Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre de 2015

Se tlajtolkuepalistli tlen amo oui moajsikamati

Se tlajtolkuepalistli tlen amo oui moajsikamati

“Itlajtol Dios yolitok.” (HEBREOS 4:12)

TLAKUIKALMEJ: 37 UAN 43

1. 1) ¿Tlen okinauatijkej Adán ma kichiua? 2) Tiitekipanojkauan Jehová, ¿ken tiktekitiltiaj totlajtol?

JEHOVÁ otechchijchi pampa uelis timotlapouiskej. Itech Xochitlali Jehová okinauati Adán ma kintlalili intoka nochtin yolkamej. Uan Adán okitekitilti tlen Jehová okimakak pampa tlajtos, ijkon ueli okintlalili se kuali tokayotl nochtin yolkamej (Génesis 2:19, 20). Ijkuakon, tinochtin tiitekipanojkauan Jehová tiktekitiltiaj tlen otechmakak pampa uelis tikueyichiuaskej uan tikintlapouiskej oksekimej itech tlen kichiuas. Axkan tiktekitiltiaj pampa uelis tiktlajtolkuepaskej Biblia uan uelis tikintlapouiskej oksekimej ma kixmatikan Jehová.

2. 1) ¿Tlen okinekiayaj kichiuaskej tokniuan akinmej okitlajtolkuepkej Traducción del Nuevo Mundo? 2) ¿Tlen timomachtiskej axkan?

2 Sapanoa miakej yokitlajtolkuepkej Biblia, uan sekimej okachi kuali okichijkej. Tokniuan akinmej okitlajtolkuepkej Traducción del Nuevo Mundo okinekiayaj ma kijto tlen melauak. Ik non, okinekiayaj kichiuaskej eyi tlamantli.  Achto, kiueyichiuaskej itoka toTajtsin Dios uan kitlaliskej itech tlajtolkuepalistli nochi uelta tlen oualaya ijkuak achto omoijkuilo (xiktlajtolti Mateo 6:9). Ome, tla ueliskia kitlajtolkuepaskiaj sejse tlajtoli. Ijkuak amo uelis kichiuaskiaj, kitlajtolkuepaskiaj tlen kijtosneki. * (Xikita tlajtoli tlen kiualika tlakxitlan.) Uan eyi, kintekitiltiskiaj tlajtolmej tlen amo oui motlajtoltiskej uan moajsikamatiskej (xiktlajtolti Nehemías 8:8, 12). * TiiTlaixpantijkauan Jehová ijkon yotikchijkej ijkuak otiktlajtolkuepkej Traducción del Nuevo Mundo ika kanaj 130 tlatlamantli tlajtolmej. Axkan timomachtiskej ken noijki ijkon otikchijkej ijkuak otiktlajtolkuepkej Traducción del Nuevo Mundo tlen okiski itech xiuitl 2013. Uan tikitaskej ken noijki ijkon okichijkej oksekimej tokniuan tlen okitlajtolkuepkej Biblia ika okseki tlatlamantli tlajtolmej.

SE BIBLIA TLEN KIUEYICHIUA ITOKA TOTAJTSIN DIOS

3, 4. 1) ¿Kanin tikajsij itoka toTajtsin Dios ika tlajtoli hebreo? 2) ¿Tlen yokichijkej miakej akinmej kitlajtolkuepaj Biblia?

3 Ika tlajtoli hebreo itoka toTajtsin Dios kipia naui letras. Nin tokayotl miak uelta mota itech tlen yiuejkika okijkuilojkej, ken itech rollos tlen okinmajsikej itech mar Muerto. Noijki tikajsij itech Septuaginta tlen okichijkej kanaj itech xiuitl 200 achto itech xiuitl 1 uan otlanki kanaj itech xiuitl 100. Miakej tlaltikpaktlakamej motlajtlachialtiaj ijkuak kimatij itoka toTajtsin Dios miak uelta mota itech tlen yiuejkika okijkuilojkej.

Miakej motlajtlachialtiaj ijkuak kimatij itoka toTajtsin Dios mota itech tlen yiuejkika omoijkuilo

4 Nin techmachtia itoka toTajtsin Dios moneki yetos itech Biblia. Pero miakej Biblias amo kipiaj nin tokayotl. Se neskayotl, itech xiuitl 1901 omochijchi American Standard Version. Nin Biblia okipiaya itoka toTajtsin Dios. Uan itech xiuitl 1950 omochijchi Traducción del Nuevo Mundo de las Escrituras Griegas Cristianas ika tlajtoli inglés, nin Biblia noijki okipiaya itoka toTajtsin Dios. Uan itech xiuitl 1952 omoyektlali American Standard Version. Nin Biblia ayakmo okipiaya itoka toTajtsin Dios. ¿Tleka? Pampa akinmej okitlajtolkuepkej okineltokayaj amo kuali kitekitiltiskej nin tokayotl. Miakej Biblias ika inglés uan ika okseki tlajtolmej noijki amo kipiaj nin tokayotl.

5. ¿Tleka miak ipati itoka toTajtsin Dios ma yeto itech Biblia?

5 Ijkuak ikaj kitlajtolkuepa se amochtli, moneki kimatis tlen kineki akin okichijchi amochtli uan nin moneki kichiuas ijkuak kitlajtolkuepas. Jehová ye akin okichijchi Biblia. Miakej tlaxelolmej techmachtiaj ye  kipatioita itoka uan noijki kineki tlaltikpaktlakamej ma kimatikan nin tokayotl uan ma kiueyichiuakan (Éxodo 3:15; Salmo 83:18; 148:13; Isaías 42:8; 43:10; Juan 17:6, 26; Hechos 15:14). Ik non, miak ipati itoka toTajtsin Dios ma kipia itech tlajtolkuepalistli tlen kichiuaj itech Biblia. Jehová okichi itoka ma moijkuilo miak uelta itech rollos tlen yiuejkika okijkuilojkej (xiktlajtolti Ezequiel 38:23). * Ik non, ijkuak akinmej kitlajtolkuepaj kikixtiaj nin tokayotl, kijtosneki amo kitlakaitaj Jehová.

6. ¿Tleka itoka toTajtsin Dios ijkuilitok chikuase uelta okachi?

6 Axkan onka miak tlamantli tlen techititia itoka toTajtsin Dios moneki ma yeto itech Biblia. Itech Traducción del Nuevo Mundo tlen okiski itech xiuitl 2013, itoka toTajtsin Dios ijkuilitok 7,216 veces, kijtosneki axkan chikuase uelta okachi ijkuilitok. * (Xikita tlajtoli tlen kiualika tlakxitlan.) ¿Tleka? Achto makuili uelta okitlalijkej itoka toTajtsin Dios pampa itech rollos tlen okinmajsikej itech mar Muerto uits itoka toTajtsin Dios, ninmej rollos yikin otechkauilijkej ma tikinmitakan. * (Xikita tlajtoli tlen kiualika tlakxitlan.) Uan chikuase uelta okitlalijkej pampa satepan kuali omomachtijkej rollos tlen yiuejkika okijkuilojkej.

7, 8. ¿Tlen kijtosneki tokayotl Jehová?

7 Akinmej melauak tikchiuaj ken Cristo miak ipati ma tikmatikan tlen kijtosneki itoka toTajtsin Dios. Nin tokayotl kijtosneki: “Ye Kichiua ma Mochiua”. * (Xikita tlajtoli tlen kiualika tlakxitlan.) Achto toamatlajkuiloluan okiyekijtoayaj tlen kijtosneki nin tokayotl ika tlen kijtoa Éxodo 3:14, itech Traducción del Nuevo Mundo tlajtoli tlen kiualika tlakxitlan kijtoa: “Ne Niyetos san tlen Nikpejpenas Niyetos”. Itech xiuitl 1984 Traducción del Nuevo Mundo ika tlajtoli inglés okiyekijto Jehová mochiua tlen ye kineki pampa ma mochiua itlanekilis. * (Xikita tlajtoli tlen kiualika tlakxitlan.) Pero tlen okiski itech xiuitl 2013 kijtoa: “Itoka toTajtsin Dios amo san kijtosneki ye ineuia mochiua tlen moneki pampa kichiuas itlanekilis. Noijki kijtosneki ye kichiua nochi tlen okichijchi ma kichiua nochi tlen moneki uan ijkon ma mochiua itlanekilis”.

8 ¿Ken kichiua Jehová pampa tlen okichijchi ma kichiua tlen ye kineki? Se neskayotl, toTajtsin Dios okichi Noé ma kichijchiua akali uan noijki okichi Bezalel kuali ma tlachijchiua. Noijki okichi Gedeón kuali ma kimati moteuis, uan noijki okichi tlatitlanil Pablo ma tetlapoui ika miak yolchikaualistli. Itoka toTajtsin Dios sapanoa miak ipati pampa itekipanojkauan. Ik non, tokniuan akinmej okichijchijkej Traducción del Nuevo Mundo okitlalijkej itoka toTajtsin Dios kanin moneki yetos.

9. ¿Tleka Cuerpo Gobernante kineki ma motlajtolkuepa Biblia ika miakej tlatlamantli tlajtolmej?

9 Axkan onka miakej Biblias tlen ayakmo kijkuiloaj itoka toTajtsin Dios. Uan  kipatlaj ika tlajtolmej ken “toTeko” noso ika se tokayotl tlen ika kinnotsaj okseki teotsitsintin. Ik non, Cuerpo Gobernante kineki nochtin tlaltikpaktlakamej tlen tlatlamantli intlajtol ma kipiakan se Biblia tlen kiueyichiua itoka toTajtsin Dios (xiktlajtolti Malaquías 3:16). * Axkan Traducción del Nuevo Mundo kiueyichiua itoka toTajtsin Dios ika kanaj 130 tlatlamantli tlajtolmej.

SE TLAJTOLKUEPALISTLI TLEN KIJTOA TLEN MELAUAK UAN TLEN AMO OUI MOAJSIKAMATI

10, 11. ¿Tlen ouijkayotl kipiaj ijkuak kinekij kitlajtolkuepaskej Traducción del Nuevo Mundo?

10 Kitlajtolkuepaskej Traducción del Nuevo Mundo tlen kajki ika tlajtoli inglés, ika okseki tlatlamantli tlajtolmej sapanoa oui. Se neskayotl, itech Eclesiastés 9:10 uan itech okseki tlaxelolmej, Biblia ika inglés tlen omochi itech xiuitl 1984 okitekitiltiaya tlajtoli hebreo Seol. Okseki Biblias ika inglés noijki ijkon kijtoaj. Pero itech okseki tlatlamantli tlajtolmej nin tlajtoli amo kixmatij. Uan oksekimej noijki kineltokaj Seol kanaj kajki. Ik non, axkan okinkauilijkej ma kitlajtolkuepakan tlajtoli hebreo Seol uan griego Hades ken “Mikakoyoktli”. Tlen okitlajtolkuepkej amo oui se kajsikamatis uan kijtoa tlen melauak.

11 Noijki itech okseki tlajtolmej sapanoa oui motlajtolkuepa tlajtoli griego uan  hebreo tlen motekitiltia pampa tlajtoli “alma”. Itech seki tlajtolmej, nin tlajtoli alma kajsikamatij ken itlaj tlen kisa ijkuak ikaj miki uan noijki oksekimej kajsikamatij ken se ejekatl, noso fantasma. Pampa ayakmo ijkon ma moajsikamati, okinkauilijkej ma kitlajtolkuepakan ken kijtoa tlaxelol. Itech apéndice 4A itech Traducción del Nuevo Mundo con referencias, moijtoa ken motekitiltia tlajtoli alma itech Biblia ika español. Pampa amo okachi oui moajsikamatis, tlen kijtoaj ika tlajtoli hebreo uan griego okintlalijkej itech seki tlajtolmej tlen tlakxitlan motaj itech Biblia ika inglés.

Tokniuan akinmej okiyektlalijkej Biblia ika tlajtoli inglés okinmitakej miakej tlajtlanilmej tlen okichijkej akinmej kitlajtolkuepaj Biblia itech nochi Tlaltikpak

12. ¿Tlen okseki tlamantli omopatlak itech Traducción del Nuevo Mundo ika tlajtoli inglés?

12 Tlajtlanilmej tlen okinchiuayaj akinmej okitlajtolkuepkej Biblia ika okseki tlatlamantli tlajtolmej noijki otechititijkej okseki tlajtolmej noijki oui moajsikamatij. Ik non, itech metstli septiembre xiuitl 2007 Cuerpo Gobernante okijto ma moyektlali Traducción del Nuevo Mundo. Tokniuan akinmej okiyektlalijkej okinmajsikej miakej tlajtlanilmej tlen tokniuan akinmej kitlajtolkuepaj Biblia okichijkej. Okinpatlakej seki tlajtolmej tlen ayakmo okachi omotekitiltiayaj. Omochijchikajkej pampa noijki ma kijto tlen melauak, pero amo oui ma moajsikamati. Ken tikitaj, tekitl tlen okichijkej oksekimej tokniuan akinmej okitlajtolkuepkej Biblia otlapaleui ma moyektlali Biblia ika tlajtoli inglés (Proverbios 27:17).

TOKNIUAN SAPANOA KITLASOJKAMATILIAJ JEHOVÁ

13. ¿Tlen kijtoaj akinmej kitlajtoltiaj Biblia tlen okiski itech xiuitl 2013?

13 ¿Ken okiselijkej tokniuan nin yankuik Biblia tlen okiski itech xiuitl 2013? Sapanoa miakej tokniuan yokintitlankej miakej cartas kanin kijtoaj kitlasojkamatiliaj Jehová. Se tokni kijtoa Biblia ken se caja tlen kipia miakej temej kualtsitsintin, uan nin tlen techiluia toTajtsin Dios. Ye kijtoa nin Biblia amo oui se kajsikamatis uan se kitlajtoltis. Ijkuak kitlajtoltijtok, mokuayejyekoa ken kinmitaskia nonmej temej kualtsitsintin uan kita nochi ken chijchitokej. Ken amo oui  tlajtolmej tlen kitekitiltia nin Biblia axkan okachi kuali kixmati toTajtsin Dios. Ijkuak kitlajtoltia, kita ken Jehová kinapaloskia uan kitlapouiskia ika tlasojtlalistli.

14, 15. ¿Tlen kimachiliaj tokniuan tlen kipiaj Biblia ika intlajtol?

14 Tokniuan akinmej amo tlajtoaj inglés sapanoa kitlasojkamatiliaj Jehová pampa Traducción del Nuevo Mundo kajki ika intlajtol. Se tlakatl tlen yikipia miak xiuitl, kijtoa yiuejkika kitlajtoltia Biblia pero amo keman okitlajtolti se Biblia tlen amo oui moajsikamati uan tlen ajsi itech iyolo. Se tokni tlen chanti itech ueyi altepetl Albania kijtoa Biblia ika tlajtoli albanés sapanoa kualtsin mokaki. Uan okijto: “¡Se ueyi tlateochiualistli tikkakiskej Jehová ika totlajtol!”.

15 Itech miakej uejueyij altepemej, amo miakej kipiaj Biblia pampa sapanoa patio uan amo onka. Se neskayotl, itech ueyi altepetl Ruanda miakej akinmej omomachtiayaj iuan iTlaixpantijkauan Jehová amo omochikauaya intlaneltokilis pampa amo okipiayaj Biblia. Tlen okinemakayaj teopan sapanoa patio uan amo omoajsikamatiaya. Se kalchanejke tlen kinpia naui inkoneuan okitlasojkamatilijkej Jehová uan “tlakeuali yolmelajki” pampa okiski Biblia ika intlajtol. Achto amo keman ueli okikojkej se Biblia pampa sejse yejuan, pero axkan sejse kipia se Biblia. Pampa kiteititiskej kitlasojkamatiliaj Jehová, nochipa kitlajtoltiaj.

16, 17. 1) ¿Tlen kineki Jehová pampa sejse tejuan? 2) ¿Tlen tiknekij tikchiuaskej?

16 Nin yankuik Biblia satepan noijki mochijchiuas ika okseki tlatlamantli tlajtolmej. Satanás amo kineki, pero Jehová kineki nochtin itekipanojkauan ma tiktlajtoltikan iTlajtol pero ika tlajtolmej tlen amo oui (xiktlajtolti Isaías 30:21). * Ayakmo miak poliui pampa nochi “Tlaltikpak tentos ika itlamatilis Jehová” (Isaías 11:9).

17 Kuali ma tiktekitiltikan nochi tlen techmaka Jehová, ken tlajtolkuepalistli tlen kiueyichiua itoka. Mojmostla ma tikkakikan tlen techiluia itech Biblia. Uan ye nochipa kikakis totlatlaujtiluan. Tla kuali iuan timotlapouiaj, okachi kuali tikixmatiskej uan okachi tiktlasojtlaskej (Juan 17:3).

“¡Se ueyi tlateochiualistli tikkakiskej Jehová ika totlajtol!”

^ párr. 2 Xikita tlamachtil tlen itoka “Cómo escoger una buena traducción de la Biblia”, tlen okiski itech revista La Atalaya (ika náhuatl del centro Akin Tetlapouijtok) 1 de mayo 2008.

^ párr. 2 Nehemías 8:8 kijtoa: “Uan yejuan chikauak okitlajtoltijtokaj amochtli, itech iTlanauatil akin melauak toTajtsin Dios, kuali okiyekijtoayaj uan okijtoayaj tlen kijtosneki; non okinpaleui tlaltikpaktlakamej ma kajsikamatikan tlen okitlajtoltiayaj”. Uan tlaxelol 12 kijtoa: “Uan nochi altepetl otlakuatoj uan otlakonitoj, uan noijki okititlankej tlakuali uan sapanoa oyolpakej, pampa kuali okajsikamatkej tlajtolmej tlen okinmatiltijkej”.

^ párr. 5 Ezequiel 38:23 kijtoa: “Melauak nimoueyichiuas uan nimochipauas uan nimotematiltis inmixpan inmixtololouan miakej altepemej; uan moneki kimatiskej ne niJehová”.

^ párr. 6 Achto makuili uelta okitlalijkej itech 1 Samuel 2:25, 6:3, 10:26 uan 23:14, 16, uan chikuase okitlalijkej itech Jueces 19:18.

^ párr. 6 Rollos tlen okinmajsikej itech mar Muerto kipia kanaj mil xiuitl okachi, amo ken amochmej ika hebreo tlen okitekitiltijkej ijkuak okichijchijkej Traducción del Nuevo Mundo.

^ párr. 7 Sekimej ixtlamatkej noijki ijkon kiyekijtoaj nin tokayotl.

^ párr. 7 Itech Traducción del Nuevo Mundo ika referencias xikita página 1559 tlen itoka “El nombre divino en las Escrituras Hebreas”.

^ párr. 9 Malaquías 3:16 kijtoa: “Itech non kauitl akinmej kimauiliaj Jehová opejkej motlapouiaj, sejse okitlapoui akin iuan okatka, uan Jehová okinkaktoka uan okajsikamatiaya. Uan iamoch toTajtsin Dios itech yolitilistli opejki moijkuiloa iixpan ye pampa akinmej kimauiliaj Jehová uan akinmej omokuayejyekoayaj itech itoka”.

^ párr. 16 Isaías 30:21 kijtoa: “Uan monakasuan kikakiskej mokuitlapan se tlajtoli tlen kijtos: “Nin ojtli. Itech xinemikan”, tla namejuan nanyaskej ik namomayekma noso ik namomapochma”.