Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2015

Nikan tikueyichiuaj toTajtsin Dios

Nikan tikueyichiuaj toTajtsin Dios

“Nikchawatilia mochantsi, kemi se tletl nechtlamia.” (JUAN 2:17)

TLAKUIKALMEJ 13 UAN 21

1, 2. 1) ¿Yiuejkika kanin okiueyichiuayaj toTajtsin Dios? 2) Jesús, ¿ken okitaya teokali? 3) ¿Tlen timomachtiskej axkan?

ITEKIPANOJKAUAN Jehová nochipa okipixkej kanin kiueyichiuaskiaj. Se neskayotl, uelis Abel okimakaya tlamanali Jehová itech se altar (Génesis 4:3, 4). Noé, Abrahán, Isaac, Jacob uan Moisés noijki okinchijchijkej altares (Génesis 8:20; 12:7; 26:25; 35:1; Éxodo 17:15). Noijki, Jehová okinmilui israelitas ma kichijchiuakan se mantajkali pampa kiueyichiuaskiaj (Éxodo 25:8). Satepan okinnauati ma kichijchiuakan teokali (1 Reyes 8:27, 29). Ijkuak israelitas okiskej itech Babilonia, opejkej monechikoaj itech sinagogas (Marcos 6:2; Juan 18:20; Hechos 15:21). Uan akinmej achto okichiuayaj ken Cristo omonechikoayaj itech kalmej (Hechos 12:12; 1 Corintios 16:19). Axkan tiiTlaixpantijkauan Jehová timonechikoaj itech miakej kalmej tlen tikinpiaj itech nochi Tlaltikpak.

2 Jesús sapanoa okitlakaitaya teokali tlen okatka Jerusalén. Ik non, Juan 2:17 kijtoa: “Ijkuakó, itlamachtijkawah okilnamikeh itech tiotlájtoli ijkuilitok: “Nikchawatilia mochantsi, kemi se tletl nechtlamia” (Salmo 69:9). Kalmej kanin timonechikoaj amo ikalijtik toTajtsin Dios ken teokali tlen okatka Jerusalén (2 Crónicas 5:13; 33:4). Pero moneki ma tikintlakaitakan,  pampa nikan tikueyichiuaj toTajtsin Dios. Axkan timomachtiskej tlen techiluia Biblia itech tlen moneki tikchiuaskej itech kali kanin timonechikoaj, ken uelis tikmaluiskej uan ken uelis titlapaleuiskej pampa ma kinchijchiuakan okachi kalmej. * (Xikita tlajtoli tlen kiualika tlakxitlan.)

MA TIKINTLAKAITAKAN NECHIKOLMEJ

3-5. 1) ¿Tlen tikchiuaj itech kalmej kanin timonechikoaj? 2) ¿Tleka miak ipati tonechikoluan?

3 Okachi tikueyichiuaj Jehová itech kalmej kanin timonechikoaj. Pampa nechikolmej se tetliokolil tlen techmaka Jehová. ¿Tleka? Pampa techpaleuiaj okachi ma timouikakan iuan Jehová. Uan noijki itech tonechikoluan ialtepe Jehová techyolchikaua uan techmachtia ijkuak okachi moneki. Nochi tlen techmachtiaj itech tonechikoluan tikitaj ken tlakuali tlen sejse semana techmakaj Jehová uan Jesús. Se ueyi tlateochiualistli pampa techyoleuaj ma titlakuakan itech “imesa n Toteko” (1 Corintios 10:21).

4 Itech Biblia Jehová techiluia moneki ma timonechikokan pampa ma tikueyichiuakan uan “matimosepanyolchikawakah” (xiktlajtolti Hebreos 10:24, 25). Nochipa timonechikoaj pampa tiktlakaitaj Jehová, san amo timonechikoaj ijkuak melauak itlaj amo techkauilia ma tikchiuakan. Uan ijkuak timoyektlaliaj pampa tonechikoluan tikteititiaj melauak tikinpatioitaj (Salmo 22:22).

5 Tiktlakaitaj toTajtsin Dios ijkuak kuali tikchiuaj itech kali kanin timonechikoaj uan tikmaluiaj. Ika tonemilis tiknekij oksekimej kuali ma tlajtokan itech Jehová, pampa nin tokayotl kajki itech miakej kalmej kanin timonechikoaj (xikita 1 Reyes 8:17).

6. ¿Tlen kijtoaj sekimej tlaltikpaktlakamej itech kalmej kanin timonechikoaj? (Xikita tlaixkopinal tlen ika peua tlamachtil.)

6 Tlaltikpaktlakamej kitaj sapanoa tikpatioitaj kali kanin timonechikoaj. Se neskayotl, se tlakatl tlen chanti itech ueyi altepetl Turquía okijto sapanoa omotlajtlachialti pampa kali kanin monechikoaj tokniuan sapanoa chipauak uan nochi kuali kajki. Noijki okitlajtlachialti pampa nochtin kuali omotlakentiayaj uan okitlajpaloayaj ika yolpakilistli. Nin tlakatl opejki monechikoa uan seki kauitl satepan omoapolakti. Itech se altepetl itech ueyi altepetl Indonesia tokniuan okichijchijkej se kali kanin monechikoskej. Tokniuan okinyolejkej akinmej ik ompa ochantiayaj, tekiua uan oksekimej ma kitakan nin kali. Tekiua omotlajtlachialti pampa ken kuali okichijchijkej kali uan xochitlali kualtsin okatka. Ye okijto melauak tikchiuaj tlen tikijtoaj pampa non kali okatka chipauak.

Itech Kali kanin timonechikoaj amo ma tikchiuakan tlamantli tlen kiteititis amo tiktlakaitaj Jehová (Xikinmita párrafos 7 uan 8)

7, 8. Itech kali kanin timonechikoaj, ¿ken tikteititiaj tiktlakaitaj Jehová?

7 Jehová techyoleua ma timonechikokan. Uan ye kita ken timotlakentiaj uan ken tonemilis ijkuak timonechikoaj. Ik non, amo tikintlaliskej tlanauatilmej itech tlen uelis noso amo tikchiuaskej itech kalmej kanin timonechikoaj. Pero noijki amo tikchiuaskej ken tiyetoskiaj itech tokalijtik. Jehová kineki tinochtin akinmej timonechikoaj kuali ma timomachilikan. Ik non, amo itlaj tikchiuaskej tlen kiteititis amo titetlakaitaj. Ik non, timochijchikauaj pampa kuali timotlakentiskej. Uan noijki ijkuak tikatej itech  tonechikoluan amo timotlapouiaj iuan oksekimej, amo tikintitlaniliaj mensajes, amo titlakuaj nion itlaj tikonij ijkuak timomachtijtokej. Uan noijki tetajmej kinmachtiaj inkoneuan amo ma motlalokan nion ma mauiltikan itech kali kanin timonechikoaj (Eclesiastés 3:1).

8 Timonechikoaj pampa ma techmachti Jehová uan ma tikueyichiuakan. Ik non, ijkuak timonechikoaj amo itlaj tikinnemakiltiaj tokniuan (xikita Nehemías 13:7, 8). Ma tikilnamikikan, ijkuak Jesús okinmitak itech teokali otlanemakayaj ye sapanoa okualanki uan okinkixti (Juan 2:13-17).

MA TITLAPALEUIKAN PAMPA MA MOCHIJCHIUAKAN OKSEKI KALMEJ

9, 10. 1) ¿Tlen kichiuaj iTlaixpantijkauan Jehová pampa ma mochijchiuakan okseki kalmej? 2) ¿Tlen yomochi? 3) ¿Tleka mochijchiuaj kalmej maski ualeua amo onka tomin?

9 Miakej tokniuan mochijchikauaj pampa ma mochijchiuakan okseki kalmej kanin timonechikoaj itech nochi Tlaltikpak. Yejuan kinamachijchiuaj, kinyektlaliaj uan kinchijchiuaj kalmej kanin timonechikoskej. Ijkon itech saiktlami 15 xiuitl sejse tonal omochijchijkej kanaj makuili kalmej. Ijkon yomochijchijkej kanaj 28,000 kalmej kanin timonechikoaj.

10 Biblia kijtoa akinmej kipiaj miak moneki kinpaleuiskej akinmej amo okachi kipiaj (xiktlajtolti 2 Corintios 8:13-15). Ik non, ialtepe Jehová kitekitiltia nochi tomin tlen tiktemakaj uan tlapaleuilistli tlen kitemakaj tokniuan pampa mochijchiuaskej okseki kalmej. ¿Tlen yomochi? yomochijchijkej miakej kualtsitsintin kalmej pampa monechikoskej tokniuan maski amo okipiayaj tomin pampa kinchijchiuaskej.

11. 1) ¿Tlen kijtoaj tokniuan pampa kipiaj se kali kanin monechikoskej? 2) ¿Tlen tikmachilia ijkuak timokuayejyekoa itech tokniuan?

11 Itech ueyi altepetl Costa Rica omochijchi se kali san itech chikueyi tonal. Tokniuan kijtoaj sapanoa okinekiayaj se kali kanin monechikoskej. Kitlasojkamatiliaj Jehová, ialtepe uan tokniuan. Sapanoa yolpakij uan kitlasojkamatiliaj Jehová pampa nin tetliokolil tlen okinmakak. Tinochtin tiyolpakij tikinmitaskej tokniuan kitlasojkamatiliaj Jehová pampa nochi tlen kinmaka. Uan tiknekij tokniuan itech nochi Tlaltikpak ma kipiakan se kali kanin monechikoskej. Jehová kiteochijtok tekitl pampa okachi ma mochijchiuakan kalmej. ¿Tleka? Pampa ijkuak mochijchiua se yankuik kali oksekimej tlaltikpaktlakamej peuaj monechikoaj pampa momachtiskej itech Jehová (Salmo 127:1).

12. ¿Ken uelis titlapaleuiskej pampa ma mochijchiuakan okseki kalmej?

12 ¿Ken uelis titlapaleuiskej pampa ma mochijchiuakan okseki kalmej? Sekimej  uelis tiaskej titlapaleuitiuij. Uan nochtin uelis tiktemakaskej tomin. Tla timochijchikauaj titlapaleuiskej, sapanoa tiyolpakiskej. Uan noijki tikueyichiuaskej Jehová, non tlen okachi ipati. Tiknekij tikchiuaskej ken oksekimej itekipanojkauan Jehová tlen techiluia Biblia. Ika miak yolpakilistli okitemakakej tomin pampa ma mochijchiua itlaj kanin uelis kiueyichiuaskiaj Jehová (Éxodo 25:2; 2 Corintios 9:7).

MA YETO CHIPAUAK KALI KANIN TIMONECHIKOAJ

13, 14. Ijkon ken kijtoa Biblia, ¿tleka moneki titlayektlaliskej kanin timonechikoaj uan ma yeto chipauak?

13 Jehová chipauak uan nochi kiyektlalia, uan kineki noijki ijkon ma tikchiuakan. Ik non, moneki ma titlayektlalikan itech kali kanin timonechikoaj uan noijki ma yeto chipauak (xiktlajtolti 1 Corintios 14:33, 40). Pampa tiyetoskej tichipauakej ken Jehová moneki ma timokuayejyekokan, ma tikchiuakan uan ma tikueyichiuakan ken kineki. Uan noijki moneki ma timaltikan pampa ma yeto chipauak totlalnakayo (Apocalipsis 19:8).

14 Tla chipauak kali kanin timonechikoaj, uelis tikinyoleuaskej oksekimej. Yejuan kitaskej melauak tiknekij tiyoltoskej itech Tlaltikpak tlen yetos chipauak. Noijki kitaskej tikueyichiuaj toTajtsin Dios tlen chipauak uan ayakmo miak poliui nochi Tlaltikpak kikuepas se kualtsin xochitlali (Isaías 6:1-3; Apocalipsis 11:18).

15, 16. 1) ¿Tleka ualeua oui pampa yetos chipauak kali kanin timonechikoaj? 2) ¿Tleka moneki ma yeto chipauak kali kanin timonechikoaj? 3) ¿Ken mochipaua kali kanin timonechikoaj? 4) ¿Tlen uelis tikchiuaskej nochtin?

15 Ualeua oui pampa yetos chipauak kali kanin timonechikoaj. ¿Tleka? Pampa miakej tlatlamantli mokuayejyekoaj itech ken moneki yetos chipauak. Sekimej chantij itech altepemej kanin onka miak tlali uan sokitl. Oksekimej amo kipiaj miak atl noso tlen ika tlachipauaskej. Uan ken tlatlamantli otimoskaltijkej tlatlamantli tikitaj tlachipaualistli. Pero maski san kanin tichantiskej noso maski san tlen mokuayejyekoskej tlaltikpaktlakamej tlen iuan  tichantij, moneki titlayektlaliskej uan titlachipauaskej itech kali kanin timonechikoaj. ¿Tleka? Pampa ompa tikueyichiuaj Jehová (Deuteronomio 23:14).

16 Tla tiknekij nochipa ma yeto chipauak kali kanin timonechikoaj, moneki kuali tikitaskej ken titlachipauaskej. Tlayekankej kijtoskej ken motlachipauas uan kitaskej tla tikpiaj nochi tlen ika titlachipauaskej. Noijki kinmiluiskej tokniuan ken uelis kuali kichipauaskej nochi. Seki tlamantli moneki tikchipauaskej ijkuak tlamis tonechikol, okseki tlamantli amo. Nochtin uelis titlapaleuiskej pampa ma yeto chipauak kali kanin timonechikoaj.

KUALI MA YETO KALI KANIN TIMONECHIKOAJ

17, 18. 1) ¿Tlen uelis timomachtiskej itech iTekipanojkauan Jehová tlen yiuejkika okatkaj? 2) ¿Tleka moneki nochipa kuali ma yeto kali kanin timonechikoaj?

17 Itekipanojkauan Jehová tlen yiuejkika okatkaj kuali okipiayaj teokali. Se neskayotl, tekiua Jehoás okinnauati teopixkej itech Judá ma kiyektlalikan teokali ika tomin tlen nochi altepetl okitemakak (2 Reyes 12:4, 5). Kanaj 200 xiuitl satepan, tekiua Josías noijki okitekitilti tomin tlen okitemakak altepetl pampa kiyektlalis teokali (2 Crónicas 34:9-11). ¿Tlen techmachtia nin neskayotl? Tejuan noijki uelis kuali tikpiaskej kali kanin timonechikoaj uan tikyektlaliskej tlen monekis.

18 Seki kalmej kanin tekitij iTlaixpantijkauan Jehová kitaj itech ueyi altepemej kanin tlayekanaj amo kuali katej sekimej kalmej kanin timonechikoaj nion tlen ompa tikpiaj. Ualeua ijkon panoa pampa amo kimatij ken kichiuaskej. Uan noijki pampa amo kipiaj tomin pampa tlayektlaliskej. Pero tla amo san niman tikyektlaliaj kali kanin timonechikoaj, okachi ijtlakauis. Uan akinmej kitaskej, totech amo kuali mokuayejyekoskej. Ik non, moneki timochijchikauaskej pampa kuali yetos kali kanin timonechikoaj. Ijkon tikueyichiuaj Jehová uan ijkon amo tikkauiltiskej tomin tlen tokniuan kitemakaj ika nochi inyolo.

Moneki kuali uan chipauak ma yeto kali kanin timonechikoaj (Xikinmita párrafos 16 uan 18)

19. ¿Axkan tlen tikchiuas pampa tikteititis melauak tiktlakaita kali kanin timonechikoaj?

19 Tlaxelolmej tlen axkan otimomachtijkej techpaleuiaj pampa tikintlakaitaskej kalmej kanin timonechikoaj. Ma tikilnamikikan nonmej kalmej amo inmiaxka se tlaltikpaktlakatl noso se tlanechikol, iaxkauan Jehová. Tla tiktlakaitaj Jehová, tiktlakaitaskej tonechikoluan uan kalmej kanin timonechikoaj. Noijki tiktemakaskej ika nochi toyolo tomin pampa ma mochijchiuakan okachi kalmej uan timochijchikauaskej pampa chipauakej uan kuali ma yetokan. Ik non, ma tikchiuakan ken Jesús uan ma tikteititikan melauak tiktlakaitaj kali kanin tikueyichiuaj Jehová (Juan 2:17).

^ párr. 2 Axkan timomachtiskej itech kalmej kanin timonechikoaj. Pero nin tlamachtil noijki techpaleuis pampa tikintlakaitaskej kalmej kanin tikchiuaj uejueyij nechikolmej maski san kanin timonechikoskej.