Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Octubre de 2015

“Akin amo ixtlamatki kineltoka nochi tlen kiluiaj”

“Akin amo ixtlamatki kineltoka nochi tlen kiluiaj”

“Amo ixtlamatki akin amo keman kitlajtoltia periódico, uan okachi akin kineltoka nochi tlen ompa moijtoa.” (August von Schlözer, historiador uan escritor alemán [1735-1809])

YIKIPIA kanaj 200 xiuitl nin tlakatl okijto amo uelis tikneltokaskej nochi tlen moijtoa itech periódicos. Uan axkan noijki ijkon panoa. Amo uelis tikneltokaskej nochi tlen moijtoa itech Internet. Axkan mojmostla uelis tiktlajtoltiskej miak tlamantli, uan nin pampa onka miak tlamantli yankuik. Miak tlamantli tlen onka melauak uan techpaleuia, pero okseki tlamantli amo techpaleuia uan techijtlakoa. Ik non, moneki ma timomaluikan. Ijkuak ikaj peua kitekitiltia Internet uelis kineltokas tlen okitlajtolti melauak san pampa ompa okitak, noso se iyolikni okititlanili. Uan uelis noijki kineltoka seki tlamantli tlen mota amo melauak. Ik non, Biblia kijtoa: “Akin amo ixtlamatki kineltoka nochi tlen kiluiaj, pero akin ixtlamatki mokuayejyekoa itech sejse tlamantli tlen kichiua” (Proverbios 14:15).

Akin amo ixtlamatki kineltoka nochi tlen kiluiaj, pero akin ixtlamatki kineltoka san ijkuak melauak kimati ijkon opanok. Itech Internet onka miak tlamantli tlen miakej kitaj pero tlen amo melauak. ¿Tlen uelis tikchiuaskej pampa amo ma techkajkayauakan? Ma timotlajtlanikan: “¿Kanin oniktlajtolti? ¿Oniktlajtolti itech se página tlen itech uelis nitlaneltokas, noso oniktlajtolti kanin san akin uelis tlajkuilos? ¿Kijtoa ikaj akin amo moixmati? ¿Okse página tlen itech nitlaneltoka okijto amo melauak tlen moijtoa?”. * Kuali ma timokuayejyekokan (Proverbios 7:7). Tla tiktlajtoltiaj itlaj tlen amo ueli tikneltokaj, uelis amo melauak. ¿Uan tla techiluiaj itlaj tlen amo kuali itech okse? Ma timotlajtlanikan: “¿Akin kipaktiskia miakej ma kimatikan itech nin tlamantli? ¿Tleka ikaj kineki miakej ma kimatikan?”.

AMO XIKTITLANI SEJSE MENSAJE TLEN TIKSELIA

Ijkuak sekimej kiseliaj seki mensajes ika noticias, san niman kintitlaniliaj inyolikniuan. San niman kichiuaj uan nion mokuayejyekoaj kox melauak noso kox uelis kipaleuis akin kititlaniliaj.  Uelis san kinekij oksekimej ma kinmitakan pampa yejuan achto okitematiltijkej non tlamantli (2 Samuel 13:28-33). Pero moneki ma tikteititikan ixtlamatilistli. Amo tiknekij tikinmijtlakoskej oksekimej tlaltikpaktlakamej.

¿Tleka sekimej kintitlanij mensajes uan amo kitaj kox melauak? Pampa amo kinekij tlatemoskej pampa kimatiskej kox melauak. Uelis kijtoaj: “Noyolikniuan uelis kitaskej kox melauak, tla ijkon kinekij”. Pero uelis moyolikniuan noijki amo majxiliaj pampa tlatemoskej uan kimatiskej kox melauak (Efesios 5:15, 16). Ik non, tla amo tikmati kox tikintitlanilis oksekimej noso amo, moneki tikilnamikis: “Tla amo tikmati, okachi kuali xikpojpolo ijtik tlajsoli”.

Miak ipati ma timotlajtlanikan: “¿Nechpaktia nikintitlanilis oksekimej tlen onikseli? ¿Se tonal omonekiaya nikinmiluis ma nechtlapojpoluikan pampa amo melauak tlen onikintitlanili? ¿Ikaj onechilui ayakmo ma niktitlanili mensajes tlen nikinselia?”. Tla toyolikniuan kipiaj Internet, yejuan uelis kitemoskej tlen kinekij kimatiskej. Amo moneki ma kiselikan miakej correos kanin moijtoaj chistes, kiualikaj tlaixkopinalmej noso videos. Noijki amo moneki tikintitlaniliskej grabaciones itech tlapoualismej tlen ikaj okinchi noso sejse tlajtoli tlen ompa omoijto. * Okachi kuali sejse ma momachti tlen kineki kimatis, ma kitemo tlaxelolmej tlen kiualika se tlamachtil noso tlen tlanankilis itech nechikolmej.

Kuali ximokuayejyeko achto tiktitlanis se mensaje

¿Tlen moneki tikchiuaskej tla itech Internet tikajsij itlaj tlen amo melauak itech iTlaixpantijkauan Jehová? ¡Amo ma tiktlajtoltikan! Amo ma tikintitlanilikan oksekimej, pampa san tiktematiltiskej itlaj tlen amo melauak. Uan tla techtekipachoa tlen otiktlajtoltijkej, moneki ma tiktlatlaujtikan Jehová ma techmaka ixtlamatilistli uan noijki ma timotlapouikan iuan se tokni tlen chikauak itlaneltokilis (Santiago 1:5, 6; Judas 22, 23). Amo ma techtlajtlachialti tla kijtoaj tlen amo melauak itech iTlaixpantijkauan Jehová. Noijki otlakajkayajkej itech Jesús. Uan ye okijto kintojtokaskiaj imachtijkauan uan kijtoskiaj tlen  amo melauak itech yejuan (Mateo 5:11; 11:19; Juan 10:19-21). Tla tiixtlamatkej tikmatiskej ijkuak ikaj tlakajkayajtok itech iTlaixpantijkauan Jehová uan noijki tla kineki kinkajkayauas oksekimej (Proverbios 2:10-16).

MA TIKINTLAKAITAKAN OKSEKIMEJ

Noijki moneki timomaluiskej tla itlaj otechiluijkej itech tokniuan. Maski melauak tlen otechiluijkej, uelis amo kuali ma tikinmiluikan oksekimej (Mateo 7:12). Se neskayotl, tla tikijtoaj tlen amo melauak itech oksekimej kijtosneki amo titetlasojtlaj uan noijki amo ikaj kipaleuis tlen tikijtoaj (2 Tesalonicenses 3:11; 1 Timoteo 5:13). Uan noijki seki tlamantli amo moneki momatis. Tla ikaj kineki kijtos itlaj tlen okipanok uan tlen amo moneki kimatiskej oksekimej, moneki tiktlakaitaskej tla kitematiltia keman uan kanin ye kineki. Tla tejuan achto tiktematiltiaj, uelis tikinyolkokoskej tokniuan uan noijki uelis moijtlakos tlanechikol.

Axkan san niman momati tla itlaj otlapanok. Seki tlamantli melauak uan tlapaleuia, pero okseki tlamantli amo melauak uan teijtlakoa. Amo xikilkaua, tla tiktitlaniliaj itlaj akin tikixmati, ye san niman uelis kintitlanilis nochtin tlen kinmixmati tlen katej itech nochi Tlaltikpak. Ik non, miak ipati amo ma tikintitlanilikan oksekimej tlen tejuan tikseliaj. Maski Biblia kijtoa “akin tetlasojtla [...] nochi kineltoka”, moneki ma tikteititikan ixtlamatilistli uan amo ma timokuayejyekokan nochi tlen tikseliaj melauak (1 Corintios 13:7). Noijki amo moneki tikneltokaskej nochi tlen kijtoaj itech ialtepe Jehová uan itech tokniuan. Ma tikilnamikikan, nochtin akinmej kitematiltiaj tlen amo melauak kichijtokej ken Satanás “n teta de nochteh non tlakajkayawah” (Juan 8:44). Ik non, ma timomaluikan itech nochi tlen mojmostla tikseliaj. Amo ma tikilkauakan tlen kijtoa Biblia: “Akin amo ixtlamatki mochiuas xoxo, pero akin ixtlamatki kipias tlamatilistli” (Proverbios 14:18).

^ párr. 4 Ualeua itech Internet mota seki tlamantli tlen yiuejkika omoijto amo melauak. Uelis ikaj kipatla seki tlamantli pampa ma mota melauak opanok.

^ párr. 8 Xikita “Sección de preguntas” tlen okiski itech Nuestro Ministerio del Reino (ika náhuatl del centro Toteki itech Tekiuajkayotl) de abril 2010.