Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2015

Ximochijchikaua pampa itech tlanechikol ma yeto yolseuilistli

Ximochijchikaua pampa itech tlanechikol ma yeto yolseuilistli

“Nikueyichiuas kanin katej nokxiuan.” (ISAÍAS 60:13)

TLAKUIKALMEJ 28 UAN 136

1, 2. Itech Escrituras Hebreas, ¿tlen kijtosneki kanin kinseuia iikxiuan?

ITECH Isaías 66:1 Jehová okijto iluikak ken kanin motlalia ken ueyi Tekiua uan Tlaltikpak kanin kinseuia iikxiuan. Uan itech Isaías 60:13 okijto: “Nikueyichiuas kanin katej nokxiuan”. ¿Ken uelis kichiuas ma yeto kualtsin kanin kinseuia iikxiuan? ¿Uan tlen kijtosneki pampa akinmej tikatej itech Tlaltikpak?

2 Itech Escrituras Hebreas, tlajtoli kanin kinseuia iikxiuan noijki motekitiltia pampa teokali tlen okatka itech altepetl Israel (1 Crónicas 28:2; Salmo 132:7). Jehová okitaya sapanoa kuajkualtsin teokali, pampa ompa tlaltikpaktlakamej uelis kiueyichiuaskiaj.

3. 1) ¿Axkan tlen ika ueli tikueyichiuaj Jehová? 2) ¿Keman opejki teokali espiritual?

3 ¿Axkan tlen ika tikueyichiuaj Jehová? Amo tikchiuaj itech se kali, ken teokali. Axkan tikchiuaj itech “teokali espiritual”, nin okachi kuali kiueyichiua Jehová. ¿Tlen  kijtosneki? Tlamantli tlen toTajtsin Dios okitlali pampa tlaltikpaktlakamej ma tikueyichiuakan uan iuan ma timouikakan. Uan nin omochi pampa Jesús omikik uan ijkon otechmakixti. ¿Keman opejki teokali espiritual? Itech xiuitl 29, ijkuak Jesús omoapolakti uan Jehová okipejpenki ken ueyi teopixki pampa ma tekiti itech iteokali espiritual (Hebreos 9:11, 12).

4, 5. 1) Ijkon ken kijtoa Salmo 99:3, ¿tlen moneki ma kichiuakan itekipanojkauan Jehová? 2) ¿Tlen moneki ma timotlajtlanikan?

4 Tiktlasojkamatiliaj Jehová pampa otechmakak nin tlamantli pampa ma tikueyichiuakan. ¿Ken tiktlasojkamatiliaj? Ijkuak tikinmiluiaj oksekimej toTajtsin Dios itoka Jehová uan ye okiualtitlanki ikone ma mikiki pampa nochtin tejuan. Tiyolpakij tikmatiskej kanaj ocho millones iTlaixpantijkauan Jehová mojmostla kiueyichiuaj. Oksekimej tlaltikpaktlakamej kineltokaj ijkuak mikiskej yaskej iluikak uan ijkuakon kiueyichiuaskej toTajtsin Dios. Pero tejuan tikmatij amo melauak. Tikmatij axkan moneki ma tikueyichiuakan.

5 Uan ijkuak tikueyichiuaj, tikchijtokej ken itekipanojkauan tlen yiuejkika okitekichiuilijkej (xiktlajtolti Salmo 99:3). * Miakej itekipanojkauan ken Moisés, Aarón uan Samuel okiueyichijkej toTajtsin Dios ken ye okijto (Salmo 99:6, 7). Axkan ome nechikolmej san sekan kiueyichiuaj Jehová. Achto, tlapejpenalmej, achto yaskej iluikak pampa mochiuaskej teopixkej iuan Jesús, yejuan tekitij itech teokali espiritual tlen kajki Tlaltikpak. Ome, nochtin akinmej mokauaskej itech Tlaltikpak tlen kinpaleuiaj tlapejpenalmej (Juan 10:16). Pero sejse moneki motlajtlanis: “¿Nikueyichijtok Jehová ijkon ken ye kijtoa?”.

¿AKINMEJ TEKITIJ ITECH TEOKALI ESPIRITUAL?

6, 7. 1) ¿Tlen opanok seki xiuitl satepan opejki tlanechikol? 2) ¿Tlen opanok itech xiuitl 1919?

6 Tlatitlanil Pablo okijto sekimej ayakmo tlaneltokaskiaj tlen melauak uan peuaskia tlamachtiskiaj tlen amo melauak (Hechos 20:28-30; 2 Tesalonicenses 2:3, 4). Uan nin opejki mochiua kanaj 100 xiuitl satepan okitlalijkej tlanechikol itech akinmej melauak kichiuaj ken Cristo. Ijkuakon okatka oui se kimatis akinmej melauak itekipanojkauan Jehová. Pero miak xiuitl satepan, Jehová okitekitilti Jesús pampa kiteititis akinmej okitekichiuilijtokaj itech teokali espiritual.

7 Itech xiuitl 1919 kuali omotak akinmej okitekichiuilijtokaj Jehová itech iteokali espiritual. Yejuan okipatlakej miak tlamantli pampa uelis kiueyichiuaskiaj Jehová ken ye kineki (Isaías 4:2, 3; Malaquías 3:1-4). Ijkuakon opejki mochiua tlen yiuejkika okitak tlatitlanil Pablo.

8, 9. ¿Tlen kijtosneki xochitlali tlen okitak tlatitlanil Pablo?

8 Jehová ika ichikaualis okichi tlatitlanil  Pablo ma kita itlaj tlen satepan mochiuaskia (xiktlajtolti 2 Corintios 12:1-4). Pablo okitak itlaj tlen okitokayoti “xochitlalpan”. ¿Tlen xochitlali? Uelis kijtosneki eyi tlamantli. Achto, xochitlali tlen ayakmo miak poliui yetos itech Tlaltikpak (Lucas 23:43). Ome, xochitlali espiritual chipauak tlen tikpiaskej itech Tlaltikpak. Uan eyi, “ixochitlalpa Dios” kijtosneki nochi tlateochiualismej tlen onka iluikak (Apocalipsis 2:7).

9 ¿Tleka tlatitlanil Pablo okijto okinkak tlajtolmej tlen amo uelis kijtoskia? Pampa ijkuakon amo omonekiaya kijtos nochi tlamantli kuali tlen okikak. Pero axkan iTlaixpantijkauan Jehová kema uelis tikintlapouiskej tlaltikpaktlakamej itech nochi tlamantli kuali tlen tikpiaj itech ialtepe Jehová.

10. ¿Xochitlali espiritual uan teokali espiritual san se tlamantli kijtosnekij?

10 Itech toamatlajkuiloluan miak uelta techiluiaj itech xochitlali espiritual. Pero ¿xochitlali espiritual uan teokali espiritual san se tlamantli kijtosneki? Amo. Ken otimomachtijkej, teokali espiritual kijtosneki tlen toTajtsin Dios okitlali pampa uelis tikueyichiuaskej. Pero xochitlali espiritual kijtosneki ken itech ialtepe Jehová tikpiaj yolseuilistli uan san sekan tikatej. Nin xochitlali techpaleuia ma tikitakan akinmej melauak kitekichiuiliaj Jehová itech teokali espiritual (Malaquías 3:18).

11. ¿Tlen tlateochiualistli tikpiaj axkan?

11 Tiyolpakij tikitaskej ken itech xiuitl 1919 Jehová okichi tlaltikpaktlakamej tlajtlakolejkej ma kimaluikan uan okachi ma kiueyitilikan uan ma kichikauakan xochitlali espiritual. ¿Titlapaleuijtok itech nin tekitl? ¿Tikpatioita tiktekichiuilis Jehová uan ijkon tikueyichiuas?

JEHOVÁ KICHIUA KUALTSIN MA YETO IALTEPE

12. ¿Tleka tikmatij yimochijtok tlen kijtoa Isaías 60:17? (Xikita tlaixkopinal tlen ika peua tlamachtil.)

12 Itech nochi xiuitl tlen yopanok ialtepe Jehová nikan ipan Tlaltikpak yokiyektlali miak tlamantli. Mochijtok ken okijto teotlajtojki Isaías (xiktlajtolti Isaías 60:17). * Tokniuan telpokamej uelis san kimatij tlen omopatlak pampa ikaj okintlapoui noso okitlajtoltijkej itech toamatlajkuiloluan. Pero katej miakej tokniuan tlen yiuejkika kitekichiuiliaj Jehová uan tlen okitakej nochi tlamantli tlen omopatlak. Yejuan kimatij toTajtsin Dios kitekitiltijtok toueyi Tekiua Jesús pampa ma kiyekana ialtepe. Tla tikinkakiskej tlen techiluiaj tokniuan yolmelajkej, okachi titlaneltokaskej itech Jehová.

Axkan moneki ma tikueyichiuakan Jehová

13. Ijkon ken kijtoa Salmo 48:12-14, ¿tlen moneki ma tikchiuakan?

 13 Tinochtin moneki tikintlapouiskej oksekimej itech ialtepe Jehová. Ken axkan onka miak tlamantli amo kuali, melauak se ueyi tlateochiualistli tiyetoskej itech xochitlali espiritual kanin onka yolseuilistli uan tikatej san sekan. Ik non, moneki tikintlapouiskej telpokamej uan ichpokamej itech xochitlali espiritual uan itech ialtepe Jehová (xiktlajtolti Salmo 48:12-14). *

14, 15. 1) ¿Tlen omopatlak satepan itech xiuitl 1970? 2) ¿Tleka sapanoa kuali nochi tlen yomopatlak itech ialtepe Jehová?

14 Miakej tokniuan tlen yiuejkika kitekichiuiliaj Jehová okitakej seki tlamantli tlen omopatlak pampa okachi kuali ma yeto ialtepe Jehová nikan itech Tlaltikpak. Se neskayotl, yiuejkika itech sejse tlanechikol okatka se tokni tlen okachi otlayekanaya, itech sejse kali kanin tekitij iTlaixpantijkauan Jehová okatka se tokni tlen okachi otlayekanaya, uan itech Nueva York san se tokni okiyekanaya Sociedad Watch Tower. Maski okatkaj oksekimej tokniuan yolmelajkej tlen noijki okinpaleuiayaj, san se tokni okijtoaya tlen mochiuas itech tlanechikol, itech kali kanin tekitij iTlaixpantijkauan Jehová uan itech kali tlen kajki  Nueva York. Pero nochi nin omopatlak satepan itech xiuitl 1970.

15 Nochi tlen yomopatlak itech ialtepe Jehová sapanoa kuali. ¿Tleka? Pampa nochi tlen yomopatlak omochi pampa axkan okachi kuali tikajsikamatij Biblia. Ialtepe Jehová kuali mopaleuia pampa axkan ayakmo san se tokni kijtoa tlen mochiuas. Axkan nochtin tlayekankej tlen Jehová okintlali uelis mopaleuiskej pampa kuali inyelis kipiaj (Proverbios 24:6; Efesios 4:8).

Jehová kinpaleuijtok nochtin tlaltikpaktlakamej (Xikinmita párrafos 16 uan 17)

16, 17. Itech nochi tlen yomopatlak axkan, ¿tlen okachi mitspaktia, uan tleka?

16 Ma tikitakan seki tlamantli tlen yomopatlak itech ialtepe Jehová. Ijkuak titetlapouiaj techpaktia tikintemakaskej amatlajkuilolmej tlen tlapaleuiaj. Noijki tiktekitiltiaj nochi tlen yankuik pampa titetlapouiskej. Ika jw.org miakej tlaltikpaktlakamej kiseliaj tlapaleuilistli. Nochi tlen yomopatlak kiteititia Jehová kintlasojtla tlaltikpaktlakamej uan intech motekipachoa.

Xochitlali espiritual kijtosneki itech ialtepe Jehová tikpiaj yolseuilistli uan san sekan tikatej

17 Noijki tikpatioitaj nochi tlen yomopatlak itech tonechikoluan pampa ijkon uelis timomachtiskej toselti noso iuan tokalchanejkauan. Uan tiktlasojkamati nochi tlen yomopatlak itech toueyi nechikoluan. ¡Sejse xiuitl okachi kualtsin mochiua! Noijki tiktlasojkamatiliaj Jehová nochi tlen timomachtiaj itech tlamachtilmej ika Biblia tlen tikinpiaj. Nochi tlen yomopatlak kiteititia Jehová kiyekana ialtepe uan kichiua okachi kuajkualtsin ma mota xochitlali espiritual.

 TLEN UELIS TIKCHIUASKEJ PAMPA KUALTSIN MA MOTA XOCHITLALI ESPIRITUAL TLEN TIKPIAJ

18, 19. ¿Tlen uelis tikchiuaskej pampa kualtsin ma mota xochitlali espiritual tlen tikpiaj?

18 Jehová techteochiua pampa titlapaleuiskej ma mota kualtsin xochitlali espiritual tlen tikpiaj. ¿Ken uelis tikchiuaskej? Ma titetlapouikan uan ma titlamachtikan ika Biblia ika miak yolchikaualistli. Ijkuak ikaj tikpaleuiaj ma mochiua itlaixpantijka Jehová, tikchiuaj okachi ma moskalti xochitlali espiritual tlen tikpiaj (Isaías 26:15; 54:2).

19 Ijkuak tikpiaj kuali toyelis tikchiuaj okachi kuajkualtsin ma mota xochitlali espiritual tlen tikpiaj. Ijkon miakej tlaltikpaktlakamej kinpaktis nin xochitlali espiritual. Ma timotlajtlanikan, ¿tleka miakej tlaltikpaktlakamej kinekij yetoskej itech ialtepe toTajtsin Dios uan okachi momachtiskej itech ye uan Jesús? Amo pampa tikmatij miak, kichiuaj pampa kuali tikpiaj toyelis.

Tejuatsin uelis titlapaleuis ma moskalti xochitlali espiritual (Xikinmita párrafos 18 uan 19)

20. Ijkon ken kijtoa Proverbios 14:35, ¿tlen moneki ma tikchiuakan?

20 Jehová uan Jesús melauak yolpakij ijkuak kitaj ken mota sapanoa kuajkualtsin xochitlali espiritual tlen tikpiaj. Uan tejuan tiyolpakij ijkuak titlapaleuiaj pampa kuajkualtsin ma mota. Pero okachi tiyolpakiskej ijkuak nochi Tlaltikpak mokuepas se xochitlali kanin tichantiskej. Proverbios 14:35 kijtoa: “Se ueyi tekiua moyolpaktia iuan se tlakeuali tlen kipia ixtlamatilistli”. Ik non, ma tiyetokan tiixtlamatkej uan ma timochijchikauakan pampa kualtsin ma mota xochitlali espiritual.

^ párr. 5 Salmo 99:3: “Ma kiueyichiuakan ueyi motoka, pampa sapanoa ueyititok uan chipauak”.

^ párr. 12 Isaías 60:17: “Ika oro nikpatlas cobre, uan ika plata nikpatlas tepostli, uan ika cobre nikpatlas kuauitl, uan ika tepostli nikpatlas tetl; uan yolseuilistli niktlalis pampa ma namechyekana uan melajkayotl pampa ma namechmaka tekitl”.

^ párr. 13 Salmo 48:12-14: “Xikyaualokan Sión, xiakan uan nochi xikyaualokan; xikinpouakan itorres. Xiktlalikan namoyolo itech itepauan. Kuali xikinmitakan intorres tlen ika momaluiaj, pampa ijkon uelis nankintlapouiskej itech nin tlamantli akinmej satepan yoltoskej. Pampa nin Dios nochipa yetos toDios. Ye nochipa techyekanas”.

Tiktlasojkamatilia Jehová nochi tlen techmachtia itech tlamachtilmej ika Biblia