Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Noviembre de 2014

Ma tiyetokan tichipauakej itech nochi tonemilis

Ma tiyetokan tichipauakej itech nochi tonemilis

“Xinemikah non yolchipawakeh.” (1 PED. 1:15)

1, 2. 1) ¿Tlen kineki Jehová ma kichiuakan itekipanojkauan? 2) ¿Tlen tlajtlanilmej tikinnankiliskej axkan?

TLATITLANIL Pedro otlajkuilo itech tlen kijtoa amochtli Levítico uan okiyekijto akinmej tikchiuaj ken Cristo moneki tiyetoskej tichipauakej itech nochi tonemilis ijkon ken israelitas (xiktlajtolti 1 Pedro 1:14-16). Jehová “akin Chipauak”, kineki tlapejpenalmej uan akinmej mokauaskej itech Tlaltikpak ma mochijchikauakan pampa ma yetokan chipauakej itech nochi innemilis, itech nochi tlen kichiuaskej (Juan 10:16).

2 Ika tlen axkan timomachtiskej tikitaskej okseki tlamantli tlen miak ipati tlen kipia amochtli Levítico, uan tlen techpaleuis ma tikajsikamatikan tlen kineki Jehová ma tikchiuakan uan ijkon ma tiyetokan tichipauakej itech nochi tonemilis. Noijki tikinnankiliskej ninmej tlajtlanilmej: ¿Tleka moneki nochipa tikintlakamatiskej itlanauatiluan Jehová? ¿Tlen techmachtia Levítico pampa ma tiktlakaitakan Jehová? Uan ¿tlen techmachtia tlamanali tlen okitemakayaj israelitas?

NOCHIPA MA TIKINTLAKAMATIKAN ITLANAUATILUAN JEHOVÁ

3, 4. 1) ¿Tleka akinmej kichiuaj ken Cristo moneki kintlakamatiskej itlanauatiluan Jehová uan principios bíblicos? 2) ¿Tleka amo ma timomakuepakan nion ma titekokolikan?

3 Pampa tikyolpaktiskej toTajtsin Dios, moneki tikintlakamatiskej  nochi itlanauatiluan uan ma timoyekanakan ika principios bíblicos, uan amo keman ma tikijtokan amo techpaleuiskej noso amo moneki tikintlakamatiskej. Maski axkan ayakmo moneki tikintlakamatiskej tlanauatilmej tlen okinmijkuilo Moisés, ninmej tlanauatilmej techpaleuiaj ma tikmatikan tlen kuali uan tlen amo kuali, ijkon ken kijtoa toTajtsin Dios. Se neskayotl, Jehová okinnauati israelitas: “Amo moneki timomakuepas nion amo xikilnamikto tlen omitschiuilijkej ikoneuan moaltepe; uan moneki titetlasojtlas ken timotlasojtla. Ne niJehová” (Lev. 19:18).

4 Ken tikitaj Jehová amo kineki ma timomakuepakan nion ma titekokolikan (Rom. 12:19). Tla amo tiktlakamatij tlen technauatia, tikpaleuijtokej Satanás uan tiksokiotiaj tokayotl Jehová. Ik non, ijkuak ikaj techkualania, amo san ma tikilnamiktokan tlen otechchiuili. Biblia kijtoa tikatej ken se “xoktsi” tlen tikpiaj tlen miak ipati: toteki itech tekiuajkayotl (2 Cor. 4:1, 7). Itech nin xoktsi amo uelis tikpiaskej tlen miak ipati ken toteki itech tekiuajkayotl uan tlen amo kuali ken ijkuak ikaj tikkokoliaj.

5. ¿Tlen techmachtia tlen okichi Aarón ijkuak omikej ikoneuan? (Xikita tlaixkopinal tlen ika peua tlamachtil.)

5 Itech Levítico 10:1-11 techtlapouia itech se ouijkayotl tlen okinpanok Aarón uan ikalchanejkauan. Jehová okiualtitlanki tlitl tlen okinmikti ome ikoneuan Aarón, Nadab uan Abihú, pero noijki toTajtsin Dios okinmilui amo ma moyolkokokan. ¡Omonekiaya yetoskej yolchikauakej pampa kitlakamatiskia nin tlanauatil! ¿Uan tejuan? ¿Tikatej tichipauakej iixpan Jehová uan timochijchikauaj amo timouikaskej iuan tokalchanejkauan noso toyolikniuan tlen okinkixtijkej itech tlanechikol? (Xiktlajtolti 1 Corintios 5:11.)

6, 7. 1) ¿Tlen moneki tikilnamikiskej ijkuak se tokalchanejka akin amo itlaixpantijka Jehová techyoleua ma tiakan ijkuak ikaj monamiktis? (Xikita tlajtoli tlen kiualika tlakxitlan.) 2) ¿Tlen uelis tikiluiskej tokalchanejka tlen techyoleua ma tiakan ijkuak ikaj monamiktis?

6 Axkan uelis amo moneki tikchiuaskej ken okichijkej Aarón uan ikalchanejkauan. Pero ¿tlen tikchiuaskej tla se tokalchanejka akin amo itlaixpantijka Jehová techyoleua ma tiakan ijkuak ikaj monamiktis itech teopan noso inmiuan ma tiiluichiuakan? Maski itech Biblia amo tikajsij se tlanauatil tlen kijtoa amo ma tiakan, kema tikinmajsij miakej principios tlen uelis techpaleuiskej ma tikpejpenakan tlen okachi kuali. *

7 Uelis sekimej tokalchanejkauan amo kinpaktis tlen tikneltokaj. Uelis amo kajsikamatij tiknekij tiktlakamatiskej Jehová uan tiyetoskej tichipauakej (1 Ped. 4:3, 4). Uan tejuan amo tiknekij tikinpinatiskej nion tikinkualaniskej, ik non, ika miak tlasojtlalistli tikinmiluiskej tlen tikneltokaj. Uan moneki tikchiuaskej san niman. Ijkuak techyoleuaj tikintlasojkamatiliskej pampa otechyolejkej ma tiakan ijkuak ikaj monamiktis, pero noijki moneki tikinyekiluiskej itech teopan kichiuaskej seki tlamantli tlen amo uelis tikchiuaskej, uan amo tiknekij tikinpinatiskej nion tikinkualaniskej itech non iluitl tlen yejuan kipatioitaj, ik non, kuali ma timokuayejyekokan kox tiaskej. * Tla ijkon tikinmiluiaj tokalchanejkauan tiktlakamatiskej Jehová uan amo titlajtlakolchiuaskej.

 JEHOVÁ SAN YE UEYI TEKIUA ITECH NOCHI SEMANAUAK

8. ¿Tlen techmachtia Levítico itech ken san Jehová kinamiki Kitemakas Tlanauatilmej?

8 Amochtli Levítico techmachtia san Jehová kinamiki Kitemakas Tlanauatilmej. Kanaj 30 veces kijtoa Jehová okintemakak tlanauatilmej tlen ijkuilitokej itech amochtli Levítico. Uan Moisés kuali okimatiaya, ik non, nochipa okichiuaya tlen toTajtsin Dios okiluiaya (Lev. 8:4, 5). Noijki moneki tiktlakamatiskej Jehová akin Kinamiki Tlanauatis. Uan ialtepe techpaleuia pampa ma tiktlakamatikan. Pero ualeua tiyetoskej toselti uan monekis tikintlakamatiskej itlanauatiluan Jehová ijkon ken okichi Jesús ijkuak okatka kanin tlauaki (Luc. 4:1-13). ¿Tlen tikchiuaskej? Tla titlaneltokaj itech toTajtsin Dios uan tiktlakaitaj ken toueyi Tekiua, amo ikaj uelis kichiuas amo ma tiktlakamatikan uan amo ikaj techmomojtiskej (Prov. 29:25).

9. ¿Tleka techkokoliaj?

9 Akinmej tikchiuaj ken Cristo amo techtlajtlachialtia ma techtlajyouiltikan, pampa Jesús okinmilui imachtijkauan: “Nomechtemaktiskeh para manomechtlaijyowiltikah iwa nomechmiktiskeh. Nochteh n tlaltikpaktlakah nomechkokoliskeh por nonnechneltokah” (Mat. 24:9). Maski techkokoliaj, titetlapouiaj uan timochijchikauaj pampa tiyetoskej tichipauakej iixpan Jehová. ¿Tleka techkokoliaj tla tejuan timochijchikauaj, tikatej tichipauakej uan kuali tinemij? (Rom. 13:1-7.) Pampa tiktlakamatij Jehová akin toueyi Tekiua itech nochi semanauak. San ye tikueyichiuaj uan nochipa tikintlakamatij itlanauatiluan (Mat. 4:10).

10. ¿Tlen okipanok se tokni akin amo okitlakamatki Jehová?

10 Biblia kijtoa akinmej kichiuaj ken Cristo “ayakmó nonkichiwah tlan yejwah kichiwah”. Ik non, amo timokajkalakiaj itech guerras nion itech política (xiktlajtolti Juan 15:18, 19 uan Isaías 2:4). Pero miakej tokniuan amo kitlakamatij Jehová. Miakej satepan omoyolkuepkej uan oksepa okitlakamatkej Jehová (Sal. 51:17). Pero oksekimej amo. Ma tikitakan tlen opanok itech Hungría, ijkuak omochijtoka Segunda Guerra Mundial. Sekimej policías okinnechikojkej 160 tokniuan tlen ayamo okajxitiayaj 45 xiuitl, tlen okintsakej itech miakej altepemej pampa okitlakamatiayaj toTajtsin Dios. Ijkuak ompa okatkaj okinmiluijkej omonekiaya tekitiskej ken soldados. Maski miakej amo okiselijkej tlen okinmiluijkej, chiknaui tokniuan keman okichijkej non tekitl. Ome xiuitl satepan, se itech chiknaui akinmej amo okitlakamatkej Jehová okipanok itlaj tlen oui: okinauatijkej noijki yetoskia itech akinmej kinmiktiskiaj sekimej iTlaixpantijkauan Jehová. ¡Melauak okatka oui uan okachi pampa ompa okatka se iikni! Pero amo okinmiktijkej tokniuan.

MA TIKMAKAKAN JEHOVÁ TLEN OKACHI KUALI

11, 12. ¿Tlen techmachtia itech Jehová tlanauatilmej itech tlamanali?

11 Tlanauatil tlen okimakakej Moisés okijtoaya israelitas omonekiayaj kitemakaskej tlamanali (Lev. 9:1-4, 15-21). Ken nin tlamanali okiteititiaya tlamanali tlen okitemakak Jesús, omonekiaya yetos chipauak. Uan sejse tlamanali Jehová okijto ken mochiuaskia. Se neskayotl, Levítico 12:6 kiyekijtoa tlen omonekiaya kichiuas se siuatl tlen okipiaya se konetl: “Ijkuak tlamiskej tonalmej ijkuak mochipauas pampa okipixki se chokotsin noso se takotsin, kiualikas se ichkakonetl tlen ayamo kajxitia se xiuitl ken se tlamanali tlen kitlatiskej uan se palomajkonetl noso se paloma ken se tlamanali pampa tlajtlakoli, iyekapan mantajkali, iixpan teopixki”. Maski kuali okiyekijtoaya tlen omonekiaya kichiuaskej, Tlanauatil noijki techmachtia Jehová  tetlasojtla uan yolkuali. Tla siuatl amo okipiaya tomin pampa kikoas se ichkakonetl, uelis kintemakaskia ome palomajkonemej noso ome palomas (Lev. 12:8). Maski amo okipiaya tomin, Jehová okitlasojtlaya uan okipatioitaya tlamanali tlen okitemakaya. ¿Tlen techmachtia nin tlanauatil?

12 Tlatitlanil Pablo okinyole tokniuan “nochipa matikweyijkachiwakah Dios, [...] ye n tlamánali non tikpiah tikmakaskeh” (Heb. 13:15). Tikmakaj nin tlamanali ijkuak titetlapouiaj itech nin tokayotl tlen chipauak. Melauak amo tinochtin tiuelij tikchiuaj ken oksekimej, pampa timokokoaj noso tikpiaj itlaj okse tlamantli, pero tlen okachi ipati ma timochijchikauakan tikmakaskej Jehová tlen okachi kuali. Se neskayotl, tokniuan akinmej amo uelij kisaj pampa mokokoaj noso yokokoxkatikej, noso youeuejtikej tetlapouiaj ika cartas, teléfono noso kintlapouiaj akinmej kintlajpaloaj. Noijki ijkon kiueyichiuaj Jehová (Rom. 12:1; 2 Tim. 2:15).

13. ¿Tleka moneki tiktemakaskej amatsintli kanin kijtoa keski horas otitetlapouijkej?

13 Amo tikueyichiuaj Jehová pampa ikaj techchiualtia, tikueyichiuaj pampa tiktlasojtlaj (Mat. 22:37, 38). ¿Tlen moneki tikchiuaskej ijkuak techiluiaj ma tikijkuilokan keski horas otitetlapouijkej? Ijkuak tejuan tiktemakaj amatsintli, tikteititiaj tiktlasojtlaj uan tiktlakamatij Jehová (2 Ped. 1:7). Uan amo ikaj moneki tetlapouis san pampa kineki kitlalis itech amatsintli miak horas. Uan noijki tla se tokni mokokoa noso yokokoxkatik, noso youeuejtik, uelis tetlapouis quince minutos uelis kitlalis non kauitl itech amatsintli. Jehová kimati maski san otetlapoui seki minutos, okichi pampa kitlasojtla Jehová uan kipatioita kitekichiuilis. Jehová kimati ye kimaka tlen okachi kuali, ik non, Jehová kipatioita. Ken yotimomachtijkej, maski se israelita amo okipiaya tomin uelis kimakaskia Jehová se tlamanali. Noijki tokniuan akinmej amo okachi uelij tetlapouiaj, yolpakij pampa kitemakaj itlaj tlen okichijkej itech tetlapouilistli. Ika nochi tlen tikijkuiloaj itech amatsintli, momati tlen tekitl tikchijtokej itech nochi Tlaltikpak uan ialtepe Jehová kimati kanin moneki okachi tlapaleuilistli, ijkon okachi kuali mochiua tetlapouilistli. ¿Amo tikpatioitaj tiktemakaskej amatsintli kanin kijtoa keski horas otitetlapouijkej?

OKACHI KUALI MA TIMOMACHTIKAN BIBLIA

14. ¿Tleka moneki tikitaskej ken timomachtiaj?

14 Ika nochi tlen yotimomachtijkej, axkan kuali tikajsikamatij tleka Jehová okitlali amochtli Levítico itech iTlajtol (2 Tim. 3:16). Uan axkan tiknekij tiyetoskej tichipauakej, uan amo san pampa Jehová kineki, tiknekij tikchiuaskej pampa san Jehová kinamiki ma tikmakakan tlen okachi kuali. Uan noijki nochi tlen yotimomachtijkej kichiua okachi kuali ma timomachtikan Biblia (xiktlajtolti Proverbios 2:1-5). Nochtin tiknekij ma kiseli Jehová tlamanali tlen tikmakaj. Ik non, ma timotlajtlanikan: “¿Ken nimomachtia? Pampa nechpaktia nimauiltis, nimoyolpaktis, nikitas televisión uan videojuegos, ¿non amo nechkauilia kuali ma nimomachti?”. Tla ijkon techpanoa, miak ipati ma timomachtikan  tlen okijkuilo tlatitlanil Pablo.

¿Tikpatioitaj timomachtiskej Biblia uan tikueyichiuaskej Jehová ken kalchanejkej? (Xikita párrafo 14)

15, 16. ¿Tleka tlatitlanil Pablo kuali okinyekilui hebreos tlen omonekiaya kichiuaskej?

15 Tlatitlanil Pablo kuali okinmilui tlen omonekiaya kichiuaskej hebreos (xiktlajtolti Hebreos 5:7, 11-14). Kuali okinyekilui yejuan ‘yolik kajsikamatih’, pampa amo kuali okajsikamatiayaj tlen kijtoa Biblia. ¿Tleka ijkon okinmilui? Pampa ijkon ken Jehová techtlasojtla ye noijki okintlasojtlaya tokniuan uan intech omotekipachoaya pampa san okinekiayaj kimatiskej tlen amo okachi oui itech Biblia. Maski kipia miak ipati kimatiskej tlen okachi amo oui itech Biblia, tla okinekiayaj ma yeto chikauak intlaneltokilis, omonekiaya okachi kuali ma momachtikan.

16 Yejuan amo kuali otlamachtiayaj, okachi kuali, omonekiaya ikaj ma kinmachti. ¿Tleka omonekiaya ikaj ma kinmachti? Pampa amo kuali omomachtiayaj. ¿Uan tejuan? ¿Tikpatioitaj kuali timomachtiskej? ¿Timochijchikauaj pampa tikajsikamatiskej? ¿Tikxeloaj kauitl pampa timotlatlaujtiskej uan kuali timomachtiskej Biblia? Tla tikitaj oui, ¿uelis pampa nochipa amo kuali timomachtiaj? Ma tikilnamikikan tejuan amo san titetlapouiaj, noijki tikinmachtiaj oksekimej uan noijki tiknekij ma kiueyichiuakan Jehová (Mat. 28:19, 20).

17, 18. 1) ¿Tleka moneki kuali timomachtiskej tlen okachi oui itech Biblia? 2) ¿Uelis tikoniskej alcohol achto timonechikoskej?

17 Miakej tikitaj oui timomachtiskej Biblia, uan Jehová amo techchiualtia ma timomachtikan. Maski yitikpiaj miak xiuitl timomachtiaj noso yikin tipeuaj, nochtin moneki kuali timomachtiskej Biblia pampa tiyetoskej tichipauakej.

18 Pampa tiyetoskej tichipauakej iixpan Jehová, moneki kuali timomachtiskej Biblia uan tikchiuaskej tlen toTajtsin Dios kineki. Oksepa ma tikitakan tlen okinpanok Nadab uan Abihú, akinmej Jehová okinmikti pampa amo kuali okiueyichijkej, uelis pampa otlakonikej (Lev. 10:1, 2). Ma tikitakan tlen okinauatijkej Aarón ma kichiua ijkuak toTajtsin Dios okinmikti ikoneuan (xiktlajtolti Levítico 10:8-11). ¿Kijtosneki amo tikoniskej alcohol ijkuak tiaskej tonechikol? Ma timokuayejyekokan itech nin tlamantli, tejuan ayakmo moneki tiktlakamatiskej nin Tlanauatil (Rom. 10:4). Itech sekimej altepemej tokniuan konij tepitsin alcohol ijkuak tlakuaj achto yaskej innechikol. Itech Pascua okitekitiltiayaj naui copas de vino. Uan ijkuak Jesús okitlali iCena toTeko, okinmilui itlatitlaniluan ma konikan vino tlen okineskayotiaya ieso (Mat. 26:27). Biblia kijtoa amo kuali sapanoa ma titlakonikan uan ma titlauanakan (1 Cor. 6:10; 1 Tim. 3:8). Pero miakej inkuayejyekol amo kinkauilia ma konikan nion tepitsin alcohol achto kiueyichiuaskej Jehová. Noijki ma tikilnamiktokan itech altepemej tlatlamantli mokuayejyekoaj uan tlen okachi ipati kuali ma tikmatikan tlen kuali uan tlen amo kuali, pampa tikyolpaktiskej toTajtsin Dios uan tiyetoskej tichipauakej.

19. 1) ¿Tlen tlamantli uelis techpaleuis pampa kuali ma timomachtikan ken kalchanejkej noso toselti? 2) ¿Tlen moneki tikchiuaskej pampa ma tiyetokan tichipauakej?

19 Onka miak tlamantli tlen miak ipati tlen uelis tikinmatiskej tla kuali timomachtiaj Biblia. Ialtepe Jehová techmaka miak tlamantli tlen techpaleuia kuali ma timomachtikan ken kalchanejkej uan toselti, ¿tikchijtokej? Okachi ma tikixmatikan Jehová, itlanekilis uan noijki okachi itech ma timotokikan (Sant. 4:8). Ma tiktlajtlanilikan ken salmista: “Xikintlapo noixtololouan, pampa ne uelis nikitas nochi tlamantli kualtsin itech motlanauatil” (Sal. 119:18). Nochipa ma tiktlakamatikan Jehová akin “Yolchipauak”, uan ika miak yolpakilistli ma ‘tiktematiltikan nin kuali tlajtoli non chipauak’ (1 Ped. 1:15; Rom. 15:16). Axkan techpanoa miak tlamantli tlen amo kuali, ik non, ma timochijchikauakan nochipa ma tiyetokan tichipauakej uan ma tiktekichiuilikan Jehová ken toueyi Tekiua.

^ párr. 6 Xikita tlamachtil tlen itoka “Tlen techtlajtlaniaj” tlen okiski itech La Atalaya (ika náhuatl del centro Akin Tetlapouijtok) 15 de mayo de 2002.

^ párr. 7 Nin principio noijki techyekana ijkuak techyoleuaj ma titlakuatij, ma timijtotitij noso ijkuak monamiktiskej inmixpan tekiuajkej, pampa ompa noijki uelis kichiuaskej seki tlamantli tlen Jehová amo kipaktia, noijki akinmej techitaskej tlatlajtoskej tlen amo kuali itech ialtepe Jehová.