Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2015

Jesús okintlasojtlaya tlaltikpaktlakamej

Jesús okintlasojtlaya tlaltikpaktlakamej

“Okachi onikintlasojtlak inkoneuan tlaltikpaktlakamej.” (PROVERBIOS 8:31)

1, 2. ¿Ken okiteititi Jesús sapanoa kintlasojtla tlaltikpaktlakamej?

ITECH Proverbios tlakotonal chikueyi moijtoa itech ixtlamatilistli ken ikaj tlen yoltok. Uan nin pampa ixtlamatilistli kineskayotia Jesús ijkuak ok okatka iluikak. Ompa kijtoa ijkuak toTajtsin Dios okichijchi nochi tlamantli, Jesús iuan okatka ken “se kuali tekipanojki”. Melauak oyolpakiaya ijkuak toTajtsin Dios okichijchiuaya iluikak uan Tlaltikpak. Pero itech nochi tlamantli tlen toTajtsin Dios okichijchi, Jesús okachi okintlasojtlak tlaltikpaktlakamej (Proverbios 8:22-31).

2 ¿Ken okiteititi Jesús sapanoa kitlasojtla toTajtsin Dios uan tlaltikpaktlakamej? Okiteititi ijkuak okinek uits itech Tlaltikpak pampa ma kimiktikan, ijkon uelis techmakixtis itech tlajtlakoli uan mikilistli (Mateo 20:28; Filipenses 2:5-8). Uan noijki ijkuak ouala Tlaltikpak okiseli chikaualistli tlen toTajtsin Dios okimakak uan ijkon uelis kinchiuaskia milagros. Ika nochi milagros tlen okichi okiteititi sapanoa techtlasojtla uan nochi tlamantli kuali tlen satepan kichiuas.

3. ¿Tlen timomachtiskej axkan?

 3 Ijkuak ouala Tlaltikpak Jesús okintlapoui tlaltikpaktlakamej itech iTekiuajkayo toTajtsin Dios (Lucas 4:43). Ye okimatiaya nin tekiuajkayotl kichipauas itoka toTajtsin Dios uan kiyektlalis nochi ouijkayotl tlen panoa itech Tlaltikpak. Uan ika milagros tlen okichi ijkuak otetlapouiaya, Jesús okiteititi kintlasojtla tlaltikpaktlakamej. Nochi nin miak ipati pampa tejuan. ¿Tleka? Pampa milagros kichiua ma tikchiakan tlen kuali. Axkan timomachtiskej naui milagros tlen okichi Jesús.

“NIKMONEKILTIA. ¡XIMOCHIPAWA!”

4. ¿Tlen opanok ijkuak Jesús okitak se tlakatl tlen okipiaya lepra?

4 Ijkuak Jesús otetlapouiaya oyajki se altepetl tlen itoka Galilea. Ompa okajsik se tlakatl tlen okipiaya lepra, se kokolistli tlen temomojti (Marcos 1:39, 40). Nin tlakatl sapanoa omokokoaya, ik non, Lucas okijto nin tlakatl okipiaya lepra pero itech nochi itlalnakayo (Lucas 5:12). Biblia kijtoa tlakatl omotlankuaketski iixpan Jesús uan okijto: “Noteko, tla Tejwatsi tikmonekiltia, weletis techchipawas de nokokolis”. Ye okimatiaya Jesús uelis kipajtiskia. Pero amo okimatiaya kox okinekiaya kipajtis. ¿Tleka? Pampa tlayekankej teopixkej amo okinnekiayaj akinmej okipiayaj lepra. Uan uelis nin tlakatl ayakmo omoixmatiaya pampa okipiaya lepra. ¿Tlen okichi Jesús? ¿Okitak noijki ken okitayaj tlayekankej teopixkej? ¿Tejuatsin tlen tikchiuaskia?

5. ¿Tleka Jesús okinek kipajtis akin okipiaya lepra?

5 Tlanauatil tlen okijkuilo Moisés okijtoaya tla se tlakatl tlen okipiaya lepra omotokiaya iuan oksekimej tlaltikpaktlakamej omonekiaya kijtos omokokoaya. Pero uelis nin tlakatl amo ijkon okichi (Levítico 13:43-46). ¿Okualanki Jesús? Amo. Ye omotekipacho itech nin tlakatl uan okipaleui. Pampa okiknomatki okichi itlaj tlen amo ikaj okichiuaya: okikitski nin tlakatl. Satepan okijto: “Nikmonekiltia. ¡Ximochipawa!”. Uan tlakatl san niman opajtik (Lucas 5:13). Jehová okimakak chikaualistli Jesús pampa uelis kichiuaskia nin milagro uan pampa kiteititiskia kintlasojtla tlaltikpaktlakamej (Lucas 5:17).

6. 1) ¿Tlen tlamantli techtlajtlachialtia itech milagros tlen okichi Jesús? 2) ¿Tlen techmachtiaj milagros tlen okichi Jesús?

6 Jesús okichi miakej milagros ika chikaualistli tlen okimakak toTajtsin Dios. Amo san okinpajti akinmej okipiayaj lepra, noijki okinpajti miakej tlaltikpaktlakamej tlen tlatlamantli kokolistli okipiayaj. Biblia kijtoa: “Omotlajtlachialtiayah ken okitakeh akimeh amo otlajtoayah otlajtojkeh, non oikximijmiktokah opajtikeh, non koxomeh onejnenkeh iwa non amo otlachiayah otlachixkeh” (Mateo 15:31). Axkan tlapajtijkej kinekij oksekimej tlaltikpaktlakamej ma kitemakakan seki intech intlalnakayo pampa uelis kipajtiskej akin mokokoa. Pero Jesús amo okinekiaya non. Ye san niman uelis kipajtiskia akin omokokoaya. Uan noijki uelis okinpajtiaya maski uejka okatkaj (Juan 4:46-54). ¿Tlen techmachtia nochi nin?  Toueyi Tekiua Jesucristo kineki uan uelis kichiuas ayakmo ma yeto kokolistli. Tikitaskej tlen okichiuaya Jesús iuan tlaltikpaktlakamej kichiua ma tikneltokakan itech Xochitlali kinmiknomatis akinmej amo itlaj kipiaj (Salmo 72:13). Tikmatij ye melauak kineki kinpajtis nochtin akinmej tlajyouiaj.

“XIMEWA, XIKAJKOKUI MOPETL IWA XINEJNEMI”

7, 8. ¿Tlen okichi Jesús ijkuak oyaya Judea?

7 Seki metstli satepan desde Galilea Jesús oyajki itech altepetl Judea pampa ompa noijki tetlapouiskia. Miakej tlaltikpaktlakamej okikakej uan okajsikamatkej ye okintlasojtlaya. Jesús okinyolseui akinmej otlajyouiayaj uan okintlapoui itlaj kuali (Isaías 61:1, 2; Lucas 4:18-21).

8 Itech metstli nisán, Jesús oyajki Jerusalén pampa uelis iluichiuaskia itech Pascua. Sapanoa miakej tlaltikpaktlakamej noijki oyayaj nin iluitl. Jesús oyajki itech se tanque tlen okatka itech altepetl, ik norte itech teokali. Ompa okajsik se tlakatl tlen okatka ipan ipetl pampa amo ueli onejnemiaya.

9, 10. 1) ¿Tleka tlaltikpaktlakamej oyayaj itech tanque tlen okatka Jerusalén? 2) ¿Tlen okichi Jesús? (Xikita tlaixkopinal tlen ika peua tlamachtil.) 3) ¿Tlen techmachtia nin milagro?

9 Miakej tlaltikpaktlakamej oyayaj itech non tanque. ¿Tleka? Pampa okineltokayaj tla omaltiayaj ijkuak atl omoliniaya, yejuan uelis mopajtiskiaj. Ximokuayejyeko tlen opanoaya ompa, pampa miakej tlaltikpaktlakamej okinekiayaj mopajtiskej. Jesús amo okinekiaya mopajtis, pampa ye amo okipiaya tlajtlakoli. Ik non, ¿tleka oyajki ompa? Pampa okintlasojtlaya tlaltikpaktlakamej. Ompa okajsik se tlakatl tlen amo ueli onejnemiaya. Nin tlakatl youejka omokokoaya, achto nesiskia Jesús ipan Tlaltikpak (xiktlajtolti Juan 5:5-9).

Jesús okintemoaya tlaltikpaktlakamej akinmej okinekiayaj ma kinpaleui

10 Jesús okitlajtlani tlakatl kox okinekiaya mopajtis. Ye omoyolkokoaya miak uan okilui kema okinekiaya mopajtis, pero amo ueli omopajtiaya pampa amo ikaj okipaleuiaya ma kalaki itech tanque. Ijkuakon Jesús okilui ma kichiua itlaj tlen omotaya amo uelis mochiuaskia. Okilui: “Ximewa, xikajkokui mopetl iwa xinejnemi”. ¡Uan tlakatl ijkon okichi! Nin milagro kichiua ma timokuayejyekokan itech nochi tlen kichiuas Jesús itech Xochitlali. Pero noijki techmachtia Jesús sapanoa kintlasojtla tlaltikpaktlakamej. Ye oyajki kanin kajki tanque pampa okintemoaya tlaltikpaktlakamej akinmej okinekiayaj ma kinpaleui. Tejuan noijki moneki tikchiuaskej ken Jesús uan ma tikintemokan tlaltikpaktlakamej akinmej tlajyouiaj pampa nochi tlamantli amo kuali tlen mochiua itech Tlaltikpak.

“¿AKIN OKITELKO NOTLAKE?”

11. ¿Tlen techmachtia Marcos 5:25-34?

11 (Xiktlajtolti Marcos 5:25-34.) Se siuatl yokipiaya 12 xiuitl okipiaya  se kokolistli tlen tepinati. Okitlaxtla miak tomin pampa okinekiaya ma kipajtikan, pero okachi omokokoaya. Ye ayakmo oyolpakiaya uan amo ueli okiueyichiuaya toTajtsin Dios. Ken ayakmo okinekiaya mokokos, se tonal okatkaj miakej tlaltikpaktlakamej ye okalak hasta kanin okatka Jesús uan okitelko itlaken(Levítico 15:19, 25). ¡Siuatl opajtik! Jesús okimachili itech okiski chikaualistli, ik non, omokuepki uan okintlajtlani akin okikitski. Nin siuatl sapanoa omomojtiaya, ik non, omotlankuaketski uan okijto nochi tlen okipanoaya. Jesús okimatiaya Jehová okipajti nin siuatl. Ik non, Jesús okilui: “Nokone, motlaneltokalis omitspajti”. Uan okilui ma uia uan ayakmo ma motekipacho. Jesús melauak okintlasojtlaya tlaltikpaktlakamej.

Ika milagros tlen okichi Jesús okiteititi motekipachoa itech tlen techpanoa (Xikinmita párrafos 11 uan 12)

12. 1) Ika nochi tlen yotimomachtijkej, ¿tlen tikneltoka itech Jesús? 2) ¿Tlen kuali neskayotl techmaka Jesús?

12 Techyolseuia miak tikmatiskej Jesús kintlasojtla tlaltikpaktlakamej uan okachi akinmej mokokoaj. ¡Satanás amo ijkon kichiua! Ye kineki ma tikneltokakan amo ikaj techneki uan amo itlaj topati. Milagros tlen okichi Jesús kiteititia ye totech motekipachoa uan itech tlen techtlajyouiltia. Tiktlasojkamatiliaj pampa tikpiaj se teopixki uan se tekiua tlen techtlasojtla miak (Hebreos 4:15). Tla amo timokokoaj uelis yetos oui tikmatiskej tlen kimachiliaj akinmej yiuejkika mokokoaj. Pero uelis tikchiuaskej ken Jesús. Maski ye amo keman omokoko, okajsikamatiaya tlen okimachiliayaj akinmej mokokoaj uan okinmiknomatiaya (1 Pedro 3:8). ¡Ma tikchiuakan ken ye!

“¡LÁZARO, XIWALKISA!”

13. ¿Tlen techmachtia itech Jesús iyolitilis Lázaro?

13 Jesús okiyolkokoaya miak kitas oksekimej otlajyouiayaj. Se neskayotl, ijkuak iyolikni omikik, ye sapanoa omoyolkoko ijkuak okitak ikalchanejkauan uan iyolikniuan omoyolkokoayaj (xiktlajtolti Juan 11:33-36). Ye  ochokak maski okimatiaya kiyolitiskia Lázaro. Amo opinauaya oksekimej ma kitakan choka. Sapanoa okitlasojtlaya Lázaro iuan ikalchanejkauan, ik non, ika chikaualistli tlen okimakak toTajtsin Dios okiyoliti (Juan 11:43, 44).

14, 15. 1) ¿Tlen techititia Jehová kineki kitlajtlamis nochi tlen techtlajyouiltia? 2) ¿Tlen kijtosneki “tumbas conmemorativas”?

14 Biblia kijtoa Jesús kichiua ken iTajtsin, Jehová (Hebreos 1:3). Ik non, milagros tlen okichi Jesús techititia toTajtsin Dios noijki kitlajtlamis nochi tlen techtlajyouiltia, kokolistli, tlen techyolkokoa uan mikilistli. Ayakmo miak poliui, toTajtsin Dios iuan Jesús kinyolitiskej sapanoa miakej tlaltikpaktlakamej akinmej yomikej. Jesús okijto kinyolitiskej “nochteh non yomikkeh iwa tooktokeh” (Juan 5:28, 29).

15 Itech Traducción del Nuevo Mundo kijtoa “tumbas conmemorativas”. Nin kijtosneki Jehová kinmilnamiki ken okatkaj akinmej yomikej, uan noijki kilnamiki ken okatka inyelis (Isaías 40:26). Uan amo san ueli kinmilnamiki, noijki kineki kinmilnamikis. Yolitilistli tlen ijkuilitokej itech Biblia techmachtiaj nochi tlen mochiuas itech Xochitlali.

MILAGROS, ¿TLEN TECHMACHTIAJ ITECH JESÚS?

16. ¿Tlen milagro kitaskej miakej itekipanojkauan toTajtsin Dios?

16 Uelis timomakixtiskej itech Armagedón tla nochipa tiktlakamatij Jehová. Nin milagro tlen okachi ueyi. Satepan tikitaskej okachi milagros. Nochtin tlaltikpaktlakamej ayakmo kipiaskej tlajtlakoli (Isaías 33:24; 35:5, 6; Apocalipsis 21:4). Ijkuakon ayakmo ikaj kintekitiltis lentes, garrotes, sillas de ruedas nion audifonos. Ika ipaleuilis Jehová nochtin akinmej momakixtiskej itech Armagedón kipiaskej chikaualistli uan ayakmo mokokoskej. Uan kinekiskej ma kinpaleui, pampa yejuan tekitiskej pampa nochi Tlaltikpak kikuepaskej se kualtsin xochitlali (Salmo 115:16).

17, 18. 1) ¿Tleka Jesús okichi milagros? 2) ¿Tleka timochijchikauaskej pampa uelis tiyetoskej itech Xochitlali?

17 Ijkuak timomachtiaj milagros tlen okichi Jesús, akinmej mokauaskej itech Tlaltikpak okachi kineltokaj ayakmo miak poliui pampa ayakmo ikaj mokokos (Apocalipsis 7:9). Ninmej milagros techmachtiaj Jesús sapanoa techtlasojtla (Juan 10:11; 15:12, 13). Teiknomatilistli tlen okiteititi Jesús techilnamiktia Jehová sapanoa kintlasojtla itekipanojkauan (Juan 5:19).

18 Axkan onka miak ouijkayotl, tlajyouilistli uan mikilistli (Romanos 8:22). Ik non, tiknekij nochi Tlaltikpak ma mokuepa se Xochitlali. Malaquías 4:2 techiluia ijkuakon tiyolpakiskej pampa ayakmo timokokoskej uan ayakmo tikpiaskej tlajtlakoli. Ijkuak timokuayejyekoaj itech nochi nin, melauak tiktlasojkamatiliaj Jehová uan tikneltokaj kichiuas tlen okijto. Ik non, timochijchikauaskej pampa uelis tiyetoskej itech Xochitlali. Tiyolpakij tikitaskej milagros tlen okichi Jesús kiteititia nochi tlamantli kuali tlen tikpiaskej ijkuak ye ualtlanauatis itech Tlaltikpak.