Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto de 2015

Amo xikilkaua ¡Jehová mitstlasojtla!

Amo xikilkaua ¡Jehová mitstlasojtla!

“Nimokuayejyekos itech nochi tekitl tlen tikchiua.” (SALMO 77:12)

TLAKUIKALMEJ: 18 UAN 29

1, 2. 1) ¿Tleka tikneltoka Jehová kintlasojtla itekipanojkauan? 2) ¿Tlen tiknekij nochtin tlaltikpaktlakamej?

JEHOVÁ sapanoa kintlasojtla itekipanojkauan. Ma tikitakan seki neskayomej. Se tokni tlen itoka Taylene, nochipa okinekiaya kuali kichiuas nochi, ik non, omoyolkokoaya. Pero miak xiuitl tokniuan okiyolchikauaya ika tlasojtlalistli pampa ayakmo ijkon ma momachili. Tokni kijtoa: “Tla Jehová amo nechtlasojtlaskia, amo nechyolchikauaskia nion nechnojnotsaskia”. Okse tokni tlen itoka Brigitte kipia ome ikoneuan pero inamik omikik. Ye kijtoa axkan tetajmej sapanoa oui kinmiskaltiskej inkoneuan. Okachi tetajmej tlen inselti katej. Pero nin tokni kuali kimati Jehová kitlasojtla uan nochipa kipaleuia pampa amo ma tlajyoui nion ma moyolkoko uan pampa uelis tlaxikos (1 Corintios 10:13). Okse tokni tlen itoka Sandra kipia se kokolistli tlen amo ueli pajti. Itech se ueyi nechikol, se tokni siuatl omotoki inauak pampa iuan motlapouis uan kitlajpalos. Inamik Sandra oyolpakik miak ijkuak okitak. Ye kijtoa kimachilia  Jehová kitlasojtla ijkuak kinmita ken tetlasojtlaj tokniuan.

2 Jehová otechchijchi pampa titetlasojtlaskej uan tiknekiskej ma techtlasojtlakan. Pero ijkuak timokokoaj, ijkuak titlajyouiaj pampa amo tikpiaj tomin noso ijkuak amo techkaki ijkuak titetlapouiaj, uelis timosotlauaskej, uan noijki uelis timokuayejyekoskej Jehová ayakmo techtlasojtla. Tla ijkon techpanoa, moneki tikilnamikiskej ye totech motekipachoa uan kineki techpaleuis. Ye nochipa touan yetos tla tejuan tiyolmelajkej (Isaías 41:13; 49:15).

3. ¿Tlen techpaleuis pampa tikmatiskej Jehová melauak techtlasojtla?

3 Tokniuan tlen itech yotimotlapouijkej kuali kimatij Jehová okinpaleui ijkuak otlajyouijtokaj. Tejuan noijki moneki kuali tikmatoskej Jehová kineki techpaleuis (Salmo 118:6, 7). Tla timokuayejyekoaj itech nochi tlen ye techmaka, tikmatiskej melauak techtlasojtla (xiktlajtolti Salmo 77:11, 12). * Axkan tikitaskej naui tlamantli tlen kiteititia Jehová melauak techtlasojtla uan ken uelis tiktlasojkamatiliskej: 1) nochi tlen okichijchi, 2) Biblia, 3) tlatlaujtilistli uan 4) tlaxtlauili (xikita recuadro tlen itoka “¿Tlen kijtosneki?”).

Ijkuak tikitaj nochi tlen Jehová okichijchi tikajsikamatij sapanoa techtlasojtla

XIMOKUAYEJYEKO ITECH NOCHI TLEN JEHOVÁ OKICHIJCHI

4. Ijkuak tikitaj nochi tlen Jehová okichijchi, ¿tlen tikajsikamatij?

4 Ijkuak tikitaj nochi tlen Jehová okichijchi, tikajsikamatij sapanoa techtlasojtla (Romanos 1:20). Se neskayotl, ye otechmakak Tlaltikpak uan nochi tlen moneki pampa ma tiyolpakikan. Noijki, techmaka tlatlamantli tlakuali pampa uelis tiyolpakiskej ijkuak tikkuaskej (Eclesiastés 9:7). Se tokni tlen itoka Catherine akin chanti itech ueyi altepetl Canadá, kijtoa: “Nechpaktia miak ijkuak oksepa peua tlaxochiti, ijkuak ayakmo seua uan totomej mokuepaj uan ijkuak oksepa peua kisaj xochimej kuajkualtsitsintin. Ijkuak se uitsikitsin kikua tlen nikkajteuilia itech noventana tlen kajki kanin nitlakualchiua. Jehová sapanoa techtlasojtla, ik non, techmaka miak tlamantli kualtsin”. ToTajtsin Dios yolpaki ijkuak kita nochi tlen okichijchi uan kineki noijki tejuan ma tiyolpakikan ika nochi tlen ye okichijchi (Hechos 14:16, 17).

5. ¿Tlen okse tlamantli kiteititia Jehová melauak techtlasojtla?

5 Noijki ijkuak tikitaj ken Jehová otechchijchi, tikitaj melauak techtlasojtla. Ye otechchijchi pampa tiyolpakiskej ika tekitl tlen tikchiuaj (Eclesiastés 2:24). Otechmakak Tlaltikpak pampa itech tichantiskej, titlatokaskej uan tikinmaluiskej yolkamej (Génesis 1:26-28). Noijki, otechchijchi pampa uelis tikpiaskej toyelis ken ye (Efesios 5:1).

ITLAJTOL TOTAJTSIN DIOS MIAK IPATI

6. ¿Tleka moneki tiktlasojkamatiskej pampa tikpiaj Biblia?

6 ToTajtsin Dios techtlasojtla miak, ik non, otechmakak Biblia. Moneki tiktlasojkamatiliskej nin tetliokolil tlen otechmakak. Ika Biblia okachi tikixmatij toTajtsin Dios uan tikmatij ken kinmita tlaltikpaktlakamej. Se neskayotl, Biblia techtlapouia ken Jehová okinmitaya israelitas maski yejuan okilkajkej. Salmo 78:38 kijtoa: “Ye oteiknomatki; ye onamechtlapojpoluiaya namotlajtlakol uan amo onamechixpolo. Nochipa amo okualaniaya uan amo okiteititiaya nochi ikualanilis”. Ijkuak timokuayejyekoaj itech nin tlaxelol techpaleuia ma tikneltokakan Jehová techtlasojtla miak uan totech motekipachoa maski titlajtlakolejkej (xiktlajtolti 1 Pedro 5:6, 7).

Ika Biblia okachi tikixmatij toTajtsin Dios uan tikmatij ken kinmita tlaltikpaktlakamej

7. ¿Tleka tikpatioitaj Biblia?

7 Tejuan sapanoa tikpatioitaj Biblia. ¿Tleka? Pampa Jehová techtlapouia ika Biblia. Ijkuak se teta uan ikone kuali motlapouiaj, okachi motlasojtlaj uan okachi kuali mouikaj. Jehová ye toTajtsin Dios tlen techtlasojtla. Uan maski amo ueli tikitaj nion tikkakij, ye techtlapouia ika Biblia. Ik non, ijkuak tiktlajtoltiskej moneki kuali ma tikkakikan tlen techiluia (Isaías 30:20, 21). Ijkon tikmatiskej Jehová melauak kineki techyekanas uan techmaluis. Uan ijkon okachi tikixmatiskej uan okachi itech titlaneltokaskej (Salmo 19:7-11; xiktlajtolti Proverbios 1:33). *

Jehú okinojnotski Jehosafat pero noijki okilui Jehová okitak okichi tlamantli tlen kuali (Xikinmita párrafos 8 uan 9)

8, 9. 1) ¿Tlen kineki Jehová ma tikmatikan? 2) Xikijto se neskayotl tlen kiteititia Jehová amo san kinmita totlajtlakoluan.

8 Jehová kineki ma tikmatikan ye techtlasojtla, ik non, amo san kinmita totlajtlakoluan, ye kita nochi tlamantli kuali tlen tikchiuaj (2 Crónicas 16:9). Ma tikitakan ineskayo se tekiua itech Judá tlen omotokayotiaya Jehosafat. Ye amo kuali okichi pampa omosetili iuan ueyi tekiua Acab akin otlanauatiaya itech Israel, ijkuak moteuiskiaj iuan sirios. 400 tlakamej tlen amo melauak okatkaj teotlajtojkej okiluijkej Acab tlatlaniskia. Pero se tlakatl tlen melauak okatka teotlajtojki tlen omotokayotiaya Micaya okinmilui Jehosafat uan Acab tla moteuiskia, amo tlatlaniskia. Uan ijkon opanok. Acab omikik itech non guerra uan Jehosafat noijki ompa yimikiskia. Ijkuakon, Jehová okititlanki Jehú ma kilui Jehosafat amo kuali tlen okichi. Pero noijki okinauati ma kilui okipiaya tlamantli tlen kuali (2 Crónicas 18:4, 5, 18-22, 33, 34; 19:1-3).

9 ¿Tlen tlamantli kuali okichi tekiua Jehosafat? Seki xiuitl achto, okinnauati tekiuajkej, levitas uan teopixkej ma kinmachtikan itlanauatiluan toTajtsin Dios nochtin akinmej ochantiayaj itech altepetl Judá. Nin tlamantli tlen okichi sapanoa kuali, pampa oksekimej tlaltikpaktlakamej akinmej ochantiayaj itech okseki altepemej noijki okixmatkej Jehová (2 Crónicas 17:3-10). Maski satepan Jehosafat amo kuali okichi, Jehová amo okilka nochi tlamantli kuali tlen ye okichi. ¿Tlen techmachtia nin neskayotl? Maski tinochtin titlajtlakolejkej, moneki timochijchikauaskej tiktekichiuiliskej Jehová, ijkon ye techtlasojtlas uan amo kilkauas nochi tlamantli kuali tlen otikchijkej.

MA TIKPATIOITAKAN TLATLAUJTILISTLI

10, 11. 1) ¿Tleka tlatlaujtilistli se tetliokolil tlen techmaka Jehová? 2) ¿Ken uelis technankilis toTajtsin Dios? (Xikita tlaixkopinal tlen ika peua tlamachtil.)

10 ¿Tlen kichiua se teta ijkuak se ikone kineki iuan motlapouis? Ken motekipachoa itech ikone, ye kixeloa kauitl pampa kikakis uan kimatis tlen kimachilia. Jehová ye toTajtsin Dios, ye totech motekipachoa. Ik non, ijkuak timotlatlaujtiaj, ye kuali techkaki. Melauak, se ueyi tlateochiualistli timotlapouiskej iuan Jehová.

11 Tlatlaujtilistli se tetliokolil tlen techmaka Jehová. ¿Tleka? Pampa ijkon nochipa uelis iuan timotlapouiskej, ijkuak tiknekiskej. Ye toyolikni uan nochipa kineki techkakis. Tokni Taylene tlen itech  otimotlapouijkej ijkuak otipejkej nin tlamachtil, kijtoa: “Uelis tikiluiskej san tlen tiknekiskej”. Ijkuak tikiluiaj Jehová nochi tlen tikmachiliaj, ye uelis technankilis ika se tlaxelol itech Biblia, ika se amatlajkuilol noso ika se tokni pampa ma techyolchikaua. Jehová techkaki uan kimati ken timomachiliaj. Ijkuak kinankilia totlatlaujtiluan kiteititia techtlasojtla miak.

12. ¿Tleka miak ipati ma timomachtikan tlatlaujtilmej tlen ijkuilitokej itech Biblia? Xikijto seki tlatlaujtilmej tlen ijkuilitokej itech Biblia.

12 Tlatlaujtilmej tlen ijkuilitokej itech Biblia techmachtiaj miak tlamantli. Ik non, kuali tla timomachtiskej itech ninmej tlatlaujtilmej ijkuak tikueyichiuaskej Jehová ken kalchanejkej. Se neskayotl, uelis timomachtiskej itech tlatlaujtilistli tlen okichi Jonás ika miak yolyamanilistli ijkuak okatka ijtik ueyi michin (Jonás 1:17–2:10). Noijki uelis timomachtiskej itech tlatlaujtilistli tlen okichi tekiua Salomón ijkuak otlanki okichijchijkej teokali (1 Reyes 8:22-53). Uan uelis timomachtiskej itech tlatlaujtilistli tlen otechmachti Jesús (Mateo 6:9-13). Tla kuali timokuayejyekoaj itech tlatlaujtilmej tlen axkan yotikijtojkej, okachi kuali timotlatlaujtiskej. Noijki, amo ma tikilkauakan moneki timotlatlaujtiskej mojmostla. Tla ijkon tikchiuaj, “iyolsewilis Dios, non amaka weleti kajsikamati” kimaluis tokuayejyekol uan toyolo. Tla nochipa timotlatlaujtiaj, ijkon okachi tiktlasojkamatiliskej itlasojtlalis Jehová (Filipenses 4:6, 7).

MA TIKTLASOJKAMATIKAN TLAXTLAUILI

13. ¿Tlen techkauilia ma tikchiuakan tlaxtlauili?

13 Jehová okiteititi miak tlasojtlalistli ijkuak okitemakak tlaxtlauili. Ye otechmakak nin tetliokolil “para matikpiakah yolílistli” (1 Juan 4:9). Tlatitlanil Pablo okijto: “Mach aka kinekis motekawilis makimiktikah ipatka ok se tlakatl; maya mayeto de milajka kuali tlakatl”. Uan satepan okijto ken toTajtsin Dios sapanoa techtlasojtla, ik non, okiualtitlanki iKone akin omikik topampa, “maya otikatkah titlajtlakolejkeh” (Romanos 5:6-8). Tlaxtlauili techkauilia ma tiyetokan tiiyolikniuan Jehová uan ika nin okiteititi sapanoa techtlasojtla.

Jehová techkaki uan kimati ken timomachiliaj

14, 15. 1) Tlapejpenalmej, ¿ken kinpaleuia tlaxtlauili? 2) Akinmej mokauaskej Tlaltikpak, ¿ken kinpaleuia tlaxtlauili?

14 ¿Ken kinpaleuia tlapejpenalmej tlaxtlauili? Yejuan akinmej kichiuaj ken Cristo kitaj Jehová melauak kintlasojtla (Juan 1:12, 13; 3:5-7). ToTajtsin Dios ika iespíritu santo okinpejpenki uan axkan yejuan ikoneuan (Romanos 8:15, 16). Tlatitlanil Pablo okijto: “Dios noiwa otechyoliti sansikah iwan Cristo Jesús, iwa otechyayanti iwan Ye, kan ilwikak” (Efesios 2:6). Tla sekimej ok yoltokej, ¿tleka tlatitlanil Pablo okijto “otechyoliti”? Pampa nochtin yejuan kichiaj yetoskej iluikak, pampa non chialistli tlen okinmakak toTajtsin Dios (Efesios 1:13, 14; Colosenses 1:5).

15 Uan akinmej mokauaskej Tlaltikpak, ¿ken kinpaleuia tlaxtlauili? Tla tlaneltokaj itech tlaxtlauili, yejuan uelis  mouikaskej iuan toTajtsin Dios. Noijki, toTajtsin Dios uelis kinselis ken ikoneuan uan uelis yoltoskej nochipa nikan Tlaltikpak. Ika tlaxtlauili, Jehová kiteititia techtlasojtla tinochtin (Juan 3:16). Tiyolpakij tikmatiskej tla amo tikkauaj Jehová, ye kichiuas ma tiyoltokan nochipa itech Xochitlali. Ika tlaxtlauili Jehová okachi okiteititi itlasojtlalis. Ik non, ma tiktlasojkamatilikan ika nochi toyolo.

Ika tlaxtlauili, Jehová kiteititia techtlasojtla tinochtin

XIKTEITITI TIKTLASOJTLA JEHOVÁ

16. ¿Tleka moneki ma timokuayejyekokan ken Jehová techtlasojtla?

16 Jehová tlatlamantli techititia techtlasojtla. Ueyi tekiua David okijto tlen kichiua Jehová sapanoa ueyi uan sapanoa miak tlamantli kuali kichiua, sapanoa miak amo ken xali tlen onka itech ueyi atl (Salmo 139:17, 18). Tla timokuayejyekoaj itech nochi tlamantli kuali tlen Jehová techmaka pampa techtlasojtla, okachi tiktlasojtlaskej uan okachi kuali tiktekichiuiliskej.

17, 18. ¿Ken uelis tikteititiskej tiktlasojtlaj Jehová?

17 ¿Ken uelis tikteititiskej tiktlasojtlaj Jehová? Tla timochijchikauaj titetlapouiaj itech iTekiuajkayo (Mateo 24:14; 28:19, 20). Noijki uelis tikchiuaskej tla tiyolmelajkej ijkuak titlajyouiaj pampa kiyejyekoaj totlaneltokilis (xiktlajtolti Salmo 84:11; Santiago 1:2-5.) * Maski sapanoa titlajyouijtoskej, Jehová kimati tlen techpanotok uan techpaleuis pampa ye techtlasojtla (Salmo 56:8).

18 Axkan otimomachtijkej okseki tlamantli ken uelis tikteititiskej melauak tiktlasojtlaj Jehová. Achto, moneki ma timokuayejyekokan itech nochi tlen okichijchi. Ome, moneki timomachtiskej Biblia. Eyi, moneki tiktlatlaujtiskej Jehová pampa okachi kuali iuan ma timouikakan. Naui, moneki timokuayejyekoskej itech tlaxtlauili (1 Juan 2:1, 2). Tla ijkon tikchiuaj, Jehová okachi techtlasojtlas uan tejuan noijki mojmostla okachi tiktlasojtlaskej.

^ párr. 3 Salmo 77:11 uan 12 kijtoa: “Nikilnamikis iteki Jah; nikilnamikis nochi tlamantli tlen tetlajtlachialtia tlen yiuejkika otikchi. Uan nimokuayejyekos itech nochi tekitl tlen tikchiua uan nimokuayejyekos itech ken tikchiua”.

^ párr. 7 Proverbios 1:33 kijtoa: “Pero akin nechkakis kuali yetos uan amo kitekipachos ouijkayotl”.

^ párr. 17 Salmo 84:11 kijtoa: “Pampa toTajtsin Jehová se To­nal­tsin uan tlen ika timopaleuiaj; tlapaleuia uan kitemaka ueyichiualistli. Jehová kinmakas nochi tlen kuali akinmej nemij ika inyolo ajsitok.