Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2015

Tlen techmachtia padrenuestro (tlamachtil se)

Tlen techmachtia padrenuestro (tlamachtil se)

“Makiyektenewakah [noso, ma kiueyichiuakan] motoka.” (MATEO 6:9)

1. ¿Ijkuak titetlapouiaj tlen tikijtoaj itech padrenuestro?

MIAKEJ tlaltikpaktlakamej kimatij padrenuestro, tlen ijkuilitok itech Mateo 6:9-13. Ijkuak titetlapouiaj tikintlapouiaj tlaltikpaktlakamej itech nin tlatlaujtilistli. Ik non, tikijtoaj “xiwalmuika xitlanawatiki” ijkuak tikinmachtiaj itech iTekiuajkayo toTajtsin Dios uan ken ayakmo miak poliui pampa nochi Tlaltikpak kikuepas se kualtsin Xochitlali. Noijki tikijtoaj “makiyektenewakah [noso, ma kiueyichiuakan] motoka” pampa tikinmachtiskej toTajtsin Dios kipia itoka uan moneki tiktlakaitaskej pampa nin tokayotl chipauak (Mateo 6:9).

2. ¿Tleka amo moneki ma tikueptokan tlajtoli ijkuak timotlatlaujtiaj?

2 Miakej tlaltikpaktlakamej san kikueptokej padrenuestro ijkuak kitlatlaujtiaj toTajtsin Dios. ¿Pero ijkon okinekiaya toTajtsin Dios ma tiktlatlaujtikan? Amo. Jesús okijto: “Ijkuak nonmotiotsajtsiliskeh, amo san ompa xikojpatilijtokah nomotlajtol” (Mateo 6:7). Se tonal Jesús okinmachti imachtijkauan ken moneki motlatlaujtiskej uan okijto padrenuestro pero okipatlak seki tlajtolmej (Lucas 11:1-4). Nin techmachtia Jesús okijto nin tlatlaujtilistli pampa ma tikmatikan tlen uelis tiktlajtlaniliskej Jehová.

3. ¿Tlen uelis timotlajtlaniskej itech ome tlamachtilmej?

 3 Axkan uan chikome timomachtiskej itech padrenuestro. Ijkuak timomachtijtias nin ximotlajtlani: “¿Ken padrenuestro nechpaleuia pampa okachi kuali ma niktlatlaujti Jehová? ¿Nikchiua ijkon ken kijtoa padrenuestro?”.

“TOTAJTSI DIOS NON TIMOITSTIKA ILWIKAK”

4. 1) ¿Tlen kijtosneki tlajtoli “Totajtsi Dios”? 2) ¿Tleka akinmej mokauaskej itech Tlaltikpak noijki uelis kijtoskej Jehová intajtsin?

4 Ijkuak Jesús opejki itlatlaujtilis okijto: “Totajtsi Dios”. Nin techilnamiktia Jehová intajtsin nochtin tokniuan (1 Pedro 2:17). Jehová yokinpejpenki sekimej itekipanojkauan pampa ma yetokan iluikak. Ye okinseli ken ikoneuan. Ik non, yejuan ikoneuan toTajtsin Dios pero amo ken akinmej mokauaskej itech Tlaltikpak (Romanos 8:15-17). Pero ¿tleka akinmej mokauaskej itech Tlaltikpak noijki uelis kijtoskej Jehová intajtsin? Pampa kinmaka yolilistli uan nochi tlen kinekij. Uan satepan, ijkuak ayakmo kipiaskej tlajtlakoli uan kixikoskej tlajyouilistli, noijki mochiuaskej ikoneuan toTajtsin Dios (Romanos 8:21; Apocalipsis 20:7, 8).

5, 6. 1) ¿Tetajmej tlen uelis kinmakaskej inkoneuan? 2) ¿Tlen moneki kichiuaskej konemej ika tlen kinmakaskej intatajuan? (Xikita tlaixkopinal tlen ika peua tlamachtil.)

5 Tetajmej akinmej kitekichiuiliaj Jehová uelis kinmakaskej inkoneuan itlaj tlen miak ipati. ¿Tlen uelis kinmakaskej? Uelis kinmachtiskej Jehová intajtsin tlen kajki iluikak uan noijki uelis kinmachtiskej ken uelis kitlajtlaujtiskej. Se tlayekanki de circuito tlen kajki Sudáfrica kijtoa ijkuak oneskej ikoneuan ye nochi yoak inmiuan okitlatlaujtiayaj Jehová, amo okichiuayaj ijkuak ye amo okatka ikalijtik. Ichpokamej kijtoaj amo kilnamikij nochi tlajtolmej tlen okijtoaya intajtsin. Pero kema kilnamikij ken kuali omomachiliayaj ijkuak ye okitlatlaujtiaya Jehová. Ijkuak yokimatiayaj ken uelis motlatlaujtiskiaj ye okinmilui inselti ma kitlatlaujtikan, okinmilui amo san ichtaka ma kitlatlaujtikan. Ijkon ye okikakiaya ken okiluiayaj Jehová tlen omokuayejyekoayaj uan okimachiliayaj. Uan noijki ijkon uelis kimatiskia tlen melauak okimachiliayaj. Ijkon tokni uelis kinpaleuiskia ikoneuan ma kitlajtlanilikan Jehová tlen okachi ipati ijkon ken kijtoa padrenuestro.

6 Ijkuak yejuan okachi omoskaltiayaj okachi kuali omouikayaj iuan Jehová. Axkan yomonamiktijkej iuan innamik san sekan kitekichiuiliaj Jehová. Tetajmej uelis kinmakaskej inkoneuan itlaj tlen miak ipati, uelis kinmachtiskej Jehová melauak onka uan uelis iuan mouikaskej. Uan melauak, sejse moneki kimaluis ken mouika iuan Jehová (Salmo 5:11, 12; 91:14).

“MAKIYEKTENEWAKAH [MA KIUEYICHIUAKAN] MOTOKA”

7. 1) ¿Tlen ueyi tlateochiualistli tikpiaj tiiTlaixpantijkauan Jehová? 2) ¿Ken tikteititiaj tikpatioitaj nin tlateochiualistli?

7 TiiTlaixpantijkauan Jehová tikixmatij itoka toTajtsin Dios uan tiktematiltiaj, nin se ueyi tlateochiualistli (Hechos 15:14; Isaías 43:10). Itech padrenuestro Jesús otechmachti ma tikijtokan “makiyektenewakah [ma kiueyichiuakan] motoka”. Nin kijtosneki tiknekij ma mochipaua itoka toTajtsin Dios. ¿Ken tikteititiaj tikpatioitaj nin tlateochiualistli? Uelis tiktlajtlaniskej ma techpaleuia pampa amo ma tikijtokan nion ma tikchiuakan itlaj tlen uelis kisokiotis itoka. Amo ma  tikchiuakan ken akinmej otlaneltokayaj itech Cristo itech achto siglo, yejuan okijtoayaj seki tlamantli pero amo ijkon okichiuayaj. Ik non, tlatitlanil Pablo okijto: “Akimeh amo judíojteh tlajtoah fiero de Dios por nomotlajtlakol” (Romanos 2:21-24).

8, 9. ¿Ken Jehová okipaleui se tokni tlen omochijchika kitlakaitas itoka?

8 Akinmej tikchiuaj ken Cristo timochijchikauaj pampa tikueyichiuaskej itoka toTajtsin Dios. Se neskayotl, se tokni siuatl tlen chanti itech ueyi altepetl Noruega omikik inamik ijkuak inkone okipiaya ome xiuitl. Ye kijtoa: “Sapanoa oui tlen onipanok. Mojmostla —uelis sejse hora— oniktlatlaujtiaya Jehová ma nechyolchikaua uan ma nechpaleui pampa ayakmo okachi nimotekipachos. Amo oniknekiaya Satanás ma kipinati Jehová san pampa itlaj amo kuali onikchi. Noijki amo oniknekiaya nikkajkayauas toTajtsin Dios. Oniknekiaya nikueyichiuas itoka toTajtsin Dios, uan nokone ma kita itajtsin itech Xochitlali” (Proverbios 27:11).

9 Tokni omochijchika kiueyichiuas itoka Jehová. ¿Ken okipaleui Jehová? Ken tokniuan okipaleuijkej, ye uelis kuali omomachili uan kuali okipejpenki tlen kichiuas. Makuili xiuitl satepan omonamikti iuan se tlayekanki. Axkan ikone kipia 20 xiuitl uan yomoapolakti. Tokni kijtoa: “Niktlasojkamatilia nonamik pampa onechpaleui ma nikiskalti nokone”.

10. ¿Ken kichipauas Jehová itoka?

10 Jehová kichipauas itoka ijkuak kinmixpolos akinmej kixtopeuaj iTekiuajkayo (xiktlajtolti Ezequiel 38:22, 23). Satepan tlaltikpaktlakamej ayakmo kipiaskej tlajtlakoli. Uan nochtin akinmej yetoskej itech iluikak uan Tlaltikpak kiueyichiuaskej itoka toTajtsin Dios, Jehová. Ijkuakon Jehová “kinawatijtos nochi tlan onka” (1 Corintios 15:28).

“XIWALMUIKA XITLANAWATIKI”

11, 12. ¿Tlen okichi Jehová itech xiuitl 1876?

11 Ijkuak Jesús ok okatka Tlaltikpak imachtijkauan okitlajtlanijkej kox yipeuaskia tlanauatis. Pero Jesús okinmilui ayamo uelis kimatiskiaj okachi omonekiaya ma tetlapouikan (xiktlajtolti Hechos 1:6-8). Noijki okinmachti ma kitlajtlanikan iTekiuajkayo toTajtsin Dios uan okinmilui ma tlachixtokan pampa ijkuak peuas tlanauatiskia. Ik non, ok tiktlajtlaniliaj Jehová ma uiki iTekiuajkayo.

12 Itech xiuitl 1876, Jehová okinpaleui itekipanojkauan ma kajsikamatikan Jesús peuaskia tlanauatis itech iluikak itech xiuitl 1914. ¿Ken okinpaleui? Itech non xiuitl tokni Russell okijkuilo se tlamachtil tlen omotokayotiaya: “¿Keman tlamis kauitl pampa non uitsej itech okseki altepemej?”. Ompa okiyekijto tlen okijkuilo Daniel itech “chikome tiempos” san se tlamantli kijtosneki ika tlen okijto Jesús itech “tlan kichijtokeh n tlakah non amo judíojteh” (Daniel 4:16; Lucas 21:24). Non tlamachtil okijtoaya nin tlamiskia itech xiuitl 1914. * (Xikita tlajtoli tlen kiualika tlakxitlan.)

13. 1) ¿Tlen opanok itech xiuitl 1914? 2) ¿Tlen techmachtia nochi tlen panotok desde xiuitl 1914?

13 Itech xiuitl 1914 itech Europa miakej uejueyij altepemej opejkej se guerra tlen satepan omochi itech nochi Tlaltikpak. Miakej tlaltikpaktlakamej omikej pampa amo okipiayaj tlen kikuaskej. Uan itech xiuitl 1918 se kokolistli tlen temomojti okinmikti okachi miakej tlaltikpaktlakamej.  Nochi nin tlamantli okijto Jesús mochiuaskia (Mateo 24:3-8; Lucas 21:10, 11). Nochi nin okiteititi Jesús opejki tlanauatia itech iluikak itech xiuitl 1914. Itech non xiuitl “okistewak kemi se tlátlanki para okachi tlatlanis” (Apocalipsis 6:2). Ijkuakon Jesús okiualtlamotlak Satanás uan amo kuali ejekamej. Satepan opejki mochiua ninmej tlajtolmej: “¡Miálmasteh akimeh chantitokeh ipan tlaltíkpaktli iwa itech weyi atl! N diablo yotemok kan nomejwah iwa kualankamiki, ken kimatok mach ok wejkawitl nentinemis” (Apocalipsis 12:7-12).

14. 1) ¿Tleka titetlajtlaniaj ma peua tlanauati iTekiuajkayo toTajtsin Dios? 2) ¿Tlen moneki ma tikchiuakan?

14 Tlen ijkuilitok itech Apocalipsis tlakotonal 12 techmachtia tleka itech Tlaltikpak opejki miak ouijkayotl ijkuak Jesús opejki tlanauatia. Maski yitlanauatijtok itech iluikak, itech Tlaltikpak ok tlanauatijtok Satanás. Pero ayakmo miak poliui uan Jesús kitlajtlamis nochi tlen amo kuali uan ijkuakon tlatlanis. Pero tejuan ok titetlajtlaniskej ma peua tlanauati iTekiuajkayo toTajtsin Dios itech Tlaltikpak. Uan ok titetlapouiskej itech iTekiuajkayo toTajtsin Dios, pampa nin tekitl miak ipati. Uan ijkon mochiuas tlen okijto Jesús: “Uan ninmej kuali tlajtolmej itech Tekiuajkayotl motetlapouis itech nochi Tlaltikpak pampa ma kimatikan nochi uejueyij altepemej, ijkuakon tlamis nochi tlen amo kuali” (Mateo 24:14, TNM).

‘MAMOCHIWA TLAN TIKMONEKILTIA ITECH NIN TLALTÍKPAKTLI’

15, 16. ¿Tleka amo san moneki titetlajtlaniskej ma mochiua itlanekilis toTajtsin Dios?

15 Yikipia kanaj 6,000 xiuitl itech Tlaltikpak kema omochiuaya itlanekilis toTajtsin Dios. Omochiuaya tlen okinekiaya, ik non, okijto nochi kuali okatka (Génesis 1:31). Pero Satanás okixnamik, uan ijkuakon miakej tlaltikpaktlakamej ayakmo kichiuaj tlen kineki toTajtsin Dios.  Pero axkan onka kanaj ocho millones tlaltikpaktlakamej akinmej kitekichiuiliaj Jehová. Yejuan kimatij amo san moneki tetlajtlaniskej ma mochiua itlanekilis toTajtsin Dios ipan Tlaltikpak. Ik non, mochijchikauaj pampa kichiuaskej. Mochijchikauaj pampa kiyolpaktiskej toTajtsin Dios uan ika yolpakilistli kintlapouiaj oksekimej itech iTekiuajkayo.

¿Tikinmachtijtok mokoneuan ma kichiuakan itlanekilis Jehová? (Xikita párrafo 16)

16 Ma tikitakan ineskayo se misionera tlen chanti itech altepetl África, tokni kipia 80 xiuitl uan omoapolakti itech xiuitl 1948. Ye kijtoa: “Nochipa niktlajtlanilia toTajtsin Dios okachi miakej tlaltikpaktlakamej ma kixmatikan, achto tlamis nochi tlen amo kuali. Uan ijkuak ikaj niktlapouia, niktlajtlanilia Jehová ma nechmaka ixtlamatilistli pampa tlen niktlapouis ma ajsi itech iyolo. Noijki niktlajtlanilia ma techpaleui tinochtin pampa uelis tikinmaluiskej akinmej okiselijkej tlen melauak”. Nin tokni yokinpaleui miakej tlaltikpaktlakamej ma kixmatikan Jehová. ¿Tikinmixmati oksekimej iTlaixpantijkauan Jehová akinmej kichiuaj itlanekilis Jehová ika miak yolchikaualistli? (xiktlajtolti Filipenses 2:17).

17. ¿Tlen tikmachilia pampa nochi tlen Jehová kichiuas satepan?

17 TiiTlaixpantijkauan Jehová tiktlajtlaniliskej Jehová ma mochiua itlanekilis ipan Tlaltikpak hasta ijkuak tlamis nochi tlen amo kuali uan kinmixpolos akinmej kikokoliaj. Ijkuakon Tlaltikpak mochiuas se xochitlali uan sapanoa miakej tlaltikpaktlakamej kinyolitiskej. Jesús okijto: “Nochteh non yomikkeh iwa tooktokeh kikakiskeh itlajtol. Iwa kisaskeh de inmiketekochwah” (Juan 5:28, 29). Ximokuayejyeko ken tiyolpakiskej ijkuak oksepa kinyolitiskej tokalchanejkauan akinmej yomikej. ToTajtsin Dios “kinmixayowajwatsas nochteh” (Apocalipsis 21:4). Miakej itech akinmej kinyolitiskej amo keman okintlapouijkej itech Jehová uan Jesús. Tiyolpakiskej tikinmachtiskej ma kichiuakan itlanekilis Jehová pampa uelis yoltoskej nochipa (Hechos 24:15; Juan 17:3).

18. ¿Tlen okachi tiknekij?

18 Ayakmo miak poliui uan Jehová kichiuas eyi tlamantli tlen titetlajtlaniaj itech padrenuestro: yipeuas tlanauatis itech Tlaltikpak, mochipauas itoka ika Tekiuajkayotl uan nochtin san sekan tiktekichiuiliskej Jehová. Ijkon toTajtsin Dios kinmakas nochtin tlaltikpaktlakamej tlen kinekij. Chikome timomachtiskej okseki tlamantli tlen Jesús okijto ma titetlajtlanikan itech padrenuesto.

^ párr. 12 Tla tikneki tikmatis tleka tikijtoaj nin omochi itech xiuitl 1914, xikita amochtli ¿Tlen melauak tlamachtia Biblia?, itech páginas 215 a 218.