej okseki tlamantli tlen techpaleuis ma tiktekichiuilikan Jehová uan ma tiyetokan tichipauakej uan amo ma titlajtlakolchiuakan.