Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2015

Ximochijchikaua pampa amo tikchiuas tlen amo kuali

Ximochijchikaua pampa amo tikchiuas tlen amo kuali

“Xikinchipawakah nomomawah [uan] ximoyolchipawakah.” (SANTIAGO 4:8)

1. ¿Tlen kineltokaj miakej tlaltikpaktlakamej?

AXKAN miakej amo kitlakaitaj tlanauatilmej tlen kitemaka toTajtsin Dios. Se neskayotl, miakej kineltokaj kuali motekaskej iuan akin amo innamik, noso motekaskej siuamej iuan siuamej uan tlakamej iuan tlakamej. Itech películas, amochmej uan tlakuikalmej motaj tlaltikpaktlakamej akinmej auilnemij (Salmo 12:8). Maski miakej sapanoa auilnemij, Jehová uelis techpaleuis pampa amo ma tiauilnemikan (xiktlajtolti 1 Tesalonicenses 4:3-5).

2, 3. 1) ¿Tleka moneki tikmaluiskej tlen timokuayejyekoaj? 2) ¿Tlen timomachtiskej axkan?

2 Tinochtin titlajtlakolejkej. Uan uelis techpaktia seki tlamantli amo kuali, ken yolkamej kinpaktia tlen ika kinkitskiaj. ¿Tlen uelis tikchiuaskej tla timokuayejyekoaj itlaj amo kuali? Moneki ayakmo ijkon timokuayejyekoskej. Tla amo tikchiuaj okachi tiknekiskej titlajtlakolchiuaskej. Uan tla uelis tikchiuaskej tlen amo kuali, san niman uelis tikchiuaskej  (xiktlajtolti Santiago 1:14, 15). Ik non, tla tiknekij tikyolpaktiskej Jehová, amo ma timokuayejyekokan tlen amo kuali.

3 Ken tikitaj, moneki tikmaluiskej tlen timokuayejyekoaj. Tla tikixtopeuaj tlen amo kuali, amo tiauilnemiskej uan ijkon amo titlajyouiskej (Gálatas 5:16). Itech nin tlamachtil tikitaskej eyi tlamantli tlen techpaleuis pampa amo tiknekiskej tikchiuaskej tlen amo kuali. Achto, timouikaj iuan Jehová. Ome, tlanojnotsalmej tlen techmaka Biblia. Eyi, tlapaleuilistli tlen techmakaj tokniuan tlen chikauak intlaneltokilis.

MA TIMOUIKAKAN IUAN JEHOVÁ

4. ¿Tleka miak ipati kuali ma timouikakan iuan toTajtsin Dios?

4 Biblia kijtoa akinmej kinekij mouikaskej iuan Jehová moneki ‘kinchipawaskej inmawah uan moyolchipawaskej’ (Santiago 4:8). Nin kijtosneki akinmej tiiyolikniuan toTajtsin Dios timokuayejyekoaj uan tikchiuaj tlen ye kipaktia. Ken iuan timouikaj amo itlaj tiknekij tikchiuaskej tlen uelis kiyolkokos. Ik non, timochijchikauaj pampa timokuayejyekoskej tlamantli chipauak (Salmo 24:3, 4; 51:6; Filipenses 4:8). Jehová kimati titlajtlakolejkej uan ualeua uelis timokuayejyekoskej tlamantli tlen amo kuali. Pero ken amo tiknekij tikyolkokoskej, timochijchikauaj pampa amo timokuayejyekoskej tlen amo kuali, uan san timokuayejyekoskej tlen kuali (Génesis 6:5, 6).

5, 6. ¿Tlen uelis mitspaleuis pampa amo tikchiuas tlen amo kuali?

5 Jehová uelis techpaleuis pampa amo ma timokuayejyekokan tlen amo kuali tla nochipa tiktlatlaujtiaj. Ye techmakas iespíritu santo uan chikaualistli pampa amo titlajtlakolchiuaskej. Ijkuak timotlatlaujtia uelis tikiluis san tikneki timokuayejyekos tlen kuali (Salmo 19:14). Noijki ika yolyamanilistli uelis tiktlajtlaniskej kox totech kita itlaj amo kuali tlen uelis kichiuas ma titlajtlakolchiuakan (Salmo 139:23, 24). Noijki uelis tikiluiskej ma techpaleui pampa amo ma tiauilnemikan uan okachi ijkuak panos itlaj tlen kichiuas ma tiknekikan tiauilnemiskej (Mateo 6:13).

6 Uelis ijkuak ayamo otikatkaj tiiTlaixpantijkauan Jehová otikchiuayaj tlen amo kuali. Uan uelis ualeua ok tiknekij tikchiuaskej tlen amo kuali. Pero Jehová uelis techpaleuis ken okichi iuan ueyi tekiua David. Ye omotekak iuan se siuatl tlen amo okatka isiua. Pero satepan omoyolkuepki uan okitlajtlanili Jehová ma kipaleui, ma kichipaua iyolo uan ma kipaleui pampa nochipa kitlakamatis (Salmo 51:10, 12). Ik non, tla timochijchikajtok pampa ayakmo tikchiuas tlen amo kuali, xiktlajtlanili Jehová ma mitspaleui. Ye mitspaleuis pampa san tiknekis tiktlakamatis uan ayakmo timokuayejyekos nion tikchiuas tlen amo kuali (Salmo 119:133).

Tla peua timokuayejyekoaj tlen amo kuali, moneki san niman tikkixtiskej (Xikita párrafo 6)

“XIKCHIWAKAH TLAN KIJTOA” TOTAJTSIN DIOS

7. ¿Ken techpaleuia Biblia?

7 Ika Biblia Jehová uelis kinankilis totlatlaujtiluan. Ompa tikajsij iixtlamatilis toTajtsin Dios tlen nochipa kichiua tlen kuali (Santiago 3:17). Tla mojmostla tiktlajtoltiaj Biblia, san timokuayejyekoskej tlamantli tlen kuali (Salmo 19:7, 11; 119:9, 11). Itech Biblia noijki tikajsij seki tlanojnotsalmej uan neskayomej tlen techmachtiaj moneki amo ma timokuayejyekokan tlen amo kuali.

8, 9. 1) Ijkon ken kijtoa Proverbios 7, ¿tleka se telpochtli okichi auilnemilistli iuan se siuatl tlen oauilnemiaya? 2) ¿Tlen tlamantli uelis kichiuas ma tiauilnemikan?

 8 Itech Proverbios 5:8 toTajtsin Dios techiluia ma ticholokan itech auilnemilistli. Itech Proverbios tlakotonal 7, tikajsij ineskayo se telpochtli tlen ijkuak yiyoak opaxialoto ik kanin ochantiaya se siuatl tlen oauilnemiaya. Nin siuatl omotlakenti pampa kinyoltilanas tlakamej. Ijkuak okitak telpochtli omotoki inauak uan okixpipitso uan opejki kiluia tlamantli tlen okichi iuan ma auilnemi. Ijkuak telpochtli okiski itech ikalijtik amo omokuayejyekoaya auilnemis. Pero ken amo okixtope tlen omokuayejyekoaya, oauilnenki. Uan otlajyoui miak, tla mokuayejyekoskia tlen kipanoskia, amo panoskia ik kanin okatka non siuatl (Proverbios 7:6-27).

9 Tejuan noijki uelis amo kuali tikpejpenaskej tla amo timokuayejyekoaj titlajyouiskej. Se neskayotl, tla tikatej yiyoak amo kuali san tikpatilijtoskej canales tlen kipia televisión. ¿Tleka? Pampa uelis tikajsiskej kanin auilnemij. Uan tla tikatej itech Internet amo kuali tikchiuaskej clic itech páginas tlen amo tikinmixmatij, noso tikalakiskej kanin mota auilnemilistli. Tla ijkon tikchiuaj tikitaskej tlamantli tlen kichiuas ma tiknekikan tikchiuaskej tlen amo kuali uan amo tiktlakamatiskej Jehová.

10. ¿Tlen amo moneki kichiuaskej tlakamej uan siuamej, uan tleka? (Xikita tlaixkopinal tlen ika peua tlamachtil.)

10 Biblia techiluia ken uelis mouikaskej  tlakamej uan siuamej (xiktlajtolti 1 Timoteo 5:2). Se iTlaixpantijka Jehová sapanoa kipatioita inamik. Uan akin yikin mokuayejyekoa monamiktis noijki ijkon kichiua. Sekimej kineltokaj tla se tlakatl uan se siuatl moixuetskiliaj, moixnotsaj noso nejnemij pampa oksekimej ma kinmitakan amo se tlajtlakoli tla amo mokitskiaj. Pero tla ok kichiuaj nin tlamantli uelis mokuayejyekoskej tlen amo kuali uan satepan auilnemiskej. Tejuan uelis ijkon techpanos pampa oksekimej ijkon yokinpanok.

11. ¿Tlen techmachtia ineskayo José?

11 José techmachtia miak tlamantli. Isiua Potifar okiyejyeko pampa iuan ma moteka. José okilui amo, pero ye mojmostla okiluiaya ma motekakan (Génesis 39:7, 8, 10). Se tlakatl ixtlamatki okijto isiua Potifar omokuayejyekoaya tla mokauaskia iselti iuan José uelis kinekiskia iuan motekas. Maski non siuatl kiixuetskiliskia, kiixnotsaskia uan okseki tlamantli kichiuaskia, José yokimatiaya tlen kichiuas. Ijkon amo omokuayejyeko tlen amo kuali. Se tonal non siuatl okikitski itlaken José uan okinekiaya kichiualtis iuan ma moteka. “Pero ye ocholo uan itlaken omoka ima siuatl” (Génesis 39:12).

12. ¿Ken uelis techijtlakos tlen tikitaj?

12 Tlen tikitaj uelis kichiuas ma tiknekikan ma tikchiuakan tlen amo kuali. Jesús okijto: “Nochi tlakatl non kelewia se siwatl non amo iaxka, kijtosneki yokimomekati itech iyolo” (Mateo 5:28). Non tlen okipanok ueyi tekiua David. Biblia kijtoa ijkuak okatka ipan ichan okitak se siuatl omaltijtoka (2 Samuel 11:2). Non siuatl yokipiaya inamik. David ompa omoka kitlatok uan opejki itech mokuayejyekoa uan satepan iuan oauilnenki.

13. 1) ¿Tleka miak ipati ma timokauakan tikchiuaskej itlaj iuan toixtololouan? 2) ¿Tlen kijtosneki non?

13 Noijki se kuali neskayotl tlen okichi Job. Ye okijto: “Yonimokuayejyeko nikchiuas itlaj iuan noixtololouan” (Job 31:1, 7, 9). Miak ipati ma tikchiuakan ken Job uan ma tikchiuakan itlaj iuan toixtololouan. ¿Tleka? Pampa nin uelis kichiuas amo ma timokuayejyekokan tlen amo kuali. ¿Tlen kijtosneki tikchiuaskej itlaj iuan toixtololouan? Kijtosneki amo ikaj tikitaskej ken tiknekiskiaj iuan tiauilnemiskej. Uan tla itech televisión, revista noso san kanin tinemiskej tikitaj kanin mota auilnemij, san niman moneki tikitaskej okse tlamantli.

14. ¿Tlen moneki ma tikchiuakan pampa amo tiauilnemiskej?

14 Ika nochi tlen yotimomachtijkej uelis tejuatsin tikita moneki tikpatlas seki tlamantli. Tla ijkon, moneki san niman xikyektlali tlen moneki. Tla tiktlakamatij Jehová, uelis amo titlajtlakolchiuaskej nion tiauilnemiskej (xiktlajtolti Santiago 1:21-25).

ITLAPALEUILIS TOKNIUAN TLEN CHIKAUAK INTLANELTOKILIS

15. ¿Tleka miak ipati xikinmilui tokniuan ma mitspaleuikan?

15 Tla tejuatsin tikita oui amo timokuayejyekos tlen amo kuali. Xikinmilui tokniuan tlen chikauak intlaneltokilis ma mitspaleuikan ika tlen kijtoa Biblia. Oui pampa ikaj tikiluis ma mitspaleui, pero moneki tikchiuas (Proverbios 18:1; Hebreos 3:12, 13). ¿Tleka? Pampa tokniuan tlen chikauak intlaneltokilis uelis mitspaleuiskej ika Biblia pampa uelis tikpatlas tlen moneki. Ijkon uelis timouikas iuan Jehová.

16, 17. 1) Ika se neskayotl xikijto ken tlayekankej tlapaleuiaj pampa ikaj amo ma mokuayejyeko tlen amo kuali. 2) ¿Tleka akinmej kitaj auilnemilistli moneki kinmiluiskej tlayekankej ma kinpaleuikan?

 16 Tlayekankej itech tlanechikol uelis kuali techpaleuiskej (xiktlajtolti Santiago 5:13-15). Ma tikitakan ineskayo se telpochtli tlen chanti itech ueyi altepetl Brasil. Ye kijtoa itech miak xiuitl okitaya oui amo mokuayejyekos tlen amo kuali. Kijtoa: “Onikmatiaya Jehová amo okipaktiaya tlen onimokuayejyekoaya, pero onipinauaya nikinmiluis oksekimej”. Se tlayekanki okitak tokni okinekiaya ikaj ma kipaleui, ik non, okilui ma motlapoui iuan tokniuan tlayekankej. Telpochtli kijtoa: “Tlayekankej onechtlasojtlakej uan onechiknomatkej. Uan nin onechtlajtlachialti pampa onikneltokaya amo onechnamikiaya ijkon ma nechpaleuikan. Okikakej nochi tlen onikinmilui, ika Biblia onechilnamiktijkej Jehová nechtlasojtla uan san sekan otimotlatlaujtijkej. Nochi okichi kuali ma nikseli tlanojnotsalmej tlen onechiluijkej ika Biblia”. Axkan yopanok kauitl uan kuali mouika iuan Jehová. Ye kijtoa: “Axkan nikmati moneki niktemos tlapaleuilistli, uan amo noselti nimochijchikauas pampa amo nikchiuas tlen amo kuali”.

17 Tla tejuatsin tikita ken auilnemij (noso pornografía), miak ipati xikinmilui tokniuan ma mitspaleuikan. ¿Tleka? Pampa tla amo tikchiuas, uelis titlajtlakolchiuas. Tla ijkon mitspanoa, uelis tikinyolkokos mokalchanejkauan uan moyolikniuan. Uan noijki amo kuali tlajtoskej itech Jehová. Miakej yokinmiluijkej tlayekankej ma kinpaleuikan, uan kuali okiselijkej tlapaleuilistli tlen okinmakakej. Ijkon ok kuali mouikaj iuan Jehová iuan ok iTlaixpantijkauan Jehová (Salmo 141:5; Hebreos 12:5, 6; Santiago 1:15).

XIMOCHIJCHIKAUA PAMPA AMO TIAUILNEMIS

18. ¿Tlen moneki ma tikchiuakan?

18 Axkan tlaltikpaktlakamej okachi kichiuaj tlen amo kuali. Pero iTlaixpantijkauan Jehová mochijchikauaj pampa amo mokuayejyekoskej tlen amo kuali uan amo tlajtlakolchiuaskej. Uan non kichiua ma yolpaki Jehová. Ik non, ma timopaleuikan ika eyi tlamantli tlen otimomachtijkej: ken timouikaj iuan Jehová, tlanojnotsalistli tlen kitemaka Biblia uan tlapaleuilistli tlen kitemakaj tokniuan tlen chikauak intlaneltokilis. Tla ijkon tikchiuaj tiyolpakiskej uan amo itlaj techtekipachos (Salmo 119:5, 6). Satepan Satanás ayakmo yetos, uan tejuan nochipa tiyoltoskej itech se kualtsin Tlaltikpak kanin mochiuas tlen kuali.