Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2015

Ma tikpaleuikan iTekiuajkayo toTajtsin Dios

Ma tikpaleuikan iTekiuajkayo toTajtsin Dios

“Yejwah noiwa ayakmó de nin tlaltíkpaktli.” (JUAN 17:16)

TLAKUIKALMEJ 18 UAN 54

1, 2. 1) ¿Tleka tiiTlaixpantijkauan Jehová amo timokajkalakiaj itech tlamantli tlen kinxeloa tlaltikpaktlakamej? (Xikita tlaixkopinal tlen ika peua tlamachtil.) 2) ¿Tlen mokuayejyekoaj miakej tlaltikpaktlakamej itech inmialtepe, tlen ompa kichiuaj uan itech akinmej mauiltiaj? 3) ¿Tlen panoa ijkuak tlaltikpaktlakamej mokuayejyekoaj okachi inpati?

AXKAN miakej tlaltikpaktlakamej amo mouikaj pampa tlatlamantli inmialtepe, inyelis uan tlatlamantli mokuayejyekoaj. Pero tiiTlaixpantijkauan Jehová amo timokajkalakiaj itech tlamantli tlen kinxeloa tlaltikpaktlakamej. ¿Tleka? Pampa tiktlasojtlaj Jehová uan tiktlakamatij (1 Juan 5:3). Maski tlatlamantli toaltepe, tiktlakamatij nochi tlen technauatia. Tejuan okachi tikpatioitaj tikpaleuiskej iTekiuajkayo Jehová (Mateo 6:33). Ik non, uelis tikijtoskej tejuan “ayakmó de nin tlaltíkpaktli” (xiktlajtolti Juan 17:11, 15, 16; Isaías 2:4).

2 Miakej tlaltikpaktlakamej mokuayejyekoaj inmialtepe uan tlen ompa kichiuaj okachi ipati uan kinchikoitaj oksekimej. Oksekimej sapanoa kipatioitaj akinmej mauiltiaj uan oksekimej amo. Ik non, miakej san moteuiaj uan hasta kinmiktiaj akinmej amo mokuayejyekoaj ken yejuan. Pero maski  tiiTlaixpantijkauan Jehová amo ijkon tikchiuaj, uelis techijtlakos uan noijki uelis kinmijtlakos tokalchanejkauan. Uelis ikaj techchiuilis itlaj amo kuali. Uan non techyolkokoa, pampa Jehová otechchijchi pampa tikmatiskej ijkuak itlaj kuali techchiuiliaj noso amo (Génesis 1:27; Deuteronomio 32:4). Ik non, ijkuak se tekiuajkayotl kichiua tlen amo kuali, uelis tiknekiskej amo kuali itech titlajtoskej. Ijkuakon, ¿uelis amo timokajkalakiskej itech tlen kichiuaj tlaltikpaktlakamej?

Amo timokuayejyekoaj seki tlamantli tlen kinauatia Satanás okachi kuali

3, 4. 1) ¿Tleka akinmej tikchiuaj ken Cristo amo timokajkalakiaj itech política nion tiauij guerras? 2) ¿Axkan tlen timomachtiskej?

3 Miakej tlaltikpaktlakamej mokajkalakiaj itech política pampa tekiuajkej kinmiluiaj ijkon ma kichiuakan. Pero akinmej melauak tikchiuaj ken Cristo amo timokajkalakiaj itech política nion tiauij guerras. ¿Tleka? Pampa tikchiuaj ken Jesús (Mateo 26:52). Amo timokuayejyekoaj seki tlamantli tlen kinauatia Satanás okachi kuali (2 Corintios 2:11). Ik non, amo timokajkalakiaj itech tlen kichiuaj tlaltikpaktlakamej (xiktlajtolti Juan 15:18, 19).

4 Ken tinochtin titlajtlakolejkej, uelis tikinchikoitaj oksekimej san pampa tlatlamantli motaj (Jeremías 17:9; Efesios 4:22-24). Itech nin tlamachtil tikitaskej ken uelis techpaleuis Biblia pampa amo tikinchikoitaskej oksekimej maski tlatlamantli motaj. Noijki timomachtiskej ken uelis tikinmitaskej oksekimej ken kinmitaj Jehová uan Jesús. Nin techpaleuis ma tiyetokan tiyolmelajkej uan ijkon tikpaleuiskej iTekiuajkayo toTajtsin Dios.

TEJUAN SAN TIKPALEUIAJ JEHOVÁ

5, 6. ¿Ken kinmita Jesús nochtin tlaltikpaktlakamej, uan tleka?

5 Ijkuak tiknekis timokajkalakis itech tlen kichiuaj tlaltikpaktlakamej, ximotlajtlani: “¿Tlen kichiuaskia Jesús?”. Ijkuak ye okatka nikan Tlaltikpak, tlaltikpaktlakamej itech Judea, Galilea uan Samaria amo omouikayaj. Se neskayotl, Judíos uan samaritanos nion omotlapouiayaj (Juan 4:9). Noijki fariseos uan saduceos nochipa san omoteuiayaj (Hechos 23:6-9). Judíos tlen omomachtijkej itlanauatil Moisés omomachiliayaj okachi inpati uan okinchikoitayaj akinmej amo omomachtijkej (Juan 7:49). Uan judíos okinkokoliayaj romanos uan akinmej okikololoayaj tomin (Mateo 9:11). Pero Jesús amo omokajkalaki. Ye nochipa okipaleuiaya tlen melauak itech Jehová uan okimatiaya Jehová okinpejpenki judíos pampa ma yetokan ialtepe. Pero amo keman okinmachti imachtijkauan ma momachilikan okachi inpati (Juan 4:22). Ye okinmachti ma kintlasojtlakan nochtin tlaltikpaktlakamej (Lucas 10:27).

Jehová uan Jesús amo mokuayejyekoaj sekimej tlen tlatlamantli inaltepe noso intlajtol okachi inpati

6 Jesús kuali kinmita nochtin tlaltikpaktlakamej. Amo kinpatioita san sekimej uan oksekimej amo. ¿Tleka? Pampa Jehová okinchijchi tlaltikpaktlakamej pampa ma kitemitikan nin Tlaltikpak  uan tlatlamantli ma motakan (Génesis 1:27, 28). Ik non, Jehová uan Jesús kinpatioitaj nochtin tlaltikpaktlakamej, uan amo mokuayejyekoaj sekimej tlen tlatlamantli inmialtepe noso intlajtol okachi inpati (Hechos 10:34, 35; Apocalipsis 7:9, 13, 14). Noijki ijkon moneki timokuayejyekoskej (Mateo 5:43-48).

7, 8. 1) Akinmej tikchiuaj ken Cristo, ¿akin tikpaleuiaj, uan tleka? 2) ¿Akin kichiuas ayakmo ma titlajyouikan?

7 Akinmej melauak tikchiuaj ken Cristo amo tikinpaleuiaj tekiuajkej tlen katej Tlaltikpak. San tikpaleuiaj iTekiuajkayo Jehová. ¿Tleka? Pampa kuali tikmatij san ye kinamiki tlanauatis. Itech xochitlali Edén Satanás okijto Jehová amo kuali tlanauatia. Uan ye mokuayejyekoa okachi kuali tlanauatia uan kineki tejuan ijkon ma timokuayejyekokan. Pero Jehová techkauilia sejse tejuan ma tikpejpenakan akin tiknekij ma technauati. Ik non, ximotlajtlani: “¿Niktlakamati Jehová pampa kuali nikmati san ye kinamiki tlanauatis? ¿Nikmatok san iTekiuajkayo toTajtsin Dios kiyektlalis nochi ouijkayotl? ¿Noso nimokuayejyekoa toselti uelis timonauatiskej uan kuali tiyetoskej tla amo techyekana toTajtsin Dios?” (Génesis 3:4, 5).

8 Se neskayotl, tla ikaj mitstlajtlania tlen timokuayejyekoa itech tekiuajkej noso itech ken tlanauatiaj, ¿tlen titlanankilis? Melauak sekimej tekiuajkej kinekij kinpaleuiskej tlaltikpaktlakamej. Pero moneki tikilnamikiskej san iTekiuajkayo Jehová uelis tlayektlalis uan tlanauatis ika melajkayotl. Ik non, tejuan san tikpaleuiaj Jehová. Tla amo ijkon tikchiuaskej, timoxeloskej itech tlanechikol.

9. 1) ¿Tlen ouijkayotl omochi itech tlanechikol tlen okatka Corinto? 2) ¿Tlen okinmilui Pablo?

9 Itech achto siglo, omochi se ouijkayotl itech tlanechikol tlen okatka itech altepetl Corinto. Sekimej okipaleuiayaj Pablo, oksekimej Apolos, oksekimej Cefas uan oksekimej Cristo. Ik non, ijkuak Pablo okimatki tlen opanotoka omotekipacho miak. Nin okatka se ueyi ouijkayotl pampa ijkon omoxelojtoka tlanechikol. Ik non, Pablo okinmilui: “Amo ximoxexelokah”. Noijki, okinmilui san sekan ma yetokan uan san se tlamantli ma mokuayejyekokan. Axkan moneki noijki ijkon tikchiuaskej. Amo keman ma timoxelokan itech tlanechikol (1 Corintios 1:10-13; xiktlajtolti Romanos 16:17, 18).

10. ¿Tlen otechmachti Pablo ijkuak okijto tlapejpenalmej okatkaj ipatka Jehová uan Jesús itech se altepetl?

10 Pablo okinmilnamikti tlapejpenalmej: “Pero tejwah, tocha kajki ilwikak”, uan okinmilui amo ma mokuayejyekokan itech tlamantli “tlan onka itech nin tlaltíkpaktli” (Filipenses 3:17-20). * (Xikita tlajtoli tlen kiualika tlakxitlan.) Noijki okinmilui tlapejpenalmej  okatkaj ken ipatka Jehová uan Jesús itech se altepetl. Ijkuak ikaj kajki itech se altepetl ipatka oksekimej, amo mokajkalakia itech ouijkayomej noso itech política tlen mochiua ompa. Noijki ijkon, tlapejpenalmej amo mokajkalakiaj itech ouijkayomej nion itech política nikan Tlaltikpak (2 Corintios 5:20). Akinmej kichiuaj ken Cristo tlen mokauaskej Tlaltikpak noijki amo mokajkalakiaj itech ouijkayotl tlen onka Tlaltikpak. Yejuan san kipaleuiaj iTekiuajkayo toTajtsin Dios.

MA TIKINMITAKAN OKSEKIMEJ KEN KINMITA JEHOVÁ

11, 12. 1) Tla tiknekij tikpaleuiskej iTekiuajkayo toTajtsin Dios, ¿tlen amo moneki timokuayejyekoskej? 2) ¿Ken okinmitaya se tokni sekimej tlaltikpaktlakamej? 3) ¿Tlen okipaleui ma kipatla ikuayejyekol?

11 Miakej tlaltikpaktlakamej san mouikaj iuan akinmej tlajtoaj intlajtol noso kichiuaj ken yejuan. Noijki moueyinekij pampa chantij itech se altepetl. Tejuan moneki timomaluiskej uan amo timokuayejyekoskej okachi topati uan amo ken oksekimej. Tla ijkon timokuayejyekoaj, moneki tikpatlaskej tokuayejyekol. Ijkon amo tikchiuaskej ken tlaltikpaktlakamej. ¿Tlen uelis techpaleuis pampa tikpatlaskej tokuayejyekol?

12 Ma tikitakan tlen okipanok tokni Mirjeta. * (Xikita tlajtoli tlen kiualika tlakxitlan.) Ye oneski itech se altepetl tlen omotokayotiaya Yugoslavia. Ompa okinkokoliayaj tlaltikpaktlakamej tlen ochantiayaj itech altepetl Serbia. Pero okajsikamatki Jehová amo kinmita sekimej okachi inpati uan oksekimej amo, uan Satanás kineki tlaltikpaktlakamej ma mokokolikan. Ik non, ye mochijchikaua kipatlas tlen mokuayejyekoa. Pero ijkuak opejki se Guerra itech non altepetl, Mirjeta opejki oksepa kinkokolia serbios. Amo okinekiaya kintlapouis itech kuali tlajtolmej. Ye kuali okimatiaya amo kuali tlen okichijtoka, ik non, okitlatlaujti Jehová ma kipaleui ma kipatla tlen mokuayejyekoa. Noijki okilui ma kipaleui pampa mochiuas precursora. Ye kijtoa tetlapouilistli sapanoa okipaleui. Uan axkan ayakmo ijkon mokuayejyekoa pampa ijkuak tetlapouia mochijchiua tetlasojtlas ken Jehová.

13. 1) ¿Tlen okipanok se tokni tlen itoka Zoila, uan tlen okichi? 2) ¿Tlen techmachtia tlen okipanok Zoila?

13 Se tokni siuatl tlen ochantiaya México tlen itoka Zoila ochantito Europa. Itech itlanechikol katej miakej tokniuan tlen uitsej itech América Latina. Ye kijtoa sekimej kipinatiaj ialtepe, tlen ompa kichiuaj uan tlakuikalmej tlen kikakij. Non okiyolkokoaya. Pero okitlatlaujti Jehová ayakmo ijkon momachilis. Tlen okipanok Zoila techmachtia ome tlamantli. Achto, uelis timoyolkokoskej noso tikualaniskej ijkuak ikaj amo kuali tlajtoa itech toaltepe. Ome, amo keman moneki ma tikijtokan noso ma tikchiuakan itlaj pampa tikteititiskej oksekimej okachi inpati uan oksekimej amo. Tejuan amo tiknekij tikinxeloskej itech tlanechikol noso san kanin tiyetoskej (Romanos 14:19; 2 Corintios 6:3).

Xiktlatlaujti Jehová ma mitspaleui pampa tikinmitas tlaltikpaktlakamej ken ye kinmita

14. ¿Tlen mitspaleuis xikinmita oksekimej ken kinmita Jehová?

14 TiiTlaixpantijkauan Jehová tiseititokej itech nochi Tlaltikpak. Ik non, amo keman moneki timokuayejyekoskej  se altepetl okachi ipati. Uelis tokalchanejkauan noso tlaltikpaktlakamej tlen iuan tikatej otechmachtijkej ma tiktlasojtlakan toaltepe. Uan uelis ok tikinchikoitaj akinmej uitsej itech okse altepetl, akinmej amo kichiuaj ken tejuan noso akinmej tlajtoaj okse tlajtoli. Tla ijkon mitspanotok, ¿tlen mitspaleuis xikpatla tlen timokuayejyekoa? Ximokuayejyeko ken kinmita Jehová tlaltikpaktlakamej tlen moueyinekij pampa okse ialtepe noso momachilia okachi inpati ken oksekimej. Ijkuak timomachtis moselti noso iuan mokalchanejkauan xiktemo tlamachtilmej tlen tlajtoaj itech non tlamantli. Uan xiktlatlaujti Jehová ma mitspaleui pampa tikinmitas tlaltikpaktlakamej ken ye kinmita (xiktlajtolti Romanos 12:2).

Tla tiknekij tiyetoskej tiyolmelajkej iixpan Jehová, moneki nochipa tiktlakamatiskej maski tlen techtoktiskej oksekimej (Xikinmita párrafos 15 uan 16)

15, 16. 1) ¿Tlen kichiuaj miakej ijkuak kitaj tejuan ayakmo tikchiuaj ken tlaltikpaktlakamej? 2) ¿Ken uelis tetajmej kinpaleuiskej inkoneuan ma yetokan yolmelajkej?

15 Ken tiktlakamatij Jehová, ualeua akinmej techitaj, tokalchanejkauan uan akinmej iuan titekitij noso timomachtiaj techitaj ayakmo tikchiuaj ken tlaltikpaktlakamej (1 Pedro 2:19). Jesús okijto sekimej techkokoliskej pampa ijkon tikchiuaj. Ma tikilnamikikan miakej itech yejuan amo itlaj kimatij itech iTekiuajkayo toTajtsin Dios. Ik non, amo kimatij tleka san tikpaleuiaj non tekiuajkayotl.

16 Tla tiknekij tiyetoskej yolmelajkej inauak Jehová. Moneki nochipa tiktlakamatiskej  maski tlen mokuayejyekoskej noso kijtoskej oksekimej (Daniel 3:16-18). Uelis akinmej okachi telpokamej okachi oui kitaj amo yetoskej ken oksekimej. Uelis sekimej momojtiaj amo kitlajpaloskej bandera noso amo kichiuaskej tlen kichiuaj tlaltikpaktlakamej ijkuak kilnamikij tlen okichijkej itech inmialtepe. Ik non, tetajmej moneki kinpaleuiskej inkoneuan pampa amo ma momojtikan kanin momachtiaj. ¿Ken uelis kinpaleuiskej? Ijkuak kiueyichiuaskej Jehová ken kalchanejkej uelis kinmiluiskej ken kita Jehová non tlamantli. Noijki uelis kinmachtiskej ken ika tlakaitalistli uelis kijtoskej tlen kineltokaj (Romanos 1:16). Uan tla moneki, uelis tetajmej motlapouiskej iuan akinmej kinmachtiaj inkoneuan pampa kinmiluiskej tlen kineltokaj.

XIYOLPAKI IKA NOCHI TLEN TLATLAMANTLI OKICHIJCHI JEHOVÁ

17. 1) ¿Tlen amo moneki timokuayejyekoskej? 2) ¿Tleka amo ipati ma tikijtokan okachi kuali tlen tejuan tikchiuaj?

17 Uelis okachi techpaktis tlakuali, tlajtoli uan tlen kichiuaj itech toaltepe. Pero amo moneki timokuayejyekoskej tlen techpaktia okachi kuali uan amo tlen kinpaktia oksekimej. ¿Tleka? Pampa Jehová okichijchi nochi tlatlamantli pampa ika timoyolpaktiskej (Salmo 104:24; Apocalipsis 4:11). Ik non, amo itlaj ipati ma tikijtokan okachi kuali tlen tejuan tikchiuaj.

Jehová kineki nochtin tlaltikpaktlakamej ma yoltokan nochipa

18. ¿Ken techpaleuia tla tikinmitaj oksekimej ken kinmita Jehová?

18 Jehová kineki tlatlamantli tlaltikpaktlakamej ma kixmatikan, ma kiueyichiuakan uan ma yoltokan nochipa (Juan 3:16; 1 Timoteo 2:3, 4). Ik non, moneki tikinkakiskej tokniuan. Uan tla kitlakamati Jehová moneki tikseliskej maski amo ijkon timokuayejyekoaj. Tla ijkon tikchiuaj, tiyolpakiskej uan tikpiaskej yolseuilistli iuan tokniuan. Ken tejuan san tikpaleuiaj Jehová uan iTekiuajkayo, amo timokajkalakiaj itech ouijkayomej tlen kipia nin Tlaltikpak nion timoueyinekij nion tikinchikoitaj oksekimej. Moneki tiktlasojkamatiliskej Jehová pampa ye techmachtia ma tiktlasojtlakan yolseuilistli uan amo ma timoueyinekikan. Timomachiliaj ken akin okijkuilo Salmo 133:1 kanin kijtoa: “¡Xikitakan! ¡Sapanoa kuali uan teyolpaktia san sekan ma yetokan tokniuan!”.

^ párr. 10 Sekimej akinmej okichiuayaj ken Cristo tlen okatkaj itech altepetl Filipos okinmitayaj ken romanos. Ik non, okachi okintlakaitayaj uan amo ken akinmej amo okinmitayaj ken romanos.

^ párr. 12 Otikinpatilijkej intoka.