Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2015

“Cristo ye ichikawalis [toTajtsin] Dios”

“Cristo ye ichikawalis [toTajtsin] Dios”

“Cristo ye ichikawalis [toTajtsin] Dios.” (1 CORINTIOS 1:24)

1. ¿Tleka tlatitlanil Pablo okijto “Cristo ye ichikawalis [toTajtsin] Dios”?

JESÚS okichi miakej milagros ijkuak ouala Tlaltikpak. Totlaneltokilis mochikauas tla itech Biblia timomachtiaj ninmej milagros (Mateo 9:35; Lucas 9:11). Jesús okichi milagros pampa Jehová okimakak chikaualistli. Ik non, tlatitlanil Pablo okijto “Cristo ye ichikawalis [toTajtsin] Dios” (1 Corintios 1:24). Pero ¿tlen techmachtiaj milagros tlen okichi Jesús?

2. ¿Tlen techmachtiaj milagros tlen okichi Jesús?

2 Milagros tlen okichi Jesús techmachtiaj miak tlamantli (Hechos 2:22). Se neskayotl, nin techmachtia ijkuak Jesús tlanauatis mil xiuitl ye noijki kichiuas miakej milagros pampa nochtin akinmej yoltoskej itech Tlaltikpak. Milagros tlen okichi Jesús noijki techmachtiaj ken iyelis Jehová uan Jesús. Axkan timomachtiskej eyi milagros tlen okichi Jesús, uan timomachtiskej ken  techpaleuiaj axkan uan ken techpaleuiskej satepan.

SE MILAGRO TECHMACHTIA MONEKI TIKINPALEUISKEJ OKSEKIMEJ

3. 1) ¿Tlen opanok itech altepetl Caná? 2) ¿Tleka Jesús okichi non milagro?

3 Achto milagro tlen okichi Jesús omotak ijkuak omonamiktijtokaj itech altepetl Caná. Amo tikmatij tleka amo okipiayaj miak vino. Nin tlamantli tepinati, pampa akinmej omonamiktijkej omonekiayaj kinmakaskej nochi akinmej ompa okatkaj. Ijkuakon María, inantsin Jesús okilui ma kinpaleui akinmej omonamiktijkej. ¿Tleka? Ye kuali okimatiaya nochi tlen iTlajtol toTajtsin Dios okijtoaya itech Jesús, uan okimatiaya miakej kitokayotiskiaj “Tekone de non Weyijkatitok” (Lucas 1:30-32; 2:52). Ik non, uelis María okineltokaya Jesús uelis kinpaleuiskia. Pero kema tikmatij Jesús uan María okinekiayaj kinpaleuiskej akinmej yikin omonamiktijkej. Ik non, Jesús okikuepki kanaj 380 litros de atl ika vino tlen okachi kuali (xiktlajtolti Juan 2:3, 6-11). Amo omonekiaya ma kichiua nin milagro, pero okichi pampa omotekipachoaya itech oksekimej. Ye okichijtoka ken Jehová akin kinpaleuia oksekimej.

4, 5. 1) ¿Tlen techmachtia milagro tlen okichi Jesús? 2) ¿Tlen tikneltokaj pampa Jesús okichi nin milagro?

4 Ika chikaualistli tlen Jehová okimakak Jesús ye ueli okikuepki miak atl ika vino tlen okachi kuali. Okichi miak vino pampa nochtin akinmej ompa okatkaj. Nin milagro techmachtia Jehová uan Jesús sapanoa kinekij kinpaleuiskej oksekimej uan noijki kimatij tlen tiknekij. Uan noijki techmachtia Jehová techmakas miak tlakuali itech Xochitlali (xiktlajtolti Isaías 25:6).

5 Itech ma timokuayejyekokan. Ijkuak tiyetoskej itech Xochitlali, Jehová techmakas nochi tlen tiknekiskej. Tinochtin tikpiaskej se kuali kali uan miak tlakuali uelik. Melauak tiktlasojkamatiliaj Jehová ijkuak timokuayejyekoaj itech nochi tlamantli kuali tlen techmakas.

Ma tikchiuakan ken Jesús uan ma tikinpaleuikan oksekimej (Xikita párrafo 6)

6. 1) ¿Tlen okichiuaya Jesús ika ichikaualis? 2) ¿Ken uelis tikchiuaskej ken Jesús?

6 Jesús amo keman omopaleui ika ichikaualis. Se neskayotl, ¿tlen okichi ijkuak Satanás okilui temej ma kinkuepa panes? Amo okinek kichiuas (Mateo 4:2-4). Jesús ika ichikaualis okinpaleuiaya oksekimej.  ¿Ken uelis ijkon tikchiuaskej? Jesús okijto: “Xitetlatliokolikah” (Lucas 6:38). ¿Uan ken uelis tikinpaleuiskej oksekimej? Uelis tikinyoleuaskej touan ma tlakuatij. Noijki ijkuak tlamis tonechikol uelis inmiuan timotlapouiskej, noso uelis tikkakiskej akin kipanoltis se tlamachtil. Noijki uelis tikinpaleuiskej akinmej yikin peuaj tetlapouiaj. Tikchiuaj ken Jesús ijkuak tikinpaleuiaj oksekimej uan tikinchiuiliaj tlen kuali.

“NOCHTEH OTLAKUAJKEH IWA KUALI OIJIXWIKEH”

7. ¿Tlen amo tlamis kanin tlanauatijtok Satanás?

7 Axkan uan yiuejkika itech Tlaltikpak miakej amo kipiaj tlen kikuaskej. Ik non, Jehová okinmilui israelitas itech Tlaltikpak nochipa yetoskiaj akinmej amo kipiaskiaj tlakuali (Deuteronomio 15:11). Uan miak xiuitl satepan Jesús okijto: “Próbesteh nochipa yetoskeh nomowah” (Mateo 26:11). ¿Kijtosneki itech Tlaltikpak nochipa yetoskej akinmej amo itlaj kipiaj? Amo. Ye okijto kanin tlanauatijtok Satanás nochipa yetoskej akinmej amo itlaj kipiaj. Pero itech Xochitlali ayakmo ijkon tlamochiuas. Ompa nochtin kipiaskej tlen kikuaskej uan nochtin kipiaskej tlen ika mopanoltiskej.

8, 9. 1) ¿Tleka Jesús okimiaktili pan uan michimej? 2) ¿Tlen tikmachilia pampa tlen okichi Jesús?

8 Salmista okijto itech Jehová: “Te tiktlapoa moma uan tikinmaka tlen kinekij nochtin tlen yoltokej” (Salmo 145:16). Jesús okichi ken iTajtsin uan okinmakak tlaltikpaktlakamej tlen okinekiayaj. Pero amo okichi san pampa kiteititis okipiaya miak chikaualistli. Jesús melauak omotekipachoaya itech tlaltikpaktlakamej. Ma tikitakan tlen kijtoa Mateo 14:14-21 (xiktlajtolti). Miakej tlaltikpaktlakamej tlen oualayaj itech miakej altepemej onejnenkej pampa kikakiskej Jesús (Mateo 14:13). Ijkuak yitlayoatoka imachtijkauan okitakej tlaltikpaktlakamej osotlauakej uan oapismikiayaj. Ik non, okiluijkej Jesús ma kinmilui ma yakan uan ma kikoakan tlen uelis kikuaskiaj. ¿Tlen okichi Jesús?

Jesús okijto moneki tikinpaleuiskej oksekimej

9 San ika makuili panes uan ome michimej Jesús okintlamakak sapanoa miakej tlaltikpaktlakamej. ¿Tleka ijkon okichi Jesús? Pampa ye kintlasojtla tlaltikpaktlakamej uan kineki kuali ma yetokan. Uan okinmakak miak tlakuali pampa Biblia kijtoa nochtin otlakuajkej uan kuali oixuikej. Tlakuali okinmakak chikaualistli pampa uelis oksepa mokuepaskiaj inkalijtik maski sapanoa uejka okatkaj (Lucas 9:10-17). Omoka miak tlakuali, ik non, okikololojkej kanaj 12 chikiuitl ika nochi tlen omoka.

10. ¿Tlen kichiuas toTajtsin Dios pampa akinmej amo itlaj kipiaj?

10 Axkan miakej tlaltikpaktlakamej  amo itlaj kipiaj, pampa tekiuajkej tlachtekij noso tlakajkayauaj. Uan noijki miakej tokniuan amo kipiaj miak tlakuali. Pero toTajtsin Dios kineki uan uelis kinmakas nochtin tlen moneki pampa kuali yoltoskej. Ye kijtoa nochtin kipiaskej tlakuali uan tlen ika mopanoltiskej (xiktlajtolti Apocalipsis 7:16).

11. 1) ¿Tleka tikneltokaj Jesús techpaleuis? 2) ¿Ken uelis tikinpaleuiskej tlaltikpaktlakamej?

11 Itech eyi xiuitl uan tlajko itech seki altepemej Jesús okichi miakej milagros (Mateo 15:24). Pero axkan ueyi Tekiua, uan ijkuak tlanauatis mil xiuitl kinpaleuis nochtin tlaltikpaktlakamej (Salmo 72:8). Ika milagros Jesús okiteititi kitekitiltis ichikaualis pampa kinpaleuis tlaltikpaktlakamej. Ik non, tikneltokaj ayakmo miak poliui pampa kichiuas. Ijkuak timokuayejyekoaj tlen kichiuas, tiknekij timochijchikauaskej pampa tikinpaleuiskej oksekimej (Salmo 45:1; 49:3). Tejuan amo uelis tikchiuaskej milagros. Pero kema uelis tikintlapouiskej oksekimej itech nochi tlamantli kuali tlen kijtoa Biblia. Uan non tlen moneki ma tikchiuakan (Romanos 1:14, 15).

Ika milagros Jesús okiteititi kitekitiltis ichikaualis pampa kinpaleuis tlaltikpaktlakamej

JEHOVÁ UAN JESÚS KIYEKANAJ NOCHI TLEN ONKA ITECH TLALTIKPAK

12. ¿Tleka Jesús kimati ken kiyekanas nochi tlen onka itech Tlaltikpak?

12 Biblia kijtoa Jesús okipaleui toTajtsin Dios “ken se kuali tekipanojki” ijkuak okichijchi Tlaltikpak (Proverbios 8:22, 30, 31; Colosenses 1:15-17). Ik non, Jesús kimati ken uelis kiyekanas nochi tlen onka itech Tlaltikpak, ken ejekatl uan ueyi atl.

¿Tlen mitstlajtlachialtia ijkuak timokuayejyekoa tleka Jesús okichi milagros? (Xikinmita párrafos 13 uan 14)

13, 14. Xikijto se neskayotl kanin mota Jesús kinauatia nochi tlen onka itech Tlaltikpak.

13 Ijkuak okatka itech Tlaltikpak, Jesús okiteititi uelis kiyekanas tlen onka itech Tlaltikpak. Se tonal ika ichikaualis toTajtsin Dios Jesús otlanauati ejekatl ma moketsa (xiktlajtolti Marcos 4:37-39). Se tlakatl tlen sapanoa momachtia Biblia kijtoa nin ejekatl okatka chikauak pampa okiauia, sapanoa oejekaya uan sapanoa otlatekuiniaya. Se chikauak ejekakiauitl tlen kipojpoloa nochi. Tlatitlanil Mateo noijki otlajkuilo itech nin chikauak ejekakiauitl (Mateo 8:24).

14 Ximokuayejyeko tlen opanok. Atl okiuitekiaya barca uan okalakiaya. Ejekakiauitl chikauak omokakiaya uan barca san omoliniaya. Pero Jesús okochtoka pampa sapanoa osotlauak. Itlatitlaniluan omomojtijkej. Ik non, okixitijkej uan okiluijkej mikiskiaj (Mateo 8:25). ¿Tlen okichi Jesús? Omejki uan okijto: “¡Ximoyekmana!” (Marcos 4:39). “Iwa n ejekatl omóketski iwa nochi san owaltlamoka.” Jesús kinauatia nochi tlen onka itech Tlaltikpak.

15. ¿Tleka tikijtoaj Jehová kinauatia nochi tlen onka itech Tlaltikpak?

 15 Jehová okimakak chikaualistli Jesús pampa uelis kinauatis nochi tlen onka itech Tlaltikpak. Ik non, tikneltokaj Jehová noijki uelis kinauatis nochi tlen onka itech Tlaltikpak. Se neskayotl, chikome tonal achto mochiuaskia ueyi apachiuilistli Jehová okijto 40 tonalmej uan 40 yoak chikauak kiauiskia (Génesis 7:4). Uan noijki itech Éxodo 14:21 kijtoa Jehová okitekitilti chikauak ejekatl uan ijkon okitlajkoxelo mar rojo. Uan itech Jonás 1:4 kijtoa: “Jehová okichi ma uala se ueyi ejekatl itech atl”. Techyolseuia tikmatiskej itech Xochitlali toTajtsin Dios kinauatis nochi tlen onka itech Tlaltikpak.

16. ¿Tleka techyolseuia tikmatiskej Jehová uan Jesús kinauatiaj nochi tlen onka itech Tlaltikpak?

16 ¿Tleka techyolseuia tikmatiskej Jehová uan Jesús kinauatiaj nochi tlen onka itech Tlaltikpak? Pampa ijkuak Jesús tlanauatis mil xiuitl tikmatij huracanes, tsunamis, volcanes uan tlalolinilistli ayakmo techtlajyouiltiskej. Uan ken Jehová kinpaleuis nochtin  tlaltikpaktlakamej, amo techmomojtis nochi tlen axkan panoa itech Tlaltikpak (Apocalipsis 21:3, 4). Tikneltokaj Jesús kitekitiltis chikaualistli tlen toTajtsin Dios okimakak uan ijkon kinauatis nochi tlen onka itech Tlaltikpak.

MA TIKCHIUAKAN KEN TOTAJTSIN DIOS UAN CRISTO

17. ¿Ken uelis tikchiuaskej ken Jehová uan Jesús?

17 ¿Ken uelis tikchiuaskej ken toTajtsin Dios uan Cristo? Amo uelis tikinchiuaskej milagros ken Jehová uan Jesús, pero kema uelis tikchiuaskej tlen kijtoa Proverbios 3:27 (xiktlajtolti). Ijkuak tokniuan tlajyouiaj uelis tikinmakaskej tlen kinekij uan uelis tikinyolseuiskej (Proverbios 17:17). Uan nin uelis tikchiuaskej ijkuak mochiua se tlaxixinilistli. Se neskayotl, satepan ijkuak opanok se chikauak ejekakiauitl (huracan) se tokni iknosiuatl okipolo ikalijtik. Ijkuak tokniuan okipaleuijkej, tokni okijto melauak otetlasojkamatiliaya pampa ye iTlaixpantijka Jehová, amo san pampa tlamantli tlen okimakakej, noijki pampa espiritualmente okiyolchikajkej. Noijki ijkon okipanok se tokni tlen iselti. Sapanoa omotekipachoaya pampa se ejekatl okixixini ikalijtik. Pero tokniuan okipaleuijkej uan okiyektlalijkej ikalijtik. Ye amo okimatiaya ken kintlasojkamatilis. Uan ijkuakon okijto: “Tlasojkamati Jehová”. Tinochtin tikintlasojkamatiliaj tokniuan pampa techpaleuiaj. Pero okachi tiktlasojkamatiliaj Jehová uan Jesús pampa techmaluiaj.

18. ¿Tlen mitstlajtlachialtia ijkuak timokuayejyekoa tleka Jesús okichi milagros?

18 Ijkuak Jesús okatka itech Tlaltikpak okiteititi “ye ichikawalis [...] Dios”. Pero amo keman okichi milagros pampa oksekimej ma kitakan noso pampa mopaleuis. Ye okichi pampa okintlasojtlaya tlaltikpaktlakamej uan okinekiaya kinpaleuis. Chikome timomachtiskej itech nochi nin tlamantli.