Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre de 2015

“Xikmiakili totlaneltokalis”

“Xikmiakili totlaneltokalis”

“¡Techpalewi para okachi manitlaneltoka!” (MARCOS 9:24)

TLAKUIKALMEJ: 54 UAN 24

1. ¿Tleka miak ipati tlaneltokilistli? (Xikita tlaixkopinal tlen ika peua tlamachtil.)

¿YOTIMOTLAJTLANI kox Jehová mitsmakixtis ijkuak tlamis nochi tlen amo kuali? Tlatitlanil Pablo okijto tla tiknekij timomakixtiskej moneki ma tikpiakan tlaneltokilistli. Ye okijto: ‘Tla se amo kipia tlaneltokálistli, mach weletis kipaktis Dios’ (Hebreos 11:6). Ikaj uelis kijtos tinochtin titlaneltokaj. Pero Biblia kijtoa: “Amo nochteh kineltokah Dios” (2 Tesalonicenses 3:2). Ninmej tlaxelolmej techmachtiaj miak ipati ma timochijchikauakan pampa tikpiaskej chikauak totlaneltokilis.

2, 3. 1) ¿Tleka miak ipati ma mochikaua totlaneltokilis? 2) ¿Tlen tlajtlanilmej tikinnankiliskej?

2 Tlatitlanil Pablo noijki okijto moneki “momatis kox milák [ti]tlaneltokah” (xiktlajtolti 1 Pedro 1:7). Ken ayakmo miak poliui pampa tlamis nochi tlen amo kuali, moneki ma ‘tipouikan iwan nekateh akimeh kineltokah Dios iwa ijkó kinmakixtiah’ (Hebreos 10:39). Ik non, moneki ma timochijchikauakan pampa okachi ma mochikaua totlaneltokilis. Ijkon Jesús techmakixtis ijkuak kitlajtlamis nochi tlen amo kuali. Tejuan uelis tikiluiskej Jehová ijkon ken se tlakatl okilui Jesús:  “¡Techpalewi para okachi manitlaneltoka!” (Marcos 9:24). Noso noijki uelis tikiluiskej ken tlatitlanilmej: “Xikmiakili totlaneltokalis” (Lucas 17:5).

3 Axkan tikinnankiliskej eyi tlajtlanilmej: ¿Ken uelis tikpiaskej chikauak totlaneltokilis? ¿Ken tikteititiaj chikauak totlaneltokilis? Uan ¿tleka tikneltokaj Jehová techmakas tlaneltokilistli tla tejuan tiktlajtlaniliaj?

TOTAJTSIN DIOS KINEKI MA MOCHIKAUA TOTLANELTOKILIS

4. ¿Tlen neskayomej uelis techpaleuiskej ma mochikaua totlaneltokilis?

4 Jehová kineki ma mochikaua totlaneltokilis. Ik non, “nochi tlan yowejka omoijkuilo itech tiotlajkuíloli, omoijkuilo para matimoixtlamachtikah” (Romanos 15:4). Tikinmajsij miakej neskayomej, ken: Abrahán, Sara, Isaac, Jacob, Moisés, Rahab, Gedeón, Barac uan oksekimej tlen okiteititijkej okipiayaj chikauak intlaneltokilis (Hebreos 11:32-35). Pero noijki tikitaj inneskayo oksekimej tokniuan tlen axkan okiteititijkej kipiaj chikauak intlaneltokilis. *

Inneskayo tokniuan tlen chikauak intlaneltokilis techmachtia miak tlamantli

5. 1) ¿Ken okiteititi Elías melauak otlaneltokaya? 2) ¿Tlen uelis timotlajtlaniskej?

5 Itech Biblia tikajsij ineskayo Elías. Ma tikitakan makuili uelta ijkuak okiteititi okipiaya chikauak itlaneltokilis. 1) Se tonal Elías okilui ueyi tekiua Acab Jehová kichiuaskia amo ma kiaui nion ma tlamochiua. Uan okilui melauak ijkon mochiuaskia pampa Jehová ijkon okijto (1 Reyes 17:1). 2) Elías okineltokaya Jehová kimakaskia ye uan oksekimej tlen kikuaskiaj, maski amo kiauiskia nion tlamochiuaskia (1 Reyes 17:4, 5, 13, 14). 3) Elías okineltokaya Jehová kiyolitiskia ikone se iknosiuatl (1 Reyes 17:21). 4) Otlaneltokaya, Jehová kiualtitlaniskia tlitl tlen kitlatiskia tlamanali itech tepetl Carmelo (1 Reyes 18:24, 37). 5) Achto kiauiskia oksepa, Elías okineltokaya melauak kiauiskia, ik non, okilui ueyi tekiua Acab: “Xitlejko, xitlakua uan xitlakoni; pampa mokaki chikauak kiauis” (1 Reyes 18:41). Ika nochi tlen otikitakej, ma timotlajtlanikan: “¿Nitlaneltoka ijkon ken Elías?”.

¿KEN UELIS TIKPIASKEJ CHIKAUAK TOTLANELTOKILIS?

6. ¿Tlen techpaleuis ma tikpiakan chikauak totlaneltokilis?

6 Tla tiknekij tikpiaskej chikauak totlaneltokilis, moneki ma tikiluikan toTajtsin Dios ma techmaka iespíritu santo. ¿Tleka? Pampa tlaneltokilistli kisa itech espíritu santo (Gálatas 5:22). Jesús otechilui ma tikiluikan Jehová ma techmaka okachi espíritu santo, uan otechilnamikti Jehová kinmaka akinmej kitlatlaujtia (Lucas 11:13).

Jesús otechilui ma tiktlajtlanilikan Jehová ma techmaka okachi espíritu santo

7. Ika se neskayotl xikijto tlen moneki ma tikchiuakan pampa ma tikpiakan chikauak totlaneltokilis.

 7 ¿Uan tla yichikauak totlaneltokilis? Moneki timochijchikauaskej pampa nochipa ma yeto chikauak. ¿Tleka? Pampa tlaneltokilistli ken tlitl tlen ika titlaxotlaltiaj. Achto chikauak xotla. Pero tla amo tiktlaliliaj kuauitl seuis. Noijki ijkon panoa ika totlaneltokilis. Tla tiknekij tikpiaskej chikauak totlaneltokilis, moneki ma tiktlajtoltikan uan ma timomachtikan Biblia. Ijkuak okachi tiktlasojtlaskej Jehová uan Biblia, totlaneltokilis okachi mochikauas.

8. ¿Tlen techpaleuis ma tikpiakan chikauak totlaneltokilis?

8 Pampa ma yeto chikauak totlaneltokilis, amo san moneki tikmatiskej tlen otimomachtijkej achto timoapolaktiskiaj (Hebreos 6:1, 2). Se neskayotl, uelis timomachtiskej ken yomochi seki tlamantli tlen kijtoa Biblia. Uan noijki ijkuak timomachtiskej Biblia, moneki tikteititiskej itech tonemilis melauak chikauak totlaneltokilis (xiktlajtolti Santiago 1:25; 2:24, 26).

9, 10. Pampa ma mochikaua totlaneltokilis, 1) ¿ken techpaleuiaj tokniuan? 2) ¿Ken techpaleuiaj nechikolmej? 3) ¿Ken techpaleuia tetlapouilistli?

9 Tlatitlanil Pablo okijto, akinmej tikchiuaj ken Cristo moneki “matimoyolchikawakah [...] itech totlaneltokalis” (Romanos 1:12). ¿Tlen kijtosneki? Totlaneltokilis okachi mochikaua ijkuak timouikaj iuan tokniuan itech tlanechikol. Uan okachi tla timouikaj iuan akinmej yolmelajkej ijkuak tlajyouiaj (Santiago 1:3). Akinmej amo kuali toyolikniuan kichiuaskej amo ma tikpiakan chikauak totlaneltokilis, pero akinmej kuali toyolikniuan techpaleuiskej ma mochikaua totlaneltokilis (1 Corintios 15:33). Ik non, Biblia technauatia nochipa ma timonechikokan pampa ijkon tinochtin timoyolchikauaj (xiktlajtolti Hebreos 10:24, 25). Uan noijki tlen timomachtiaj itech tonechikoluan kichikaua totlaneltokilis. Romanos 10:17 kijtoa ijkuak okachi timomachtiaj Biblia, okachi mochikaua totlaneltokilis. Ik non, moneki ma timotlajtlanikan: “¿Nochipa nimonechikoa?”.

10 Tla tikinmachtiaj oksekimej itech Biblia, noijki mochikauas totlaneltokilis. ¿Tleka? Pampa ijkuak titetlapouiaj, tikajsikamatij moneki ma titlaneltokakan itech Jehová uan ma tiyetokan yolchikauakej, ijkon ken tokniuan itech achto siglo (Hechos 4:17-20; 13:46).

11. 1) ¿Tleka Josué uan Caleb okipiayaj chikauak intlaneltokilis? 2) ¿Ken uelis tikchiuaskej ken Josué uan Caleb?

11 Ijkuak tikitaj ken Jehová technankilia uan techpaleuia, totlaneltokilis okachi mochikaua. Non tlen okinpanok Josué uan Caleb. Ijkuak ichtaka otlachiatoj itech Tlali tlen  Jehová okijto kinmakaskia, yejuan okiteititijkej melauak otlaneltokayaj. Ijkuak opanok xiuitl, intlaneltokilis okachi omochika pampa okitakej ken Jehová okinpaleuiaya. Ik non, Josué okinmilui israelitas Jehová nochipa kichiua tlen kijtoa. Satepan okinmilui ma kimauilikan Jehová uan ma kitekichiuilikan. Uan noijki okinmilui: “Ne uan nokalchanejkauan, tiktekichiuiliskej Jehová” (Josué 23:14; 24:14, 15). Tla noijki titlaneltokaj itech Jehová, tikitaskej ken techpaleuia uan totlaneltokilis okachi mochikauas (Salmo 34:8).

¿KEN TIKTEITITIAJ CHIKAUAK TOTLANELTOKILIS?

12. ¿Ken tikteititiaj chikauak totlaneltokilis?

12 Santiago okijto: “Nimitsititis milák nikneltoka Dios ika tlan kuali” nikchiua (Santiago 2:18). Nikan Santiago okijto ika tlen tikchiuaj uelis tikteititiskej chikauak totlaneltokilis. Ma tikitakan ken uelis tikteititiskej titlaneltokaj.

Tla timochijchikauaj titetlapouiskej tikteititiskej chikauak totlaneltokilis (Xikita párrafo 13)

13. ¿Tleka ijkuak titetlapouiaj tikteititiaj titlaneltokaj?

13 Tikteititiaj titlaneltokaj ijkuak titetlapouiaj. ¿Tleka? Pampa ijkon tikteititiaj ayakmo miak poliui pampa tlamis nochi tlen amo kuali (Habacuc 2:3). Tla tiknekij tikmatiskej kox chikauak totlaneltokilis, moneki ma timotlajtlanikan: “¿Nikpatioita nitetlapouis? ¿Nimochijchikaua pampa nikintlapouis oksekimej itech toTajtsin Dios? ¿Niktemoa ken uelis okachi nitetlapouis?” (2 Corintios 13:5). Tla timochijchikauaj titetlapouiskej, tikteititiskej melauak chikauak totlaneltokilis (xiktlajtolti Romanos 10:10).

14, 15. 1) ¿Ken uelis mojmostla tikteititiskej melauak titlaneltokaj itech Jehová? 2) Se kalchanejke, ¿ken okiteititijkej melauak otlaneltokayaj?

 14 Ijkuak tikxikoaj nochi tlajyouilistli noijki tikteititiaj tikpiaj chikauak totlaneltokilis. Tla moneki ma tikxikokan, kokolistli, ijkuak amo tikpiaj tomin, timoyolkokoaj noso okseki ouijkayotl, titlaneltokaj Jehová uan Jesús techpaleuiskej ijkuak okachi monekis (Hebreos 4:16). Tla tiktlatlaujtiaj Jehová ma techpaleui, tikteititiaj melauak itech titlaneltokaj. Jesús okijto uelis tiktlajtlaniliskej toTajtsin Dios ma “techmaka nochi tonati tlan tikmomajsewiskeh” (Lucas 11:3). Itech Biblia tikinmajsij miakej neskayomej tlen techmachtiaj Jehová uelis techmakas san tlen tiktlajtlaniliskej. Se neskayotl, ijkuak israelitas amo okipiayaj tlen kikuaskej, Jehová okimakak Elías atl uan tlakuali. Biblia kijtoa kakalomej mojmostla okiuikiliaya pan uan nakatl, nin okichiuayaj kualkan uan tiotlak, uan oatliaya itech se aueyatl (1 Reyes 17:3-6). Noijki uelis tikneltokaskej Jehová techmakas nochi tlen moneki pampa kuali tiyetoskej.

Tla tikxikoaj tlajyouilistli, tikteititiaj chikauak totlaneltokilis (Xikita párrafo 14)

15 Tla tikchiuaj nochi tlen kijtoa Biblia, uelis tikinmakaskej nochi tlen kinekij tokalchanejkauan pampa kuali ma yetokan. Xikita tlen okinpanok sekimej tokniuan tlen chantij Asia. Se tonal se teta okitak pampa sapanoa  otekitiaya ayakmo okachi kuali omouikaya iuan Jehová. Ye uan isiua okinekiayaj kitlakamatiskej tlen kijtoa Mateo 6:33 uan Proverbios 10:4. Ik non, omokajkej ayakmo ompa tekitiskia uan axkan san kichijchiuaskiaj tlakuali pampa kinemakaskej. Isiua kijtoa axkan sapanoa chikauak tekitij, pero ken Jehová kinpaleuia yejuan nochipa kipiaj tlen kikuaskej. ¿Yomitspanok itlaj tlen noijki okichika motlaneltokilis?

Tla tikchiuaj tlen kijtoa Biblia uelis tikinmakaskej tokalchanejkauan tlen moneki

16. ¿Tlen panos tla titlaneltokaj itech Jehová?

16 Tla tiktlatlaujtia Jehová ma techpaleui, ye melauak techpaleuis tla itech melauak titlaneltokaj. Non tlen okijto Pablo ijkuak okilnamik tlen teotlajtojki Habacuc otlajkuilo: “Yolchipawak ika itlaneltokalis yolitos” (Gálatas 3:11; Habacuc 2:4). Uan noijki tlatitlanil Pablo okijto toTajtsin Dios tlatlamantli uelis techpaleuis (Efesios 3:20). Melauak timochijchikauaj tiktekichiuiliskej toTajtsin Dios, pero seki tlamantli amo uelis tikchiuaskej. Ik non, timochijchikauaj uan tikneltokaj Jehová techteochiuas. Melauak tiktlasojkamatiliaj pampa ye techpaleuia.

JEHOVÁ TECHMAKAS TLANELTOKILISTLI TLA TIKTLAJTLANILIAJ

17. 1) ¿Ken okinnankili Jesús itlatitlaniluan? 2) ¿Ken tikmatij tla tiktlatlaujtiaj Jehová ma techmaka okachi tlaneltokilistli ye melauak techmakas?

17 Axkan uelis timomachiliaj ken itlatitlaniluan Jesús akinmej okijtojkej: “Xikmiakili totlaneltokalis” (Lucas 17:5). Itech iluitl Pentecostés itech xiuitl 33 Jesús okinmakak espíritu santo uan okinpaleui ma kajsikamatikan itlanekilis toTajtsin Dios. Nin okachi okichika intlaneltokilis. Uan ijkuakon opejkej okachi tetlapouiaj, ken amo keman omochiuaya (Colosenses 1:23). Jehová kijtoa “tla itla tiktlajtlaniliah non Ye kipaktia”, ye melauak techmakas (1 Juan 5:14).

18. ¿Ken kinteochiua Jehová akinmej itech tlaneltokaj?

18 Tla titlaneltokaj itech Jehová, ye techteochiuas uan techmakas okachi tlaneltokilistli ijkuak tiktlajtlaniliskej. Ijkuakon okachi mochikauas totlaneltokilis uan ijkuakon toTajtsin Dios techteochiuas (2 Tesalonicenses 1:3, 5).

^ párr. 4 Uelis tiktlajtoltiskej tlen okichijkej sekimej tokniuan ken Lillian Gobitas Klose (¡Despertad! 22 de julio 1993), Feliks Borys (¡Despertad! 22 de febrero 1994) uan Josephine Elias (¡Despertad! de septiembre 2009).