Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2015

Uelis tiktlaniliskej Satanás

Uelis tiktlaniliskej Satanás

“Amo xikmokawilikah manomechtlani n amokualitlakatl, yej nochipa xikneltokakah Dios.” (1 PEDRO 5:9)

1. 1) ¿Tleka miak ipati axkan ma timochijchikauakan pampa amo ma techtlanili Satanás? 2) ¿Tleka tikijtoaj uelis tiktlaniliskej Satanás?

AXKAN Satanás kintlajyouiltia nochtin itekipanojkauan Jehová. Kintlajyouiltia tlapejpenalmej tlen ok katej itech Tlaltikpak uan noijki kintlajyouiltia akinmej mokauaskej itech Tlaltikpak (Juan 10:16). Ken kimati ayakmo kipoloa miak kauitl, Satanás kineki miakej itekipanojkauan Jehová ayakmo ma tlaneltokakan itech toTajtsin Dios (xiktlajtolti Apocalipsis 12:9, 12). Ik non, miak ipati ma timochijchikauakan pampa amo ma techtlanili Satanás. Pero ¿uelis tiktlaniliskej? Kema, pampa Biblia kijtoa: “Ximochijchikawakah para amo manomechtlani n amokualitlakatl, iwa ye nomechcholilis” (Santiago 4:7).

2, 3. 1) ¿Tleka Satanás kineki tlaltikpaktlakamej ma kineltokakan amo melauak onka? 2) ¿Tleka tikneltokaj Satanás melauak onka?

2 Miakej tlaltikpaktlakamej kijtoaj amo onka Satanás. Yejuan kineltokaj Satanás uan amo kuali ejekamej san motaj itech amochmej, películas noso videojuegos. Uan kijtoaj san akinmej amo kuali mokuayejyekoaj kineltokaj melauak onka amo kuali ejekamej. Uan Satanás kineki nochtin  tlaltikpaktlakamej ma kineltokakan amo melauak onka. ¿Tleka? Pampa ijkon okachi amo oui ma kinkajkayaua (2 Corintios 4:4). Ik non, Satanás mochijchikaua pampa mojmostla okachi miakej tlaltikpaktlakamej ijkon ma kineltokakan.

3 Pero tiiTlaixpantijkauan Jehová tikneltokaj Satanás melauak onka. ¿Tleka? Pampa Biblia techiluia Satanás okitekitilti se koatl uan ijkon omotlapoui iuan Eva (Génesis 3:1-5). Noijki omotlapoui iuan Jehová ijkuak okijto Job san okitekichiuiliaya Jehová pampa ma kiteochiua (Job 1:9-12). Uan noijki omotlapoui iuan Jesús ijkuak okinekiaya ma tlajtlakolchiua (Mateo 4:1-10). Uan ijkuak Jesús okitlalijkej ken ueyi Tekiua itech xiuitl 1914, Satanás opejki kintlajyouiltia tlapejpenalmej tlen ok katej itech Tlaltikpak (Apocalipsis 12:17). Uan axkan Satanás noijki techtlajyouiltia nochtin akinmej tiktekichiuiliaj toTajtsin Dios. San uelis tiktlaniliskej tla timochijchikauaj uan titlaneltokaj itech Jehová. Axkan timomachtiskej eyi tlamantli tlen uelis tikchiuaskej pampa amo ma techtlanili Satanás.

AMO MA TIMOUEYINEKIKAN

4. ¿Tleka tikijtoaj Satanás ye akin okachi moueyineki?

4 Satanás ye akin okachi moueyineki. ¿Tleka ijkon tikijtoaj? Pampa okijto Jehová amo kinamiki tlanauatis. Uan noijki okinekiaya tlaltikpaktlakamej ma kiueyichiuakan ye uan amo Jehová. Satanás sapanoa moueyineki. Ik non, tla tiknekij tiktlaniliskej moneki amo ma timoueyinekikan (xiktlajtolti 1 Pedro 5:5). Pero ¿tlen kijtosneki ueyinekilistli? ¿Nochipa amo kuali?

5, 6. 1) Xikijto tleka uelis yetos kuali timoueyinekis. 2) ¿Tlen uelis panos tla timoueyinekij? 3) Xikijto ineskayo sekimej tlaltikpaktlakamej tlen omoueyinekej.

5 Ueyinekilistli amo nochipa amo kuali. Se neskayotl, amo se tlajtlakoli timoueyinekiskej pampa itlaj kuali tlen okichijkej oksekimej. Uan noijki se tonal ijkon omomachili tlatitlanil Pablo. Okijto omoueyinekiaya pampa tokniuan itech Tesalónica okipiayaj chikauak intlaneltokilis maski sapanoa otlajyouiayaj (2 Tesalonicenses 1:4). Noijki kuali amo ma tipinauakan pampa itlaj kuali tlen tikpiaj noso itlaj tlen otikchijkej. Se neskayotl, uelis timoueyinekiskej pampa tokalchanejkauan, kanin tiuitsej noso kanin otineskej (Hechos 21:39).

6 Pero tla timoueyinekij uelis tikchiuaskej sekimej ayakmo kuali ma mouikakan, uan noijki ayakmo timouikaskej iuan Jehová. Ueyinekilistli uelis kichiuas amo ma tikselikan ijkuak oksekimej technojnotsaj noso ma tikualanikan (Salmo 141:5). Akinmej moueyinekij kineltokaj yejuan okachi inpati noso okachi yolkualmej, amo ken oksekimej. Jehová kinkokolia akinmej moueyinekij (Ezequiel 33:28; Amós 6:8). Pero Satanás kineki nochtin tlaltikpaktlakamej noijki ma moueyinekikan. Melauak oyolpakik ijkuak Nemrod, ueyi tekiua itech Egipto uan Absalón omoueyinekej (Génesis 10:8, 9; Éxodo 5:1, 2; 2 Samuel 15:4-6). Caín noijki omoueyineki. Se tonal Jehová okilui ma kipatla inemilis. Pero amo otetlakamatki uan otlajtlakolchi iixpan Jehová. Ik non, ayakmo omouikak iuan Jehová (Génesis 4:6-8).

7, 8. 1) ¿Ken mota akinmej kinchikoitaj oksekimej? 2) ¿Tleka miakej tlaltikpaktlakamej ijkon kichiuaj? 3) ¿Tleka amo kuali ma timoueyinekikan itech tlanechikol?

7 Ueyinekilistli uelis kichiuas tlaltikpaktlakamej  ma motlajyouiltikan. Miakej tlaltikpaktlakamej kinchikoitaj san pampa tlatlamantli inaltepe. Yejuan kineltokaj okachi inpati amo ken oksekimej tlaltikpaktlakamej. ¿Tleka miakej tlaltikpaktlakamej ijkon mokuayejyekoaj? Pampa moueyinekij uan kineltokaj okachi inpati. Nin kichiua miakej ma momiktikan uan ma mochiuakan miakej guerras.

Itech tlanechikol amo yetos yolseuilistli tla ikaj moueyineki

8 Pero itech tlanechikol amo uelis motas nin tlamantli. Pero tla ikaj moueyineki nin uelis kichiuas ma mokualanikan. Ijkon okinpanok sekimej tokniuan itech achto siglo. Ik non, tlatitlanil Santiago okintlajtlani: “¿Kani walewa n tlájtoli non ika pewa nonmokuakualaniah?” (Santiago 4:1). Tla tikinchikoitaj oksekimej noso tikneltokaj okachi topati, nin uelis kichiuas ma tikinmiluikan itlaj amo kuali noso noijki ma tikintlajyouiltikan (Proverbios 12:18). Ueyinekilistli uelis kichiuas amo ma yeto yolseuilistli itech tlanechikol.

9. ¿Ken techpaleuia Biblia pampa amo ma timoueyinekikan uan amo ma tikneltokakan okachi topati? (Xikita tlaixkopinal tlen ika peua tlamachtil.)

9 Biblia techpaleuia amo ma timoueyinekikan nion ma tikneltokakan okachi topati. Se neskayotl, itech Proverbios 16:5 Jehová techiluia kinkokolia nochtin akinmej moueyinekij. Uan itech Hechos 17:26 techiluia: “San itech se, Dios okinchijchi nochteh n tlakah”. Ik non, uelis tikijtoskej amo ikaj okachi ipati, pampa tinochtin tiuitsej itech Adán. Amo ipati tikijtoskej toTajtsin Dios sekimej okachi kuali okinchijchi. Ik non, ma timotlajtlanikan: “¿Nikneltoka okachi nopati pampa san onineski itech se altepetl?”. Tla ijkon timokuayejyekoaj uelis tikkauilijtokej Satanás ma kijtlako tlanechikol uan ayakmo ma titetlasojtlakan (Juan 13:35). Pero tla tiknekij tiktlaniliskej Satanás moneki ma timochijchikauakan uan amo ma timoueyinekikan (Proverbios 16:18).

AMO MA TIKTLASOJTLAKAN TOMIN NION TLEN ONKA ITECH TLALTIKPAK

10, 11. 1) ¿Tlen kichiua Satanás pampa ma tiktlasojtlakan tlen onka itech Tlaltikpak? 2) ¿Tlen okipanok Demas pampa okitlasojtlak tlen onka itech Tlaltikpak?

10 Satanás tlayekantok itech Tlaltikpak (Juan 12:31; 1 Juan 5:19). Miak tlamantli tlen onka itech Tlaltikpak amo kuali. Uan melauak, amo nochi amo kuali. Pero Satanás kitekitiltia nochi tlen onka itech Tlaltikpak pampa ma tikchiuakan tlen tiknekij uan amo ma tiktlakamatikan toTajtsin Dios. Mochijchikauas pampa ma tiktlasojtlakan tlen onka itech Tlaltikpak uan amo ma tiktlakamatikan Jehová (xiktlajtolti 1 Juan 2:15, 16).

11 Nin tlen okinpanok sekimej tokniuan itech achto siglo. Se neskayotl, okatka se tlakatl tlen omotokayotiaya Demas tlen okipaleuiaya tlatitlanil Pablo. Pero Pablo okijto: “Demas, yonechkakajte, ye okachi okiyoltilanki tlan onka itech nin tlaltíkpaktli” (2 Timoteo 4:10). ¿Tlen tlamantli okitlasojtlaya Demas?  Biblia amo techiluia. Uelis okachi okitlasojtlaya tomin uan amo kitekichiuilis Jehová. Ik non, Demas ayakmo okiseli tlateochiualismej pampa ayakmo okitekichiuiliaya Jehová. ¿Ipati tlen okichi? Amo. Itech Tlaltikpak amo kajsiskia tlen Jehová kimakaskia (Proverbios 10:22).

Amo keman ma tikneltokakan okachi ipati ma tikpiakan tomin, uan amo ipati ma timouikakan iuan Jehová

12. ¿Ken kineki techkajkayauas Satanás ika tlen tiknekij?

12 Ken titlaneltokaj itech Cristo tiknekij tikpiaskej tomin pampa tikinmaluiskej tokalchanejkauan (1 Timoteo 5:8). Uan noijki tikmatij Jehová kineki ma tiyolpakikan. Ijkon tikijtoaj pampa Adán uan Eva okintlali itech se kualtsin xochitlali (Génesis 2:9). Pero Satanás noijki uelis techkajkayauas ken okikajkaya Demas, uan uelis kichiuas ma tikchiuakan tlen tiknekij. ¿Ken uelis kichiuas? Uelis kichiuas “n tomi [ma] pewa [tech]kajkayawa” (Mateo 13:22). Ye kineki ma tikneltokakan tla tikpiaj miak tomin uan tikkoaj miak tlamantli uelis tiyolpakiskej. Pero tla peua ijkon tikneltokaj uelis tikpoloskej tlen okachi ipati, ayakmo timouikaskej iuan Jehová. Jesús otechilui: “Amaka tlakatl weletis kintekitilis ome inteko, porke se kitlawelitas iwa non ok se kitlasojtlas, noso se kitlakitas iwa non ok se mach kitlakitas. Amaka weletis kimopantis Dios tla satlawel momijmiktia para kitlawelpias tomi” (Mateo 6:24). Timochiuaskej itlakeualuan tomin tla okachi tikpatioitaj tikpiaskej tomin. Ijkon amo uelis tiktekichiuiliskej Jehová. Uan non tlen kineki Satanás ma techpano. Tla tiknekij tiktlaniliskej Satanás, amo keman ma timokuayejyekokan okachi ipati ma tikpiakan tomin noso ma tikkoakan okseki tlamantli, okachi ipati ma timouikakan iuan Jehová (xiktlajtolti 1 Timoteo 6:6-10).

MA TIKIXTOPEUAKAN AUILNEMILISTLI

13. ¿Tlen mokuayejyekoaj miakej tlaltikpaktlakamej itech namiktilistli?

13 Satanás noijki techkajkayaua ika auilnemilistli. Axkan miakej tlaltikpaktlakamej kineltokaj ayakmo ipati ma timonamiktikan, noijki amo ipati amo ma tikkajkayauakan tonamik, pampa kijtoaj nochi nin kichiua ayakmo ma tiyolpakikan. Se neskayotl, se siuatl tlen kinchijchiua películas okijto axkan nochtin kikajkayauaj inamik, uan noijki amo keman okixmatki ikaj tlen amo kineki kikajkayauas inamik. Uan okse tlakatl tlen noijki kinchijchiua películas okijto ye kineltoka amo otechchijchijkej pampa ma tiyetokan iuan san se tonamik. Satanás melauak yolpaki ijkuak tlaltikpaktlakamej tlen sapanoa kinmixmatij kijtoaj amo ipati namiktilistli, se tlamantli tlen toTajtsin Dios otechmakak. Satanás kineki akinmej yomonamiktijkej ma mokajkayauakan. Tla tiknekij tiktlaniliskej moneki timokuayejyekoskej ken Jehová.

14, 15. Tla tejuatsin tikneki tiauilnemis, ¿tlen uelis tikchiuas?

14 Akinmej inselti uan akinmej yomonamiktijkej moneki ma mochijchikauakan  pampa amo ma auilnemikan. Pero nin sapanoa oui. Se neskayotl, kanin momachtiaj telpokamej kikakij ken oksekimej telpokamej kijtoaj motekaj san iuan akin kinekij. Noijki kikakij miakej kijtoaj kintitlaniliaj oksekimej tlaixkopinalmej uan tlajtolmej tlen ika auilnemij. Itech seki uejueyij altepemej kijtoaj tla ikaj kititlani tlajtolmej noso tlaixkopinalmej kanin tlajtoaj itech auilnemilistli se tlamantli amo kuali (pornografía infantil). Uan noijki Biblia kijtoa akin auilnemi “tlajtlakolchiwa iwa inewia kijtlakoa ikuerpo” (1 Corintios 6:18). Miakej tlaltikpaktlakamej tlajyouiaj uan mikij pampa mokokoaj pampa auilnemij. Uan miakej telpokamej tlen auilnemij satepan moyolkokoaj. Miakej amochmej, películas uan tlakuikalmej kichiuaj ma tikneltokakan amo itlaj techpanos tla amo tikintlakamatij itlanauatiluan toTajtsin Dios. Pero nin tlamantli amo melauak. Tla amo timomaluiaj uelis titlajtlakolchiuaskej (Hebreos 3:13).

15 Tla tejuatsin peua tikneki tiauilnemis, ¿tlen uelis tikchiuas? Achto moneki tikyekmatis tikneki titlajtlakolchiuas (Romanos 7:22, 23). Xiktlatlaujti Jehová ma mitsmaka chikaualistli (Filipenses 4:6, 7, 13). Xikixtopeua nochi tlamantli tlen uelis kichiuas xitlajtlakolchiua (Proverbios 22:3). Uan ijkuak tiknekis titlajtlakolchiuas, san niman xikixtopeua (Génesis 39:12).

16. 1) ¿Tlen okichi Jesús ijkuak Satanás okinekiaya ma tlajtlakolchiua? 2) ¿Tlen techmachtia ineskayo Jesús?

 16 ¿Tlen okichi Jesús ijkuak Satanás okinekiaya ma tlajtlakolchiua? Satanás amo ueli okikajkaya ika nochi tlen okilui kimakaskia. Jesús nion omokuayejyeko itech tlen Satanás kimakaskia. Jesús san niman okilui Satanás: “Itlajkuilol Dios kijtoa” (xiktlajtolti Mateo 4:4-10). ¿Tlen techmachtia ineskayo Jesús? Ye kuali okimatiaya tlen okijtoaya iTlajtol toTajtsin Dios. Ik non, ijkuak Satanás okinekiaya ma tlajtlakolchiua, Jesús san niman okilnamik tlen okijto toTajtsin Dios. Tla tiknekij tiktlaniliskej Satanás moneki timochijchikauaskej pampa amo ma tiauilnemikan (1 Corintios 6:9, 10).

AMO MA TIMOSOTLAUAKAN

17, 18. 1) ¿Ika tlen okseki tlamantli techkajkayaua Satanás? 2) ¿Tleka amo techtlajtlachialtia tlen kitekitiltia Satanás? 3) ¿Tlen kipanos Satanás? 4) ¿Tleka techyolchikaua tikmatiskej tlen kipanos Satanás?

17 Axkan otimomachtijkej ken Satanás techkajkayaua ika: ueyinekilistli, ijkuak tiktlasojtlaj tomin uan auilnemilistli. Pero Satanás kitekitiltia miak tlamantli pampa techkajkayauas. Se neskayotl, sekimej tokniuan inkalchanejkauan amo kinkauiliaj ma kitekichiuilikan Jehová. Oksekimej kanin momachtiaj kinpinatiaj. Uan oksekimej tokniuan amo uelij tetlapouiaj pampa tekiuajkej amo kinkauiliaj. Pero nin tlamantli nochtin tikmatij techpanos, pampa Jesús okijto ijkon techpanoskia. Ye okijto: “Nochteh nomechkokoliskeh por nonkitematiltiah Notoka, pero akin kixikos nochi, Dios kimakixtis” (Mateo 10:22).

Kixpoloskej Satanás (Xikita párrafo 18)

18 ¿Ken uelis tiktlaniliskej Satanás? Jesús okijto: “Tla nochi nonkixikoskeh, nonmomakixtiskeh” (Lucas 21:19). Nion se tlaltikpaktlakatl uelis kichiuas nochipa ma titlajyouikan. Tla amo tikkauaj Jehová, amo ikaj uelis kichiuas ayakmo iuan ma timouikakan (Romanos 8:38, 39). Uan tla timikij, Satanás amo techtlanilis pampa tla amo otikajkej Jehová ye oksepa techyolitis (Juan 5:28, 29). Pero ¿tlen kipanos Satanás? Ijkuak toTajtsin Dios kitlajtlamis nochi tlen amo kuali, Jesús kitsakuas Satanás itech mil xiuitl pampa ayakmo ma techtlajyouilti (Apocalipsis 20:1-3). Satepan oksepa kikajkauaskej Satanás uan mochijchikauas pampa techkajkayauas. Uan satepan kixpoloskej (Apocalipsis 20:7-10). Satanás amo itlaj kuali kichia. ¡Pero tejuatsin kema! Ik non, ximochijchikaua, xiktlanili Diablo uan xikchikaua motlaneltokilis. ¡Tejuatsin uelis tiktlanilis Satanás!