Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto de 2015

¿Tikchixtok tiyoltos itech Xochitlali?

¿Tikchixtok tiyoltos itech Xochitlali?

“Makichiwakah nochipa tlan kuali, [...] iwa kipiaskeh n nemílistli non ayik tlami.” (1 TIMOTEO 6:18, 19)

TLAKUIKALMEJ: 43 UAN 40

1, 2. 1) ¿Tlen tikneki tikchiuas itech Xochitlali? (Xikita tlaixkopinal tlen ika peua tlamachtil.) 2) ¿Tlen tlamantli kichiuas okachi ma tiyolpakikan itech Xochitlali?

TLATITLANIL Pablo okijto ma timochijchikauakan pampa ma tikpiakan yolilistli tlen amo keman tlamis (xiktlajtolti 1 Timoteo 6:12, 19). Miakej itekipanojkauan toTajtsin Dios kichiaj yoltoskej nochipa itech Tlaltikpak tlen kikuepaskej se Xochitlali. Tla tikneki tiyoltos itech Tlaltikpak uelis san tikchixtok ma ajsiki non tonal. ¿Timokuayejyekoa ken timomachilis ijkuak timeuas ika yolpakilistli, amo itlaj mitstekipachos uan kuali tiyetos? (Isaías 35:5, 6). Ximokuayejyeko ken tiyetos iuan mokalchanejkauan uan moyolikniuan, uan noijki iuan akinmej kinyolitiskej (Juan 5:28, 29; Hechos 24:15). Noijki uelis tikmatis okachi miak tlamantli. Se neskayotl, tikmatis miak tlamantli itech nochi tlen okichijchi Jehová, uelis timomachtis itlaj titlatsotsonas noso noijki tikchijchiuas mokalijtik.

2 Pero okseki tlamantli noijki kichiuas ma tiyolpakikan. ¿Tlen tlamantli? Achto, nochtin tlaltikpaktlakamej kitlakaitaskej itoka toTajtsin Dios, Jehová, uan san ye  kitlakamatiskej (Mateo 6:9, 10). Ome, itech Tlaltikpak san yetoskej tlaltikpaktlakamej akinmej amo kipiaj tlajtlakoli, ijkon ken okinekiaya Jehová. Uan noijki ajachitsin ayakmo tikpiaskej tlajtlakoli uan okachi kuali timouikaskej iuan Jehová (Salmo 73:28; Santiago 4:8).

3. ¿Tleka moneki axkan ma timoyektlalikan?

3 Tikneltokaj Jehová kichiuas nochi tlen okijto. ¿Tleka? Pampa Biblia kijtoa “Dios nochi weleti kichiwa” (Mateo 19:25, 26). Tlatitlanil Pablo okijto ma timochijchikauakan pampa tikpiaskej yolilistli tlen amo keman tlamis. Ik non, ika tonemilis moneki ma tikteititikan tikneltokaj ayakmo miak poliui pampa ma tlami nochi tlen amo kuali. Tla tiknekij tiyetoskej itech Xochitlali moneki axkan ma timoyektlalikan. Ma tikitakan ken uelis ijkon tikchiuaskej.

¿KEN UELIS TIMOYEKTLALISKEJ?

4. Xikijto se neskayotl tlen kiteititis ken uelis timoyektlaliskej pampa tiyoltoskej itech Xochitlali.

4 ¿Axkan ken uelis timoyektlaliskej pampa tiyoltoskej itech Xochitlali? Ximokuayejyeko itech nin neskayotl. Ijkuak ikaj yas chantiti okse altepetl, ¿ken moyektlalia? Kichiua nochi tlamantli ken yiompa chantiskia. Se neskayotl, uelis peua tlajtoa ken kanin yas chantiti noso noijki peua kita tlen kichiuaj ompa. Noijki uelis peua tlakua ken akinmej ompa chantij. Noijki ijkon, uelis timoyektlaliskej ken tiyetoskiaj itech Xochitlali tla tikchiuaj nochi ken ompa tiyetoskiaj. Ma tikitakan seki tlamantli tlen uelis tikchiuaskej.

5, 6. ¿Tleka axkan moneki ma tiktlakamatikan ialtepe Jehová?

5 Axkan miakej tlaltikpaktlakamej kichiuaj ijkon ken kineki Satanás. Se neskayotl, miakej kijtoaj amo moneki tiktlakamatiskej toTajtsin Dios uan sejse uelis kichiuas tlen kinekis. ¿Tlen yopanok? Tlaltikpaktlakamej sapanoa tlajyouiaj uan amo yolpakij (Jeremías 10:23). Pero tejuan tikmatij Jehová ika miak tlasojtlalistli techyekana. Ik non, tiktlakamatij. Uan itech xochitlali nochtin okachi kuali yetoskej pampa nochtin kitlakamatiskej toTajtsin Dios.

6 Tla tiknekij timoyektlaliskej pampa tiyoltoskej itech Xochitlali, moneki axkan ma tiktlakamatikan nochi tlen kijtoa ialtepe Jehová. ¿Tleka? Pampa itech Xochitlali technauatiskej nochi Tlaltikpak ma tikkuepakan se Xochitlali, uan tikinpaleuiskej akinmej kinyolitiskej ma momachtikan itech Jehová. Tikpiaskej sapanoa miak tekitl. Ik non, ma timotlajtlanikan: “Tla ialtepe Jehová techiluia ma tikchiuakan itlaj tlen amo techpaktia, ¿titetlakamatiskej uan ika miak yolpakilistli tikchiuaskej?”.

7, 8. 1) ¿Tleka moneki tikpaleuiskej ialtepe Jehová axkan? 2) ¿Tlen okinmiluijkej sekimej tokniuan ma kichiuakan? 3) ¿Ken timomachiliskej itech xochitlali?

7 Amo san moneki tiktlakamatiskej ialtepe Jehová. Moneki ma tiyolpakikan ika tekitl tlen techmaka uan moneki ma titlapaleuikan. Se neskayotl, ijkuak ialtepe Jehová techmaka okse tekitl, ¿timochijchikauaj tikchiuaskej ika yolpakilistli? Tla axkan tikchiuaj nochi tlen kijtoa ialtepe Jehová, itech Xochitlali amo oui tikitaskej tiktlakamatiskej nochi tlen technauatiskej (xiktlajtolti  Hebreos 13:17). Ma timokuayejyekokan itech tlen okinpanok israelitas ijkuak oajsitoj itech Tlali tlen Jehová okijto Kinmakaskia. Amo okipejpenkej kanin chantiskiaj. Sejse okiluijkej kanin chantiskiaj (Números 26:52-56; Josué 14:1, 2). Noijki itech Xochitlali uelis amo tikpejpenaskej kanin tichantiskej. Pero tla axkan tikpaleuiaj ialtepe Jehová, tiyolpakiskej tiktekichiuiliskej Jehová maski san kanin tichantiskej.

8 Se ueyi tlateochiualistli tiktekichiuiliskej toTajtsin Dios ijkuak ye tlanauatijtos. Ik non, axkan ika yolpakilistli tikpaleuiaj ialtepe Jehová. Pero ualeua uelis oksekan techiluiskej ma tiktekichiuilikan Jehová. Se neskayotl, sekimej tokniuan akinmej otekitiayaj itech Betel itech ueyi altepetl Estados Unidos okinmiluijkej oksekan ma kitekichiuilikan Jehová. Uan sekimej tlayekankej itech circuito okinmiluijkej ma tekitikan ken precursores especiales pampa yikipiaj xiuitl noso itlaj okse tlamantli. Nochtin yolpakij itech tlen kichiuaj uan Jehová kinteochijtok. Tla tiknekij tiyolpakiskej uan tiknekij ma techteochiua Jehová, ¿tlen moneki ma tikchiuakan? Ma tiktlajtlanilikan Jehová ma techpaleui, moneki ma timochijchikauakan pampa tiktekichiuiliskej uan tiyolpakiskej ika san tlen tekitl techmakaskej (xiktlajtolti Proverbios 10:22). * ¿Uan tla itech xochitlali tiknekiskej tichantiskej kanin okachi techpaktis, pero techiluiskej ma tichantikan oksekan? Melauak amo techtekipachos kanin tichantiskej noso tlen tekitl tikchiuaskej. Tiktlasojkamatiliskej miak Jehová pampa otechkauili ma tiyetokan itech xochitlali (Nehemías 8:10).

Itech xochitlali monekis tikpiaskej toyelis ijkon ken Jehová techmachtia ma tikpiakan axkan

9, 10. 1) ¿Tleka monekis timochiaskej itech Xochitlali? 2) ¿Ken uelis tikteititiskej axkan tikmatij timochiaj?

9 Uelis itech xochitlali monekis timochiaskej. Se neskayotl, uelis tikitaskej ken miakej yolpakiskej ijkuak moyolitiskej inkalchanejkauan noso inyolikniuan. Uan monekis tikchiaskej ma kinyolitikan tokalchanejkauan noso toyolikniuan. Tla ijkon panos, ¿tiyolpakiskej iuan oksekimej uan timochiaskej? (Romanos 12:15). Tla tikmatij timochiaj axkan ijkuak Jehová kichiuas nochi tlen yokijto kichiuas, noijki uelis timochiaskej satepan (Eclesiastés 7:8).

10 Noijki uelis timoyektlaliskej pampa tiyetoskej itech xochitlali tla tikmatij timochiaj ijkuak mopatla se tlamachtil itech Biblia itech toamatlajkuiloluan. ¿Kuali timomachtiaj yankuik tlamachtilmej noso tlen mopatla itech toamatlajkuiloluan? ¿Tikmatij timochiaj tla amo kuali tikinajsikamatij? Tla tikmatij timochiaj axkan, itech xochitlali okachi amo oui timochiaskej ijkuak Jehová techmakas yankuik tlanauatilmej itech tlen tikchiuaskej (Proverbios 4:18; Juan 16:12).

11. ¿Tleka axkan moneki ma titetlapojpoluikan?

 11 Moneki tikintlapojpoluiskej oksekimej, ijkon noijki timoyektlaliaj pampa tiyetoskej itech xochitlali. Itech 1,000 xiuitl tlen tlanauatis Cristo tlajtlakoli poliuis ajachitsin uan noijki pampa akinmej kinyolitiskej (Hechos 24:15). ¿Tikteititiskej tlasojtlalistli uan tikintlapojpoluiskej oksekimej ijkuak kichiuaskej itlaj tlen amo kuali? Tla tikmatij titetlapojpoluiaj axkan, kuali timouikaskej iuan oksekimej itech xochitlali (xiktlajtolti Colosenses 3:12-14).

12. ¿Tleka moneki axkan tikpiaskej toyelis ijkon ken Jehová techmachtia ma tikpiakan?

12 Itech xochitlali monekis tikpiaskej toyelis ijkon ken Jehová techmachtia ma tikpiakan axkan. ¿Tleka? Uelis itech xochitlali amo tikpiaskej nochipa nochi tlen tiknekiskej. Uan monekis timochiaskej pampa tikpiaskej seki tlamantli. Moneki tiyolpaktoskej uan nochipa titetlasojkamatiskej maski san kanin tiyetoskej. Tla ijkon tikpiaj toyelis axkan, timoyektlaliaj pampa tiyetoskej itech xochitlali uan tikteititiaj melauak tiknekij tiyetoskej ompa kanin nochtin kitlakamatiskej Jehová (Hebreos 2:5; 11:1).

MA TIMOCHIJCHIKAUAKAN PAMPA TIKTEKICHIUILISKEJ JEHOVÁ

Xitetlapoui ika miak pakilistli

13. ¿Tlen okachi tikpatioitaskej itech xochitlali?

13 Itech xochitlali tikpiaskej nochi pampa tiyolpakiskej. Pero tlen okachi techyolpaktis timouikaskej iuan Jehová (Mateo 5:3). Okachi tikpatioitaskej tiktekichiuiliskej Jehová uan tiyolpakiskej miak ijkuak tikchiuaskej (Salmo 37:4). Ik non, tla tiknekij timoyektlaliskej pampa tiyetoskej itech xochitlali, axkan moneki okachi tikpatioitaskej tiktekichiuiliskej Jehová (xiktlajtolti Mateo 6:19-21).

14. ¿Tlen uelis mokuayejyekoskej telpokamej kichiuaskej?

14 ¿Ken uelis okachi tiyolpakiskej ijkuak  tiktekichiuiliaj Jehová? Moneki kuali timokuayejyekoskej tlen tikchiuaskej satepan. Tla titelpochtli, ximokuayejyeko ken uelis tiktekitiltis moyolilis pampa tiktekichiuilis Jehová. Uelis timokuayejyekos okachi tiktekichiuilis. Itech toamatlajkuiloluan uelis tikitas ken uelis tikchiuas. * Noijki uelis timotlapouis iuan tokniuan tlen yikipiaj miak xiuitl okachi kitekichiuilijtokej Jehová. Tla tiktekitiltia moyolilis pampa tiktekichiuilis Jehová, timomachtis miak tlamantli tlen mitsyektlalis pampa tiyetos itech xochitlali.

Ximokaua tlen tikchiuas

15. ¿Itech tlen uelis timokuayejyekoskej pampa tikchiuaskej satepan?

15 Nochtin uelis timokuayejyekoskej tlen tikchiuaskej satepan pampa okachi tiktekichiuiliskej Jehová. Se neskayotl, uelis timomachtiskej ken okachi kuali titetlapouiskej. Noijki uelis timomachtiskej ken tikintlakamatiskej tlanauatilmej tlen katej itech Biblia. Uan noijki uelis timoyektlaliskej pampa tiktlajtoltiskej itlaj kuali uan chikauak, kuali titlanankiliskej uan kuali timoyektlaliskej ijkuak tiktemakaskej se tlamachtil itech tlanechikol. Xikilnamiki tla kuali timokuayejyekoa tlen tikchiuas satepan, non mitspaleuis pampa tiktekichiuilis toTajtsin Dios ika miak yolchikaualistli uan ijkon timoyektlalis pampa tiyetos itech xochitlali.

Tla kuali timouikaj iuan Jehová techpaleuis miak itech tonemilis uan kichiuas ma tiyolpakikan

¿KEN UELIS TIYOLPAKIS AXKAN?

Xiktlasojkamatili Jehová nochi tlen techmaka

16. ¿Tleka tikmatij tiyolpakiskej miak tla tiktekichiuiliaj Jehová?

16 Tla axkan timoyektlaliskej pampa tiyetoskej itech xochitlali, ¿kijtosneki amo tiyolpakiskej itech toyolilis? Amo. Tla tiktekichiuiliskej Jehová tiyolpakiskej miak itech toyolilis. Amo tiktekichiuiliaj san pampa ikaj techiluia ijkon ma tikchiuakan, nion san pampa  tikneki timomakixtiskej. Tla kuali timouikaj iuan Jehová techpaleuis miak itech tonemilis uan kichiuas ma tiyolpakikan. Ijkon otechchijchi Jehová. Itlasojtlalis uan itlayekanalis okachi kipiaj ipati (xiktlajtolti Salmo 63:1-3). * Tla tikueyichiuaj Jehová ika nochi toyolo, tiyolpakiskej miak. Akinmej yiuejkika kitekichiuiliaj Jehová kuali kimatij okachi se yolpaki ijkuak tiktekichiuiliaj Jehová (Salmo 1:1-3; Isaías 58:13, 14).

Xikaua ma mitsyekana Biblia

17. ¿Uelis timoseuiskej uan tiyolpakiskej itech Xochitlali?

17 ¿Uelis timoseuiskej uan tiyolpakiskej itech Xochitlali? Kema. Jehová otechchijchi pampa ma tiyolpakikan. Uan ye yokijto techmakas nochi pampa tiyolpakiskej (Salmo 145:16; Eclesiastés 2:24). Pero moneki tikilnamikiskej okachi tiyolpakij tla kuali timouikaj iuan Jehová. Ik non, ma tikchiuakan ijkon axkan uan ma timokuayejyekokan itech tlamantli tlen techmaka toTajtsin Dios pampa tiktekichiuiliaj (Mateo 6:33).

18. ¿Ken timoyektlaliaj pampa tiyetoskej itech Xochitlali?

18 Itech Xochitlali, sapanoa tiyolpakiskej. Tla ompa tiknekij tiyetoskej moneki axkan timoyektlaliskej. ¿Ken uelis tikchiuaskej? Moneki tikpiaskej toyelis ijkon ken Jehová kineki uan ma titetlapouikan ika miak pakilistli. Ma tiktekichiuilikan Jehová ika nochi tochikaualis uan ma tiyolpakikan. Kuali tikmatij itech Xochitlali Jehová kichiuas nochi tlen yokijto. Ik non, ma tinemikan ken tiyetoskiaj ompa.

^ párr. 8 Proverbios 10:22 kijtoa: “Itlateochiualis Jehová non tlen okachi tlapaleuia, uan ye amo tetlajyouiltia”.

^ párr. 16 Salmo 63:1-3 kijtoa: “Oh Dios, te tinoDios, ne nimitstemojtok. Motech niamiki. Motech amo nichikauak itech tlali kanin tlauaki, kanin amo onka atl. Ijkon onimitsitak kanin santo; ijkuak onikitak mochikaualis uan moueyilis. Pampa motlasojtlalis okachi kuali uan amo ken toyolilis, nokamak mitsueyichiuas”.