Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2015

Tlen techmachtia padrenuestro (tlamachtil ome)

Tlen techmachtia padrenuestro (tlamachtil ome)

“Totajtsi Dios ya kimatok tlan nomechpoloa.” (MATEO 6:8)

1-3. ¿Tleka se tokni kineltoka Jehová okinankili itlatlaujtiluan?

ITECH xiuitl 2012 se tokni precursora regular tlen itoka Lana oyajki itech ueyi altepetl Alemania. Amo keman kilkauas tlen opanok ijkuak yimokuepaskia ialtepe. Ye kijtoa Jehová okinankili ome tlatlaujtilmej. Achto ijkuak oyaya itech tren pampa ajsiskia aeropuerto okitlajtlanili Jehová ma kipaleui pampa uelis ikaj kitlapouiskia. Ijkuak oajsito aeropuerto okimatki okse tonal mochiaskia pampa kisaskia avión. Ijkuakon oksepa okitlatlaujti Jehová ma kipaleui pampa ayakmo okipiaya tomin uan noijki amo okimatiaya kanin uelis kochiskia.

2 Ijkuak okitlatlaujtijtoka Jehová ikaj okilui: “Lana, ¿tlen tikchiua?”. Se akin iuan omomachtiaya tlen oyaya Sudáfrica. Inantsin uan isitsin okikauatoj aeropuerto. Ijkuak Lana okintlapoui tlen okipanok, yejuan okiluijkej inmiuan ma mokaua inkalijtik. Uan noijki okitlajtlanijkej itech tlen okineltokaya uan itech tetlapouilistli tlen okichiuaya ken precursora.

 3 Mostlatika Lana okinnankili miakej tlajtlanilmej tlen okipiayaj itech Biblia. Uan achto mokuepaskia tokni okijkuilo intoka pampa oksekimej tokniuan uelis kintlapouiskiaj. Axkan ok tekiti ken precursora uan kimati Jehová okinankili itlatlaujtiluan (Salmo 65:2).

4. ¿Tlen timomachtiskej axkan?

4 Ijkuak itlaj techpanoa san niman tiktlatlaujtiaj Jehová. Uan ye techkaki uan kinektok techpaleuis (Salmo 34:15; Proverbios 15:8). Pero itech padrenuestro Jesús otechmachti onka okseki tlamantli tlen okachi ipati ma tiktlatlaujtikan. Axkan timomachtiskej naui tlamantli tlen saiktlami okijto Jesús itech padrenuestro uan ken nin tlamantli techpaleuia pampa amo ma tikkauakan Jehová (xiktlajtolti Mateo 6:11-13).

Amo ma timotekipachokan pampa ken tikpiaskej tlen ika timopanoltiskej

“TECHMAKA NOCHI TONATI TLAN TIKMOMAJSEWISKEH”

5, 6. Maski tikpiaj miak tlakuali, ¿tleka moneki tiktlajtlaniliskej Jehová ma techmaka tlen tikkuaskej?

5 Jesús amo otemachti ma tikijtokan “xinechmaka tlen nitlakuas”. Ye otechmachti ma tikijtokan “techmaka nochi tonati tlan tikmomajsewiskeh”. Ma tikitakan ken ijkon kichiua Victor se tlayekanki itech circuito tlen chanti itech ueyi altepetl África. Ye kijtoa: “Niktlasojkamatilia Jehová pampa nosiua uan ne amo timotekipachoaj pampa tikpiaskej tlen tikkuaskej nion kanin timokalotiskej. Tokniuan akinmej sapanoa tikintlasojtlaj techpaleuiaj. Pero niktlajtlanilia Jehová ma kinpaleui tokniuan akinmej tlajyouiaj pampa amo onka tlen ika mopanoltiskej”.

6 Uelis tikpiaj miak tlen tikkuaskej, pero oksekimej tokniuan amo itlaj kipiaj uan tlajyouijtokej. Ma tiktlajtlanilikan Jehová ma kinpaleui. Pero noijki okse tlamantli uelis tikinpaleuiskej. Se neskayotl, uelis tikinmakaskej tlen tikpiaj. Noijki uelis tiktemakaskej tomin pampa okachi ma motetlapoui itech nochi Tlaltikpak. Tikmatij tomin tlen tiktemakaj kinpaleuia tokniuan akinmej tlajyouiaj (1 Juan 3:17).

7. ¿Tlen neskayotl okijto Jesús pampa amo okachi ma timotekipachokan?

7 Ijkuak Jesús otlanki okijto padrenuestro okijto se neskayotl tlen techmachtia tleka miak ipati amo okachi ma timotekipachokan pampa tlamantli tlen ika timopanoltiskej. Ye okijto xochimej tlen katej kuajtlan amo motekipachoaj pampa Jehová kinmaluia. Ik non, okinmilui “amo ximotekipachokah nion xikmolikah: ‘[...] ¿tlan tikonakiskeh?’. Noijki okinmilnamikti: “Amo ximotekipachokah” (Mateo 6:30-34). Moneki tiyolpakiskej tla tikpiaj tlen ika timopanoltiskej se tonal. Se neskayotl, uelis tiktlajtlaniliskej Jehová kanin tichantiskej, se tekitl pampa tikpiaskej tlen tikkuaskej uan ma techpaleui kuali ma titlapejpenakan ijkuak timokokoaj. Pero onka se tlamantli tlen okachi ipati tlen moneki tiktlatlaujtiskej  Jehová. ¿Tlen tlamantli okachi ipati?

8. ¿Tlen techmachtia tlajtoli “techmaka nochi tonati tlan tikmomajsewiskeh”?

8 Ijkuak Jesús okijto ‘xitechmaka tlan tikmomajsewiskeh’, techilnamiktia moneki tiktlatlaujtiskej Jehová ma techmachti uan ma techpaleui pampa iuan ok timouikaskej. ¿Tleka ijkon tikijtoaj? Pampa Jesús noijki okijto: “N tlakatl amo san ika paj yolitok, yej noiwa ika nochi tlájtoli non Dios kijtoa” (Mateo 4:4).

“TECHINTLAPOJPOLWILI TOTLAJTLAKOLWAH”

9. ¿Ken moneki tikitaskej tlajtlakoli, uan tleka?

9 Itech padrenuestro Jesús okijto: “Techintlapojpolwili totlajtlakolwah”. Uan okse tonal oksepa okijto: “Techintlapojpolwili totlajtlakolwah” (Mateo 6:12; Lucas 11:4). Itech Traducción del Nuevo Mundo kijtoa totlajtlakoluan ken itlaj tlen tikteuikiliaj. Uan itech xiuitl 1952, nin revista okijto tejuan moneki tiktlasojtlaskej uan tiktlakamatiskej toTajtsin Dios. Ijkuak titlajtlakolchiuaj amo tikmakaj Jehová tlen kinamiki. Ik non, itlaj tikuikiliaj Jehová. Tla Jehová kineki uelis ayakmo touan mouikas. Nin revista noijki okijto: “Ijkuak ikaj tlajtlakolchiua amo kitlasojtla toTajtsin Dios” (1 Juan 5:3).

Ma tiktlasojkamatilikan Jehová pampa imikilis Jesús

10. 1) ¿Tleka Jehová techtlapojpoluia? 2) ¿Tlen tikmachiliaj pampa tlen Jehová okichi topampa?

 10 Mojmostla tiknekij Jehová ma techtlapojpolui. Uan ye techtlapojpoluia pampa yikipia kanaj 2,000 xiuitl Jesús omikik topampa. Moneki ma tiktlasojkamatilikan Jehová pampa nin kualtsin tetliokolil. Tla Jesús amo mikiskia topampa, amo uelis timomakixtiskiaj itech tlajtlakoli uan mikilistli (xiktlajtolti Salmo 49:7-9 uan 1 Pedro 1:18, 19). Tlajtolmej “techintlapojpolwili totlajtlakolwah” techilnamiktia tokniuan noijki mopaleuiaj ika imikilis Jesús. Techyekiluia Jehová kineki ma timokuayejyekokan itech tokniuan uan ken uelis kuali mouikaskej iuan Jehová. Uan nin tikchiuaj ijkuak tikintlapojpoluiaj. Uelis yetos amo se ueyi tlajtlakoli. Ijkuak tikintlapojpoluiaj tokniuan, tikteititiaj tikintlasojtlaj uan tiknekij Jehová noijki ma techtlapojpolui (Colosenses 3:13).

Maski titlajyouiskej uelis amo keman tikkauaskej Jehová

11. ¿Tleka moneki oksekimej ma tikintlapojpoluikan?

11 Ken titlajtlakolejkej uelis ualeua oui tikintlapojpoluiskej tokniuan (Levítico 19:18). Pero tla tikintlapouiaj oksekimej tlen otechchiuili se tokni, uelis okse tokni techpaleuis uan amo kuali kitas okse tokni. Uan nin uelis kichiuas ayakmo kuali ma yeto tlanechikol. Uan tla ijkon panoa uan amo tikyektlaliaj, tikteititiaj amo tiktlasojkamatiliaj imikilis Jesús (Mateo 18:35). Tla amo tikintlapojpoluiaj oksekimej Jehová amo uelis techtlapojpoluis (xiktlajtolti Mateo 6:14, 15). Uan noijki tla tiknekij Jehová ma techtlapojpolui, moneki amo ma titlajtlakolchiuakan (1 Juan 3:4, 6).

Moneki xitetlapojpolui uan ijkon Jehová mitstlapojpoluis (Xikita párrafo 11)

“AMO XIKTEKAWILI MATECHYOLTILANA N TLAJTLÁKOLI”

12, 13. 1) ¿Tlen okipanok Jesús satepan ijkuak omoapolakti? 2) ¿Tleka amo tikintlajtlakoltiskej oksekimej tla titlajtlakolchiuaj? 3) ¿Tlen okiteititi Jesús pampa nochipa okitlakamatki Jehová?

12 Itech padrenuestro Jesús okijto: “Amo xiktekawili matechyoltilana n tlajtlákoli”. Nin techilnamiktia tlen okipanok Jesús satepan ijkuak omoapolakti. Jehová okika “n amokualitlakatl” ma kiyejyeko (Mateo 4:1; 6:13). ¿Tleka okika Jehová ma kiyejyekokan Jesús? Pampa Adán uan Eva amo okiselijkej Jehová ken intekiua uan omonekiaya ma monankili ninmej tlajtlanilmej. ¿Jehová amo kuali okinchijchi tlaltikpaktlakamej? ¿Ikaj uelis yetos yolmelajki ijkuak kiyejyekoaj? ¿Okachi kuali yetoskej tlaltikpaktlakamej tla inselti monauatiaj, ijkon ken okijto Satanás? (Génesis 3:4, 5). Jehová okiualtitlanki Jesús pampa ma kinankili ninmej tlajtlanilmej. Pero ninmej tlajtlanilmej satepan monankiliskej. Ijkuakon nochtin akinmej yetoskej itech iluikak uan Tlaltikpak kimatiskej san Jehová kinamiki tlanauatis.

13 Jehová chipauak noso santo, ik non, amo ikaj kiyejyekoa. San Satanás  ijkon kichiua (Mateo 4:3). Pero tejuan tikpejpenaskej kox tikxikoskej tlen ika techyejyekos Satanás noso amo (xiktlajtolti Santiago 1:13-15). Ma timotlajtlanikan, ¿tlen okichi Jesús ijkuak Satanás okiyejyeko? San niman okixtope uan okilui tlen okijtoaya iTlajtol toTajtsin Dios. Jesús okipejpenki amo kikauas Jehová. Pero Satanás amo omosotla. “Okikakajte kech tonati” pampa oksepa uelis kiyejyekoskia (Lucas 4:13). Pero Jesús nochipa okitlakamatki Jehová. Ijkon okiteititi akin amo kipia tlajtlakoli uelis amo kikauas Jehová maski sapanoa tlajyouis. Axkan Satanás noijki techyejyekoa pampa amo ma tiktlakamatikan Jehová.

14. ¿Tlen moneki ma tikchiuakan pampa ma tikxikokan ijkuak techyejyekoaj?

14 Tlajtlanilmej tlen omochijkej ijkuak Adán uan Eva amo okiselijkej Jehová ken intekiua ok moneki ma monankili. Ik non, Jehová ok kikajtok Satanás ma techyejyeko. Pero ma tikilnamikikan Jehová amo techyejyekoa. Ye kineltoka tejuan tikchiuaskej tlen kuali uan techpaleuia. Pero amo techchiualtia ma tiktlakamatikan. Techkauilia ma tikpejpenakan kox tikauaskej noso amo. ¿Tlen moneki ma tikchiuakan pampa uelis tikxikoskej ijkuak techyejyekoskej? Moneki kuali ma timouikakan iuan Jehová uan nochipa ma tiktlatlaujtikan ma techpaleui. Ma timomachtikan ken uelis technankilis.

Jehová totech tlaneltoka uan techpaleuia

Kuali ximouika iuan Jehová uan chikauak xitetlapoui (Xikita párrafo 15)

15, 16. 1) ¿Tlen tlamantli tlen ika techyejyekoaj moneki tikixtopeuaskej? 2) ¿Akin itlajtlakol tla titlajtlakolchiuaj?

 15 Ika iespíritu santo Jehová techpaleuia pampa ma tikxikokan ijkuak Satanás techyejyekoa. Noijki ika iTlajtol uan tlanechikol techiluia tlen ouijkayotl uelis tipanoskej. Se neskayotl, technojnotsa pampa tochikaualis, tokauitl uan totomin amo ma tiktekitiltikan itech tlen amo okachi ipati. Ma tikitakan ineskayo seki tokniuan tlen intoka Espen uan Janne. Yejuan chantij itech ueyi altepetl Noruega, kanin sapanoa onka tomin. Miak xiuitl yejuan otetlapouijkej itech se altepetl kanin omonekiaya okachi tokniuan pampa uelis tetlapouiskiaj. Pero axkan yejuan kinpiaj ome inkoneuan uan ayakmo uelij tekitij ken precursores. Espen kijtoa: “Nochipa tiktlajtlaniliaj Jehová ma techpaleui pampa amo ma titlajtlakolchiuakan axkan ken ayakmo okachi titetlapouiaj. Tiktlajtlaniliaj ma techpaleui pampa kuali iuan timouikaskej uan ok chikauak ma titetlapouikan”.

16 Satanás noijki techyejyekoa ika pornografía noso kanin mota ken auilnemij, nin moneki tikixtopeuaskej. Sekimej kitaj pornografía pampa itech non mokuayejyekoaj. Tla tikitaj pornografía amo uelis tiktlajtlakoltiskej Satanás nion tlen kiyekana. ¿Tleka? Pampa yejuan amo uelis techchiualtiskej ma tikchiuakan itlaj tlen amo tiknekij. Pero miakej tokniuan kixtopeuaj non tlamantli tlen ika kinyejyekoa Satanás. Uan tejuan noijki uelis tikxikoskej (1 Corintios 10:12, 13).

“TECHMAKIXTI IMAK N AMOKUALITLAKATL”

17. 1) ¿Ken tikteititiaj tiknekij Jehová ma techmalui itech Satanás? 2) ¿Tlen kichiuas Jehová?

17 Ijkuak tikijtoaj “techmakixti imak n amokualitlakatl” tiktlajtlaniliaj Jehová ma techmalui itech Satanás. ¿Ken tikteititiaj tiknekij ma techmalui? Amo ma tikchiuakan ken tlaltikpaktlakamej nion “xiktlasojtlakah tlan onka itech nin tlaltíkpaktli” (Juan 15:19; 1 Juan 2:15-17). Ayakmo miak poliui uan Jehová kitsakuas Satanás uan kipojpolos nochi tlen kiyekantok. Pero moneki ma tikilnamikikan Satanás sapanoa kualantok pampa kimati ayakmo miak kauitl kipia. Kichiuas miak tlamantli pampa ayakmo ma tiktekichiuilikan Jehová. Ik non, moneki ma tiktlatlaujtikan Jehová ma techmalui itech Satanás (Apocalipsis 12:12, 17).

18. ¿Tlen moneki ma tikchiuakan pampa ayakmo ma yeto Satanás?

18 Tla tiknekij ayakmo ma yeto Satanás moneki ma tikchiuakan ijkon ken kijtoa padrenuestro. ¿Ken uelis tikchiuaskej? Moneki ma tiktlajtlanilikan Jehová ma tlanauati, ma mochipaua itoka uan ma mochiua itlanekilis itech Tlaltikpak. Ma titlaneltokakan Jehová techmakas nochi tlen ika timopanoltiskej uan techpaleuis pampa amo keman ma tikkauakan.