Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Noviembre de 2014

 TLAMACHTIL TLEN IKA PEUA | ¿MELAUAK ONKA DIABLO?

¿Diablo san kineskayotia tlen amo kuali?

¿Diablo san kineskayotia tlen amo kuali?

Miakej tlaltikpaktlakamej kineltokaj Satanás noso Diablo san kineskayotia tlen amo kuali. Tla ijkon, ¿tleka Biblia kijtoa Satanás omotlapoui iuan Jesús uan noijki iuan toTajtsin Dios? Kuali ma timomachtikan nin tlamantli.

IJKUAK OMOTLAPOUI IUAN JESÚS

Satanás okiyejyeko Jesús eyi uelta satepan ijkuak omoapolakti. Achto Satanás okilui ma kitekitilti ichikaualis pampa ma mopaleui, okilui temej ma kinkuepa panes. Satepan okilui ma mokajkaua pampa miakej tlaltikpaktlakamej ma kixmatikan. Uan saiktlami okilui kimakaskia tlanauatilistli itech nochi Tlaltikpak tla motlankuaketsaskia uan kiueyichiuaskia. Jesús okixiko nochi tlen Satanás okilui uan nochipa okinankili ika iTlajtol toTajtsin Dios (Mateo 4:1-11; Lucas 4:1-13).

¿Akin iuan omotlapoui Jesús? ¿Omotlapouijtoka iuan tlen amo kuali okipiaya ijtik? Amo. Biblia techiluia ye amo keman otlajtlakolchi maski sapanoa otlajyoui ken tejuan (Hebreos 4:15). Kema, “Cristo amayik okichi tlajtlákoli, iwa ayik otlakajkaya” (1 Pedro 2:22). Jesús amo omotlapouijtoka  iuan tlen amo kuali okipiaya ijtik pampa ye okatka chipauak, amo okipiaya tlajtlakoli uan nochipa okitlakamatki iTajtsin, ik non, tikijtoaj omotlapouijtoka iuan ikaj tlen melauak onka.

Pero amo san ninmej tlamantli techititia Diablo melauak onka.

  • Xikilnamiki, Diablo okilui Jesús kimakaskia nochi tlanauatilistli itech Tlaltikpak tla motlankuaketsaskia uan kiueyichiuaskia (Mateo 4:8, 9). Nin amo kipiaskia ipati tla amo melauak onka. Uan noijki Jesús okijto Satanás kipia chikaualistli.

  • Ijkuak Satanás otlanki omotlapoui iuan Jesús, oyajki uan “okikakajte kech tonati” (Lucas 4:13). Se tlamantli tlen kineskayotia tlen amo kuali, amo uelis kichiuas nochi nin tlamantli, nin san uelis kichiuas akin melauak yoltok.

  • Itech Mateo 4:11 kijtoa san niman oualajkej sekimej ángeles “okitekichiwilikoh” pampa ma moyolchikaua Jesús uan noijki okipaleuijkej. Ninmej ángeles melauak okatkaj. Tla ijkon, ¿tleka miakej kineltokaj amo onka Diablo?

IJKUAK OMOTLAPOUI IUAN TOTAJTSIN DIOS

Axkan ma tikitakan tlen okipanok Job, se itekipanojka toTajtsin Dios. Ompa moijtoa ome uelta omotlapouijkej toTajtsin Dios iuan Satanás. Itech ome uelta toTajtsin Dios okijto Job yolmelajki. Diablo okinankili ken ye okachi kuali kixmatiskia Job. Satanás okijto Job okitekichiuiliaya Jehová san pampa okiteochiuaya uan okimakaya nochi tlen kuali. Ik non, Jehová okika Diablo ma kikixtili Job nochi tlen okipiaya: itomin, ikoneuan uan noijki okichi ma mokoko. * Satepan omotak Diablo san tlakajkayaua, uan toTajtsin Dios okiteochi Job pampa nochi okixiko (Job 1:6-12; 2:1-7).

¿Jehová omotlapouijtoka iuan tlen amo kuali kipia ijtik? Amo, pampa Biblia kijtoa: “Toteko Dios [...]. Sanwel Tejwatsi tichipawak” (Apocalipsis 15:4). Uan noijki kijtoa: “¡Santo, Santo, Santísimo, Toteko Dios” (Apocalipsis 4:8). Tlajtoli santo kijtosneki chipauak, tlen amo kipia tlajtlakoli. Ik non, tla Jehová chipauak, ye amo kipia tlajtlakoli.

Tlen omotlapouijkej toTajtsin Dios uan Satanás melauak okipanok Job

Noijki miakej kijtoaj Job amo keman okatka uan san cuentos tlen omotlapouijkej. ¿Melauak? Amo. Itech okseki tlaxelolmej ken itech Santiago 5:7-11 techiluia Job melauak okatka. Ompa moijtoa Job se kuali neskayotl pampa amo ma timoxelokan itech Jehová, uan noijki techilnamiktia Jehová techteochiuas tla tikxikoaj nochi. Tla amo melauak yetoskia tlen Biblia techiluia itech Job uan nochi tlen Satanás okichiuili, ninmej tlaxelolmej amo kipiaskiaj inpati. Uan noijki itech Ezequiel 14:14, 20 techtlapouia itech eyi tlakamej tlen amo omoxelojkej itech Jehová. Techtlapouia itech Daniel uan Noé, akinmej melauak okatkaj. Uan noijki techtlapouia itech Job; ik non, uelis tikijtoskej Job melauak okatka. Uan tla Job melauak okatka, noijki Satanás akin okitlajyouilti noijki melauak onka.

Ika nochi tlen techiluia Biblia, tikmatij Satanás melauak onka. Ik non, miakej motlajtlaniaj: “¿Uelis itlaj nechchiuilis ne uan nokalchanejkauan?”.

¿TLEN KICHIJTOK DIABLO?

Ximokuayejyeko sekimej ichtekej ajsitiuij itech moaltepe. ¿Tlen panos? Ayakmo kuali yetoskej uan miakej ayakmo kuali kichiuaskej. Axkan ximokuayejyeko Diablo uan amo kuali iejekauan —ángeles akinmej amo okitlakamatkej toTajtsin Dios— touan yetoskiaj. ¿Tlen panos? Pampa tiknankiliskej, ximokuayejyeko itech nochi tlen tikitaj noso tikakij panoa.

  • ¿Amo melauak tlen amo kuali momiaktilijtok maski miakej mochijchikauaj pampa kachiuaskej?

  • ¿Yotikitak axkan tlen ika timoyolpaktiaj kipia miak tetlajchiuilistli maski tetajmej amo kinpaktia?

  • ¿Yotikitak ken axkan nochi moijtlakojtok maski oksekimej mochijchikauaj pampa amo ma ijtlakaui Tlaltikpak?

  • ¿Amo tikneltoka ikaj kichijtok ma moixpolokan tlaltikpaktlakamej?

 Biblia techiluia ikaj techtlajyouiltijtok uan techiluia akin: “Ijkó okiwalkixtijkeh n weyi dragón, n koatl non yowejka kajki, non noiwa itoka diablo iwa satanás, ye akin kinkajkayawa nochteh n tlaltikpaktlakah. Ye iwa iangelwah okualintlamotlakeh ipan nin tlaltíkpaktli. [...] Pero ¡miálmasteh akimeh chantitokeh ipan tlaltíkpaktli iwa itech weyi atl! N diablo yotemok kan nomejwah iwa kualankamiki, ken kimatok mach ok wejkawitl nentinemis” (Apocalipsis 12:9, 12). Ika nochi tlen yotimomachtijkej miakej kajsikamatij Satanás kiyekantok Tlaltikpak, uan sapanoa tetlajyouiltia.

Uan nochtin tiknekij timomaluiskej. Pero ¿ken uelis tikchiuaskej? Itech okse tlamachtil techiluis.

^ párr. 12 Biblia kijtoa toTajtsin Dios itoka Jehová