Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre de 2015

¿Tikita ken mitspaleuijtok toTajtsin Dios?

¿Tikita ken mitspaleuijtok toTajtsin Dios?

“Ima Jehová melauak motematiltis inmixpan itekipanojkauan.” (ISAÍAS 66:14)

TLAKUIKALMEJ: 35 UAN 26

1, 2. ¿Tlen mokuayejyekoaj miakej itech toTajtsin Dios?

MIAKEJ tlaltikpaktlakamej kineltokaj toTajtsin Dios amo kitekipachoa tlen tikchiuaj nion tlen techpanoa. Se neskayotl, itech metstli noviembre, xiuitl 2013, se ueyi ejekakiauitl supertifón okinxixini miakej altepemej itech ueyi altepetl Filipinas. Satepan ijkuak opanok, se tekiua okijto toTajtsin Dios amo okinpaleui pampa uelis okichijtoka okseki tlamantli.

2 Oksekimej kineltokaj toTajtsin Dios amo kita tlen tikchiuaj (Isaías 26:10, 11; 3 Juan 11). Tlatitlanil Pablo okijto itech achto siglo miakej amo okintekipachoaya ken okinmitaya toTajtsin Dios. Yejuan okichiuayaj miak tlamantli amo kuali, otlachtekiayaj uan san intech omotekipachoayaj (Romanos 1:28, 29).

3. 1) ¿Tlen moneki ma timotlajtlanikan? 2) ¿Tlen kijtosneki ijkuak Biblia kijtoa ima toTajtsin Dios?

3 Tejuan tikneltokaj toTajtsin Dios kita nochi tlen tikchiuaj. Pero moneki ma timotlajtlanikan: “¿Nikneltoka notech motekipachoa toTajtsin Dios? ¿Nikita ken nechpaleuijtok?” Itech Biblia miakej tlaxelolmej kijtoaj ima toTajtsin Dios, pampa kiteititis  kinpaleuia itekipanojkauan (xiktlajtolti Deuteronomio 26:8). * (Xikita recuadro tlen itoka “¿Tlen kijtosneki?”.) Uan Jesús okijto sekimej kitaskiaj toTajtsin Dios, nin kijtosneki kimatiskiaj kinpaleuijtok (Mateo 5:8). ¿Te ijkon mitspanoa? ¿Tikita ken mitspaleuijtok toTajtsin Dios? Biblia techtlapouia itech sekimej tlaltikpaktlakamej akinmej amo okitakej ima toTajtsin Dios uan itech sekimej tlen kema okitakej. Axkan timomachtiskej seki neskayomej. Uan chikome timomachtiskej ken tlaneltokilistli techpaleuia ma tikajsikamatikan toTajtsin Dios techpaleuijtok.

AMO OKITAKEJ TOTAJTSIN DIOS OKIPALEUIJTOKA IALTEPE

4. ¿Tleka okseki altepemej okiteititijkej amo okineltokayaj Jehová okipaleuijtoka ialtepe?

4 Yiuejkika miakej okitakej ken toTajtsin Dios okipaleui altepetl Israel. Se neskayotl, Jehová okinchi miakej milagros pampa ialtepe ma kisa itech ueyi altepetl Egipto uan noijki pampa ma kintlanilikan miakej altepemej (Josué 9:3, 9, 10). Miakej tekiuajkej okimatiayaj nochi tlen Jehová okichi. Pero maski okimatiayaj nochi nin tlamantli, omoteuijkej iuan Josué uan altepetl Israel (Josué 9:1, 2). Ijkuak Israel omoteuijtoka iuan oksekimej tekiuajkej uelis okitakej ken toTajtsin Dios okipaleui ialtepe. Se neskayotl, okitakej ijkuak Jehová okichi ma moketsakan Tonaltsin uan Metstli pampa uelis kintlaniliskiaj akinmej okinkokoliayaj (Josué 10:13). Pero akinmej amo yolkualmej amo okineltokakej Jehová melauak okinpaleuijtoka israelitas. Ik non, amo otlatlankej (Josué 11:20).

Tla tiknekij tikitaskej ken techpaleuia Jehová, moneki ma titlachixtokan

5. ¿Tlen amo okineltokak ueyi tekiua Acab?

5 Seki xiuitl satepan se ueyi tekiua okitak ken toTajtsin Dios okipaleuijtoka ialtepe. Nin ueyi tekiua omotokayotiaya Acab uan okatka se tekiua amo yolkuali. Teotlajtojki Elías okilui ayakmo kiauiskia hasta ijkuak ye kijtoskia (1 Reyes 17:1). Kema, san toTajtsin Dios uelis kipaleuiskia Elías pampa ma kiaui ijkuak ye kijtoskia. Pero Acab amo okitlakaitak. Satepan Elías okitlatlaujti Jehová ma kiualtitlani tlitl uan Jehová okinankili. Elías noijki okilui Acab Jehová kichiuaskia sapanoa ma kiaui. Uan ijkon opanok (1 Reyes 18:22-45). Pero Acab amo okineltokak Jehová okinchi ninmej milagros. ¿Tlen techmachtia tlen otikitakej itech ome párrafos? Tla tiknekij tikitaskej ken techpaleuia Jehová, moneki ma titlachixtokan.

OKITAKEJ TOTAJTSIN DIOS OKIPALEUIJTOKA IALTEPE

6, 7. ¿Tlen okajsikamatkej gabaonitas uan Rahab?

6 Yiuejkika okatka se altepetl tlen omotokayotiaya Gabaón. Akinmej ompa ochantiayaj amo okatkaj ken oksekimej tlen ochantiayaj itech okseki altepemej. ¿Tleka? Pampa yejuan okikakej nochi tlen Jehová okichi pampa kinpaleuiskia israelitas uan noijki okajsikamatkej toTajtsin Dios melauak okinpaleuijtoka. Ik non, gabaonitas amo okinekiayaj moteuiskej iuan israelitas, uan omokuayejyekojkej ken uelis mouikaskiaj iuan israelitas uan ijkon kipiaskiaj yolseuilistli (Josué 9:3, 9, 10). Melauak  kuali tlen okichijkej ijkuak okineltokakej Jehová melauak okinpaleuiaya israelitas.

7 Rahab noijki okitak ken Jehová okipaleuiaya ialtepe. Ye amo okatka israelita, pero okikak nochi tlen Jehová okichi ijkuak okinmakixti israelitas itech ueyi altepetl Egipto. Ijkuak ome tlakamej akinmej ichtaka otlachiatoj oajsitoj ikalijtik Rahab, ye okinmilui melauak okineltokaya Jehová kinpaleuiskia israelitas ma kimoaxkatikan nochi non tlali. Uan maski okimatiaya uelis mikiskia ye uan ikalchanejkauan, ye okineltokak toTajtsin Dios melauak kinpaleuiskia (Josué 2:9-13; 4:23, 24).

8. ¿Tlen okimatkej sekimej israelitas?

8 Oksepa ma timomachtikan itech tlen okipanok Acab. Ijkuak okitak itech iluikak oualtemoaya tlitl, amo okinek kajsikamatis toTajtsin Dios melauak okinankilijtoka Elías. Pero sekimej israelitas kema okajsikamatkej toTajtsin Dios okichijtoka non milagro. Ik non, yejuan okijtojkej Jehová ye akin melauak toTajtsin Dios (1 Reyes 18:39).

9. ¿Axkan ken uelis tikitaskej ima Jehová?

9 Yotikitakej inneskayo sekimej tlaltikpaktlakamej akinmej amo okitakej ken toTajtsin Dios okinpaleui itekipanojkauan uan oksekimej akinmej kema okitakej. Axkan noijki miakej itekipanojkauan toTajtsin Dios kajsikamati ye techpaleuia. Tejuan tiknekij tikchiuaskej ken akinmej kema okitakej. ¿Axkan ken uelis tikitaskej ima Jehová? Uelis tikitaskej ika iixtololouan toyolo (Efesios 1:18, TNM). (Xikita recuadro tlen itoka “¿Tlen kijtosneki?”.) Ik non, moneki okachi kuali ma tikixmatikan Jehová uan iyelis. ¿Tleka tikijtoaj  axkan melauak kinpaleuijtok akinmej kinekij kiyolpaktiskej?

¿TLEN KITEITITIA JEHOVÁ MELAUAK TECHPALEUIA AXKAN?

10. ¿Tlen neskayotl techmachtia Jehová melauak kinpaleuia akinmej kinekij kiyolpaktiskej? (Xikita tlaixkopinal tlen ika peua tlamachtil.)

10 Onka miak tlamantli tlen techititia axkan Jehová kinpaleuijtok akinmej kinekij kiyolpaktiskej. Nochipa tikkakij ken Jehová kinnankilia intlatlaujtilis akinmej kitlatlaujtia ma kinpaleui (Salmo 53:2). Se neskayotl, se tokni tlen itoka Allan otetlapouijtoka itech se altepetsintli itech ueyi altepetl Filipinas. Ijkuak okitlapouijtoka se siuatl, okitak ken opejki choka. ¿Tlen okipanok? Allan kijtoa non kualkan siuatl okitlatlaujti toTajtsin Dios ma kintitlani iTlaixpantijkauan Jehová pampa ma kitlapouikan. Ijkuak okatka ichpochtli omomachtiaya iuan iTlaixpantijkauan Jehová. Pero satepan omonamikti, oyajki itech okse altepetl uan ayakmo omomachti. Ik non, sapanoa okitlasojkamatiliaya Jehová pampa san niman okinankili itlatlaujtilis. Kanaj se xiuitl satepan omoapolakti.

Moneki ma titlachixtokan pampa tikitaskej ken techpaleuia Jehová (Xikinmita párrafos 11 a 13)

11, 12. 1) ¿Ken kinpaleuia Jehová itekipanojkauan? 2) Xikyekijto ken Jehová okipaleui se tokni.

11 Axkan Jehová yokinpaleui miakej itekipanojkauan. Se neskayotl, sekimej ijkuak ayamo omochiuayaj iTlaixpantijkauan Jehová otlachichinayaj, okintekitiltiayaj drogas uan okitayaj pornografía. Miakej kijtoaj ayakmo okinekiayaj kichiuaskej tlen amo kuali, pero amo ueli okikauayaj. Pero ijkuak okiluijkej Jehová ma kinpaleui, ye okinmakak “weletílistli [non] wits de Dios”, uan ijkon ayakmo okichijkej tlen amo kuali (2 Corintios 4:7; Salmo 37:23, 24).

Jehová kinpaleuia itekipanojkauan ma kixikokan ouijkayotl

12 Jehová noijki kinpaleuia itekipanojkauan ma kixikokan nochi ouijkayotl. Ma tikitakan ineskayo se tokni tlen itoka Amy. Okiluijkej ma tlapaleuiti itech se altepetsintli tlen mokaua itlajkotia ueyi atl ik Pacífico, ompa kichijchiuaskiaj se Kali kanin monechikoskej tokniuan uan noijki se kali kanin mokauaskiaj misioneros. Pero ompa sapanoa oui, pampa ualeua amo okipiayaj atl, luz uan noijki ijkuak sapanoa okiauiaya ojtli oatemiaya. Uan noijki omokalotijtoka itech se hotel, tlen amo ueyi, noijki sapanoa okinmilnamikiaya ikalchanejkauan. Se tonal omokualani iuan se tokni tlen iuan otekitiaya. Ijkuak oajsito kanin omokalotijtoka amo kuali omomachiliaya. Ijkuakon amo okipiaya luz, uan nochi otlayoatoka. Ijkuakon okitlatlaujti Jehová. Ijkuak oajsito luz okitak se revista Akin Tetlapouijtok tlen okinpaleuiaya misioneros. Non tlamachtil okijtoaya tlen uelis kichiuaskej pampa ayakmo okachi moyolkokoskej uan ken uelis kuali mouikaskej iuan oksekimej. Amy okimachili Jehová okitlapouijtoka. Nin okipaleui okachi chikauak ma kitekichiuili Jehová (Salmo 44:25, 26; Isaías 41:10, 13).

13. ¿Tleka tikijtoaj Jehová kinpaleuia itekipanojkauan ma tetlapouikan?

13 Jehová noijki kinpaleuia tokniuan ma tetlapouikan (Filipenses 1:7). Se neskayotl, ijkuak sekimej tekiuajkej amo kinekij ma titetlapouikan, tiauij inmixpan jueces pampa ma techpaleuikan. Itech nochi Tlaltikpak yotechpaleuijkej pampa ma moyektlalikan kanaj 268 ouijkayomej. Se neskayotl, itech xiuitl 2000  pampa tlayekapan Tribunal Europeo de Derechos Humanos yokijto tejuan otitlatlankej itech 24 ouijkayomej tlen otikpiayaj iuan tekiuajkej. Melauak amo ikaj uelis kichiuas Jehová amo ma kipaleui ialtepe (Isaías 54:17; xiktlajtolti Isaías 59:1). *

14. ¿Tlen okseki tlamantli kiteititia Jehová techpaleuijtok?

14 ¿Tlen okseki tlamantli kiteititia Jehová techpaleuijtok? Mota pampa titetlapouijtokej itech nochi Tlaltikpak (Mateo 24:14; Hechos 1:8). Noijki mota pampa tinochtin tiitekipanojkauan san sekan tikatej, maski tlatlamantli toaltepe. Itech nochi Tlaltikpak nion se tlaneltokalistli san sekan kajki. Uan noijki akinmej amo kitekichiuiliaj Jehová kijtoaj: “Dios milák kajki nomowah” (1 Corintios 14:25). Ika nochi nin tikajsikamatij Jehová axkan melauak techpaleuijtok (xiktlajtolti Isaías 66:14). * ¿Uan tejuatsin? ¿Tikita ken mitspaleuijtok Jehová itech monemilis?

¿TIKITA KEN MITSPALEUIJTOK TOTAJTSIN DIOS?

15. ¿Tlen uelis kichiuas amo ma tikitakan ken techpaleuia Jehová?

15 Ualeua uelis amo tikitaj ken techpaleuia Jehová. ¿Tleka? Uelis san timotekipachoaj itech tlen techpanotok, uan tikilkauaj nochi tlen Jehová yokichi pampa techpaleuis. Ijkon okipanok Elías. Ye okatka yolchikauak. Pero ijkuak siuatl ueyi tekiua Jezabel okinekiaya kimiktis, Elías okilka ken okipaleui Jehová. Sapanoa omomojti, uan Biblia kijtoa okinekiaya mikis (1 Reyes 19:1-4). ¿Ken uelis mopaleuiskia uan moyolchikauaskia? Omonekiaya ma kitlatlaujti Jehová ma kipaleui (1 Reyes 19:14-18).

16. Ijkuak titlajyouijtokej, ¿tlen techpaleuis ma tikitakan Jehová techpaleuijtok?

 16 Job noijki okipanok ken Elías. Sapanoa okitekipachoaya ouijkayotl tlen okipanotoka uan amo okitaya non ouijkayotl ken Jehová okitaya (Job 42:3-6). ¿Uan tejuan? Ijkuak titlajyouijtokej uelis amo tikitaj Jehová techpaleuijtok. ¿Tlen techpaleuis ma tikitakan? Ma tiktlajtoltikan Biblia uan ma timokuayejyekokan itech tlen tiktlajtoltiaj. Ijkuak tikitaskej ken techpaleuiaj ika ouijkayotl tlen tipanoaj, tikitaskej ken toTajtsin Dios techtlapouijtoskia. Ijkuakon okachi tikitaskej Jehová techpaleuijtok uan uelis tikijtoskej ken Job: “Nimitsita ika noixtololouan”.

Jehová kichiua ma tikinpaleuikan oksekimej (Xikinmita párrafos 17 uan 18)

17, 18. 1) ¿Ken yotechpaleui Jehová itech tonemilis? 2) ¿Axkan ken yokinpaleui Jehová sekimej itekipanojkauan?

17 ¿Tikita ken Jehová mitspaleuijtok? Se neskayotl, sekimej tokniuan kineltokaj ye okinpaleui ma kajsikan tlaneltokalistli tlen melauak. Oksekimej kijtoaj Jehová okinpaleui ika tlen okijto se tokni itech se nechikol. Noso noijki kijtoaj Jehová okinpaleui ijkuak okinankili intlatlaujtilis. Oksekimej kijtoaj okinpaleui ma kichiuakan itlaj pampa okachi kitekichiuiliskej. Oksekimej kijtoaj Jehová okinmakak tlen okinekiayaj ijkuak okipolojkej inteki pampa okachi monechikoskej noso tetlapouiskej (Hebreos 13:5). Tla kuali timouikaj iuan Jehová uelis tikitaskej ken tlatlamantli techpaleuia.

18 Se tokni tlen itoka Sarah akin chanti itech ueyi altepetl Kenia, okimachtijtoka se siuatl tlen omotaya amo okipatioitaya tlen omomachtiaya. Tokni okitlatlaujti Jehová ma kipaleui pampa kimatiskia kox ok kimachtiskia noso ayakmo. Ijkuak ye okijto: “Ijkon ma mochiua”, siuatl akin okimachtijtoka okinotski pampa kitlajtlanis kox ye noijki uelis monechikoskia. Sarah sapanoa omotlajtlachialti. Tla tejuan noijki tikitaj nochi tlen panoa, uelis tikitaskej ken Jehová techpaleuijtok. Okse tokni tlen itoka Rhonna, akin chanti Asia, kijtoa moneki kauitl pampa timomachtiskej ken tikitaskej Jehová techpaleuia. Uan kijtoa ijkuak tikitaj ken techpaleuia tikajsikamatij ken totech motekipachoa.

19. ¿Tlen okseki tlamantli moneki ma tikchiuakan pampa ma tikitakan Jehová techpaleuia?

19 Tla tiknekij tikitaskej ken techpaleuia Jehová, noijki moneki ma tiyetokan “[ti]yolchipawakeh” (Mateo 5:8). ¿Tlen kijtosneki? Kijtosneki timokuayejyekoskej itech tlamantli kuali uan tikixtopeuaskej nochi tlen amo kuali (xiktlajtolti 2 Corintios 4:2). Axkan otimomachtijkej tla tiknekij tikitaskej ken techpaleuia Jehová, moneki kuali iuan ma timouikakan. Chikome timomachtiskej ken techpaleuia tlaneltokilistli ma tikitakan ken techpaleuia Jehová.

^ párr. 3 Deuteronomio 26:8 kijtoa: “Saiktlami Jehová otechkixti itech altepetl Egipto ika ima chikauak tlen okimela uan okichi ika tlamantli temomojti uan ika milagros uan tlamantli tlen tetlajtlachialtia”.

^ párr. 13 Isaías 59:1 kijtoa: “¡Xikita! Ima Jehová amo tsikitsi pampa amo techmakixtis, nion inakas amo tlatsiui pampa amo techkakis”.

^ párr. 14 Isaías 66:14 kijtoa: “Namejuan nankitaskej, uan nanyolpakiskej, uan nanmoomiouan seliaskej ken yankuik xiuitl. Uan ima Jehová melauak motematiltis inmixpan itekipanojkauan, pero ye kinmixkomakas akinmej kikokoliaj”.