Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Noviembre de 2015

Jehová ye tlasojtlalistli

Jehová ye tlasojtlalistli

“[ToTajtsin] Dios Ye tlasojtlálistli.” (1 JUAN 4:8, 16)

TLAKUIKALMEJ: 18 UAN 51

1. 1) ¿Tlen okachi kinextia Jehová? 2) ¿Ken timomachiliaj ijkuak tikajsikamatij Jehová ye tlasojtlalistli?

BIBLIA kijtoa: “[ToTajtsin] Dios Ye n tlasojtlálistli” (1 Juan 4:8). Nin kijtosneki tlasojtlalistli non tlen okachi kinextia Jehová. Ye amo san kimachilia tlasojtlalistli, ye tlasojtlalistli. Nochi kichiua pampa tetlasojtla. Tiktlasojkamatiliaj miak pampa okichijchi semanauak uan nochi tlen yoltok pampa tetlasojtla.

2. Pampa Jehová techtlasojtla, ¿tlen tikmatij? (Xikita tlaixkopinal tlen ika peua tlamachtil.)

2 Tikmatij Jehová kitlasojtla nochi tlen okichijchi. Ik non, melauak tikneltokaj kichiuas nochi tlen yokijto. Se neskayotl, ken sapanoa techtlasojtla, “yokitlali se tonati ijkuak tlaixkomakas. [...] iwa kitlalis n Cristo Jesús makichiwa nin tekitl” (Hechos 17:31). Melauak tikneltokaj Jesús tlaixkomakas ika melajkayotl. Ijkuakon, nochtin akinmej kitlakamatij toTajtsin Dios nochipa yolpakiskej uan kuali yetoskej.

 ¿TLEN KITEITITIA NOCHI TLEN YOPANOK?

3. ¿Tlen panoskia tla Jehová amo techtlasojtlaskia?

3 ¿Tlen panoskia tla Jehová amo techtlasojtlaskia? Tlaltikpaktlakamej san yejuan moyekanaskiaj uan kinnauatiskia Satanás akin amo yolkuali uan amo tetlasojtla (2 Corintios 4:4; 1 Juan 5:19; xiktlajtolti Apocalipsis 12:9, 12). Tla ijkon panoskia, ¡sapanoa titlajyouiskiaj!

4. ¿Tleka Jehová okikauili Satanás ma kixnamiki?

4 Ijkuak Satanás okixnamik Jehová, okichi Adán uan Eva noijki ijkon ma kichiuakan. Satanás okijto toTajtsin Dios amo kinamiki tlanauatis uan noijki okijto ye okachi kuali tlanauatia (Génesis 3:1-5). Ken Jehová sapanoa ixtlamatki, okika ma pano kauitl pampa moteititis kox melauak tlen okijto Satanás. Pero nochi tlen yopanok kiteititia Satanás uan tlaltikpaktlakamej amo kuali tlanauatiaj.

Jehová amo otechchijchi pampa toseltij timonauatiskej, okachi kuali, san Jehová kinamiki technauatis

5. ¿Tlen kiteititia nochi tlen yopanok?

5 Axkan Tlaltikpak okachi moijtlakojtok. Itech 100 xiuitl tlen yopanokej, yomikej kanaj 100 millones tlaltikpaktlakamej itech guerras. Biblia kijtoa itech “iksemi tonatijmeh” tlaltikpaktlakamej yetoskiaj okachi amo yolkualmej (2 Timoteo 3:1, 13). Noijki, Biblia kijtoa: “Tlakatl amo uelis kinauatis tlen kichiuas itech iojui, nion amo ueli kiyekana kanin tlaksas” (Jeremías 10:23). Nochi tlen kijtoa Biblia melauak, pampa nochi tlen yopanok kiteititia Jehová amo otechchijchi pampa toseltij timonauatiskej, okachi kuali, san Jehová kinamiki technauatis.

6. ¿Tleka Jehová ok kitekauilijtok ma yoltokan akinmej amo yolkualmej?

6 ¿Tleka Jehová ok kitekauilijtok ma yoltokan akinmej amo yolkualmej? Pampa ijkon moteititia san iTekiuajkayo toTajtsin Dios kinamiki tlanauatis. Satepan, toTajtsin Dios kinmixpolos nochtin akinmej amo yolkualmej. Uan tla satepan ikaj kijtos toTajtsin Dios amo kinamiki tlanauatis, ye amo kitekauilis ijkon ma pano. Kiteititis ika nochi tlen axkan panotok, moneki ma kinmixpolokan akinmej kixnamikij. Ayakmo kitekauilis oksepa ma yetokan akinmej amo yolkualmej.

¿KEN KITEITITIA JEHOVÁ TECHTLASOJTLA?

7, 8. ¿Ken kiteititia Jehová techtlasojtla?

7 Jehová tlatlamantli kiteititia itlasojtlalis. Se neskayotl, ximokuayejyeko ken sapanoa ueyi uan kuajkualtsin semanauak. Itech nochi semanauak katej sapanoa miakej planetas uan sitlalimej. Tonaltsin se sitlali. Tla amo yetoskia Tonaltsin, amo itlaj yoltoskia itech Tlaltikpak. Ik non, Romanos 1:20 kijtoa: “Maski se amo weleti kita n Totajtsi Dios, weleti tikitah itech nochi tlan ye okichijchi”. Kema, itech nochi tlen okichijchi toTajtsin Dios, tikitaj ye sapanoa ixtlamatki, kipia chikaualistli uan tetlasojtla.

Jehová okichijchi Tlaltikpak pampa nochi tlen yoltok ma yolpaki

8 Jehová okichijchi Tlaltikpak pampa nochi tlen yoltok ma yolpaki uan okintlali  achto tlaltikpaktlakamej itech se kuajkualtsin Xochitlali. Noijki okinmakak se kuali inkuayejyekol uan se intlalnakayo tlen yoltoskia nochipa (xiktlajtolti Apocalipsis 4:11). Noijki, Salmo 136:25 kijtoa Jehová kinmaka nochtin tlen kikuaskej, pampa nochipa tetlasojtla.

9. Maski Jehová ye tlasojtlalistli, ¿tlen kikokolia?

9 Maski Jehová ye tlasojtlalistli, kikokolia nochi tlen amo kuali. Ik non, Salmo 5:4-6 kijtoa Jehová amo kipaktia tlen amo kuali uan kinkokolia akinmej amo yolkualmej, akinmej kinpaktia moteuiskej uan akinmej tlakajkayauaj.

SAN NIMAN KITLAJTLAMISKEJ NOCHI TLEN AMO KUALI

10, 11. 1) ¿Tlen kinpanos akinmej amo yolkualmej? 2) ¿Ken kinteochiuas Jehová nochtin akinmej kitlakamatij?

10 Ken yotikitakej, Jehová ye tlasojtlalistli uan kikokolia nochi tlen amo kuali. Ik non, ijkuak ye kinekis, kitlajtlamis nochi tlen amo kuali. Biblia kijtoa: “Akinmej amo yolkualmej kinmixpoloskej, pero akinmej mochiaj itech Jehová yetoskej itech Tlaltikpak”. Biblia noijki kijtoa kinmixpoloskej nochtin akinmej kikokoliaj Jehová (Salmo 37:9, 10, 20).

11 ¿Ken kinteochiuas Jehová nochtin akinmej kitlakamatij? Biblia kijtoa: “Yolmelauakej yetoskej itech Tlaltikpak, uan itech chantiskej nochipa” (Salmo 37:29). Nochtin akinmej yolmelauakej “melauak yolpakiskej pampa yetos miak yolseuilistli” (Salmo 37:11). ¿Tleka? Pampa toTajtsin Dios nochipa kichiua nochi tlen kuali pampa itekipanojkauan tlen yolmelajkej. Biblia kijtoa toTajtsin Dios “kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli”. Kema, ayakmo yetos nochi tlen amo kuali (Apocalipsis 21:4). ¡Sapanoa yolpakiskej nochtin akinmej kitlakamatij toTajtsin Dios!

12. ¿Tlen moneki tikchiuaskej tla tiknekij kuali tiyetoskej iixpan Jehová?

12 Salmo 37:37, 38 kijtoa nochtin akinmej kuali yetoskej iixpan Jehová kipiaskej yolseuilistli satepan. Noijki kijtoa toTajtsin Dios kinmixpolos nochtin akinmej amo yolkualmej uan akinmej amo tetlakamatij. Tla tiknekij kuali tiyetoskej iixpan Jehová, moneki tikixmatiskej ye uan iKone, uan tiktlakamatiskej Jehová (xiktlajtolti Juan 17:3). Moneki kuali tikmatiskej ‘nochi tlan onka itech nin tlaltíkpaktli yitlamis, pero akin kichiwah tlan Dios kineki nochipa yolitos’ (1 Juan 2:17). Ken ayakmo miak poliui pampa tlamis nochi tlen amo kuali, moneki tikchiuaskej tlen kijtoa Biblia itech Salmo 37:34, ompa kijtoa: “Ximochia itech Jehová uan xiyeto itech iojui”.

ITLAJ TLEN OKACHI KINEXTIA ITLASOJTLALIS JEHOVÁ

13. ¿Ika tlen okachi okiteititi itlasojtlalis Jehová?

13 Maski tinochtin titlajtlakolejkej, uelis tiktlakamatiskej toTajtsin Dios. Uan ken  Jesús omikik topampa, axkan yiuelis kuali timouikaskej iuan Jehová. Ijkon Jehová okachi okiteititi itlasojtlalis. Ye okiualtitlanki iKone pampa ijkon akinmej kitlakamatij uelis momakixtiskej itech tlajtlakoli uan mikilistli (xiktlajtolti Romanos 5:12 uan 6:23). Ken Jesús nochipa okatka yolmelauak ompa iluikak, Jehová kuali okimatiaya noijki yetoskia yolmelauak nikan Tlaltikpak. Jehová okiyolkoko miak ijkuak okitlajyouiltijkej iKone akin sapanoa okitlasojtlaya. Pero Jesús nochipa okiteititi san Jehová kinamiki tlanauatis. Noijki okiteititi se tlaltikpaktlakatl tlen amo kipia tlajtlakoli uelis yetos yolmelauak iixpan Jehová maski sapanoa tlajyouis.

ToTajtsin Dios okiualtitlanki iKone pampa techtlasojtla, uan Jesús okinek kichiuas (Xikita párrafo 13)

14, 15. ¿Ken techpaleuia imikilis Jesús?

14 Maski Jesús otlajyoui miak ijkuak okimiktijkej, okatka yolmelauak iixpan Jehová uan okiteititi san Jehová kinamiki tlanauatis. ¿Ken techpaleuia imikilis Jesús? Pampa okitemakak iyolilis, axkan uelis tiyoltoskej nochipa itech Xochitlali. Tlatitlanil Pablo okijto Jehová uan Jesús okiteititijkej sapanoa techtlasojtlaj. Pablo okijto: “Mach aka kinekis motekawilis makimiktikah ipatka ok se tlakatl; maya mayeto de milajka kuali tlakatl, pero mixewis aka kinekis makimiktikah ipatka se akin kualitlakatl. Pero Dios techititia itlasojtlalis keman Cristo Jesús omikki topatka, maya otikatkah titlajtlakolejkeh” (Romanos 5:6-8). Noijki, tlatitlanil Juan okijto: “Dios otechnextili techtlasojtla, ijkuak okwaltítlanki Cristo itech nin tlaltíkpaktli non san Ye se Ikone, para matikpiakah yolílistli por Cristo. Ye n tlasojtlálistli: amo tejwah otiktlasojtlakeh Dios, Ye otechtlasojtlak iwa okualtítlanki Ikone para kitemaktis kemi se tlamánali para matechtlapojpolwi de totlajtlakolwah” (1 Juan 4:9, 10).

15 Uan Jesús okijto: “Totajtsi Dios saikpanoa okintlasojtlak n tlaltikpaktlakah, yika okitemakti non sanwel Ye se Ikone, para nochteh akimeh kineltokaskeh amo  mamoixpolokah, yej makipiakah se yankuik nemílistli non ayik tlami” (Juan 3:16). Maski sapanoa okiyolkoko, Jehová okitemakak iKone pampa ma mikiki topampa. Nin kiteititia sapanoa techtlasojtla uan nochipa techtlasojtlas. Ik non, tlatitlanil Pablo okijto: “Kuali nikmatok amitla weletis techachiwas de itech itlasojtlalis Dios. Nion tla timikiskeh, nion tla tiyolitoskeh, nion ángelteh, nion inweletilis noso inchikawalis n espíritus amokualteh, nion tlan axa tipanotokeh nion tlan sikin wits, nion tlan wejkapa, nion tlan wejkatla, nion itla ok se tlan Dios okichijchi weletis techachiwas de itech itlasojtlalis, non Ye techmaka por Toteko Cristo Jesús” (Romanos 8:38, 39).

ITEKIUAJKAYO TOTAJTSIN DIOS YITLANAUATIJTOK

16. 1) ¿Tlen Tekiuajkayotl mesiánico? 2) ¿Akin yokitlali toTajtsin Dios pampa tlanauatis itech Tekiuajkayotl?

16 Tekiuajkayotl mesiánico noijki kiteititia Jehová techtlasojtla. Nin tekiuajkayotl okitlali toTajtsin Dios uan noijki yokitlali se tekiua tlen kuali tlanauatia uan kintlasojtla tlaltikpaktlakamej (Proverbios 8:31). Nin tekiua ye Jesucristo, akin toTajtsin Dios okipejpenki. Noijki, toTajtsin Dios yokinpejpenki 144,000 tlaltikpaktlakamej pampa tlanauatiskej iuan Jesús itech iluikak. Ijkuak kinyolitia pampa yaskej iluikak, ok kilnamikij nochi tlen okimachilijkej ijkuak okatkaj tlaltikpaktlakamej (Apocalipsis 14:1). Ijkuak Jesús okatka nikan Tlaltikpak, otetlapoui itech non Tekiuajkayotl. Ye okimilui imachtijkauan ma motlatlaujtikan ijkin: “ToTajtsin tlen tika iluikak, ma mochipaua motoka. Ma uiki moTekiuajkayo. Ma mochiua motlanekilis, ken itech iluikak, noijki itech Tlaltikpak” (Mateo 6:9, 10, TNM). Melauak tikchixtokej ma uiki iTekiuajkayo toTajtsin Dios pampa kinteochiuas nochtin tlaltikpaktlakamej.

17. ¿Tleka Jesús amo tlanauatia ken tlaltikpaktlakamej?

17 Jesús amo tlanauatia ken tlaltikpaktlakamej, pampa tlaltikpaktlakamej moteuiaj itech guerras uan kinmiktiaj oksekimej. Pero Jesús techtlasojtla uan kipia kualtsin iyelis ken Jehová (Apocalipsis 7:10, 16, 17). Jesús okijto: “Xiwikih nonawak nonnochteh akimeh tekitih chikawak iwa yononsotlawakeh, iwa Ne nomechsewis. Xikwikakah notlamamal, iwa xikchiwakah tlan Ne nikchiwa, porke Ne niyolyámanki iwa niteiknoma. Iwa nonkajsiskeh yolsewílistli itech nomoyolo. Porke n tekitl non Ne nikneki xikchiwakah amo owi se kitlakitas, iwa tlan Ne nomechnawatia, noiwa amo tesotla” (Mateo 11:28-30). ¡Jesús melauak techtlasojtla!

18. 1) ¿Tlen opejki panoa itech xiuitl 1914? 2) ¿Tlen timomachtiskej chikome?

18 Biblia kijtoa iTekiuajkayo toTajtsin Dios opejki tlanauatia itech xiuitl 1914. Ijkuakon opejki kinnechikoaj akinmej tlanauatiskej iuan Jesús tlen ok katej nikan Tlaltikpak. Noijki opejki kinnechikoaj sapanoa miakej tlaltikpaktlakamej akinmej momakixtiskej ijkuak tlamis nochi tlen amo kuali uan yoltoskej itech Xochitlali. Biblia kintokayotia “senmiaktikeh tlaltikpaktlakah” (Apocalipsis 7:9, 13, 14). ¿Keski yetoskej? ¿Uan tlen kineki toTajtsin Dios ma kichiuakan? Nin tikitaskej chikome.