Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre de 2015

¿Ken uelis tiktlasojkamatiskej tlen Jehová techmaka?

¿Ken uelis tiktlasojkamatiskej tlen Jehová techmaka?

IJKUAK tikitaj nochi tlen Jehová okichijchi, tikitaj Jehová sapanoa kitemaka tlen kipia (Santiago 1:17). Se neskayotl, itech semanauak amo okintlali san seki sitlalimej ye okintlali sapanoa miakej. Uan itech Tlaltikpak okitlali tlatlamantli kuajmej uan xochimej (Salmo 65:12, 13; 147:7, 8; 148:3, 4).

Tlakatl akin okijkuilo Salmo 104 okitlasojkamatili Jehová pampa nochi tlen okichijchi, ik non, okijkuilili se tlakuikali. Uan uelis tikajsis itech Salmo tlakotonal 104. Ompa kijtoa non tlakatl okinekiaya kiueyichiuas Jehová itech nochi inemilis (Salmo 104:33). ¿Noijki ijkon tikueyichiuas?

JEHOVÁ SE KUALI NESKAYOTL PAMPA KITEMAKA TLEN KIPIA

Jehová noijki kineki ma tiktemakakan tlen tikpiaj ijkon ken ye. Ik non, tlatitlanil Pablo okinauati ma kijkuilo itech akinmej kipiaj sapanoa miak tomin amo ma kineltokakan ika yolpakiskej. Moneki tlaneltokaskej itech Jehová akin kitemaka tlen kuali. Tlatitlanil Pablo noijki okijto ma tikinmakakan tlen kuali oksekimej uan ma tiyolpakikan tikinmakaskej tlen tikpiaj. Tla ijkon tikchiuaj, itech xochitlali sapanoa tiyolpakiskej (1 Timoteo 6:17-19). Ik non, Jehová techiluia ma tiktemakakan tlen tikpiaj.

Ijkuak tlatitlanil Pablo okijkuilo amatlajkuilol segunda a los Corintios, okijto tleka moneki tiktemakaskej tlen tikpiaj. Okijto: “Xiktemakakah ijkó kemi yononkitlalijkeh itech nomoyolo, amo manomechixkoko nion xiktemakakah ijkuak nomechchijchikawah, porke Dios kitlasojtla akin kitemaka ika pakílistli” (2 Corintios 9:7). ¿Akinmej mopaleuiaj tla tiktemakaj tlen tikpiaj? Kinpaleuia akinmej kiseliaj tlen tikinmakaj uan noijki techpaleuia pampa tikseliaj miak tlamantli kuali tlen Jehová techmaka (2 Corintios 9:11-14).

Tlatitlanil Pablo noijki okinmilui corintios ma kitlasojkamatilikan Jehová pampa okinmakak se tetliokolil tlen miak ipati (2 Corintios 9:15). Tetliokolil otechmakak Jehová uan okichi ika iKone. Melauak tiktlasojkamatiliaj Jehová pampa otechmakak tetliokolil.

¿Ken uelis tikteititiskej tiktlasojkamatiliaj Jehová uan Jesús ika nochi tlen kichiuaj uan tlen kichiuaskej? Uelis tiktemakaskej tokauitl, tochikaualis, tlamantli tlen tikpiaj pampa tiktekichiuiliskej Jehová uan tikinpaleuiskej oksekimej ma kixmatikan. Tinochtin uelis tiktemakaskej tlen tikpiaj maski tikpiaskej miak tlamantli noso amo (1 Crónicas 22:14; 29:3-5; Lucas 21:1-4).