Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Noviembre de 2015

ITekiuajkayo toTajtsin Dios yikipia 100 xiuitl tlanauatijtok

ITekiuajkayo toTajtsin Dios yikipia 100 xiuitl tlanauatijtok

“N Dios teyolsewi [...] manomechmachti nochi tlan kuali para nonkichiwaskeh tlan Ye kimonekiltia.” (HEBREOS 13:20, 21)

TLAKUIKALMEJ: 136 UAN 14

1. ¿Ken tikmatij Jesús okitaya miak ipati tetlapouis itech iTekiuajkayo toTajtsin Dios?

JESÚS okipaktiaya kintlapouis tlaltikpaktlakamej itech iTekiuajkayo toTajtsin Dios. Non tlen okachi okipatioitaya. Ijkuak okatka nikan Tlaltikpak, otlajto kanaj 100 uelta itech iTekiuajkayo toTajtsin Dios. Jesús okachi otetlapoui itech iTekiuajkayo toTajtsin Dios (xiktlajtolti Mateo 12:34).

2. ¿Keski tlaltikpaktlakamej okikakej tlen okijto Jesús itech Mateo 28:19, 20?

2 Satepan ijkuak okiyolitijkej Jesús, ye omonexti inmixpan 500 tlaltikpaktlakamej (1 Corintios 15:6). Uelis yejuan akinmej Jesús okinnauati ma tetlapouikan itech “nochi altepemej”. * (Xikita tlajtoli tlen kiualika tlakxitlan.) Pero tetlapouiskiaj itech nochi Tlaltikpak yetoskia oui. Uan Jesús okijto uejkauaskia  hasta itlamian tonalmej. Ijkuak tejuan titetlapouiaj, titlapaleuiaj pampa ma mochiua tlen okijto Jesús (Mateo 28:19, 20, TNM).

3. ¿Tlen eyi tlamantli otechpaleui ma titetlapouikan?

3 Ijkuak Jesús okinnauati imachtijkauan ma tetlapouikan, noijki okinmilui: “Niyetok namouan” (Mateo 28:20, TNM). Ika ninmej tlajtolmej, Jesús okinmilui imachtijkauan kinyekanaskia uan kinpaleuiskia pampa tetlapouiskiaj itech nochi Tlaltikpak. Jehová noijki techpaleuia itech ninmej tonalmej. Hebreos 13:20, 21 kijtoa ye techmaka “nochi tlan kuali” pampa uelis titetlapouiskej. Itech nin tlamachtil tikitaskej: 1) Seki tlamantli tlen ika otitetlapouiayaj, 2) ken otitetlapouiayaj yiuejkika, uan 3) ken techmachtiaj axkan pampa titetlapouiskej. Achto ma tikitakan seki tlamantli tlen ika otitetlapouiayaj itech 100 xiuitl tlen yopanok.

SEKI TLAMANTLI TLEN IKA OTITETLAPOUIAYAJ

4. ¿Ken techpaleuia nochi tlen tiktekitiltiaj pampa titetlapouiskej?

4 Jesús okijto kuali tlajtolmej itech Tekiuajkayotl ken se xinachtli tlen ikaj kitokaj (Mateo 13:18, 19). Pampa se tlakatl kitokas se xinachtli, achto kuali kiyektlalia tlali uan pampa uelis kichiuas kitekitiltia miak tlamantli. Noijki, pampa tikinpaleuiskej tlaltikpaktlakamej ma kikakikan tlen tikintlapouiaj, tiktekitiltiaj nochi tlen techmaka totekiua Jesucristo. Seki tlamantli ayakmo tiktekitiltiaj pero okseki kema. Pero nochi nin tlamantli techpaleuia pampa kuali titetlapouiskej.

Tarjetas de testimonio okinpaleui miakej ma peua tetlapouikan

5. ¿Tlen okatkaj tarjetas de testimonio uan ken omotekitiltiayaj?

5 Itech xiuitl 1933, tokniuan opejkej kitekitiltiaj seki amatsitsintin pampa tetlapouiskiaj, okintokayotiayaj tarjetas de testimonio. Ninmej amatsitsintin okipiayaj seki tlajtolmej tlen otlajtoaya itech Biblia. Ualeua okisayaj yankuikej tarjetas. ¿Ken omotekitiltiayaj nonmej tarjetas? Se tokni akin opejki kintekitiltia ijkuak okipiaya 10 xiuitl kijtoa: “Otikinmiluiayaj tlaltikpaktlakamej: ‘¿Uelis tiktlajtoltis nin tarjeta?’. Ijkuak okitlajtoltiayaj, otikinmakayaj se amatlajkuilol uan otiayaj”.

6. ¿Tleka otlapaleuijkej miak tarjetas de testimonio pampa motetlapouis?

6 Tarjetas de testimonio sapanoa otlapaleuijkej pampa motetlapouis. ¿Tleka? Achto kinchijchiuaskia nonmej tarjetas, sekimej tokniuan okinekiayaj tetlapouiskej pero omomojtiayaj uan amo okimatiayaj tlen kijtoskiaj. Oksekimej amo omomojtiayaj uan otetlapouiayaj, pero amo kuali omokuayejyekoayaj tlen kijtoskiaj. Nonmej amatsitsintin okinpaleuijkej tokniuan pampa amo oui ma tetlapouikan.

7. ¿Tleka ualeua okatka oui motetlapouis ika tarjetas de testimonio?

7 Pero ualeua noijki okatka oui motetlapouis ika tarjetas de testimonio. Se tokni siuatl kijtoa: “Ualeua tlaltikpaktlakamej okijtoayaj: ‘¿Tlen kijtoa non tarjeta? ¿Uelis techiluis?’”. Oksekimej tlaltikpaktlakamej amo ueli okitlajtoltiayaj se amatl uan oksekimej san okonanayaj uan otlatsakuayaj. Oksekimej okintsomoniayaj pampa amo okinekiayaj kimatiskej tlen okijtoaya tarjeta. Pero  nonmej tarjetas otlapaleuijkej miak pampa tokniuan ma tetlapouikan uan ijkon tlaltikpaktlakamej okinmitayaj yejuan otetlapouiayaj itech Tekiuajkayotl.

8. ¿Ken okitekitiltijkej tokniuan gramófono portátil? (Xikita tlaixkopinal tlen ika peua tlamachtil.)

8 Kanaj itech xiuitl 1930 tokniuan opejkej kitekitiltiaj se tepostli pampa tetlapouiskiaj. Non tepostli omotokayotiayaj gramófono portátil. Nin tepostli okintlaliliayaj discos uan ijkon omokakiaya se tlapoualistli tlen okitemakaya se tokni. Sekimej okintokayotijkej nonmej teposmej Aarón pampa otlajtoayaj inpatka ijkon ken Aarón otlajtoayaj ipatka Moisés (xiktlajtolti Éxodo 4:14-16). * Tla se tlaltikpaktlakatl okinekiaya kikakis se tlapoualistli, se tokni okitlaliaya uan satepan okiluiaya kox okinekiaya se amatlajkuilol. Ualeua miakej kalchanejkej okikakiayaj tlapoualismej. Itech xiuitl 1934 tokniuan opejkej kinchijchiuaj gramófonos pampa tetlapouiskiaj. Uan okinchijchijkej 92 tlapoualismej ika discos.

9. ¿Ken otlapaleui gramófono portátil itech tetlapouilistli?

9 Yiuejkika, se tlakatl okikak se tlapoualistli tlen sapanoa okipakti. Okinmilui tokniuan ma kitlanetikan gramófono se semana pampa ma kikakikan tlapoualistli akinmej ochantiayaj ik kanin ye ochantiaya. Pampa ijkon okichi, miakej tlaltikpaktlakamej opejkej momachtiaj Biblia uan omoapolaktijkej. Non tlakatl noijki omoapolakti uan ome iichpokauan omochijkej misioneras. Gramófono portátil okinpaleui tokniuan pampa tetlapouiskej ijkon ken tarjetas de testimonio. Pero satepan, totekiua Jesucristo opejki kinmachtia imachtijkauan ken tetlapouiskiaj ika Tlamachtil pampa Akinmej Tetlapouiaj, ijkon okachi kuali tlamachtiskiaj (xiktlajtolti Isaías 50:4). *

KEN OMOTETLAPOUIAYA YIUEJKIKA

10, 11. ¿Ken otechpaleui radio uan periódicos pampa otitetlapouijkej?

10 Ika itlayekanalis toTekiua, tokniuan yiuejkika tlatlamantli otetlapouiayaj pampa kintlapouiskiaj miakej tlaltikpaktlakamej. Ijkon otetlapouiayaj ijkuak ayamo okatkaj miakej iTlaixpantijkauan Jehová itech nochi Tlaltikpak (xiktlajtolti Mateo 9:37). Yejuan otetlapouijkej ika periódicos. Sejse semana, tokni Russell okititlaniaya se tlapoualistli kanin okinseliaya noticias. Uan satepan okititlaniaya non tlapoualistli kanin okinchijchiuaya periódicos itech uejueyij altepemej Canadá, Estados Unidos uan Europa. Itech xiuitl 1913, tlapoualismej tlen okinchijchiuaya tokni Russell okisayaj itech 2,000  periódicos tlen okintlajtoltiayaj kanaj 15 millones tlaltikpaktlakamej.

Periódico uan radio otlapaleuijkej miak pampa motetlapouis kanin amo okatkaj miakej tokniuan

11 Noijki tokniuan yiuejkika otetlapouijkej ika radio. Itech tonal 16, metstli abril, xiuitl 1922, tokni Rutherford okitemakak achto tlapoualistli itech radio. Okikakej kanaj 50,000 tlaltikpaktlakamej. Satepan tokniuan okichijchijkej se estación de radio, ompa achto tlapoualistli omotemakak itech tonal 24, metstli febrero, xiuitl 1924. Revista Watch Tower (ika náhuatl del centro Akin Tetlapouijtok) 1 de diciembre 1924, okijto: “Tikneltokaj ika radio okachi kuali tiktematiltiaj tlen melauak uan amo patio kisa”. Tokniuan kuali okitekitiltijkej periódicos uan radio pampa kuali otetlapouijkej ijkuak ayamo okatkaj miakej iTlaixpantijkauan Jehová itech nochi Tlaltikpak.

Miakej tokniuan kinpaktia tetlapouiskej itech ojtli kanin onka miakej tlaltikpaktlakamej uan kintlapouiskej itech página de Internet jw.org (Xikinmita párrafos 12 uan 13)

12. 1) ¿Tejuatsin tlen okachi mitspaktia titetlapouis kanin onka miakej tlaltikpaktlakamej? 2) Tla timajmaui, ¿tlen uelis tikchiuas?

12 Axkan noijki ueli tikintlapouiaj miakej tlaltikpaktlakamej itech ojtli kanin onka miakej tlaltikpaktlakamej. Timochijchikauaj tikintlapouiskej kanin kichiaj carro, kanin moketsa tren, kanin kinkauaj incarros uan noijki kanin tlanemakaj. Tla timajmaui tikintlapouis, ¿tlen uelis tikchiuas? Xiktlatlaujti Jehová uan ximokuayejyeko itech tlen okijto se tokni de circuito. Ye okijto ijkuak onka se yankuik tlamantli tlen ika titetlapouiskej, uelis tikteititiskej tiknekij tiktekichiuiliskej  Jehová uan tikteititiskej itech titlaneltokaj. Ye kijtoa ijkon kiteititia uelis kichiuas san tlen Jehová kiluis ma kichiua. Ijkuak ayakmo timajmauij uan okse tlamantli peua titetlapouiaj, okachi kuali tiktekichiuiliaj Jehová uan okachi itech titlaneltokaj (xiktlajtolti 2 Corintios 12:9, 10).

13. 1) ¿Tleka miak ipati ma tikintlapouikan oksekimej itech página de Internet jw.org? 2) ¿Ken tiktekitiltia jw.org ijkuak titetlapouia?

13 Miakej tokniuan kinpaktia kintlapouiskej oksekimej itech página de Internet jw.org. Mojmostla kanaj 1,600,000 tlaltikpaktlakamej kalakij itech jw.org. Ompa ueli kintlajtoltiaj uan kinkixtiaj amatlajkuilolmej ika kanaj 700 tlatlamantli tlajtolmej. Yiuejkika ika radio otikintlapouiayaj akinmej uejka ochantiayaj. Uan axkan noijki ijkon panoa ika jw.org.

TECHMACHTIAJ PAMPA UELIS TITETLAPOUISKEJ

14. 1) ¿Tlen tlapaleuilistli okinekiayaj tokniuan? 2) ¿Tlen tlamachtil techpaleuia kuali ma titlamachtikan Biblia?

14 Axkan yotimomachtijkej nochi tlen Jehová techmaka pampa uelis kuali titetlapouiskej. Pero Jehová noijki techmachtia. ¿Tleka moneki ma techmachti? Se neskayotl, ijkuak tokniuan otetlapouiayaj ika gramófono, miakej tlaltikpaktlakamej amo okinpaktiaya tlen otitetlapouiayaj. Pero oksekimej okinpaktiaya uan okinekiayaj okachi ma kinmachtikan ika Biblia. Tokniuan omonekiaya ma kinmachtikan ken uelis kuali tlamachtiskej uan tlen kijtoskej ijkuak oksekimej amo kinekiskej kiseliskej tlen kintlapouiaj. Espíritu santo okipaleui tokni Knorr ma kajsikamati tokniuan omonekiaya ma kinmachtikan pampa kuali ma tetlapouikan ika Biblia. Ik non, itech xiuitl 1943 omochi Tlamachtil pampa Akinmej Tetlapouiaj.

15. 1) ¿Tlen kinpanoa sekimej tlen panoaj itech Tlamachtil pampa Akinmej Tetlapouiaj? 2) ¿Ken yokichi Jehová ijkon ken kijtoa Salmo 32:8?

15 Miakej tokniuan noijki amo okimatiayaj ken uelis tetlapouiskej inmixpan miakej tlaltikpaktlakamej. Se tokni kilnamiki tlen opanok ijkuak okipanolti achto itlamachtil, itech xiuitl 1944. Otlamachti itech se tlakatl tlen uits itech Biblia tlen omotokayotiaya Doeg. Tokni kijtoa itech nochi itlamachtil ouiuiyokak pero otlanki okipanolti itlamachtil. Itech nin tlamachtil noijki panoaj konemej. Tokni de circuito tlen otikijtojkej itech párrafo 12 kilnamiki tlen okipanok se konetl tlen okipanolti achto itlamachtil. Sapanoa omomojtiaya uan okinekiaya chokas. Pero amo omosotla uan otlanki okipanolti itlamachtil. Oksekimej tokniuan sapanoa momojtiaj pampa pinauaj uan mokuayejyekoaj nion amo uelis kajkokuiskej inma nion uelis kipanoltiskej se tlamachtil. ¿Ijkon omitspanok?  Xiktlatlaujti Jehová ma mitspaleui pampa ayakmo timomojtis. Ye mitspaleuis ijkon ken okinpaleui tokniuan akinmej achto opanokej itech Tlamachtil pampa Akinmej Tetlapouiaj (xiktlajtolti Salmo 32:8). *

Itech xiuitl 1943 ik tlayekapan 8,500 tokniuan yomomachtijkej itech Galaad uan tekititokej itech 170 uejueyij altepemej

16. ¿Tleka okitlalijkej Tlamachtil tlen mochiua itech Galaad?

16 ToTajtsin Dios noijki yokinmachti itekipanojkauan ika Tlamachtil ika Biblia tlen kichiua Watchtower itech Galaad. Nin tlamachtil kinpaleuia ma kinekikan okachi tetlapouiskej. Nin tlamachtil opejki itech xiuitl 1943. Itech non xiuitl ik tlayekapan yokiskej kanaj 8,500 tokniuan tlen tekititokej itech kanaj 170 uejueyij altepemej. Uan itech xiuitl 2011 ik tlayekapan axkan yauij momachtiaj precursores especiales, tlayekankej itech circuito, betelitas uan misioneros tlen amo omomachtijkej itech nin tlamachtil.

17. ¿Ken yotlapaleui Tlamachtil tlen mochiua itech Galaad?

17 ¿Ken yotlapaleui nin tlamachtil? Ma timokuayejyekokan itech tlen omochi itech ueyi altepetl Japón. Itech xiuitl 1949 metstli agosto, itech nochi non ueyi altepetl san okatkaj majtlaktli tokniuan. Pero ijkuakon opejkej ajsi sekimej misioneros tlen omomachtijkej itech Galaad. Ijkuak otlantoka non xiuitl okatkaj 13 misioneros tlen okinpaleuiayaj tokniuan ma tetlapouikan. Axkan itech ueyi altepetl Japón onka 216,000 tokniuan. ¡Uan miakej tokniuan tekitij ken precursores!

18. ¿Tlen okseki tlamachtilmej tikinpiaj?

18 ¿Tikinpiaj okseki tlamachtilmej? Kema, se neskayotl, tikpiaj Tlamachtil itech Tekiuajkayotl, Tlamachtil tlen kiselia Precursor, Tlamachtil pampa ma tetlapouikan Tekiuajkayotl, Tlamachtil pampa Tlayekankej itech Circuito uan insiuauan uan Tlamachtil pampa akinmej tlayekanaj itech Betel uan insiuauan. Nochi nin yokinpaleui miakej tokniuan pampa okachi ma mochikaua intlaneltokilis. Tikitaj Jesús axkan ok techmachtijtok.

19. 1) ¿Tlen okijto tokni Russell itech tetlapouilistli? 2) ¿Melauak tlen okijto?

19 Yopanokej 100 xiuitl opejki tlanauatia iTekiuajkayo toTajtsin Dios. Itech non xiuitl Jesús opejki kiyekana tetlapouilistli. Itech xiuitl 1916 tokni Russell okijto: “Tetlapouilistli totoka momiaktilijtok, uan okachi momiaktilis, pampa moneki titetlapouiskej itech Tekiuajkayotl itech nochi Tlaltikpak” (La fe en marcha, de A. H. Macmillan, página 69). Ken tikitaj, tokni Russell okineltokaya motetlapouiskia itech nochi Tlaltikpak. Uan melauak titetlapouijtokej itech nochi Tlaltikpak. Tiktlasojkamatiliaj Jehová pampa techmachtia pampa uelis kuali tikchiuaskej toteki.

^ párr. 2 Uelis ninmej 500 tlaltikpaktlakamej opejkej kichiuaj ken Cristo. ¿Ken tikmatij? Pampa tlatitlanil Pablo okinmilui “tokniwah”. Noijki okijto: “Miakeh ok onkateh, iwa sikimeh yomikkeh”. Nin kiteititia uelis Pablo uan oksekimej akinmej okichiuayaj ken Cristo okinmixmatiayaj miakej itech ninmej 500 tlaltikpaktlakamej.

^ párr. 8 Éxodo 4:14-16 kijtoa: “Ijkuakon Jehová sapanoa okualanki iuan Moisés, uan okijto: ‘¿Amo mokni Aarón tlen levita? Ne nikmati ye kuali tlajtoa. Uan axkan ye uits itech ojtli pampa mitsnamikiki. Ijkuak mitsitas, yolpakis. Ik non, moneki tiktlapouis uan tiktlalis tlajtolmej itech ikamak, uan ne niyetos namouan ijkuak nantlajtoskej, uan ne namechmachtis tlen nankichiuaskej. Ye mopatka kitlapouis altepetl, uan ye mopatka tlajtos, uan te tiyetos ken iDios’”.

^ párr. 9 Isaías 50:4 kijtoa: “ToTeko Jehová akin Ueyititok onechmakak innenepil akinmej okinmachtijkej, pampa uelis niknankilis akin sotlaua ika se kuali tlajtoli. Ye mojmostla nechijxitia; kijxitia nonakas pampa nikkakis ken akinmej kinmachtia”.

^ párr. 15 Salmo 32:8 kijtoa: “Nimitsmakas ixtlamatilistli, uan nimitsmachtis itech tlen ojtli moneki tias. Ne nimitsnojnotsas ika noixtololouan”.